ល្បែងនយោបាយការបរទេស “ជើងមួយជាន់ទូកពីរ” របស់ឥណ្ឌា
ចុះផ្សាយនៅថ្ងៃ៖
ស្តាប់ - ០៧:០៨
វិបត្តិសង្គ្រាមនៅអ៊ុយក្រែន បានរំលេចឲ្យឃើញកាន់តែច្បាស់ អំពីគោលនយោបាយការទូតរបស់ឥណ្ឌា ដែលមានលក្ខណៈជាតិនិយម និងមិនខ្វល់ពីតម្លៃមនសិកា នៅក្នុងការសន្យាជាមួយសហគមន៍អន្តរជាតិ។ ជានិច្ចជាកាល ឥណ្ឌាអះអាង ថាខ្លួនគឺជាដៃគូរបស់ក្រុមប្រទេសលោកខាងលិច ដោយប្រកាសការពារក្របខណ្ឌច្បាប់អន្តរជាតិ សិទ្ធិសេរីភាព និងលទ្ធិប្រជាធិបតេយ្យ។ តែទន្ទឹមគ្នានេះ ឥណ្ឌា គឺជាប្រទេសដែលស្និទនឹងរុស្ស៊ីបំផុតផងដែរ តាមរយៈការសហការជាច្រើន ទាំងសេដ្ឋកិច្ច និងវិស័យយោធា។ លោកនាយករដ្ឋមន្ត្រីឥណ្ឌា ណារិន្ទ្រ ម៉ូឌី មានបំណងឲ្យឥណ្ឌា ប្រកាន់គោលជំហរ “ពហុបក្សសម្ព័ន្ធ” ពោលគឺត្រូវជាមួយគ្រប់ភាគី ទាំងរុស្ស៊ី ទាំងបស្ចិមលោក ឲ្យតែកាលៈទេសៈ អាចហុចផលចំណេញមកឲ្យឥណ្ឌា។
កាលពីថ្ងៃទី១៦កញ្ញា នៅក្នុងឱកាសប្រជុំ អង្គការសហប្រតិបត្តិការសៀងហៃ នៅក្រុងសាម៉ារកង់ដ៍ ប្រទេសអ៊ូហ្សបេគីស្ថាន លោកណារិន្ទ្រ ម៉ូឌី បានថ្លែងប្រាប់ទៅលោកពូទីនថា “ពេលវេលានេះ មិនមែនជាពេលធ្វើសង្គ្រាមទេ”។ សំដីដែលហាក់បានស្តីបន្ទោសដោយប្រយោល ទៅលើលោកពូទីន ដែលបានបង្កសង្គ្រាមនៅអ៊ុយក្រែន។ តែយ៉ាងណាសំដីរបស់លោកណារិន្ទ្រ ម៉ូឌី នេះវាហាក់យឺតពេលបន្តិចទៅហើយ ខណៈដែលគ្រប់គ្នាបានដឹងយ៉ាងច្បាស់ ថាឥណ្ឌា បានបដិសេធ មិនប្រកាសថ្កោលទោសរុស្ស៊ីទេ កាលពីពេលដែលរុស្ស៊ី លើកទ័ពវាយលុកចូលអ៊ុយក្រែនដំបូង។
គួររំលឹកថា នៅឆ្នាំ២០១៧ លោកនាយករដ្ឋមន្ត្រីឥណ្ឌា ណារិន្ទ្រ ម៉ូឌី បាននាំឥណ្ឌា ឲ្យចូលជាសមាជិក នៃអង្គការសហប្រតិបត្តិការសៀងហៃ ដែលមានចិន និងរុស្ស៊ី ជាមេគំនិត ហើយដែលគេដឹងថា ជាក្រុមសម្ព័ន្ធភាព ប្រជែងជាមួយបស្ចិមលោក។ ភ្លាមៗក្រោយពេលរុស្ស៊ីលើកទ័ពចូលឈ្លានអ៊ុយក្រែន ក្រុមបស្ចិមលោកបានព្យាយាមអូសទាញឥណ្ឌា ឲ្យចូលរួមនៅក្នុងការប្រកាសថ្កោលទោសរុស្ស៊ី។ ក៏ប៉ុន្តែឥណ្ឌាបានបដិសេធ ហើយបានត្រឹមប្រកាសឲ្យភាគីជម្លោះ អ៊ុយក្រែន និងរុស្ស៊ី ចរចាគ្នា។
ដំណើរបញ្ច្រាសទិសនៃនយោបាយការបរទេសរបស់ឥណ្ឌា មានរូបរាង្គកាន់តែច្បាស់ ជាពិសេសនៅមុនពេលចេញដំណើរ ទៅចូលរួមជំនួបកំពូលនៅក្រុងសាម៉ារកង់ដ៍ នៅពេលលោកណារិន្ទ្រ ម៉ូឌី បានទទួលជួបលោកស្រីរដ្ឋមន្ត្រីការបរទេសបារាំង នៅក្រុងញូដេលី។ ក្នុងជំនួបនោះ លោកម៉ូឌី បានប្រកាសអំពីជំហរដ៏ម៉ឺងម៉ាត់របស់ឥណ្ឌា ក្នុងការកសាងសហប្រតិបត្តិការផ្នែកកងទ័ព នៅក្នុងសម្ព័ន្ធភាពឥណ្ឌូប៉ាស៊ីហ្វិក ដែលគ្រប់គ្នាដឹងថា មានកម្មវត្ថុសំដៅទប់ជាមួយឥទ្ធិពលវាតទីរបស់ចិន។
អះអាងថាចង់នៅកណ្តាល តែសំរុកទិញប្រេងដែលរុស្ស៊ីលក់ឡៃឡុង
តើឥណ្ឌា នៅជាមួយក្រុមណាមួយឲ្យប្រាកដ? នៅជាមួយចិន-រុស្ស៊ី ឬនៅ ជាមួយក្រុមប្រទេសលោកខាងលិច? អាមេរិក និងអឺរ៉ុប ធ្លាប់បានសង្ឃឹមថា សង្គ្រាមនៅអ៊ុយក្រែន ប្រហែលជាអាចរុញឥណ្ឌា ឲ្យងាកមកខាងខ្លួន នៅពេលឥណ្ឌាបានឃើញអំពើបំពានឥតខ្មាស របស់លោកពូទីន។ ក៏ប៉ុន្តែទីបំផុត ក្រុមប្រទេសលោកខាងលិច បានត្រឹមខកចិត្ត ព្រោះឥណ្ឌាមិនត្រឹមតែមិនថ្កោលទោសរុស្ស៊ី ហើយថែមទាំងមិនបានចូលរួម ដាក់ទណ្ឌកម្មសេដ្ឋកិច្ចទៅលើរុស្ស៊ី ថែមទៀត។
ជាច្រើនឆ្នាំមកហើយ ដែលឥណ្ឌាបានប្រកាសខ្លួន សហការជាមួយក្រុមប្រទេសលោកខាងលិច។ តែទន្ទឹមនឹងនេះ រុស្ស៊ីមិនដែលទៅណាឆ្ងាយពីឥណ្ឌាទេ។ រុស្ស៊ីគឺជាអ្នកផ្គត់ផ្គង់អាវុធដ៏សំខាន់មួយរបស់ឥណ្ឌា។ ជានិច្ចជាកាល ឥណ្ឌាតែងតែបោះឆ្នោតប្រឆាំង ឬបោះឆ្នោតអនុបវាទ ទៅលើការប្រកាសថ្កោលទោសរុស្ស៊ី នៅក្នុងក្របខណ្ឌក្រុមប្រឹក្សាសន្តិសុខ។ នៅក្នុងបរិបទសង្គ្រាមនៅអ៊ុយក្រែន ឥណ្ឌាបានត្រឹមតែចុះហត្ថលេខារួមជាមួយគ្នា ក្នុងក្របខណ្ឌ G7 កាលពីខែមិថុនា ដែលប្រកាសសន្យាគោរពអធិបតេយ្យភាព បូរណៈភាពដែនដីរបស់ប្រទេសនីមួយៗ។
ទន្ទឹមគ្នានេះដែរ ឥណ្ឌាបានសំរុកទិញប្រេងរបស់រុស្ស៊ីយ៉ាងច្រើនសន្ធឹក បន្ទាប់ពីរុស្ស៊ីបានលក់ឡៃឡុង ក្នុងតម្លៃថោក ព្រោះដោយសារតែទណ្ឌកម្មបស្ចិមលោក។ ៦ខែក្រោយសង្គ្រាមនៅអ៊ុយក្រែន រុស្ស៊ីបានក្លាយជាអ្នកលក់ប្រេងឲ្យឥណ្ឌា ច្រើនលើសអារ៉ាប៊ីសាអូឌីតទៅទៀត។ ដូចគ្នាដែរ ផលិតផលជីកសិកម្មរបស់រុស្ស៊ី នាំចូលទៅឥណ្ឌា បានកើនទំហំ មួយគុណជា៨ឯណោះ។ នៅក្រុងសាម៉ារកង់ លោកពូទីន បានថ្លែងទៅកាន់លោកណារិន្ទ្រ ម៉ូឌី ដោយបានអបអរសាទរ ចំពោះ ការពង្រឹងចំណងសហការទ្រង់ទ្រាយធំ នៅក្នុងវិស័យថាមពល ប្រេង ឧស្ម័ន និងឧស្សាហកម្មនុយក្លេអ៊ែរ។
"ទ្រឹស្តីពហុបក្សសម្ព័ន្ធ"
ជាការពិតណាស់ សង្គ្រាមអ៊ុយក្រែន មិនត្រឹមតែមិនបានបិទបញ្ចប់គោលនយោបាយការទូត ជើងមួយជាន់ទូកពីរ របស់ឥណ្ឌានោះទេ តែវាបានរំលេចឲ្យឃើញកាន់តែច្បាស់ នូវយុទ្ធសាស្ត្រ “ពហុបក្សសម្ព័ន្ធ” ដែលឥណ្ឌាបាននិងកំពុងអនុវត្ត។ ទ្រឹស្តីយុទ្ធសាស្ត្រ “ពហុបក្សសម្ព័ន្ធ” នេះ ត្រូវបានផ្តួចផ្តើមគំនិត ដោយលោក Subrahmanyam Jaishanka រដ្ឋមន្ត្រីការបរទេសឥណ្ឌា ហើយដែលលោកបានសរសេរចងក្រងក្នុងសៀវភៅ The Indian Way បោះពុម្ពនៅឆ្នាំ២០២០។ ទ្រឹស្តីពហុបក្សសម្ព័ន្ធថ្មីរបស់ឥណ្ឌានេះ គឺវាផ្ទុយគ្នាស្រលះ ពី “ទ្រឹស្តីមិនចូលបក្សសម្ព័ន្ធ” ដែលឥណ្ឌាធ្លាប់បានអនុវត្តកាលពីជំនាន់លោកណេរូ។
រដ្ឋមន្ត្រីការបរទេសឥណ្ឌាបច្ចុប្បន្ន បានថ្លែងដោយឥតលាក់លៀមថា គោលនយោបាយការបរទេសរបស់ឥណ្ឌា គឺត្រូវតែបម្រើផលប្រយោជន៍ឥណ្ឌាទាំងស្រុង ដោយមិនគិតខ្វល់ពីការពិចារណាផ្នែកសីលធម៌ មនសិកា ឬក៏ក្របខណ្ឌនៃតម្លៃច្បាប់អន្តរជាតិឡើយ។ មានន័យថា ឥណ្ឌានឹងមិនចូលក្នុងបក្សសម្ព័ន្ធណាមួយផ្តាច់មុខឡើយ តែឥណ្ឌានឹងចូលរួមច្រើនកន្លែងព្រមគ្នា តាមរយៈឱកាសថ្មីៗដែលអាចហុចផលឥណ្ឌា។
គឺយុទ្ធសាស្ត្រឆក់ឱកាសគ្រប់កាលៈទេសៈ ឲ្យតែឥណ្ឌាបានផលនេះហើយ ដែលរដ្ឋមន្ត្រីការបរទេសរបស់អ៊ុយក្រែន បានបរិហារចំៗ កាលពីពេលថ្មីៗនេះ។ លោក Dmytro Koulba បានលើកឡើងថា នៅពីក្រោយពាក្យថា “មិនចូលបក្សសម្ព័ន្ធណាមួយ” របស់ឥណ្ឌា គឺវាបង្កប់ដោយភាពស្រេកឃ្លានចង់បានប្រយោជន៍ ដ៏អត្មានិយមបំផុតរបស់ឥណ្ឌា ខណៈដែលអ៊ុយក្រែន និងក្រុមប្រទេសលោកខាងលិច កំពុងតែធ្វើពលីកម្ម។
នៅលើវិស័យកងទ័ពវិញ ឥណ្ឌាក៏បានដើរលើផ្លូវបញ្ច្រាសគ្នា២ដែរ។ ដើមខែកញ្ញានេះ កងទ័ពឥណ្ឌា បានចូលរួមយ៉ាងសកម្ម នៅក្នុងកម្មវិធីសមយុទ្ធយោធាដ៏ធំមហិមា Vostok 2022 រៀបចំដោយរុស្ស៊ី និងចិន។ ហើយនៅខែតុលាខាងមុខនេះ ឥណ្ឌានឹងចូលរួមក្នុងសមយុទ្ធយោធា ជាមួយអាមេរិក នៅរដ្ឋ Uttarakhand ប្រជុំភ្នំហិមាល័យ។
អត្មានិយមដោយឥតអៀនខ្មាស
លោក Christophe Jaffrelot នយោបាយវិទូ ជំនាញតំបន់អាស៊ីខាងត្បូង បានលើកឡើងថា អ្នកនយោបាយហិណ្ឌូជាតិនិយម ដែលកំពុងតែដឹងនាំឥណ្ឌានាពេលបច្ចុប្បន្ន កំពុងតែអនុវត្តគោលនយោបាយគ្មានមនសិកា និងគ្មានភាពខ្មាសអៀនអ្វីទាំងអស់ ឲ្យតែខ្លួនបានប្រយោជន៍។ ក្រុមប្រទេសលោកខាងលិច បានចាប់ផ្តើមភ្លឺភ្នែកខ្លះហើយ ថាកន្លងមកខ្លួនបានចាញ់កល ល្បែងឆ្ពិនភ្នែករបស់ឥណ្ឌា។ លោកអះអាងថា សមយុទ្ធយោធា Vostok 2022 ដែលឥណ្ឌាបានចូលរួមជាមួយរុស្ស៊ី ទាំងដែលកងទ័ពរុស្ស៊ីកំពុងតែធ្វើសង្គ្រាម សម្លាប់ជីវិតជនស៊ីវីលអ៊ុយក្រែននោះ គឺវាប្រៀបបីដូចជាឥណ្ឌា បានជេរប្រមាថមកលើក្រុមបស្ចិមលោកដូច្នេះដែរ។ ចំណុចមួយដ៏សំខាន់នៃទ្រឹស្តីសរសេរក្នុងសៀវភៅរបស់ លោក Subrahmanyam Jaishanka គឺការមិនឲ្យតម្លៃសូម្បីប៉ុនចុងក្រចក មកលើបស្ចិមលោក។
នៅពីក្រោយស្នាមញញឹម ដៃសំពះប្រណមស្វាគមន៍ នៅពេលជួបជាមួយថ្នាក់ដឹកនាំបស្ចិមលោកម្តងៗ ធាតុពិតគឺលោកណារិន្ទ្រ ម៉ូឌី បានកាច់ចង្កូតឥណ្ឌា ឲ្យងាកឆ្ងាយពីគោលនយោបាយពង្រឹងមិត្តភាព ជាមួយបស្ចិមលោក ដែលលោកអតីតនាយករដ្ឋមន្ត្រីឥណ្ឌា Manmohan Sing បានអនុវត្ត។ ជាមួយនឹងប្រជាជនដល់ទៅជាង ១៣០០លាននាក់ ឥណ្ឌាក្រោមការដឹកនាំរបស់លោកណារិន្ទ្រ ម៉ូឌី ដឹងខ្លួនយ៉ាងច្បាស់ថា ក្រុមបស្ចិមលោកត្រូវការខ្លួនកម្រឹតណា។ ចាប់ពីខែធ្នូខាងមុខនេះទៅ ឥណ្ឌានឹងធ្វើជាប្រធានវិលជុំ នៃក្រុមប្រទេសG20។ លោកណារិន្ទ្រ ម៉ូឌី មានមហិច្ឆតា ចង់ធ្វើឲ្យឥណ្ឌា ក្លាយជាមហាអំណាចពិភពលោកមួយនឹងគេ តែសួរថា ជាមហាអំណាចអត្មានិយមបម្រើតែប្រយោជន៍ខ្លួន ឬក៏ជាមហាអំណាចបម្រើប្រយោជន៍រួមរបស់មនុស្សជាតិ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ