ក្រុមប្រទេសផលិតប្រេង OPEP+ កំពុងដើរលើខ្សែដ៏តូចឆ្មារ រវាងអាមេរិកនិងរុស្ស៊ី
ចុះផ្សាយនៅថ្ងៃ៖
ស្តាប់ - ០៤:៣៥
តម្លៃប្រេង នៅលើទីផ្សារអន្តរជាតិ នៅតែស្ថិតក្នុងកម្រិតខ្ពស់ដដែល ដោយសារតែទំហំនៃការផលិត និងទំហំស្តុកមានតិច។ ទន្ទឹមគ្នានេះ រុស្ស៊ីដែលជាប្រទេសផលិតប្រេងដ៏សំខាន់មួយដែរ មិនអាចផលិតនាំចេញបានច្រើនទេ ដោយសារតែជាប់ទណ្ឌកម្មអន្តរជាតិ។ នៅថ្ងៃពុធខាងមុខនេះ ក្រុមប្រទេសផលិតប្រេង OPEP+ នឹងជួបប្រជុំគ្នា ទាក់ទិននឹងការផលិតប្រេង។ ក្រុមប្រទេស OPEP+ កំពុងតែស្ថិតក្នុងកាលៈទេសៈមួយដ៏លំបាក ដោយម្ខាងសហរដ្ឋអាមេរិកដាក់សំពាធ ទាមទារឲ្យដំឡើងការផលិត តែទន្ទឹមគ្នានេះគេមិនអាចធ្វើឲ្យរុស្ស៊ីទាស់ចិត្តបានទេ ព្រោះរុស្ស៊ីក៏ជាដៃគូដ៏សំខាន់ របស់OPEP។ តើក្រុមប្រទេសផលិតប្រេង អាចនឹងដំឡើងការផលិតបំពេញស្តុក ដើម្បីទាញតម្លៃប្រេងឲ្យចុះថោកដែរឬទេ?
បន្ទាប់ពីពិភពលោកបានពើបប្រទះនឹងវិបត្តិជំងឺឆ្លងកូវីដ១៩ ក្រុមប្រទេសផលិតប្រេង OPEP ដែលមានសមាជិកចំនួន១៣ប្រទេស ដឹកនាំដោយអារ៉ាប៊ីសាអូឌីត ព្រមទាំងដៃគូចំនួន១០ប្រទេសទៀត ដឹកនាំដោយរុស្ស៊ី បានរួមគ្នា កាត់បន្ថយការផលិតប្រេង ដើម្បីទាញចំនួនស្តុកឲ្យធ្លាក់ចុះ។ វិធានការនេះ បានជួយឲ្យប្រេងមានតម្លៃឡើងបន្តិចម្តងៗឡើងវិញ។
នៅក្នុងបរិបទសេដ្ឋកិច្ចសកល ដែលចាប់ផ្តើមងើបឡើងវិញជាបណ្តើៗ ក្រុមប្រទេសផលិតប្រេង បានកំណត់វិធានការ ដំឡើងការផលិតជាដំណាក់ បន្តិចម្តងៗដើម្បីបំពេញស្តុក។ ក៏ប៉ុន្តែនៅក្រោយការផ្ទុះសង្គ្រាមឈ្លានពានរបស់រុស្ស៊ី ទៅលើអ៊ុយក្រែន បញ្ហាវិបត្តិថាមពលបានទាញតម្លៃប្រេងឲ្យឡើងខ្ពស់ជាខ្លាំង អមជាមួយនឹងអតិផរណា ដែលបោះពួយមិនឈប់។
មានមតិខ្លះបានលើកឡើងថា ក្រុមប្រទេសផលិតប្រេង ត្រូវតែបង្កើនការផលិត បំពេញទីផ្សារ ដើម្បីឲ្យតម្លៃប្រេងធ្លាក់បន្តិចវិញ ខណៈជីវភាពប្រជាជនទូទៅកាន់តែលំបាក។ កាលពីពាក់កណ្តាលខែកក្កដា លោកប្រធានាធិបតី ចូ បៃដិន បានធ្វើដំណើរទៅកាន់អារ៉ាប៊ីសាអូឌីត ប្រទេសផលិតប្រេងដ៏ធំជាងគេ និងដែលជាក្បាលម៉ាស៊ីនធំរបស់ OPEP។ សហរដ្ឋអាមេរិក បានព្យាយាមដាក់សំពាធបញ្ចុះបញ្ចូល ឲ្យអារ៉ាប៊ីសាអូឌីត ត្រូវតែជំរុញឲ្យOPEP បង្កើនការផលិតប្រេង ឲ្យបានច្រើនជាងនេះ។ តម្លៃប្រេងចុះថោក លោកចូ បៃដិន ក៏អាចបានទទួលការសរសើ ពីប្រជាជនអាមេរិកដែរ ដែលកំពុងតែត្អូញត្អែរ មិនខុសពីប្រជាជនប្រទេសផ្សេងៗទៀត រឿងប្រេងឥន្ធនៈឡើងថ្លៃ។
តែយ៉ាងណា ការសម្រេចដំឡើងការផលិតប្រេង គឺវាមិនមែនជារឿងស្រួលទេ ជាពិសេសក្នុងកាលៈទេសៈនេះ ដែលរុស្ស៊ី ដែលជាដៃគូដ៏សំខាន់មួយរបស់OPEP មិនអាចលក់ប្រេងបាន ព្រោះជាប់ទណ្ឌកម្មសេដ្ឋកិច្ច។ OPEP មិនអាចឆក់ឱកាសនេះ ដំឡើងការផលិតតែម្នាក់ឯង ទុកឲ្យរុស្ស៊ីមានការថ្នាំងថ្នាក់ចិត្តឡើយ ប្រសិនបើចង់រក្សាការសហការជាមួយគ្នាតទៅទៀត។
យោងតាមវិទ្យាស្ថាន Energy Aspects ប្រចាំនៅទីក្រុងឡុងដ៍ គឺគេជឿថា ក្រុមប្រទេស OPEP រួមជាមួយសម្ព័ន្ធមិត្ត ដែលហៅកាត់ថា OPEP+ អាចនឹងដំឡើងការផលិត ក៏ប៉ុន្តែក្នុងទំហំតិចតួចស្តួចស្តើង។ OPEP+ ត្រូវធ្វើតាមការចង់បានរបស់អាមេរិកមែន តែក៏ត្រូវតែថ្លឹងថ្លែងមិនឲ្យរុស្ស៊ីខឹងច្រឡោតឡើយ។ លោក Tamas Vargas អ្នកវិភាគម្នាក់នៅ PVM Energy បានលើកឡើងថា អារ៉ាប៊ីសាអូឌីតក្នុងនាមជាក្បាលម៉ាស៊ីនOPEP កំពុងតែដើរលើខ្សែមួយដ៏តូចឆ្មារ ដោយត្រូវប្រយ័ត្នប្រយែងបំផុត រវាងឥទ្ធិពលអាមេរិក និងរុស្ស៊ី។ OPEP អាចដំឡើងការផលិតប្រេងបន្តិច ដើម្បីកុំឲ្យអាមេរិកបាក់មុខតែប៉ុណ្ណោះ។
ផ្អែកតាមលោក Carsten Fritsch អ្នកជំនាញនៅធនាគារ Commerzbank គឺក្រុមប្រទេសOPEP+ អាចនឹងសន្មត់គ្នានៅថ្ងៃពុធខាងមុខនេះ ដំឡើងកម្មវត្ថុផលិតបន្តិចបន្តួចតែប៉ុណ្ណោះ សម្រាប់ខែកញ្ញា ដើម្បីបំពេញចន្លោះគំលាត រវាងកម្មវត្ថុនិងការផលិតជាក់ស្តែង។ ដូចគ្នាដែរ សម្រាប់លោក Matthew Holland អ្នកវិភាគនៅ វិទ្យាស្ថាន Energy Aspects គឺOPEP មិនអាចធ្វើឲ្យខូចសម្ព័ន្ធភាពជាមួយរុស្ស៊ីបានឡើយក្នុងពេលនេះ ដោយត្រូវបង្អង់រងចាំចរចាគ្នា បង្កើតកិច្ចព្រមព្រៀងរយៈពេលវែងមួយទៀត នៅរវាងដំណាច់ឆ្នាំ២០២២៕
ជាងនេះទៀត ការដំឡើងការផលិតប្រេង គឺវាជារឿងមួយលំបាកណាស់ សម្រាប់ប្រទេសសមាជិកOPEP ភាគច្រើន។ ជានិច្ចជាកាល ទំហំនៃការផលិតរួម ដែលក្រុមប្រទេសOPEP បានសន្មត់គ្នា គឺមានតែលើក្រដាសប៉ុណ្ណោះ។ ឯការផលិតបានជាក់ស្តែង គឺមានទាបជាងកម្មវត្ថុជានិច្ច។ ជាក់ស្តែង យោងតាមតួលេខរបស់អង្គការថាមពលអន្តរជាតិ AIE ទំហំផលិតប្រេងជាក់ស្តែងក្នុងខែមិថុនាកន្លងទៅ គឺមានទាបជាងកម្មវត្ថុកំណត់ ដល់ទៅ២,៨លានធុងបារីលឯណោះ។
ដោយសារតែបញ្ហាអស្ថិរភាពនយោបាយ ជម្លោះប្រដាប់អាវុធ កង្វះហេដ្ឋារចនាសម្ព័ន្ធគ្រប់គ្រាន់ជាដើម ប្រទេសខ្លះដូចជា អង់ហ្គោឡា និងនីហ្សេរីយ៉ាជាដើម គឺមិនអាចបន្ថែមការផលិតបានលើសនេះទេ បើទោះបីជាចង់ក៏ដោយ។ ក្នុងចំណោមប្រទេស ដែលអាចនៅមានលទ្ធភាពបង្កើនការផលិត គឺមានតែអារ៉ាប៊ីសាអូឌីត និង អេមីរ៉ាត់អារ៉ាប់រួមទេ។ តែយ៉ាងណា អារ៉ាប៊ីសាអូឌីត បានបញ្ជាក់ហើយ ថាខ្លួនមិនអាចផលិតបន្ថែម យកមកបំពេញស្តុករបស់ប្រទេសផ្សេងបានទេ។ ការប្រកាសបែបនេះ ក៏ជាវិធីការពារខ្លួន ព្រោះអារ៉ាប៊ីសាអូឌីត មិនចង់ឲ្យរុស្ស៊ីមើលឃើញថាខ្លួនធ្វើតាមអាមេរិកជ្រុលពេក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ