ភូមាប្រហារជីវិតអ្នកទោសមនសិការ៤នាក់ មានម្នាក់ជាអ្នកតំណាងរាស្ត្រនិងម្នាក់ជាអ្នកនិពន្ធ
ចុះផ្សាយនៅថ្ងៃ៖
ស្តាប់ - ០៥:១១
ថ្ងៃច័ន្ទដើមសប្តាហ៍ របបសឹកភូមា បានប្រហារជីវិតអ្នកទោសមនសិការ ចំនួន៤រូប ក្នុងនោះគឺមានម្នាក់ជាអ្នកតំណាងរាស្ត្រ និង ម្នាក់ជាអ្នកនិពន្ធ។ តុលាការភូមាក្រោមខ្សែញាក់របស់របបសឹក បានចេញសាលក្រមកាត់ទោសប្រហារជីវិត កាលពីខែមករា ឆ្នាំ២០២២ និងដែលត្រូវអាជ្ញាធរទើបតែសម្រេចអនុវត្តប្រហារជីវិត នៅថ្ងៃទី២៥កក្កដា។ ការសម្លាប់ប្រហារជីវិតនៅពេលនេះ គឺជាសញ្ញាសម្លុត គំរាម បំបាក់ស្មារតីដ៏ធ្ងន់ធ្ងរចំពោះចលនាប្រឆាំង។ តើអ្នកទោសមនសិការ ចំនួន៤នាក់ ជានរណា?
ក្នុងចំណោមមរណជនទាំងបួន គឺបុគ្គលពីរនាក់ មានភាពល្បីល្បាញខ្លាំងនៅក្នុងចលនាអ្នកប្រឆាំងនឹងរដ្ឋាភិបាលរបបយោធាភូមា។ ទី១ ជាអតីតសមាជិកសភាមកពីគណបក្សសម្ព័នជាតិដើម្បីប្រជាធិបតេយ្យរបស់លោកស្រីអ៊ុងសាន ស៊ូជី គឺឈ្មោះលោក ព្យូ ហ្សេយ៉ារ ថ (Phyo Zeya Thaw) និងទី២ លោក ច មីនយូ (Kyaw Min Yu) ហៅក្រៅថា Jimmy (ជីមមី) ជាអ្នកនិពន្ធនិងជាសកម្មជនប្រជាធិបតេយ្យដ៏លេចធ្លោ។ ចំណែកពីរនាក់ទៀត គឺលោក ឡា មីយូ អោង (Hla Myo Aung) និងលោក អោង ធូរ៉ា ហ្សា (Aung Thura Za) ដែលត្រូវកាត់ទោសអស់ជីវិត ព្រោះតែត្រូវតុលាការរបបសឹកចោទប្រកាន់ដោយសង្ស័យថាបានសម្លាប់ស្រីម្នាក់ជាគិញឈ្លបយកការណ៍បម្រើរដ្ឋាភិបាលរបបយោធាភូមា។
អ្នកចម្រៀងរ៉ាប់ ជាប់ឆ្នោតជាតំណាងរាស្ត្រ
អ្នកតំណាងរាស្ត្រលោក ព្យូ ហ្សេយ៉ារ ថ (Phyo Zeya Thaw) មានវ័យ៤១ឆ្នាំ គឺតំណាងនិមិត្តរូបឲ្យយុវជនភូមាជាន់ថ្មី ជាបញវន្ត អ្នករស់នៅទីក្រុង មានគំនិតបើកជំហរទៅកាន់ពិភពលោក និងមានទស្សនៈប្រឆាំងនឹងរបបឃោរឃៅផ្តាច់ការ។ រាប់តាំងពីការស្លៀកពាក់របស់លោក ដែលមិនចុះនឹងទម្លាប់ប្រពៃណីចាស់ ហើយបទភ្លេងដែលលោកច្រៀងមានលក្ខណៈញាក់កន្ត្រាក់ ផ្សំនឹងទំនុកច្រៀងចាក់ដោតឌឺដង ប្រឆាំងនឹងរបបសឹកផ្តាច់ការភូមា។ ឧទាហរណ៍ មានឃ្លាមួយក្នុងបទចម្រៀងរបស់គាត់ លើកឡើងថា «យើងមិនប្តូរគោលគំហរទេ យើងមិនបោះបង់ចុះចាញ់ទេ ហើយយើងមិនប្រគល់ខ្លួននគរបាលឲ្យចាប់ទេ។»។ ទំនុកច្រៀងរបស់លោកគឺរិះគន់រដ្ឋាភិបាលរបបសឹកភូមា គឺចាប់តាំងពីឆ្នាំ២០០០មកម្ល៉េះ។
អ្នកចម្រៀងរ៉ាប-ហិបហប់-រូបនេះ ធ្លាប់បានត្រូវចាប់ខ្លួនម្តងហើយ ព្រោះតែបានចូលរួមបង្កើតបណ្តាញក្រុមតន្ត្រីករដែលមានចលនានិងទស្សនៈផ្ទុយនឹងរដ្ឋអំណាច នោះគឺចលនា"Generation Wave"។ រដ្ឋអំណាចភូមាធ្លាប់បានចាប់ខ្លួនលោក ព្យូ ហ្សេយ៉ារ ថ ដាក់ពន្ធនាគារចន្លោះឆ្នាំ ២០០៨និង២០១១ ក្នុងបទចោទចូលរួមជាមួយអង្គការទុច្ចរិត និងកាន់កាប់រូបិយវត្ថុបរទេសខុសច្បាប់ ។ បួនឆ្នាំក្រោយមក នៅឆ្នាំ២០១៥ លោក ព្យូ ហ្សេយ៉ារ ថ បានជាប់ឆ្នោតជាអ្នកតំណាងរាស្ត្រ នៅមណ្ឌលរដ្ឋធានីណៃពិដោរ ចេញពីបេក្ខភាពបក្សសម្ព័ន្ធជាតិដើម្បីប្រជាធិបតេយ្យ របស់លោកស្រី អ៊ុង សានស៊ូជី។
នៅក្រោយរដ្ឋប្រហារថ្ងៃទី១កុម្ភៈ២០២១ របបសឹកភូមាបានចាប់ឃុំខ្លួនសមាជិកសភារូបនេះនៅខែវិច្ឆិកា ហើយតុលាការកាត់ទោសប្រហារជីវិត នៅខែមករា២០២២ និងដែលគេទើបតែអនុវត្តសាលាក្រមនៅថ្ងៃទី២៥កក្កដា។ មុនថ្ងៃប្រហារជីវិត លោកបានសុំឲ្យគ្រួសារជួយយកវ៉ែនតាសម្រាប់អានសៀវភៅនិងវចនានុក្រមមួយផង ជូនគាត់នៅក្នុងមន្ទីរឃុំឃាំង។ ម្តាយរបស់លោក បានផ្តល់បទសម្ភាសឲ្យវិទ្យុអន្តរជាតិមួយថា «កូនប្រុសខ្ញុំ មិនមែនជាចោរ ឬជនខិលខូចទេ។ ខ្ញុំមានមោទនភាពចំពោះកូនប្រុសខ្ញុំដែលពលីអាយុជីវិតដើម្បីប្រទេសជាតិ។ ប្រសិនបើខ្ញុំអាចទទួលបានអដ្ឋិធាតុ ខ្ញុំចង់ធ្វើចេតិមួយនិងឆ្លាក់ចារឈ្មោះកូនខ្ញុំ»។
អ្នកនិពន្ធប្រឆាំងរបបសឹក
អ្នកនិពន្ធលោក ច មីនយូ (Kyaw Min Yu) ហៅក្រៅថា Jimmy (ជីមមី) ត្រូវគេចាត់ទុកថាជា«ទីប្រឹក្សាមួយរូប»របស់រដ្ឋាភិបាលរួបរួមជាតិ ក្នុងអាណត្តិរបស់លោកស្រី អ៊ុង សានស៊ូជី។ មានវ័យ៥៣ឆ្នាំ លោកធ្លាប់បានជាប់ពន្ធនាគារ មិនតិចជាង១៥ឆ្នាំឡើយ ព្រោះតែប្រឆាំងរដ្ឋាភិបាលភូមា។ នៅពេលកន្លងមក លោកធ្លាប់មានប្រសាសន៍ថា «គុកស្ទើរតែក្លាយជាផ្ទះទី២ទៅហើយ»។ លោកមានគំនិតប្រឆាំងនឹងរដ្ឋអំណាចផ្តាច់ការ និងគាំទ្រចលនាប្រជាធិបតេយ្យដឹកនាំមកដោយលោកស្រី អ៊ុង សានស៊ូជី គឺតាំងតែពីនៅជាយុវជន។ វ័យ១៩ឆ្នាំ លោកបានចូលរួមការព្រឹត្តិការណ៍តវ៉ារបស់ក្រុមនិស្សិតដ៏ធំមួយ នៅឆ្នាំ១៩៨៨។
ភរិយារបស់លោកអ្នកនិពន្ធរូបនេះ គឺអ្នកស្រី នីឡា ធែន ( Nilar Thein) ក៏ជាសកម្មជនគាំទ្រលទ្ធិប្រជាធិបតេយ្យដែរ។ ឆ្នាំ២០០៧ បន្ទាប់ពីភរិយាបានប្រសូត្រកូនស្រីមួយបានតែប៉ុន្មានខែ រូបលោកជាឪពុកត្រូវនគរបាលភូមាចាប់ខ្លួនដាក់គុក។ មួយឆ្នាំក្រោយមក ភរិយាលោកក៏ត្រូវចាប់ខ្លួនដែរ។ អ្នកទាំងពីរបានជួបគ្នាវិញ នៅឆ្នាំ២០១២ ដោយសារតែមានកិច្ចព្រមព្រៀងលើកលែងទោស។ នៅថ្ងៃដែលគេប្រហារជីវិតស្វាមី អ្នកស្រី នីឡា ធែន មានប្រសាសន៍ប្រាប់វិទ្យុបរទេសថា «មរណភាពនេះ គឺជាឧក្រិដ្ឋកម្មដ៏គួរឲ្យអៀនខ្មាសបំផុតសម្រាប់របបសឹកភូមា។ គាត់ស្លាប់តែរូបកាយមែន តែគាត់រស់រានជានិច្ចនៅក្នុងបេះដូងរបស់យើងគ្រប់គ្នា»។
បើតាមអង្គការសិទ្ធិមនុស្សនៅក្នុងស្រុក, ចាប់តាំងពីឡើងកាន់អំណាចដោយរដ្ឋប្រហារយោធា ដើមខែកុម្ភៈឆ្នាំ២០២១ គឺបណ្តាលឲ្យមានស្លាប់មនុស្សជាង២ពាន់នាក់ ហើយ១ម៉ឺន៥ពាន់ត្រូវចាប់ខ្លួន។ ទន្ទឹមនឹងគ្នានេះ តុលាការរបបសឹក បានកាត់ទោស អ្នកនយោបាយនិងសកម្មជនគណបក្សប្រឆាំង ចំនួន១១៥ ពីបទធ្វើភេរវកម្ម និងត្រូវមានទោសប្រហារជីវិត។ ក្នុងចំណោមនេះ មាន៦៨នាក់ ជាប់ទោសប្រហារជីវិត ហើយអ្នកមួយចំនួនទៀត បានរត់ភៀសខ្លួនចោលស្រុកកំណើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ