បារាំង៖ ហេតុអ្វីអាកាសធាតុក្តៅខ្លាំងធ្វើឲ្យប៉ះពាល់ដល់រោងចក្រនុយក្លេអ៊ែរ?
ចុះផ្សាយនៅថ្ងៃ៖
ស្តាប់ - ០៤:៣១
នៅក្នុងអំឡុងពេលកំពុងប្រឈមនឹងបញ្ហាថាមពលស្រាប់ ក្រុមហ៊ុនផលិតអគ្គិសនីបារាំងបានឲ្យដឹងថា ការផលិតអគ្គិសនីដើរដោយថាមពលនុយក្លេអ៊ែរកំពុងតែជួបនឹងភាពរអាក់រអួល ដោយរ៉េអាក់ទ័រនុយក្លេអ៊ែរជាច្រើនកន្លែងត្រូវគេកាត់បន្ថយដំណើរការ។ មូលហេតុ គឺដោយសារតែបញ្ហាអាកាសធាតុក្តៅខ្លាំង។ តើហេតុអ្វីបានជាអាកាសធាតុក្តៅ នាំឲ្យប៉ះពាល់ទៅដល់ដំណើរការរ៉េអាក់ទ័រនុយក្លេអ៊ែរបែបនេះ?
យើងដឹងថា នៅក្នុងដំណើរការនៃរ៉េអាក់ទ័រនុយក្លេអ៊ែរ ការផលិតអគ្គិសនីត្រូវធ្វើទៅតាមយន្តការចម្បងមួយ គឺប្រតិកម្មនុយក្លេអ៊ែរបង្កើតជាកម្តៅ រួចហើយកម្តៅនេះបង្កើតជាកម្លាំងចំហាយទឹកទៅបង្វិលតួប៊ីនផលិតអគ្គិសនី។
នៅក្នុងយន្តការនេះ កម្តៅ គឺជាគន្លឹះចម្បងក្នុងការផលិតអគ្គិសនី ហើយក្នុងពេលជាមួយគ្នា កម្តៅក៏អាចជាគ្រោះថ្នាក់មួយផងដែរ ពីព្រោះថា នៅពេលដែលកម្តៅកើនឡើងខ្លាំង គ្រប់គ្រងមិនបានវាអាចនឹងធ្វើឲ្យប៉ះពាល់ទៅដល់ស្នូលរ៉េអាក់ទ័រ ដែលជាកន្លែងផ្ទុកសារធាតុនុយក្លេអ៊ែរ ហើយបង្កឲ្យមានការផ្ទុះ ឬលេចធ្លាយវិទ្យុសកម្ម បង្កើតទៅជាវិនាសកម្មនុយក្លេអ៊ែរ ដូចអ្វីដែលធ្លាប់កើតមានកាលពីពេលកន្លង ដូចជា នៅឈែរណូប៊ីល ឬក៏នៅហ្វូគូស្ហ៊ីម៉ាជាដើម។
វិធានការចម្បង នៅក្នុងការរក្សាសុវត្ថិភាពរ៉េអាក់ទ័រនុយក្លេអ៊ែរ គឺការគ្រប់គ្រងសីតុណ្ហភាព ហើយកត្តាចម្បងមិនអាចខ្វះបាន នៅក្នុងការគ្រប់គ្រងសីតុណ្ហភាពរ៉េអាក់ទ័រនុយក្លេអ៊ែរនេះ គឺទឹក ហើយតម្រូវការទឹករបស់រ៉េអាក់ទ័រនុយក្លេអ៊ែរនីមួយៗ គឺមានច្រើន។ ហេតុដូច្នេះហើយបានជាគេសង្កេតឃើញថា មជ្ឈមណ្ឌលនុយក្លេអ៊ែរតែងតែត្រូវគេសាងសង់នៅក្បែរប្រភពទឹក ដូចជា សមុទ្រ ឬក៏ទន្លេ ជាដើម។
យន្តការនៃការគ្រប់គ្រងសីតុណ្ហភាពរ៉េអាក់ទ័រនុយក្លេអ៊ែរ ត្រូវធ្វើឡើងដោយការបូមទឹកពីប្រភពទឹកធម្មជាតិចូលទៅក្នុងរ៉េអាក់ទ័រ ដើម្បីស្រូបកម្តៅពីរ៉េអាក់ទ័រ មុននឹងបញ្ចេញទឹកនេះ ទៅក្នុងប្រភពទឹកធម្មជាតិវិញ ដោយទឹកដែលបញ្ចេញពីរ៉េអាក់ទ័រនុយក្លេអ៊ែរនេះ គឺជាទឹកក្តៅ។
នៅបារាំង ការបញ្ចេញទឹកក្តៅពីមជ្ឈមណ្ឌលនុយក្លេអ៊ែរទៅក្នុងប្រភពទឹកធម្មជាតិ ត្រូវធ្វើដោយគោរពទៅតាមដែនកំណត់មួយ ហើយដែនកំណត់នេះ គឺវាអាស្រ័យទៅលើសីតុណ្ហភាពទឹក នៅក្នុងប្រភពទឹកធម្មជាតិ នៅតាមមជ្ឈមណ្ឌលនុយក្លេអ៊ែរនីមួយៗ។ គោលដៅ គឺដើម្បីការពារបរិស្ថាន និងជីវចម្រុះ ដែលពាក់ព័ន្ធនឹងប្រភពទឹកធម្មជាតិ។
នៅក្នុងការអនុវត្តជាក់ស្តែង អាជ្ញាធរជាអ្នកកំណត់ថា មជ្ឈមណ្ឌលនុយក្លេអ៊ែរណាមួយ អាចបញ្ចេញទឹកក្តៅពីរ៉េអាក់ទ័រ ក្នុងសីតុណ្ហភាពខ្ពស់បំផុតត្រឹមកម្រិតណា ទៅក្នុងប្រភពទឹកធម្មជាតិ។
នៅពេលដែលទឹកពីប្រភពធម្មជាតិកាន់តែក្តៅ ធ្វើឲ្យគម្លាត រវាងសីតុណ្ហភាពទឹកដែលគេបូមពីប្រភពទឹកធម្មជាតិទៅក្នុងរ៉េអាក់ទ័រ និងកម្រិតសីតុណ្ហភាពអតិបរមា ដែលគេអាចបញ្ចេញពីរ៉េអាក់ទ័រមកវិញ មានតិចតួច យន្តការទប់កម្តៅរ៉េអាក់ទ័រនុយក្លេអ៊ែរក៏លែងសូវមានប្រសិទ្ធភាព ដែលជាហេតុតម្រូវឲ្យគេកាត់បន្ថយកម្លាំងរ៉េអាក់ទ័រក្នុងការផលិតអគ្គិសនី។
នេះហើយជាអ្វីដែលកំពុងតែកើតឡើងនៅក្នុងប្រទេសបារាំង ដោយក្រោយពីមានរលកកម្តៅជាច្រើនលើកផ្ទួនៗគ្នា សីតុណ្ហភាពទឹកនៅតាមទន្លេមួយចំនួនបានកើនឡើងខ្លាំង ដែលជាហេតុតម្រូវឲ្យក្រុមហ៊ុនផលិតអគ្គិសនីត្រូវកាត់បន្ថយដំណើរការរ៉េអាក់ទ័រឲ្យមកនៅកម្រិតទាបបំផុត ដោយរ៉េអាក់ទ័រខ្លះ ដែលមានកម្លាំង ១៣០០ម៉េហ្កាវ៉ាត់ ត្រូវកាត់បន្ថយមកនៅត្រឹមប្រមាណជា ៣០០ម៉េហ្កាវ៉ាត់តែប៉ុណ្ណោះ។
ជាការពិតថា មកទល់នឹងពេលនេះ បារាំងនៅមិនទាន់ប្រឈមនឹងបញ្ហាខ្វះអគ្គិសនីប្រើប្រាស់នោះទេ ហើយអាជ្ញាធរបារាំងក៏កំណត់ផងដែរ អំពីការលើកលែងនៅក្នុងករណីចាំបាច់ ពោលគឺ នៅក្នុងករណីត្រូវប្រឈមនឹងកង្វះអគ្គិសនី ក្រុមហ៊ុនផលិតអគ្គិសនីអាចបញ្ចេញទឹកក្តៅពីរ៉េអាក់ទ័រនុយក្លេអ៊ែរ ក្នុងសីតុណ្ហភាពខ្ពស់ជាងកម្រិតអតិបរមាបាន ដើម្បីធានាដំណើរការរ៉េអាក់ទ័រក្នុងការផលិតថាមពលអគ្គិសនី។
ទោះជាយ៉ាងណា វាឆ្លុះបញ្ចាំងឲ្យឃើញថា ថាមពលនុយក្លេអ៊ែរ ដែលគេសំឡឹងឃើញថាជាវិស័យចម្បងមួយ ក្នុងការជួយកាត់បន្ថយការបញ្ចេញឧស្ម័ន និងកាត់បន្ថយការឡើងកម្តៅផែនដី ក៏ប៉ុន្តែ វិស័យនុយក្លេអ៊ែរខ្លួនឯងផ្ទាល់នេះក៏អាចនឹងត្រូវប្រឈមផងដែរ ទៅនឹងឡើងកម្តៅផែនដី ដោយក្នុងរយៈពេលវែងខាងមុខ បញ្ហាប្រឈមរបស់រ៉េអាក់ទ័រនុយក្លេអ៊ែរ មិនមែនត្រឹមតែកើតឡើងដោយសារតែកំណើនសីតុណ្ហភាពទឹកនោះទេ។ ការថយចុះនៃបរិមាណទឹកនៅក្នុងប្រភពទឹកធម្មជាតិក៏នឹងជាបញ្ហាចោទដ៏ចម្បងមួយផងដែរ ពីព្រោះថា បើតាមការព្យាកររបស់ការិយាល័យភគព្ភសាស្រ្តបារាំង ចាប់ពីពេលនេះ ទៅដល់ឆ្នាំ២០៥០ខាងមុខ បរិមាណទឹកនៅតាមប្រភពទឹកធម្មជាតិនៅទូទាំងប្រទេសបារាំង អាចនឹងត្រូវថយចុះ ក្នុងចន្លោះ ពី ១០% ទៅ ៤០% ដោយក្នុងអំឡុងរដូវក្តៅ ការថយចុះនៃបរិមាណទឹកនេះ អាចនឹងមានរហូតទៅដល់ ៦០% ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ