អាល់ហ្សេរី ប្រារព្ធខួប៦០ឆ្នាំ នៃបុណ្យឯករាជ្យជាតិ ចេញពីក្រោមនឹមអាណានិគមបារាំង
ចុះផ្សាយនៅថ្ងៃ៖
ស្តាប់ - ០៦:១១
ថ្ងៃទី៥កក្កដា ប្រទេស អាល់ហ្សេរី ប្រារព្ធពិធីបុណ្យឯករាជ្យជាតិ គម្រប់៦០ឆ្នាំ ដែល អាល់ហ្សេរី បានប្រកាសឯករាជ្យជាតិ ចេញពីនឹមអាណានិគមបារាំង ក្នុងថ្ងៃទី៥ ខែកក្កដា ឆ្នាំ១៩៦២។ ប្រទេសអាល់ហ្សេរី បានឋិតក្រោមការត្រួតត្រារបស់បារាំងយូរជាងគេ គឺជាង១៣០ឆ្នាំ និងដែលបានរើសបម្រះងើបចេញពីនឹមអាណានិគម ដោយការតស៊ូប្រយុទ្ធបង្ហូរឈាម។ ស្លាកស្នាមនៃការងើបបះបោរនេះ គឺនៅតែបន្តជាដំបៅអនុស្សាវរីយចាស់ដែលនៅតែបន្តឈឺចាប់ រហូតដល់សព្វថ្ងៃ និងដែលធ្វើឲ្យទំនាក់ទំនងបារាំង-អាល់ហ្សេរី ជួបរឿងល្អក់កករច្រើន។
ក្នុងឱកាសខួប៦០ឆ្នាំចេញពីអាណានិគមបារាំង គឺប្រទេស អាល់ហ្សេរី បានធ្វើក្បួនដង្ហែព្យុះហយាត្រាយោធា យ៉ាងធំសម្បើម មិនធ្លាប់មាន ហើយបានបោះពុម្ពផ្សាយក្រដាសប្រាក់ថ្មី សម្រាប់អបអរឱកាសខួប៦ទសវត្សរ៍ នៃ ឯករាជ្យជាតិ នេះផង។ មិនតែប៉ុណ្ណោះ អាល់ហ្សេរី បានទទួលស្វាគមន៍វត្តមានដោយផ្ទាល់ពីប្រមុខរដ្ឋនិងប្រធានាធិបតីប្រទេសជាច្រើន ដូចជា ថ្នាក់ដឹកនាំអាជ្ញាធរប៉ាឡេស្ទីន, ប្រមុខរដ្ឋទុយនេស៊ី, ប្រធានាធិបតីនីហ្សេ ក៏បានមកចូលរួមអបអរសាទរដែរ។
ប្រមុខរដ្ឋអាល់ហ្សរី លោក Abdelmadjid Tebboune បានយកឱកាសនេះ ដើម្បីទាក់ទាញចិត្តអ្នកគាំទ្រចលនាប្រឆាំង បក្សជំទាស់ សង្គមស៊ីល និងសហជីព ជាពិសេសគឺបានយកចិត្តចលនាគាំទ្រលិទ្ធប្រជាធិបេយ្យ ហ៊ីរ៉ាក់ (Hirak)។ ចលនា ធ្លាប់ធ្វើបាតុកម្មប្រឆាំងរដ្ឋាភិបាល ជារៀងរាល់សប្តាហ៍ ចន្លោះឆ្នាំ ២០១៩ និង២០២១ ប្រឆាំងនឹងប្រធានាធិបតីចាស់ ប្រឆាំងនឹងអំណាចពោរពាសនៃក្រុមយោធា ហើយនឹងទាមទារកំណែទម្រង់នយោបាយនិងសេដ្ឋកិច្ច ជាដើម។
ទំនាក់ទំនងបារាំង-អាល់ហ្សេរី
ក្នុងឱកាសនេះ ប្រធានាធិបតីបារាំង លោក អេម៉ានុយអែល ម៉ាក្រុង បានរំលឹកផ្ញើសារថ្លែងសម្រួលផ្លូវទូត និងបានបញ្ជាក់ពីការរឹតចំណងកម្តៅទំនាក់ទំនាក់ទ្វេភាគីឡើងវិញ ដែលបើតាមលោក ម៉ាក្រុង ចំណងទាក់ទងអាល់ហ្សេរនិងបារាំង រឹងមាំខ្លាំងស្រេចទៅហើយ។
លោក អេម៉ានុយអែល ម៉ាក្រុង ត្រូវគេមើលឃើញថា បានដើរតួសម្របសម្រួលច្រើនក្នុងទំនាស់ចាស់ជាមួយអាល់ហ្សេរី។ ពីព្រោះថា អាល់ហ្សេរី ទាមទារឯករាជ្យដោយកម្លាំងតស៊ូ ដែលត្រូវរងការបង្គ្រាបពីទាហានបារាំង ស្លាប់មនុស្សច្រើនពាន់នាក់។ ក្នុងឆ្នាំ ២០១៧ មុនជាប់ឆ្នោតជាប្រធានាធិបតី លោកម៉ាក្រុងប្រកាសក្នុងទីក្រុងអាល់ហ្សេ ដោយហ៊ានចាត់ទុកអាណានិគមបារាំងលើអាល់ហ្សេរី ជាឧក្រិដ្ឋកម្មប្រឆាំងមនុស្សជាតិ ទៀតផង។
ក្នុងការប្រារព្ធបុណ្យឯករាជ្យ នៅអាល់ហ្សេរី ខួប៥៨ឆ្នាំ គឺកាលពី២ឆ្នាំមុន បារាំងក្រោមអាណត្តិរបស់លោក ម៉ាក្រុង បានប្រគល់លលាដ៏ក្បាលសពជនជាតិអាល់ហ្សេរី ២៤នាក់ ដែលសុទ្ធសឹងជាអ្នកតស៊ូនៅក្នុងសង្រ្គាមដណ្តើមឯករាជ្យពីបារាំង។ សពទាំង២៤នាក់ ត្រូវទាហានបារាំង ចាប់ជាឈ្លើយសឹក បាញ់សម្លាប់និងកាត់ក្បាល បញ្ជូនទៅរក្សាទុក នៅសារៈមន្ទីរក្រុងប៉ារីស។ លលាដ៏ក្បាលសពជនជាតិអាល់ហ្សេរី ទាំងនោះ ត្រូវទាហានបារាំងក្នុងសម័យអាណានិគម ចាត់ទុកជា«ពានរង្វាន់សង្រ្គាម»។
ទោះយ៉ាងនេះក្តី នៅមានសំណុំរឿងចាស់ណាស់ជាច្រើន ដែល ពលរដ្ឋអាល់ហ្សេរី សព្វថ្ងៃ ចង់បានការពន្យល់បកស្រាយពីបារាំង តួយ៉ាង ទី១ ការសម្លាប់ពលរដ្ឋអាល់ហ្សេរីនៅតំបន់ Sétif និង Constantinois ក្នុងឆ្នាំ ១៩៤៥ ទី២ ការបាត់ខ្លួនជនជាតិអាល់ហ្សេរីជាង ២ ០០០នាក់ ក្នុងសង្រ្គាមដណ្តើមឯករាជ្យ ចន្លោះឆ្នាំ ១៩៥៤ និង ១៩៦២ ហើយនិងទី៣ សំណល់ចំហាយនៃការសាកល្បងនុយក្លេអ៊ែរបារាំង នៅតំបន់សាហារ៉ា អាល់ហ្សេរី ដែលបន្តឲ្យពលរដ្ឋអាល់ហ្សេរីរងគ្រោះ។
ដូច្នេះហើយ ទើបក្នុងខួប៦០ឆ្នាំនេះ លោក Salah Goudjil ប្រធានសភាជាន់ខ្ពស់ អាល់ហ្សេរី និងជាអតីតអ្នកតស៊ូរំដោះជាតិម្នាក់ដែរ បានថ្កោលទោស បារាំង ថា ជាអ្នកទទួលខុសត្រូវចំពោះឧក្រិដ្ឋកិច្ចប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មប្រល័យវប្បធម៌និងអត្តសញ្ញាណជាតិអាល់ហ្សេរី។ លោកបន្ថែមថា យើងមិនអាចបំភ្លេច ឬ លុបចោលអតីតកាល បានទេ ទោះបីជាធ្វើម្តេចក៏ដោយ។
ទិដ្ឋភាពសេដ្ឋកិច្ច
បើទោះបីជា ៦០ឆ្នាំ ក្រោយចេញពីអាណានិគមបារាំងក៏ដោយ ក៏ អាល់ហ្សេរី នៅមានបញ្ហានយោបាយ អំពើពុករលួយ និងការរំលោភអំណាចពីសំណាក់យោធា ច្រើននៅឡើយ។ ចំណែកវិស័យសេដ្ឋកិច្ច ក៏នៅទន់ខ្សោយខ្លាំង។ ក្រុមអ្នកវិភាគស្ថានការណ៍ប្រទេសអាល់ហ្សេរី បានមើលឃើញថា ប្រទេសនេះនៅមានបញ្ហាធំខាងការិយាធិបតេយ្យ ការប្រមូលពន្ធជួបបញ្ហា និងកង្វះយុទ្ធសាស្ត្រឧស្សាហកម្ម។ សេដ្ឋកិច្ច អាល់ហ្សេរី ពឹងផ្អែកច្រើនលើធនធានប្រេងនិងឧស្ម័ន ពិសេស អ៊ីដ្រូកាបូន នាំចេញដែលវាស្មើនឹង៩៥%នៃការនាំចេញរបស់អាល់ហ្សេរី ហើយជាប្រភពចំណូលជាង៥០% សម្រាប់ថវិកាជាតិ ដែលត្រូវគេមើលឃើញថា ជាកង្វះពិពិធកម្មសេដ្ឋកិច្ច។ រីឯការវិនិយោគបរទេស គឺមានលក្ខខណ្ឌតឹងតែងចំពោះឈ្មួញបរទេស។ ជាក់ស្តែង តាមច្បាប់អាល់ហ្សេរី តម្រូវឲ្យជនបរទេស មានភាគហ៊ុនតែ៤៩%ប៉ុណ្ណោះ នៅក្នុងក្រុមហ៊ុន។
ចំពោះកម្សោយមួយទៀត គឺការប្រើប្រាស់មិនអស់លទ្ធភាពចំពោះវិស័យធនធានមនុស្ស។ តាមពិតទៅ យុវជនអាល់ហ្សេរី បានទទួលការអប់រំរៀនសូត្របានច្រើនសមគួរ តែពួកគេលំបាកចូលទីផ្សារការងារ និងកន្លែងដែលមានតួនាទីសម្រេចចិត្តសំខាន់ៗ ពោលគឺត្រូវក្រុមអ្នកនយោបាយចាស់វស្សានិងក្រុមយោធា រឹតត្បិត។ តាមទិន្នន័យឆ្នាំ២០២១ របស់ធនាគារពិភពលោក គឺ យុវជនអាល់ហ្សេរី អាយុក្រោម២៤ឆ្នាំ មានចំនួន៣២% ដែលអត់ការងារធ្វើ។
ជារួម ៦ទសវត្សរ៍កន្លងទៅហើយ ដែលរួចផុតពីនឹមអាណានិគមបារាំង ប៉ុន្តែ ប្រទេសអាល់ហ្សេរី នៅមានកិច្ចការជាច្រើនទៀត ដែលត្រូវធ្វើ ដើម្បីឲ្យស្របតាមបដាថ្មី ដែលជនជាតិ អាល់ហ្សេរី ខ្លួនឯង ចង់បាន នោះគឺ «ឯករាជ្យជាតិ និងឯករាជ្យប្រជាជន»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ