វិបត្តិស្រូវសាលីកំពុងគំរាមកំហែងសន្តិសុខស្បៀងពិភពលោក?
ចុះផ្សាយនៅថ្ងៃ៖
ស្តាប់ - ០៤:៥១
ស្រូវសាលី គឺមានប្រទេសជាច្រើនលើសពិភពលោក ដែលប្រើប្រាស់ និង កែឆ្នៃសម្រាប់ទទួលទាន ប៉ុន្តែ មានប្រទេស ប្រមាណតែជាង១០ប៉ុណ្ណោះ ដែល ដាំ និង ផលិតសម្រាប់នាំចេញ។ វិបត្តិកូវិដ១៩ ដែលអូសបន្លាយជាច្រើនសិបខែ បូករួមទាំងគ្រោះរាំងស្ងួតនៅប្រទេសដាំស្រូវសាលី ហើយជាពិសេស វិបត្តិសង្គ្រាមឈ្លានរុស្ស៊ីនៅអ៊ុយក្រែន គឺបង្កឲ្យមានវិបត្តិស្រូវសាលី និងដែលកំពុងគំរាមកំហែងខ្លាំងដល់សន្តិសុខស្បៀងពិភពលោក។ ថ្មីៗនេះទៀត អង្គការសហប្រជាជាតិ បានប្រកាសថា មនុស្សច្រើនជាង ២០០ លាននាក់ នៅលើពិភពលោក អាចនឹងរងគ្រោះទុរ្ភិក្ស អត់បាយ-ដាច់ស្បៀង។
ប្រទេសជាច្រើនលើពិភពលោក ដែលប្រើប្រាស់ ស្រូវសាលី សម្រាប់ធ្វើម្ស៉ៅ ឬធ្វើនំប៉័ង ជាដើម។ នៅអឺរ៉ុប អ៊ីតាលី នាំចូលស្រូវសាលីច្រើនជាងគេ ព្រោះដើម្បីធ្វើ Pizza ឬ Spaghetti ។ល។ បន្ទាប់មក ប្រទេសប្រើប្រាស់ធំបន្ទាប់ពីអ៊ីតាលី គឺ ទុយនីស៊ី នៅទ្វីបអាហ្វ្រិក។
ផ្ទុយទៅវិញ ប្រទេសមិនច្រើនទេ ដែលដាំនិងផលិតស្រូវសាលី។ ហើយប្រទេសដែលដាំនិងផលិតស្រូវសាឡីទៀតសោត ក៏ធ្វើដើម្បីតែតម្រូវការក្នុងស្រុក និងនាំចេញដោយត្បិតត្បៀតបំផុត ព្រោះដើម្បីទុកបំពេញតម្រូវការស្បៀងក្នុងស្រុកខ្លួនដែរ។ ជាក់ស្តែង ប្រទេសចិន គឺជាប្រទេសផលិតស្រូវសាលីធំជាងគេលើលោក តែ ចិន ក៏នាំចូលស្រូវសាលីថែមដែរ ដើម្បីចិញ្ចឹមប្រជាពលរដ្ឋខ្លួន ប្រមាណ១,៤ពាន់លាននាក់។
ឥណ្ឌា ផលិតស្រូវសាលីដែរ ប៉ុន្តែ ឥណ្ឌា ទើបតែប្រកាសផ្អាក់នាំចេញស្រូវសាលី ព្រោះត្រូវរក្សាទុកដើម្បីបំពេញតម្រូវការក្នុងស្រុក។ ការប្រកាសរបស់ ឥណ្ឌា ថ្មីៗនេះ បានធ្វើឲ្យតម្លៃស្រូវសាលីហក់ឡើងបន្ថែមទៀត គឺមួយតោន ឡើងដល់ ៤៣៤ អឺរ៉ូ ឡើងខ្ពស់គុណនឹងពីរ បើធៀបនឹងរដូវក្តៅឆ្នាំមុន។ សូមជ្រាបថា កាលពីខែមេសាកន្លងទៅ ស្រូវសាលី ឡើងខ្ពស់ណាស់ ដល់ជាង ៤០០អឺរ៉ូក្នុងមួយតោន ហើយពេលនេះ វាលោតហក់ឡើងរឹតតែខ្ពស់ថែមទៀត។
គេឃើញថា ប្រទេសធំៗដែលផលិតស្រូវសាលីសម្រាប់ចេញ គឺមាន សហរដ្ឋអាមេរិក កាណាដា អូស្ត្រាលី រុស្ស៊ី និងអ៊ុយក្រែន។ សង្រ្គាមនៅអ៊ុយក្រែន ជាចំណែកមួយ ធ្វើឲ្យទំនិញ និង តម្លៃស្បៀងអាហារពិភពលោក កើនឡើងខ្លាំង។ នៅមុនសង្រ្គាមឈ្លានពានរបស់រុស្ស៊ី អំលុងចុងខែកុម្ភៈ, អ៊ុយក្រែន ជាប្រទេសដ៏ធំទី៣ នៅក្នុងពិភពលោក ខាងនាំចេញស្រូវសាលី។ នៅមុនសង្រ្គាម អ៊ុយក្រែនតែម្នាក់ឯង អាចផ្គត់ផ្គង់ គ្រាប់ធញ្ញជាតិ និងប្រេងផ្កាឈូករ័ត្ន សម្រាប់តម្រូវការស្ទើរតែពាក់កណ្តាលរបស់ពិភពលោក។ ប៉ុន្តែ ការនាំចេញស្រូវសាលី និងគ្រាប់ធញ្ញជាតិរបស់ អ៊ុយក្រែន ត្រូវជាប់គាំង ព្រោះតែសង្គ្រាម ដោយសារកំពង់ផែ និងផ្លូវទឹករបស់ អ៊ុយក្រែន នៅសមុទ្រខ្មៅ ត្រូវស្ថិតក្រោមការគ្រប់គ្រងទាំងស្រុងរបស់កងទ័ព រុស្ស៊ី។ រុស្ស៊ី ខ្លួនឯង ដែលជាប្រទេសនាំចេញស្រូវសាលីសំខាន់មួយនៅក្នុងពិភពលោក ក៏មិនអាចនាំចេញបានច្រើនដែរ ព្រោះតែទណ្ឌកម្មរបស់ក្រុមប្រទេសបច្ចិមលោក។
ចាប់តាំងពីមានសង្រ្គាមនៅអ៊ុយក្រែន តម្លៃចំណីអាហារនៅក្នុងពិភពលោក បានហក់ឡើងខ្ពស់។ អង្គការស្បៀងអាហារពិភពលោក បានព្រមានរួចហើយថា បើសិនសង្រ្គាមនៅតែបន្តនោះ វិបត្តិខ្វះស្បៀង និងគ្រោះអត់ឃ្លាន នឹងកើតមាន យ៉ាងធ្ងន់ធ្ងរបំផុត នៅតាមប្រទេសអាហ្វ្រិក និងដើមបូព៌ា ដែលពឹងអាស្រ័យខ្លាំងលើការនាំចូលស្រូវសាលី ពីអ៊ុយក្រែន និងរុស្ស៊ី។
នាពេលកន្លងទៅ អង្គការចំណីអាហារនិងកសិកម្ម ហៅកាត់ថា FAO ជាទីភ្នាក់ងារមួយ របស់ អង្គការសហប្រជាជាតិ បានព្រមានថានឹងមានមនុស្ស ពី ៨ ទៅ១៣លាននាក់បន្ថែមទៀតនៅក្នុងពិភពលោក ដែលអាចរងគ្រោះ ខ្វះអាហាររូបត្ថម្ភ ប្រសិនបើសិន ការនាំចេញស្បៀងអាហារពីរុស្ស៊ី និងអ៊ុយក្រែន រងប៉ះពាល់ព្រោះតែការអូសបន្លាយនៃសង្រ្គាម។ ហើយថ្មីៗនេះទៀត អង្គការសហប្រជាជាតិ បានប្រកាសថា មានមនុស្ស ច្រើនជាង២០០លាននាក់ នៅលើពិភពលោក អាចនឹងរងគ្រោះដោយទុរ្ភិក្ស អត់បាយដាច់ស្បៀង។
តើអ្វីទៅជាដំណោះស្រាយចំពោះវិបត្តិនេះ?
ដំណោះស្រាយចំពោះរឿងនេះ គឺវាអាស្រ័យទៅនឹងការប្រមូលផលឆ្នាំនេះ ដែលបើតាមរដ្ឋមន្ត្រីកសិកម្មអាមេរិក គឺការប្រមូលផលស្រូវសាលីឆ្នាំថ្មី បានទទួលផលល្អគួរសមដែរ នៅសហរដ្ឋអាមេរិក អឺរ៉ុប ឬ អូស្ត្រាលី។ រដ្ឋមន្ត្រីកសិកម្មសហរដ្ឋអាមេរិក បានប្រកាសថា ការប្រមូលផលស្រូវសាលីឆ្នាំ២០២២នេះ អាចព្យាករណ៍បានប្រហែល ៧៧៥ លានតោន។
ទន្ទឹមនឹងគ្នានេះ ប្រទេស រុស្ស៊ី ប្រកាសថា ស្រូវសាលីរបស់ខ្លួន ប្រមូលផលបានល្អខ្លាំងណាស់។ ប្រឈមនឹងការខ្វះស្រូវសាលីនៅសកលលោក, រុស្ស៊ី បានឱកាសល្អ ដើម្បីចរចាឲ្យបច្ចិមលោកឲ្យលើកលែងទណ្ឌកម្មចំពោះការនាំចេញស្រូវសាលីរបស់ខ្លួន។ ក៏ប៉ុន្តែ សហរដ្ឋអាមេរិក និង ប្រទេសលោកខាងលិច មិនទាន់យល់ព្រមនៅឡើយទេ។ ប្រមុខការទូតអាមេរិក បានប្រៀបធៀបនិងចាត់ទុកសំណើរុស្ស៊ីនេះ ថាដូចជារបៀបចាប់ជំរិតទៅវិញ។
ចំណែក អង្គការសហប្រជាជាតិ បានស្នើសុំយ៉ាងទទូចឲ្យប្រទេសក្នុងតំបន់ជម្លោះគ្នារុស្ស៊ី-អ៊ុយក្រែន ជួយសម្រួលចរចាធ្វើយ៉ាងណា ឲ្យអាចនាំចេញស្រូវសាលី និង ធុញ្ញជាតិផ្សេងៗទៀត ដើម្បីផ្គត់ផ្គង់តម្រូវការស្បៀងនិងទំនិញលើកសកលលោក។
នៅប្រទេស ទុយនីស៊ី, តាំងពីខែមេសាមក រដ្ឋាភិបាលបានដាក់ចេញវិធានការជាច្រើន ដើម្បីដោះស្រាយស្ថានការណ៍ចំពោះមុខ ពោលគឺជាវិធានការសំដៅដល់ការបំពេញតម្រូវការស្រូវសាលីក្នុងប្រទេស ដោយជំរុញឲ្យ កសិករ ដាំស្រូវសាលី ឲ្យច្រើន។ កម្មវត្ថុរបស់រដ្ឋាភិបាលទុយនីស៊ី គឺបង្កើនចំនួនដីកសិកម្ម ពី៥៦ម៉ឺនហិចតា ទៅ៨០ម៉ឺនហិកតា ដែលត្រូវដាំតែស្រូវសាលីសុទ្ធតែម្តង។ បារាំង វិញ ក៏បានគិតគូរពីការពង្រីកដីដាំស្រូវសាលីនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ