តើលោកបៃដិនកំពុងផ្លាស់ប្តូរយុទ្ធសាស្រ្តអាមេរិកចំពោះតៃវ៉ាន់?
ចុះផ្សាយនៅថ្ងៃ៖
ស្តាប់ - ០៤:៣០
នៅក្នុងបទសម្ភាសន៍ជាមួយទូរទស្សន៍អាមេរិក (CBS) កាលពីថ្ងៃអាទិត្យ លោកប្រធានាធិបតីអាមេរិក ចូ បៃដិន បានលើកឡើងយ៉ាងច្បាស់ៗថា អាមេរិកនឹងបញ្ជូនកងទ័ពចូលទៅជួយការពារតៃវ៉ាន់ ក្នុងករណីមានការឈ្លានពានពីសំណាក់ចិនដីគោក។ នេះមិនមែនជាលើកទីមួយទេ ដែលលោកបៃដិន បានលើកឡើងច្បាស់ៗពីការប្តេជ្ញាចូលជួយតៃវ៉ាន់បែបនេះ។ ហើយការលើកឡើងម្តងហើយម្តងទៀតបែបនេះ ធ្វើឲ្យគេចោទជាសំណួរថា តើអាមេរិកកំពុងតែផ្លាស់ប្តូរគោលនយោបាយយុទ្ធសាស្រ្តជុំវិញសំណុំរឿងតៃវ៉ាន់នេះឬក៏យ៉ាងណា?
នៅក្នុងសំណុំរឿងតៃវ៉ាន់ អាមេរិកតែងតែប្រកាន់នូវគោលនយោបាយយុទ្ធសាស្រ្តមួយ ដែលគេហៅជាភាសាអង់គ្លេសថា “Strategic Ambiguity” គឺចេតនាមិនបង្ហាញជំហរច្បាស់លាស់ថា តើអាមេរិកនឹងចាត់វិធានការបែបណា ក្នុងករណីមានសង្រ្គាមរវាងចិន និងតៃវ៉ាន់។ ចូលជួយតៃវ៉ាន់ ឬមិនចូលជួយ ក៏មិនប្រាកដ។ បើជួយ តើជួយត្រឹមបញ្ជូនសព្វាវុធ និងជំនួយយោធា ឬបញ្ជូនទ័ពចូលធ្វើសង្រ្គាម ក៏មិនច្បាស់។
គោលនយោបាយយុទ្ធសាស្រ្ត “Strategic Ambiguity” នេះ អាមេរិកតែងតែប្រកានខ្ជាប់ អស់រយៈពេលជាច្រើនទសវត្សរ៍មកហើយ គឺចាប់តាំងពីឆ្នាំ១៩៧៩ ក្រោយពេលដែលអាមេរិកប្រកាសទទួលស្គាល់នយោបាយ “ចិនតែមួយ” គឺទទួលស្គាល់រដ្ឋាភិបាលក្រុងប៉េកាំងថាជាអំណាចស្របច្បាប់តែមួយគត់របស់ចិន ក៏ប៉ុន្តែ ក្នុងពេលជាមួយគ្នា អាមេរិកនៅតែបន្តការពារតៃវ៉ាន់ឲ្យស្ថិតនៅដាច់ដោយឡែកពីអំណាចគ្រប់គ្រងរបស់ក្រុងប៉េកាំង។
គន្លឹះនៃយុទ្ធសាស្រ្ត “Strategic Ambiguity” នេះ គឺដើម្បីកំញើញភាគីទាំងសងខាង ពោលគឺ ចំពោះចិន អាមេរិកមិនចង់ឲ្យចិនមើលមកឃើញថា អាមេរិកប្រាកដជាមិនចូលជួយតៃវ៉ាន់ ដើម្បីកុំឲ្យចិនបានចិត្តចូលឈ្លានពានតៃវ៉ាន់ ហើយក្នុងពេលជាមួយគ្នា ចំពោះតៃវ៉ាន់វិញ អាមេរិកក៏មិនធានាច្បាស់លាស់ថានឹងចូលជួយតៃវ៉ាន់ ដើម្បីកុំឲ្យមេដឹកនាំតៃវ៉ាន់បានចិត្តប្រកាសឯករាជ្យ នាំឲ្យចិនចូលឈ្លានពាន ហើយត្រូវផ្ទុះសង្គ្រាម។
ក៏ប៉ុន្តែ នៅក្នុងរយៈពេលប្រមាណជាមួយឆ្នាំកន្លងទៅនេះ យើងឃើញថា លោកប្រធានាធិបតីអាមេរិក ចូ បៃដិន តែងតែបានបង្ហាញពីជំហរផ្ទុយពីយុទ្ធសាស្រ្ត “Strategic Ambiguity” ដោយបានលើកឡើងម្តងហើយម្តងទៀតថា អាមេរិកនឹងចូលជួយតៃវ៉ាន់ប្រសិនបើមានការឈ្លានពានពីសំណាក់ចិន ដោយលើកចុងក្រោយ គឺក្នុងបទសម្ភាសន៍ជាមួយទូរទស្សន៍ CBS កាលពីថ្ងៃអាទិត្យ លោកបៃដិនបានបញ្ជាក់ច្បាស់ៗថា ការជួយតៃវ៉ាន់នេះ គឺមិនមែនត្រឹមតែបញ្ជូនសព្វាវុធ និងជំនួយយោធា ដូចអាមេរិកធ្វើចំពោះអ៊ុយក្រែននៅក្នុងពេលបច្ចុប្បន្ននេះទេ ក៏ប៉ុន្តែ គឺបញ្ជូនទាហានអាមេរិកឲ្យចូលទៅធ្វើសង្គ្រាមដោយផ្ទាល់។
គេសង្កេតឃើញថា នៅក្រោយពីមានការលើកឡើងរបស់លោកចូ បៃដិន ទាំងការលើកឡើងកាលពីថ្ងៃអាទិត្យ ក៏ដូចជា កាលពីលើកមុនៗ មន្រ្តីរដ្ឋាភិបាលរបស់លោកតែងតែបាននាំគ្នាចេញមុខមកស្រាយបំភ្លឺ ដោយបញ្ជាក់ថា អ្វីដែលលោកបៃដិនលើកឡើង គឺគ្រាន់តែជាការឆ្លើយតបទៅនឹងសំណួរអ្នកកាសែត ដោយនិយាយត្រង់ៗទៅតាមគំនិតផ្ទាល់ខ្លួនរបស់លោកតែប៉ុណ្ណោះ ដោយមិនមានន័យជាការផ្លាស់ប្តូរនយោបាយផ្លូវការរបស់អាមេរិក នៅក្នុងសំណុំរឿងតៃវ៉ាន់នោះទេ។
ក៏ប៉ុន្តែ បើទោះជាមានការចេញមកបកស្រាយបែបនេះក៏ដោយ គេមិនត្រូវភ្លេចទេថា ប្រធានាធិបតីអាមេរិកជាអ្នកមានអំណាចកំពូលខាងកងទ័ព និងគោលនយោបាយការបរទេស ដូច្នេះ ពាក្យសម្តីរបស់ប្រធានាធិបតី វាឆ្លុះបញ្ចាំង អំពីគោលនយោបាយរបស់អាមេរិក។
ម្យ៉ាងទៀត ការលើកឡើងថា អាមេរិកនឹងចូលទៅជួយតៃវ៉ាន់ក្នុងករណីមានការឈ្លានពានពីចិននេះ លោកចូ បៃដិន មិនមែនលើកឡើងតែម្តងនោះទេ គឺលើកឡើងរហូតដល់ទៅ ៤ដងរួចមកហើយ រាប់ចាប់តាំងពីខែសីហាឆ្នាំ២០២១កន្លងទៅ។ បើលើកឡើងតែម្តង គេអាចថា ជាការនិយាយជ្រុលមាត់ដោយអចេតនា។ តែនិយាយដដែលៗដល់ទៅ៤ដង ហើយជាងនេះទៅទៀត អ្វីដែលលោកចូ បៃដិន លើកឡើងកាលពីថ្ងៃអាទិត្យ មិនមែនធ្វើឡើងដោយឆ្លើយទៅនឹងសំណួរដែលអ្នកកាសែតឆ្មក់សួរដោយឥតព្រាងទុកនោះទេ ក៏ប៉ុន្តែ ជាការឆ្លើយនឹងសំណួរអ្នកកាសែតក្នុងបទសម្ភាសន៍មួយ ដែលមានការរៀបចំជាមុន។ ដូច្នេះ ទោះចង់ឬមិនចង់ នេះវាបង្ហាញពីជំហររបស់លោកចូ បៃដិន ក្នុងឋានៈជាប្រធានាធិបតីអាមេរិក ក្នុងការបញ្ជួនកងទ័ពអាមេរិកទៅជួយតៃវ៉ាន់ ក្នុងករណីមានការឈ្លានពានពីចិន ហើយបង្ហាញពីការផ្លាស់ប្តូរយុទ្ធសាស្រ្ត Strategic Ambiguity កាលពីមុន។
នៅក្នុងបរិបទបច្ចុប្បន្ន ដែលចិនបញ្ចេញសាច់ដុំយោធាកាន់តែខ្លាំងស្ទើរតែរៀងរាល់ថ្ងៃនេះ ការលើកឡើងរបស់លោកចូ បៃដិន ពីការបញ្ជូនទ័ពទៅជួយតៃវ៉ាន់ វាអាចជាការកំញើញមួយ ក្នុងគោលដៅដាក់សម្ពាធលើចិន ហើយរារាំងកុំឲ្យចិនចូលឈ្លានពានតៃវ៉ាន់ ក៏ប៉ុន្តែ ក្នុងពេលជាមួយគ្នា វាក៏អាចផ្តល់ផលបញ្ច្រាសមកវិញផងដែរ ពីព្រោះថា ការលើកឡើងរបស់លោកចូ បៃដិននេះ អាចនឹងធ្វើឲ្យចិនសំឡឹងឃើញថា ជាចំណុចចាប់ផ្តើមមួយ ដែលអាចនឹងនាំទៅដល់ការផ្លាស់ប្តូរជំហររបស់អាមេរិក ទាក់ទងនឹងនយោបាយ “ចិនតែមួយ” ហើយឆ្លើយតបមកវិញ ចិនអាចនឹងបង្កើនសកម្មភាពយោធាកាន់តែខ្លាំង បង្កើតឲ្យមានការប្រឈមមុខដាក់គ្នាកាន់តែខ្លាំងជុំវិញសំណុំរឿងតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ