ជំនួបបើកឆាកលើកទី១ នៃ “សហគមន៍នយោបាយអឺរ៉ុប” ជាមួយនឹងការគាំទ្រ លាយឡំនឹងការមិនទាន់ទុកចិត្ត
ចុះផ្សាយនៅថ្ងៃ៖
ស្តាប់ - ០៦:៤២
ថ្ងៃព្រហស្បតិ៍ទី៦កញ្ញា នៅទីក្រុងប្រាហ្ក សាធារណរដ្ឋឆែក ថ្នាក់ដឹកនាំប្រទេសអឺរ៉ុបចំនួន៤៤ប្រទេស នឹងត្រូវជួបប្រជុំគ្នា នៅក្នុងកម្មវិធីជំនួបបើកឆាកជាលើកទីមួយ នៃសហគមន៍នយោបាយអឺរ៉ុប។ ជាទ្រង់ទ្រាយនៃវេទិកាសន្ទនា ថ្មីមួយ ទូទាំងទ្វីបអឺរ៉ុបតែម្តង ដែលសំដៅពង្រឹងស្ថិរភាពនយោបាយ ក៏ដូចជាសន្តិសុខនៃទ្វីបអឺរ៉ុប។ តែយ៉ាងណា គេមិនអាចនិយាយបានទេ ថា សហគមន៍នយោបាយអឺរ៉ុប ដែលទើបតែប្រសូត្រនាពេលនេះ អាចនឹងមានជោគជ័យកម្រឹតណានោះទេ ព្រោះថាមានប្រទេសខ្លះបានបង្ហាញការមិនទាន់ទុកចិត្តនៅឡើយ ថាវានឹងហុចអត្ថប្រយោជន៍ជាក់ស្តែងណាមួយនោះ។
ទ្វីបអឺរ៉ុបទាំងមូលមកជុំគ្នា
ថ្នាក់ដឹកនាំប្រទេសអឺរ៉ុបចំនួន៤៤ប្រទេស ពោលគឺទ្វីបអឺរ៉ុបទាំងមូលតែម្តង ដែលនឹងមានវត្តមានចូលរួម នៅក្នុងកម្មវិធីប្រជុំលើកទីមួយ ដើម្បីបើកឆាកសម្ពោធ “សហគមន៍នយោបាយអឺរ៉ុប”។ នេះជាលើកទីមួយហើយ ក្នុងប្រវត្តិសាស្ត្រ ដែលថ្នាក់ដឹកនាំប្រទេសទូទាំងទ្វីបអឺរ៉ុប មកជួបប្រជុំគ្នាបែបនេះ លើកលែងតែ រុស្ស៊ី និងបេឡារុសទេ ដែលមិនត្រូវគេអញ្ជើញឲ្យចូលរួម។
កម្មវិធីប្រជុំបើកឆាកនេះ ត្រូវរៀបចំធ្វើនៅក្នុងប្រាសាទទីក្រុងប្រាហ្ក សាធារណរដ្ឋឆែកតែម្តង ព្រោះថាសាធារណរដ្ឋឆែក ជាប្រធានវិលជុំ នៃសហភាពអឺរ៉ុប ហើយគឺក្រុមប្រឹក្សានៃសហភាពអឺរ៉ុប ដែលជាបានអញ្ជើញប្រទេសទាំងអស់ឲ្យមកចូលរួម។ គំនិតផ្តួចផ្តើមបង្កើតសហគមន៍នយោបាយអឺរ៉ុបនេះ គឺជាគំនិតរបស់លោកប្រធានាធិបតីបារាំង អេម៉ានុយអែល ម៉ាក្រុង ដែលបានដាក់ស្នើទៅកាន់ថ្នាក់ដឹកនាំផ្សេងទៀតនៃសហភាពអឺរ៉ុប កាលពីត្រីមាសទី២ឆ្នាំ២០២២នេះ។
នៅក្នុងលិខិតអញ្ជើញ ដែលផ្ញើដោយលោក Charles Michel ប្រធានក្រុមប្រឹក្សាអឺរ៉ុប គឺលោកបានសរសេរថា សហគមន៍នយោបាយអឺរ៉ុបនេះ គឺជាវេទិកាដ៏ធំ ដែលមានកម្មវត្ថុ បង្រួបបង្រួមប្រទេសទាំងអស់នៃទ្វីបអឺរ៉ុប។ ជាការជួបជុំគ្នា ដោយស្មើភាព មិនថាប្រទេសតូចប្រទេសធំ ដើម្បីបើកឱកាសដល់ការសន្ទនានយោបាយ ដល់ការសហប្រតិបត្តិការ លើចំនុចសំខាន់ៗ ដែលមានប្រយោជន៍រួម និងដើម្បីឈានទៅកសាងពង្រឹងសន្តិសុខ ស្ថិរភាព ព្រមទាំងការរីកចម្រើនរុងរឿង របស់ទ្វីបអឺរ៉ុបទាំងមូលតែម្តង។
ប្រមុខរដ្ឋ ប្រមុខរដ្ឋាភិបាលនៃប្រទេសសមាជិកសហភាពអឺរ៉ុបទាំង២៧ប្រទេសនឹងមានវត្តមាន។ លោកស្រី លីហ្ស ត្រាស្ស នាយករដ្ឋមន្ត្រីអង់គ្លេសក៏នឹងមកចូលរួម។ លោកប្រធានាធិបតីតួកគី និងមេដឹកនាំក្រុមប្រទេសអឺរ៉ុបតំបន់បាល់កង់ទាំងអស់ ក៏មានវត្តមានដែរ។ ចំណែកលោកហ្សេឡេនស្គី ប្រធានាធិបតីអ៊ុយក្រែន នឹងមានវត្តមានថ្លែងសារ តាមវីដេអូខុសហ្វឺរិនស៍។
បង្កើតក្រុមប្រឆាំងជាមួយរុស្ស៊ី?
បរិបទសង្គ្រាមនៅអ៊ុយក្រែន ដែលរុស្ស៊ីបានបង្កឡើង កំពុងតែគំរាមដល់សន្តិសុខ និងស្ថិរភាពរបស់ទ្វីបអឺរ៉ុបទាំងមូលតែម្តង។ ដូច្នេះ ទោះចង់មិនចង់ បញ្ហានេះ វាទៅណាមិនឆ្ងាយទេ គឺនៅមានក្នុងការជជែកគ្នាគ្រប់ម៉ាត់តែម្តង នៅក្នុងឱកាសនេះ។ មានអ្នកខ្លះ ដល់ទៅហ៊ានចាត់ទុកថា សហគមន៍នយោបាយអឺរ៉ុប គឺត្រូវបានបង្កើតឡើង ដើម្បីបង្កើតជាក្រុម ប្រឆាំងជាមួយរុស្ស៊ី ថែមទៀតផង។
យ៉ាងណាមិញ មុននឹងបានចេញជាផ្លូវការថាមានប្រទេសណាចូលរួមខ្លះ គឺមានការជជែកគ្នាតឹងតែងណាស់ ព្រោះប្រទេសខ្លះ មានគោលជំហរនៅខាងរុស្ស៊ី ឬក៏មិនចង់ប្រឈមមុខជាមួយរុស្ស៊ីជាដើម។ ជាក់ស្តែងតួកគី ហុងគ្រី និងស៊ែរប៊ីជាដើម។ ហុងគ្រី និងស៊ែរប៊ី បានបង្ហាញជំហរ មិនគាំទ្រចំពោះវិធានការទណ្ឌកម្មរបស់អឺរ៉ុប ទៅលើរុស្ស៊ីទេ ព្រោះវាខាតប្រយោជន៍របស់ប្រទេសគេរៀងៗខ្លួន។
ចំណែកលោកអ៊ែរដូហ្កាន់ ប្រធានាធិបតីតួកគីវិញ មកចូលរួមកម្មវិធីថ្ងៃនេះ ទាំងមិនសូវសប្បាយចិត្តប៉ុន្មានទេ តាមពិតទៅនោះ។ លិខិតអញ្ជើញផ្ញើទៅយូរហើយ លោកប្រធានាធិបតីតួកគីទើបតែឆ្លើយថាមកចូលរួម ៥ថ្ងៃមុននេះប៉ុណ្ណោះ។ តាមការវិភាគ គឺលោកប្រធានាធិបតីតួកគី មិនចង់មកបង្ហាញថា តួកគី នៅជាមួយក្រុមប្រទេសសហភាពភាពអឺរ៉ុប ដែលកំពុងតែប្រឈមមុខដាក់គ្នាខ្លាំងជាមួយរុស្ស៊ី។ លោកអ៊ែរដូហ្កាន់ ចង់រក្សាភាពស្និទ្ធស្នាលជាមួយលោកពូទីន ហើយតែងតែអះអាងថាខ្លួនគាត់នេះហើយ ដែលអាចនិយាយចរចា ជាមួយលោកពូទីនបាន។ បន្ថែមពីនេះទៀត លោកប្រធានាធិបតីតួកគី ក៏កំពុងតែមើលមុខគ្នាមិនសូវត្រង់ដែរ ជាមួយប្រមុខរដ្ឋាភិបាលប្រទេសហ្វាំងឡង់ដ៍ និងស៊ុយអ៊ែត ដែលបានដាក់ពាក្យសុំចូលជាសាមជិកអង្គការអូតង់ ហើយត្រូវតួកគីតែម្នាក់គត់ រករឿងរំខានប្រឆាំង។
ជោគជ័យ ឬក៏បរាជ័យ?
បរិបទនយោបាយការទូត វិបត្តិសង្គ្រាមនៅអ៊ុយក្រែន វិបត្តិសេដ្ឋកិច្ច ព្រមទាំងជម្លោះទ្វេរភាគី គឺមានច្រើនណាស់ រវាងប្រទេសនៅទ្វីបអឺរ៉ុប។ ជាងនេះទៀត គឺគេបារម្ភខ្លាចក្រែងថា គម្រោងបង្កើត សហគមន៍នយោបាយអឺរ៉ុបនេះ នឹងបរាជ័យធ្លាក់ទឹក ដូចគម្រោងបង្កើត “សហព័ន្ធអឺរ៉ុប” ដែលលោក ហ្វ្រង់ស័រ មីតេរ៉ង់ប្រធានាធិបតីបារាំង និងលោកប្រធានាធិបតីសាធារណរដ្ឋឆែក វ៉ាក្លាវ ហាវែល គ្រោងចង់បង្កើតកាលពីឆ្នាំ១៩៩១។
តែយ៉ាងណាក៏ដោយ ប្រឈមជាមួយភាពតានតឹង ជម្លោះបាក់បែកសាមគ្គី សង្គ្រាម អស្ថិរភាព ដែលកំពុងតែបំភ័យទ្វីបអារ៉ុបនេះ គឺមានមតិខ្លះគេគិតថា គំនិតបង្កើត “សហគមន៍នយោបាយអឺរ៉ុប” នេះ វាគឺជាគំនិតល្អ ព្រោះថាវានឹងក្លាយជាវេទិកា ដើម្បីឲ្យប្រទេសទាំងអស់មកជួបគ្នា និយាយគ្នា ទោះមិនបានលទ្ធផលអ្វីជាក់ស្តែងក៏ដោយចុះ។ អាស៊ែរបៃហ្សង់ ឈ្លោះវាយប្រយុទ្ធគ្នាជាមួយអាមេនី ។ តួកគីមើលមុខគ្នាមិនត្រង់ ជាមួយហ្វាំងឡង់ និងស៊ុយអែត ហើយមានជម្លោះទឹកដី ជាមួយកោះស្ហ៊ីពរ៍ និងក្រិកទៀត។ ទោះកិច្ចប្រជុំនៅថ្ងៃនេះ គ្មានលទ្ធផល តែយ៉ាងណាមេដឹកនាំប្រទេសដែលមានបញ្ហានឹងគ្នាទាំងនេះ នឹងមកជួបគ្នា បាននិយាយគ្នាខ្លះ និងថតរូបជុំគ្នា។ វាជាចំណុចវិជ្ជមានមួយទៅហើយ នៃកិច្ចប្រជុំសហគមន៍នយោបាយអឺរ៉ុបនេះ។
មន្ត្រីទូតម្នាក់បានបញ្ជាក់ថា ឆ្លងកាត់កិច្ចប្រជុំ ដើម្បីរៀបចំ “សហគមន៍នយោបាយអឺរ៉ុប” នេះ គឺប្រទេសភាគច្រើនបានបង្ហាញការគាំទ្រ និងសប្បាយចិត្តចូលរួម។ តែទន្ទឹមគ្នានេះ វានៅមានការមិនទុកចិត្តច្រើន ដោយគេកំពុងចាំមើល ថាតើ សហគមន៍នយោបាយអឺរ៉ុបនេះ វាមានអត្ថប្រយោជន៍ជាក់ស្តែងកម្រិតណា។ ប្រសិនបើជោគជ័យ គឺគេនឹងជួបប្រជុំគ្នា មួយឆ្នាំម្តង ទៅ២ដង។
លោក Sebastien Maillard អគ្គនាយកវិទ្យាស្ថាន Jacques Delors បានលើកឡើងថា ក្រុមប្រទេសទ្វីបអឺរ៉ុប កំពុងតែបោះជំហាន ឈានពីសហគមន៍នៃតម្លៃរួម មកជាសហគមន៍ ដែលមានគម្រោងផែនការរួមគ្នា។ សម្រាប់ពេលនេះ គឺវាថ្មីថ្មោងខ្លាំងណាស់។ សហគមន៍នយោបាយអឺរ៉ុបនេះ អាចជោគជ័យទៅបាន គឺគេត្រូវតែគូសវាសគ្រោងឆ្អឹង មានរចនាសម្ព័ន្ធ និងមានថវិកាសម្រាប់ចំណាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ