រុស្ស៊ី និងចិន ប្រឈមជាលើកដំបូង នឹងសេចក្តីសម្រេចចិត្តថ្កោលទោស នៅក្រុមប្រឹក្សាសិទ្ធិមនុស្ស
ចុះផ្សាយនៅថ្ងៃ៖
ស្តាប់ - ០៥:៣៧
ក្រុមប្រឹក្សាសិទ្ធិមនុស្សនៃអង្គការសហប្រជាជាតិ កំពុងតែត្រៀម បោះឆ្នោតលើគម្រោងសេចក្តីសម្រេចចិត្តចំនួន២ ដែលមានខ្លឹមសារថ្កោលទោស ចិន និង រុស្ស៊ី ស្តីអំពីការរំលោភសិទ្ធិមនុស្ស។ ក្រុមប្រទេសលោកខាងលិច ដែលជាអ្នកផ្តួចផ្តើមគំនិតធ្វើគម្រោងសេចក្តីសម្រេចចិត្តនេះ បានស្ទាក់ស្ទើរជាច្រើនខែមកហើយ ព្រោះខ្លាចក្រែងថា មិនអាចទទួលបានសំឡេងឆ្នោតគាំទ្រគ្រប់គ្រាន់ ពីសំណាក់ប្រទេសសមាជិកនៃក្រុមប្រឹក្សាសិទ្ធិមនុស្ស។ តែយ៉ាងណា អង្គការសិទ្ធិមនុស្សធំៗ បានដាក់សំពាធ ដើម្បីឲ្យក្រុមប្រឹក្សាសិទ្ធិមនុស្ស ត្រូវតែប្រើវិធានការច្បាប់អន្តរជាតិ ឈានទៅថ្កោលទោសរុស្ស៊ី និងចិន។
ជាលើកទី១ហើយ ដែលប្រទេសមហាអំណាចធំៗ២ មានសិទ្ធិវ៉េតូ នៅក្រុមប្រឹក្សាអចិន្ត្រៃយ៍នៃអង្គការសហប្រជាជាតិ កំពុងប្រឈមនឹងការថ្កោលទោស នៅក្រុមប្រឹក្សាសិទ្ធិមនុស្ស។ គម្រោងសេចក្តីសម្រេចចិត្ត២ ដែលមានខ្លឹមសារថ្កោលទោសចិន និងរុស្ស៊ី ត្រូវបានក្រុមប្រទេសលោកខាងលិច ផ្តួចផ្តើមតាក់តែង ដាក់ឲ្យប្រទេសសមាជិកទាំង៤៧ នៃក្រុមប្រឹក្សាសិទ្ធិមនុស្ស បោះឆ្នោតទទួលយក។ ក្រុមប្រទេសលោកខាងលិច បានស្ទាក់ស្ទើរជាច្រើនខែ ព្រោះខ្លាចក្រែងប្រមូលការគាំទ្រមិនបានគ្រប់។ ក៏ប៉ុន្តែទីបំផុត គឺក្រុមអង្គការសិទ្ធិមនុស្ស បានដាក់សំពាធ រន្ធាន់ឲ្យក្រុមប្រទេសលោកខាងលិច ត្រូវតែធ្វើចំណាត់ការអ្វីម្យ៉ាង។
កាលពីសប្តាហ៍កន្លងទៅ ក្រុមប្រទេសសហភាពអឺរ៉ុប លើកលែងតែហុងគ្រី បានចុះហត្ថលេខា លើគម្រោងសេចក្តីសម្រេចចិត្តទី១ ដើម្បីស្នើឲ្យក្រុមប្រឹក្សាសិទ្ធិមនុស្ស ដែលមានទីតាំងនៅក្រុងហ្សឺណែវ ត្រូវតែងតាំងអ្នករាយការណ៍ពិសេសម្នាក់ ដែលនឹងមានតួនាទីតាមដានការគោរពសិទ្ធិមនុស្សនៅរុស្ស៊ី សម្រាប់រយៈពេល១ឆ្នាំ។ ជាសំណើដែលត្រូវបានធ្វើឡើង នៅក្នុងបរិបទសង្គ្រាមនៅអ៊ុយក្រែន ហើយដែលយោងតាមអង្គការសិទ្ធិមនុស្សជាច្រើន គឺរដ្ឋាភិបាលរុស្ស៊ីបានប្រើកណ្តាប់ដៃ កៀបសង្កត់ រាល់សំឡេងរិះគន់ តវ៉ាប្រឆាំង នៅក្នុងស្រុក។ នៅរុស្ស៊ី សកម្មជននយោបាយ អ្នកកាសែក ក៏ដូចជាបណ្តាញព័ត៌មានឯករាជ្យ ដែលបានចេញមុខរិះគន់ការធ្វើសង្គ្រាមនៅអ៊ុយក្រែន គឺត្រូវបានអាជ្ញាធរឃាត់ខ្លួន ចោទប្រកាន់ និងបិទស្ថាប័នជាដើម។
តែយ៉ាងណាក៏ដោយ គម្រោងសេចក្តីសម្រេចចិត្ត របស់ក្រុមប្រទេសអឺរ៉ុបនេះ ត្រូវបានភាគីរុស្ស៊ី បរិហារថាមានបង្កប់ដោយចេតនានយោបាយ។ លោក Yaroslav Ermin លេខាទីមួយតំណាងអង្គទូតរុស្ស៊ីប្រចាំក្រុមប្រឹក្សាសិទ្ធិមនុស្ស បានចោទវាយបកទៅវិញថា ប្រជាជននិយាយភាសារុស្ស៊ី ដែលរស់នៅតាមប្រទេសតំបន់សមុទ្របាល់ទិក បានរងនូវការរើសអើងប្រកាន់ពូជសាសន៍។
ដោយឡែក កាលពីថ្ងៃចន្ទ ដើមសប្តាហ៍នេះ គម្រោងសេចក្តីសម្រេចចិត្តមួយទៀត ត្រូវបានផ្តួចផ្តើមឡើង ដោយសហរដ្ឋអាមេរិក អង់គ្លេស ន័រវេស កាណាដា ស៊ុយអែត ដាណឺម៉ាក ហ្វាំងឡង់ អ៊ីសឡង់ ដើម្បីទាមទារឲ្យក្រុមប្រឹក្សាសិទ្ធិមនុស្ស ត្រូវតែជជែករឿងរំលោភសិទ្ធិមនុស្សនៅខេត្តស៊ីនជាំង។ លោក John Fisher តំណាងអង្គការ Human Rights Watch បានលើកឡើងថា គម្រោងសេចក្តីសម្រេចចិត្តនេះ គឺជាការបោះជំហានតូចមួយ តែមានសារៈសំខាន់ណាស់។ សម្រាប់លោក គឺគ្មានប្រទេសណាមួយ តូចក៏ដោយធំក៏ដោយ គឺមិនអាចយកច្បាប់មកទ្រាប់អង្គុយបានទេ។ ក្រុមប្រឹក្សាសិទ្ធិមនុស្សដែលជាស្ថាប័នកំពូល ត្រូវតែមានកាតព្វកិច្ច យករឿងរំលោភសិទ្ធិមនុស្សធ្ងន់ធ្ងរ មកនិយាយជាអាទិភាព។
សូមបញ្ជាក់ថា អស់រយៈពេលជាច្រើនឆ្នាំមកហើយដែល ក្រុមប្រទេសលោកខាងលិច និងអង្គការក្រៅរដ្ឋាភិបាលជាច្រើន ចោទប្រកាន់ចិន ថាបានចាប់បង្ឃាំងប្រជាជនអ៊ុយហ្កួរ ជាង១លាននាក់ និងក្រុមសហគមន៍អ្នកកាន់សាសនាអ៊ីស្លាមផ្សេងទៀតនៅខេត្តស៊ីនជាំង ដូចជាជនជាតិកាហ្សាក់ជាដើម។ ភស្តុតាង សក្ខីកម្ម និងឯកសារជាច្រើនត្រូវបានគេបង្ហាញ ដែលសឲ្យឃើញនូវចេតនារបស់អំណាចកុម្មុយនីស្តចិន ដែលចង់បោសសំអាតជាតិសាសន៍ ទៅលើជនជាតិអ៊ុយហ្កួរនៅខេត្តស៊ីនជាំង។
កាលពីថ្ងៃទី៣១សីហា ឧត្តមស្នងការសិទ្ធិមនុស្សនៃអង្គការសហប្រជាជាតិ បានចេញរបាយការណ៍មួយ ដោយបានលើកឡើងអំពីករណី “ឧក្រិដ្ឋកម្មប្រឆាំងមនុស្សជាតិ” កើតមាននៅខេត្តស៊ីនជាំង ប្រទេសចិន ដោយផ្អែកលើភស្តុតាងដ៏គួរឲ្យទុកចិត្តជាច្រើន។ ក៏ប៉ុន្តែចិនបានច្រានចោលការចោទប្រកាន់ទាំងស្រុង និងបានចោទថាស្ថាប័នអង្គការសហប្រជាជាតិ កំពុងតែក្លាយជាឧបករណ៍នយោបាយ របស់សហរដ្ឋអាមេរិក និងក្រុមប្រទេសលោកខាងលិចផ្សេងទៀត។
គួរកត់សំគាល់ថា ប៉ុន្មានសប្តាហ៍មកនេះ ចិនបានបង្កើនប្រតិបត្តិការការទូតយ៉ាងខ្លាំង នៅក្រុមប្រឹក្សាសិទ្ធិមនុស្ស ទីក្រុងហ្សឺណែវ ដើម្បីដាក់សំពាធ អូសទាញ ទិញទឹកចិត្តប្រទេសសមាជិកផ្សេងទៀត កុំឲ្យបោះឆ្នោតគាំទ្រគម្រោងសេចក្ដីសម្រេចចិត្ត របស់ក្រុមប្រទេសបស្ចឹមលោក។ មន្ត្រីចិនទទួលបន្ទុកព័ត៌មានខេត្តស៊ីនជាំង Xu Guixian បានប្រាប់អ្នកកាសែតនៅក្រុងហ្សឺណែវថា ចិនបានត្រៀមខ្លួនរួចហើយដើម្បីប្រយុទ្ធយកឈ្នះ។ ដូចគ្នាដែរ នៅក្នុងពេលជជែកដេញដោលក្នុងក្រុមប្រឹក្សាសិទ្ធិមនុស្ស កាលពីថ្ងៃចន្ទ មន្ត្រីចិនតំណាងខេត្តស៊ីនជាំង លោក Shawkat Imin បានចោទទៅក្រុមប្រទេសលោកខាងលិច ថាបានយកសំណុំរឿងសិទ្ធិមនុស្ស មកធ្វើជាលេស ដើម្បីបង្កអស្ថិរភាពនៅខេត្តស៊ីនជាំងរបស់ចិន។
គួរបញ្ជាក់ដែរថា តាមការគ្រោងទុក ប្រទេសសមាជិកទាំង៤៧នៃក្រុមប្រឹក្សាសិទ្ធិមនុស្ស នឹងត្រូវបោះឆ្នោត ទទួលយក ឬមិនទទួលយក គម្រោងសេចក្តីសម្រេចចិត្តទាំង២ របស់ក្រុមប្រទេសលោកខាងលិច នៅថ្ងៃទី៦ ឬទី៧តុលាខាងមុខនេះ។ សម្រាប់ពេលនេះ លទ្ធផលជាក់ស្តែងយ៉ាងណាគ្មាននរណាអាចទាយបានទេ។ មានការបារម្ភថា គម្រោងសេចក្តីសម្រេចចិត្តទាំង២នេះ ប្រហែលជាមិនអាចទទួលបាន សំឡេងឆ្នោតគាំទ្រគ្រប់គ្រាន់ ដើម្បីឈានទៅអនុម័តបានទេ។
ដោយគ្មានអ្វីភ្ញាក់ផ្អើល កាលពីថ្ងៃចន្ទ គុយបា និង វ៉េណាស៊ុយអេឡា បានប្រកាសគោលជំហរ គាំទ្រចិននិងរុស្ស៊ី ហើយប្រឆាំងដាច់ខាតចំពោះការលូកដៃរបស់ក្រុមប្រឹក្សាសិទ្ធិមនុស្ស ចូលទៅក្នុងកិច្ចការផ្ទៃក្នុងរបស់ប្រទេសនីមួយៗ។ ប្រទេសមួយចំនួនទៀត ដូចជាប៉ាគីស្ថានជាដើម ក៏បានគាំទ្រចិនដែរ ដោយលើកឡើងថា សំណុំរឿងខេត្តស៊ីនជាំង វាគឺជាកិច្ចការផ្ទៃក្នុងរបស់ចិន។
ដោយឡែក សម្រាប់ប្រទេសអាហ្វ្រិកទាំង១៣ប្រទេស ដែលជាសមាជិកក្រុមប្រឹក្សាសិទ្ធិមនុស្សវិញ យោងតាមការវិភាគមួយកាលពីសប្តាហ៍កន្លងទៅ ដោយក្រុមការងារការពារសិទ្ធិមនុស្ស គឺមានប្រទេសអាហ្វ្រិកកាន់តែច្រើន ដែលបានចុះចាញ់ ការដាក់សំពាធរបស់ចិន។ ចិនគឺជាអ្នកវិនិយោគធំជាងគេនៅអាហ្វ្រិក មិនថាក្នុងវិស័យសាងសង់ហេដ្ឋារចនាសម្ព័ន្ធ ឬវិស័យជីកគាស់ធនធានធម្មជាតិ។ ចិនជាអ្នកវិនិយោគធំ ហើយក៏ជាម្ចាស់បំណុលធំផងដែរ នៅអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ