តើវាសនាអនាគតលីបង់ នឹងប្រសើរឡើងឬទេ ជាមួយសមាសភាពសភាអាណត្តិថ្មី?
ចុះផ្សាយនៅថ្ងៃ៖
ស្តាប់ - ០៥:០១
ប្រជាជនលីបង់ប្រមាណជា៤១% បានចូលរួមបោះឆ្នោត ជ្រើសរើសសភាអាណត្តិថ្មី កាលពីថ្ងៃទី១៥ឧសភា។ យោងតាមលទ្ធផលផ្លូវការ ផ្សាយនៅអង្គារទី១៧ឧសភាម្សិលមិញ ក្រុមហេសបូឡា និងបក្សពួកនយោបាយ ដែលធ្លាប់មានសំឡេងភាគច្រើនក្នុងសភា ពេលនេះបានបាត់បង់សំឡេងភាគច្រើនហើយ។ ទន្ទឹមគ្នានេះ បេក្ខជនឯករាជ្យដែលកើតចេញ ពីចលនាបះបោររបស់ប្រជាជនលីបង់ កាលពីចុងឆ្នាំ២០១៩ បានឈានចូលទៅកាន់កាប់អាសនៈសភាចំនួន១៣អាសនៈ។ តើជាមួយនឹងសមាសភាពសភាអាណត្តិថ្មីនេះ លីបង់អាចនឹងដោះស្រាយវិបត្តិនយោបាយ និងស្តារសេដ្ឋកិច្ចប្រទេសដែលធ្លាក់ដុនដាបបំផុតនេះ ឲ្យល្អប្រសើរវិញដែរឬទេ?
លទ្ធផលបោះឆ្នោតជាផ្លូវការ ប្រកាសដោយរដ្ឋមន្ត្រីមហាផ្ទៃលីបង់ បានបង្ហាញថា ក្រុមហេបូឡា គាំទ្រដោយថវិកានិងអាវុធរបស់អ៊ីរ៉ង់ រួមជាមួយគណបក្សសម្ព័ន្ធភាព បានទទួលអាសនៈ មិនគ្រប់ចំនួន៦៥ ដែលជាសំលេងភាគច្រើនក្នុងចំណោម ១២៨អាសន្ននៅក្នុងសភាលីបង់ទេ។ កាលពីអាណត្តិមុន បក្សសម្ព័ន្ធនេះ មានអាសនៈសភាចំនួន៧០។
រីឯគណបក្ស “កម្លាំងលីបង់” ដែលជាបក្សសាសនាគ្រិស្ត ហើយដែលប្រឆាំងខ្លាំងបំផុតនឹងក្រុមហេសបូឡានោះ បានកើនអាសនៈ ចំនួន៤ បើប្រៀបធៀបទៅអាណត្តិមុន ពោលគឺសំឡេងចំនួន ១៩អាសនៈ នៅក្នុងសភាថ្មី។ បក្ស កម្លាំងលីបង់ បានក្លាយជាបក្សសាសនាគ្រិស្តដ៏ធំជាងគេ ក្នុងសភាថ្មី។
អ្វីដែលជាការកត់សំគាល់មួយទៀតនោះ គឺបេក្ខជនឯករាជ្យចំនួន១៣នាក់ បានឈានជើងចូលទៅក្នុងសភា ដែលបេក្ខភាពពួកគេ សុទ្ធតែបានកើតចេញពីចលនាបះបោររបស់ប្រជាជន កាលពីខែតុលា ឆ្នាំ២០១៩ ដើម្បីបណ្តេញពួកអ្នកនយោបាយចាស់ឆ្នាំ ដែលពុករលួយបក្សពួកនិយម ឲ្យចុះពីអំណាច។ ជាងនេះទៀត បេក្ខជនឯករាជ្យចំនួន២នាក់ បានឈ្នះអសនៈសភា នៅមណ្ឌលភាគខាងត្បូងលីបង់ តំបន់ដែលក្រុមហេសបូឡាមានឥទ្ធិពល ហើយតែងតែឈ្នះឆ្នោតរាប់សិបឆ្នាំមកហើយ។
បើតាមការវិភាគរបស់អ្នកសង្កេតការណ៍នយោបាយលីបង់ វត្តមានរបស់តំណាងរាស្ត្រឯករាជ្យថ្មី ទាំង១៣នាក់ គឺអាចក្លាយជាកម្មវត្ថុ នៃការតថ្លៃនយោបាយ របស់ក្រុមបក្សធំៗផ្សេងទៀត ដើម្បីបានសំឡេងគ្រប់ឈានទៅបង្កើតរដ្ឋាភិបាល។ តែទន្ទឹមគ្នានេះ លោក Sami Nader អ្នកវិភាគនៅវិទ្យាស្ថាន Levan Institute for Strategic affairs បានលើកឡើងថា លោកមិនជឿថា សមាសភាពសភាថ្មីនេះ នឹងធ្វើឲ្យមានការប្រែប្រួលធំដុំឡើយ ដល់ឆាកនយោបាយលីបង់។ ថ្វីបើក្រុមហេសបូឡា បានបាត់បង់អាសនៈខ្លះមែន តែនៅមានឧបសគ្គច្រើនទៀតណាស់ ដែលអាចរារាំង ដល់ការធ្វើកំណែទម្រង់នយោបាយលីបង់។
អ្នកជំនាញរូបនេះ បានបញ្ជាក់ថា ច្បាប់បោះឆ្នោតលីបង់ ត្រូវបានរៀបចំតាក់តែង ដើម្បីអនុញ្ញាតឲ្យបក្សពួកនយោបាយធំៗ បន្តបែងចែងអំណាចគ្នា ចែកលាភសក្ការៈគ្នា គ្រប់គ្រងប្រទេសតទៅទៀត ដោយគ្មានការផ្លាស់ប្តូរធំដុំទេ។ ជាងនេះទៀត ការដែលគ្មានគណបក្សណាមួយ មានសំឡេងភាគច្រើនក្នុងសភានេះ គឺវាអាចនឹងធ្វើឲ្យរាំងស្ទះយូរខែ ទំរាំអាចឈានទៅបង្កើតរដ្ឋាភិបាលថ្មីបាន។ ចំណែកការបោះឆ្នោតប្រធានាធិបតី ដែលនឹងមកដល់ នៅខែវិច្ឆិការខាងមុខនេះ ក៏គឺជាចំណុចមួយដ៏សំខាន់ដែរ ដែលអាចធ្វើឲ្យប្រែប្រួលទាំងស្រុង ដល់បរិបទនយោបាយ។
ដូចគ្នាដែរ លោក Alex Issa បណ្ឌិតវិទ្យាសាស្ត្រនយោបាយ និងទំនាក់ទំនងអន្តរជាតិ បានប្រាប់អ្នកយកព័ត៌មានបារាំង AFP ថា សម្រាប់ពេលនេះ ការដែលគ្មានសំឡេងភាគច្រើនក្នុងសភា គឺវានឹងធ្វើកិច្ចការដឹកនាំប្រទេស ត្រូវរាំងស្ទះយូរខែទៅមុខ ខណៈលីបង់ កំពុងផុងជ្រៅទៅៗ ក្នុងវិបត្តិសេដ្ឋកិច្ច។ យ៉ាងណាមិញ ចំនួនប្រជាជនដែលទៅបោះឆ្នោត កាលពីថ្ងៃអាទិត្យទី១៥ឧសភា ដែលមានតែ៤១% ពោលគឺថយចុះថែមទៀត បើប្រៀបធៀបទៅឆ្នាំ២០១៨ ដែលមាន៤៨%នោះ គឺវាបានបង្ហាញឲ្យឃើញថា ប្រជាពលរដ្ឋលីបង់ អស់សង្ឃឹម និងលែងទុកចិត្តលើអ្នកនយោបាយហើយ។
គួរបញ្ជាក់ថា លីបង់បានឆ្លងកាត់វិបត្តិសង្គម និងសេដ្ឋកិច្ចដ៏ធ្ងន់ធ្ងរបំផុត ប្រមាណ៣ឆ្នាំមកហើយ។ ប្រជាពលរដ្ឋបានបន្ទោសថាពួកអ្នកនយោបាយគណបក្ស តែងតែស៊ុំគ្រលំគ្នា បែងចែងអំណាច ដោយមិនខ្វល់ពីការកសាងរៀបចំប្រទេស។ អំពើពុករលួយបក្សពួកនិយម បានរុញគ្រប់វិស័យឲ្យធ្លាក់ចុះដុនដាប។ តម្លៃរូបិយវត្ថុលីបង់ បានបាត់បង់តម្លៃដល់ទៅ៩០%។ ៨០%នៃប្រជាជន រស់នៅក្រោមបន្ទាត់នៃភាពក្រីក្រ។ ហើយនៅឆ្នាំ២០២០ រដ្ឋលីបង់បានប្រកាសមិនអាចសងបំណុលគេបាន។ បន្ថែមពីនេះទៀត សោកនាដកម្មផ្ទុះឃ្លាំងស្តុកសារធាតុ នីត្រាតអាម៉ូនីញ៉ូម នៅកំពង់ផែក្រុងបេរូត កាលពីខែសីហាឆ្នាំ២០២០ ដែលបណ្តាលឲ្យស្លាប់មនុស្សជាង២០០នាក់នោះ ហាក់បានមកបញ្ជាក់ អំពីការចុះទុនខ្សោយលិចលង់ផុងជ្រៅ នៃរដ្ឋាភិបាលពុករលួយលីបង់។
យ៉ាងណាក៏ដោយ ក្រោយការបោះឆ្នោតកាលពីថ្ងៃចន្ទ ទី១៥ឧសភា លោកអគ្គលេខាធិការអង្គការសហប្រជាជាតិ បានផ្ញើលិខិតអបអរ ចំពោះការរៀបចំបោះឆ្នោតដែលបានប្រព្រឹត្តិទៅដោយរលូន។ លោកអគ្គលេខាធិការអង្គការសហប្រជាជាតិ បានដាក់ការសង្ឃឹមទៅលើរដ្ឋសភាថ្មីលីបង់ ក្នុងការចេញវិធានការបន្ទាន់ និងចាំបាច់ ដើម្បីស្តារស្ថិរភាពសេដ្ឋកិច្ច ព្រមទាំងរៀបចំអភិបាលកិច្ចឲ្យបានប្រសើរឡើង។ លោកអង់តូនីញ៉ូ ហ្គូតទែរស៍ ក៏បានអំពាវនាវផងដែរ ឲ្យលីបង់រៀបចំរដ្ឋាភិបាលថ្មីឲ្យបានឆាប់រហ័ស ដើម្បីអាចទៅសម្រេចកិច្ចព្រមព្រៀង ជាមួយមូលនិធិរូបិយវត្ថុអន្តរជាតិ ហើយឈានទៅធ្វើកំណែទម្រង់ចាំបាច់ ដើម្បីដាក់ប្រទេសឲ្យស្ថិតលើផ្លូវ នៃការរីកចម្រើនសេដ្ឋកិច្ចឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ