យុទ្ធសាស្រ្តរបស់លោកបៃដិននៅតែផ្តោតលើអាស៊ី ទោះជាមានសង្រ្គាមអ៊ុយក្រែន
ចុះផ្សាយនៅថ្ងៃ៖
ស្តាប់ - ០៤:២៤
សង្រ្គាមនៅអ៊ុយក្រែន គឺជាបញ្ហាប្រឈមដ៏ធំបំផុតមួយ នៅក្នុងភូមិសាស្រ្តនយោបាយពិភពលោក នៅក្នុងពេលបច្ចុប្បន្ន។ ក៏ប៉ុន្តែ បើទោះជាសង្រ្គាមអ៊ុយក្រែននេះ អាចជាបញ្ហាប្រឈមនៅក្នុងរយៈពេលខ្លី ប៉ុន្តែ អាទិភាពនៃនយោបាយការបរទេសរយៈពេលវែងនៃរដ្ឋាភិបាលរបស់លោកបៃដិន គឺនៅតែចង់ផ្តោតលើតំបន់អាស៊ី។
យើងដឹងថា នៅពេលដែលលោកអូបាម៉ា ដាក់ចេញនូវយុទ្ធសាស្រ្តមកផ្តោតអាទិភាពលើតំបន់អាស៊ី ដែលគេហៅជាភាសាអង់គ្លេសថា « Pivot to Asia » លោកចូ បៃដិន កាន់តំណែងជាអនុប្រធានាធិបតី។ នៅក្រោយពេលបានជាប់ឆ្នោតជាប្រធានាធិបតី លោកបៃដិន ក៏បានបញ្ជាក់ផងដែរថា យុទ្ធសាស្រ្តរបស់លោក គឺនៅតែបន្តផ្តោតអាទិភាពទៅលើតំបន់អាស៊ីនេះដដែល ហើយថា ចិន គឺជាគូប្រជែងដ៏ចម្បងបំផុត ដែលគួរតែជាចំណុចផ្តោតដ៏ធំបំផុតមួយ នៃនយោបាយការបរទេសអាមេរិក។
ក៏ប៉ុន្តែ ជាងមួយឆ្នាំក្រោយពីលោកចូ បៃដិនឡើងកាន់តំណែង ស្រាប់តែសង្រ្គាមអ៊ុយក្រែនត្រូវផ្ទុះឡើង ហើយអាមេរិកក៏ត្រូវងាកមកប្រឈមនឹងគូប្រជែងចាស់របស់ខ្លួនវិញ គឺរុស្ស៊ី។
យើងឃើញថា ចាប់តាំងពីរុស្ស៊ីចូលឈ្លានពានអ៊ុយក្រែន កាលពីថ្ងៃទី២៤កុម្ភៈ រដ្ឋាភិបាលអាមេរិកត្រូវជាប់វក់វីជាមួយតែនឹងវិបត្តិអ៊ុយក្រែន, កញ្ចប់ថវិការាប់ពាន់លានដុល្លារត្រូវបានចំណាយ ឬគ្រោងចំណាយ ដើម្បីបញ្ជូនជំនួយសព្វាវុធទៅឲ្យអ៊ុយក្រែន, ត្រូវចំណាយពេលភាគច្រើនទៅលើការសម្របសម្រួលជាមួយបណ្តាប្រទេសសម្ព័ន្ធមិត្តនៅអឺរ៉ុប ដើម្បីដាក់ទណ្ឌកម្មលើរុស្ស៊ី ហើយលោកចូបៃដិនបានចំណាយពេលជាច្រើនថ្ងៃ នៅក្នុងតំបន់អឺរ៉ុប ដើម្បីជួបជាមួយប្រទេសសម្ព័ន្ធមិត្ត ទាំងនៅក្នុងបក្សសម្ព័ន្ធអូតង់ សហភាពអឺរ៉ុប ក្រុមប្រទេស G7 ក៏ដូចជាធ្វើដំណើរទៅដល់ប្រទេសប៉ូឡូញ ជាប់ព្រំដែនជាមួយអ៊ុយក្រែន ក្នុងពេលដែលតំបន់អាស៊ីឯណោះវិញ លោកចូ បៃដិន នៅមិនទាន់បានឈានជើងជាន់បានម្តងនៅឡើយ ចាប់តាំងពីឡើងកាន់តំណែងជាប្រធានាធិបតី កាលពីជាងមួយឆ្នាំមុន។
ក៏ប៉ុន្តែ ជាងពីរខែក្រោយពីចំណាយពេលច្រើនតែទៅលើវិបត្តិអ៊ុយក្រែន លោកបៃដិនកំពុងតែចាប់ផ្តើមបង្វែអាទិភាពមកតំបន់អាស៊ីវិញ ដោយជំនួបកំពូលអាមេរិក-អាស៊ាន ដែលបានលើកពេល កាលពីចុងខែមីនាកន្លងទៅ នឹងត្រូវចាប់បើកធ្វើឡើងវិញ នៅក្នុងរដ្ឋធានីវ៉ាស៊ីងតោន នៅថ្ងៃ១២-១៣ឧសភានេះ ហើយមួយសប្តាហ៍ក្រោយមកទៀត លោកបៃដិននឹងធ្វើដំណើរទៅបំពេញទស្សនកិច្ចនៅអាស៊ីជាលើកទីមួយ ដោយនឹងត្រូវធ្វើដំណើរទៅកាន់ប្រទេសជប៉ុន និងកូរ៉េខាងត្បូង ពីថ្ងៃទី២០ ដល់ថ្ងៃទី២៤ឧសភាខាងមុខ ដោយនៅក្នុងអំឡុងពេលស្ថិតនៅក្នុងទីក្រុងតូក្យូ លោកប្រធានាធិបតីអាមេរិកត្រូវបើកធ្វើជំនួបកំពូលមួយផងដែរ ជាមួយប្រមុខដឹកនាំ ជប៉ុន អូស្ត្រាលី និងឥណ្ឌា នៅក្នុងបក្សសម្ព័ន្ធចតុភាគី ដែលគេតែងតែហៅថា « Quad » ហើយដែលគេស្គាល់ជាទូទៅថាជាបក្សសម្ព័ន្ធដ៏សំខាន់មួយ ដែលមានគោលដៅទប់ទល់នឹងឥទ្ធិពលរបស់ចិន។
យោងតាមមន្ត្រីរដ្ឋាភិបាលអាមេរិក ទាំងនៅក្នុងអំឡុងជំនួបកំពូលអាមេរិក-អាស៊ាន និងទាំងក្នុងអំឡុងដំណើរទស្សនកិច្ចរបស់លោកចូ បៃដិន ទៅអាស៊ី ថ្វីដ្បិតតែសង្រ្គាមអ៊ុយក្រែនជាសំណុំរឿងសំខាន់មួយ ក៏ប៉ុន្តែ លោកចូ បៃដិន ក៏នឹងផ្តោតផងដែរទៅលើវិបត្តិកូវីដ និងបញ្ហាសន្តិសុខនៅក្នុងតំបន់អាស៊ី រួមមានទាំងវិបត្តិកូរ៉េខាងជើង ក៏ដូចជា បញ្ហាជុំវិញជម្លោះនៅសមុទ្រចិនខាងត្បូង។
ការណ៍ដែលលោកបៃដិនងាកមកផ្តោតលើតំបន់អាស៊ីវិញ នៅពេលនេះ ប្រហែលជាក្នុងចេតនាចង់ធានាដល់ប្រទេសសម្ព័ន្ធមិត្តអាស៊ីថា វិបត្តិអ៊ុយក្រែននៅពេលនេះ គ្រាន់តែជាបញ្ហាប្រឈមរយៈពេលខ្លីតែប៉ុណ្ណោះ រីឯចក្ខុវិស័យយុទ្ធសាស្រ្តរយៈពេលវែងវិញ អាទិភាពនៃគោលនយោបាយការបរទេសអាមេរិកគឺនៅដដែល គឺអាទិភាពទៅលើយុទ្ធសាស្រ្តឥណ្ឌូប៉ាស៊ីហ្វិក ដែលជាយុទ្ធសាស្រ្តគន្លឹះ ដើម្បីប្រជែងជាមួយនឹងចិន ដែលអាមេរិកនៅតែចាត់ទុកថាជាគូប្រជែងធំបំផុតទាំងនៅក្នុងពេលបច្ចុប្បន្ន និងទៅថ្ងៃអនាគត។
ការមិនចង់ឲ្យសង្រ្គាមអ៊ុយក្រែនបង្កឲ្យមានផលប៉ះពាល់ដល់ចក្ខុវិស័យយុទ្ធសាស្រ្តរយៈពេលវែងនៅអាស៊ីនេះ ក៏ត្រូវបានឆ្លុះបញ្ចាំងឲ្យឃើញផងដែរ តាមរយៈជំហរប្រយ័ត្នប្រយែងរបស់អាមេរិកចំពោះឥណ្ឌា។ ឥណ្ឌា ដែលបដិសេធមិនព្រមថ្កោលទោសរុស្ស៊ីក្នុងសង្រ្គាមអ៊ុយក្រែន ហើយថែមទាំងបន្ថែមការទិញប្រេងពីរុស្ស៊ីថែមទៅទៀត ក៏ប៉ុន្តែ អាមេរិកនៅតែព្យាយាមចៀសវាងមិនរិះគន់ធ្ងន់ៗលើឥណ្ឌា ដោយសារតែឥណ្ឌា គឺជាតួអង្គដ៏សំខាន់មួយ នៅក្នុងយុទ្ធសាស្រ្តរបស់អាមេរិក ដើម្បីប្រជែងជាមួយចិននៅអាស៊ី។
មែនទែនទៅ សូម្បីតែចំណាត់ការរបស់អាមេរិកចំពោះរុស្ស៊ី នៅក្នុងសង្រ្គាមអ៊ុយក្រែន ក៏ទំនងជាធ្វើឡើង ដោយមានបង្កប់សារសំដៅទៅកាន់ចិនផងដែរ ដោយសម្រាប់អាមេរិក បរាជ័យរបស់រុស្ស៊ីនៅអ៊ុយក្រែន និងផលវិបាកធ្ងន់ធ្ងរដែលធ្លាក់លើរុស្ស៊ី កើតចេញពីការឈ្លានពានប្រទេសអ៊ុយក្រែននៅពេលនេះ អាចជាមេរៀនមួយ ដើម្បីឲ្យចិនយកទៅពិចារណា ក្នុងករណីចិនចង់ឈ្លានពានតៃវ៉ាន់ ឬធ្វើសកម្មភាពឈ្លានពានណាមួយផ្សេងទៀត នៅក្នុងតំបន់អាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ