តើភាពតានតឹងជុំវិញតៃវ៉ាន់អាចនឹងរាលដាលទៅជាសង្រ្គាម?
ចុះផ្សាយនៅថ្ងៃ៖
ស្តាប់ - ០៤:៣៦
នៅក្នុងមួយរយៈពេលចុងក្រោយនេះ ភាពតានតឹងជុំវិញតៃវ៉ាន់កំពុងតែកើតមានយ៉ាងខ្លាំងជាមួយនឹងការបញ្ជូននាវាចម្បាំង និងយន្តហោះចម្បាំងឲ្យទៅបើកកាត់ក្បែរតៃវ៉ាន់ បូករួមទាំងការបោះពាក្យសម្តីដាក់គ្នាទៅវិញទៅមក រវាងចិន និងអាមេរិក។ តើភាពតានតឹងនេះអាចនឹងរាលដាលទៅជាសង្រ្គាមថ្មីមួយទៀតដែរឬទេ នៅក្នុងពេលដែលពិភពលោកកំពុងប្រឈមនឹងសង្រ្គាមអ៊ុយក្រែនមួយរួចទៅហើយ?
នៅក្នុងអំឡុងដំណើរទស្សនកិច្ចទៅកាន់តំបន់អាស៊ី កាលពីចុងខែឧសភាកន្លងទៅ លោកចូ បៃដិន ហាក់បានបង្ហាញពីការផ្លាស់ប្តូរគោលនយោបាយរបស់អាមេរិកចំពោះតៃវ៉ាន់ ដោយបានលើកឡើងច្បាស់ៗថា អាមេរិកនឹងចូលអន្តរាគមន៍ដោយប្រើកម្លាំងទ័ព ដើម្បីជួយតៃវ៉ាន់ ប្រសិនបើមានការឈ្លានពានពីចិន។
ចិនបានឆ្លើយតបមកវិញ ដោយបានព្រមានអាមេរិកថាកុំឲ្យប្រលែងលេងជាមួយភ្លើង ហើយប៉ុន្មានសប្តាហ៍ក្រោយមកទៀត នៅក្នុងអំឡុងជំនួបរដ្ឋមន្រ្តីក្រសួងការពារជាតិ នៅក្នុងប្រទេសសិង្ហបុរី កាលពីថ្ងៃអាទិត្យទី១២មិថុនាកន្លងទៅនេះ រដ្ឋមន្រ្តីក្រសួងការពារជាតិចិនបានព្រមានបន្ថែមទៀតថា ចិនមិនញញើតនឹងធ្វើសង្រ្គាមនោះទេ ប្រសិនបើអ្នកណាហ៊ានមកបំបែកតៃវ៉ាន់ចេញពីចិន។
ការបោះពាក្យសម្តីដាក់គ្នាទៅវិញទៅមកនេះកើតមានឡើង នៅក្នុងបរិបទដែលកំពុងតែតានតឹងស្រាប់ ដោយអាមេរិកក៏បានបញ្ជូននាវាចម្បាំងឲ្យបើកឆ្លងកាត់ច្រកសមុទ្រតៃវ៉ាន់ ចំណែកចិនវិញ ក៏បញ្ជូនយន្តហោះចម្បាំងឲ្យហោះចូលទៅក្នុងតំបន់ការពារដែនអាកាសតៃវ៉ាន់កាន់តែច្រើន។ បូករួមជាមួយនឹងអ្វីដែលកំពុងកើតឡើងនៅអ៊ុយក្រែន វាបង្កើតឲ្យមានការបារម្ភខ្លាចភាពតានតឹង ជុំវិញតៃវ៉ាន់នេះ អាចនឹងត្រូវរាលដាលទៅជាសង្រ្គាមថ្មីមួយទៀត រវាងមហាអំណាចទាំងពីរ គឺចិន និងសហរដ្ឋអាមេរិក។
ក្តីបារម្ភចម្បងនៅពេលនេះ គឺបារម្ភខ្លាចចិនឆ្លៀតឱកាសដែលពិភពលោកកំពុងវក់វីនឹងសង្គ្រាមអ៊ុយក្រែន ក៏ចូលឈ្លានពានតៃវ៉ាន់ ហើយត្រូវនាំឲ្យផ្ទុះទៅជាសង្គ្រាម។ គេឃើញថា តាំងពីដើមរៀងមក ចិនតែងតែប្រកាន់ជំហរថា តៃវ៉ាន់គឺជាផ្នែកមួយរបស់ចិន ហើយថា ចិនប្តូរផ្តាច់យកតៃវ៉ាន់មកដាក់ក្រោមការត្រួតត្រារបស់ខ្លួនវិញឲ្យបាន បើទោះជាត្រូវប្រើកម្លាំងទ័ព។
ក៏ប៉ុន្តែ អ្នកជំនាញខាងយោធាជាច្រើនបានលើកឡើងថា ប្រូបាប៊ីលីតេដែលចិនចូលឈ្លានពានតៃវ៉ាន់ នៅក្នុងពេលបច្ចុប្បន្ននេះ គឺមានតិចតួច ដោយសារតែសមត្ថភាពយោធារបស់ចិននៅមានកំណត់ នៅក្នុងពេលដែលវិស័យយោធារបស់តៃវ៉ាន់ត្រូវបានពង្រឹងជាលំដាប់ ជាពិសេស ដោយបានជំនួយពីសំណាក់សហរដ្ឋអាមេរិក។
ដូច្នេះ បើសិនជាចិនចូលឈ្លានពានតៃវ៉ាន់នៅពេលនេះ ចិនមិនប្រាកដថានឹងអាចទទួលជោគជ័យ ឬបើទោះជាជោគជ័យ ក៏ត្រូវបង់ថ្លៃយ៉ាងខ្ពស់នោះដែរ ដោយអាចត្រូវរងនូវការខូចខាតធ្ងន់ធ្ងរ ទាំងខាងផ្នែកយោធា និងទាំងខាងសេដ្ឋកិច្ច ជាពិសេស អាចប៉ះពាល់ទៅដល់កំណើនសេដ្ឋកិច្ចរយៈពេលវែងទៅមុខ ដែលចិនកំពុងតែត្រូវការចាំបាច់ ដើម្បីបញ្ចៀសហានិភ័យនៃវិបត្តិសង្គម។
មែនទែនទៅ ចិនក៏ធ្លាប់បានបញ្ជាក់ផងដែរថា អាទិភាពចម្បង គឺយកតៃវ៉ាន់មកត្រួតត្រាវិញ ដោយសន្តិវិធី ហើយប្រើកម្លាំងទ័ពតែក្នុងករណីចាំបាច់តែប៉ុណ្ណោះ។ ករណីដែលអាចនឹងជំរុញឲ្យចិនប្រើកម្លាំងទ័ព ហើយបង្កើតទៅជាសង្គ្រាម ដូចអ្វីដែលរដ្ឋមន្រ្តីការពារជាតិចិន ទើបនឹងបានលើកឡើងថ្មីៗនេះស្រាប់ គឺការប្រកាសឯករាជ្យជាផ្លូវការរបស់តៃវ៉ាន់។
ក៏ប៉ុន្តែ បើមើលទៅលើនយោបាយផ្ទៃក្នុងរបស់តៃវ៉ាន់នៅក្នុងពេលបច្ចុប្បន្ននេះ ករណីដែលតៃវ៉ាន់ប្រកាសឯករាជ្យក៏មានប្រូបាប៊ីលីតេមិនច្រើននោះដែរ ដោយគេសង្កេតឃើញថា លោកស្រី សៃ អ៊ីនវេន ដែលបច្ចុប្បន្នកាន់តំណែងជាប្រធានាធិបតីតៃវ៉ាន់ ក៏ដូចជាគណបក្សរបស់លោកស្រី គឺគណបក្ស DPP តែងតែប្រកាន់នូវគោលនយោបាយចម្បងមួយថា តៃវ៉ាន់ស្ថិតនៅដាច់ពីចិនប្រៀបដូចជាប្រទេសឯករាជ្យមួយរួចទៅហើយ ដូច្នេះ វាមិនមានការចាំបាច់អ្វី ដែលត្រូវប្រកាសឯករាជ្យជាផ្លូវការ ដែលនាំឲ្យផ្ទុះទៅជាសង្រ្គាមនោះទេ។
រឹតតែសំខាន់ជាងនេះទៅទៀត គេឃើញថា នៅក្នុងការស្ទាបស្ទង់មតិជាច្រើន នៅក្នុងរយៈពេលប៉ុន្មានឆ្នាំចុងក្រោយនេះ ប្រជាជនតៃវ៉ាន់ភាគតិចណាស់ ដែលចង់ប្រកាសឯករាជ្យ ដោយសំឡេងគាំទ្រការប្រកាសឯករាជ្យមានកាន់តែតិចទៅពីមួយឆ្នាំទៅមួយឆ្នាំ ហើយមតិភាគច្រើនគាំទ្រឲ្យរក្សាស្ថានភាពដើមដូចពេលបច្ចុប្បន្ន ពោលគឺ តៃវ៉ាន់នៅដាច់ពីការគ្រប់គ្រងដោយរដ្ឋអំណាចចិនដីគោក ប្រៀបដូចជាប្រទេសឯករាជ្យមួយ ក៏ប៉ុន្តែ មិនប្រកាសឯករាជ្យជាផ្លូវការ។
ដូច្នេះ និយាយជារួមមកវិញ ជុំវិញសំណុំរឿងតៃវ៉ាន់នេះ ថ្វីដ្បិតតែមានការដំឡើងសំឡេងដាក់គ្នាខ្លាំងៗ និងការសម្ញែងសាច់ដុំដាក់គ្នាទៅវិញទៅមក ក៏ប៉ុន្តែ មានកត្តាសត្យានុម័តច្រើន ដែលបង្ហាញថា ភាគីទាំងសងខាងសុទ្ធតែមិនចង់ឲ្យមានសង្គ្រាម។ អ្វីដែលជាហានិភ័យ នៅក្នុងស្ថានភាពប្រឈមមុខដាក់គ្នាខាងផ្នែកយោធាយ៉ាងតានតឹងខ្លាំងបែបនេះ គឺការប៉ះទង្គិចគ្នាដោយអចេតនាណាមួយ ដែលអាចធ្វើឲ្យជម្លោះត្រូវរាលដាល រហូតត្រូវផ្ទុះទៅជាសង្គ្រាម បើទោះជាគ្មានអ្នកណាចង់ឲ្យកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ