ប្រែប្រួលអាកាសធាតុ៖ តើលោហៈយុទ្ធសាស្រ្តអាចក្លាយជាប្រធានបទក្តៅថ្មីក្នុងភូមិសាស្រ្តនយោបាយបន្ទាប់ពីប្រេង?
ចុះផ្សាយនៅថ្ងៃ៖
ស្តាប់ - ០៤:៤២
នៅក្នុងពេលដែលពិភពលោកកំពុងព្យាយាមប្រឈមនឹងការប្រែប្រួលអាកាសធាតុ គោលដៅចម្បងមួយ ដែលបណ្តាប្រទេសជាច្រើនបានដាក់ចេញ គឺកាត់បន្ថយការបញ្ចេញឧស្ម័នកាបូនិក ហើយឈានទៅសម្រេចគោលដៅ “ហ្សេរ៉ូកាបូន” នៅត្រឹមឆ្នាំ២០៥០ខាងមុខ។ ដើម្បីអាចសម្រេចគោលដៅ វាគឺជារឿងចាំបាច់ ដែលគេត្រូវងាកចេញពីការប្រើថាមពលផូស៊ីល ទៅប្រើថាមពលបៃតងវិញ។ ក៏ប៉ុន្តែ ការបង្កើនការផលិតថាមពលបៃតង់នេះអាចនឹងធ្វើពិភពលោកត្រូវប្រឈមនឹងការប្រជែងគ្នាដណ្តើមវត្ថុធាតុដើមយុទ្ធសាស្រ្តថ្មី ដូចអ្វីដែលកើតឡើងចំពោះប្រេងក្នុងសម័យកាលបច្ចុប្បន្ន។
នៅក្នុងរយៈពេល១សតវត្សរ៍កន្លងទៅនេះ ថាមពលដែលមនុស្សជាតិយើងប្រើត្រូវពឹងផ្អែកយ៉ាងខ្លាំងទៅលើវត្ថុធាតុដើមសំខាន់មួយ គឺប្រេង ហើយជម្លោះ និងភាពតានតឹងក្នុងភូមិសាស្រ្តនយោបាយ ទាក់ទងនឹងការប្រជែងដណ្តើមធនធានប្រេងនេះ ក៏តែងតែកើតមានឡើងស្ទើរតែជាប់ជាប្រចាំផងដែរ។
នៅក្នុងពេលបច្ចុប្បន្ននេះ បណ្តាប្រទេសជាច្រើនកំពុងស្វះស្វែងរកប្រភពថាមពលថ្មី ដើម្បីជំនួសប្រេង ក៏ដូចជា ប្រភេទថាមពលផូស៊ីលផ្សេងទៀត ដែលជាប្រភពចម្បងក្នុងការបញ្ចេញឧស្ម័នដែលធ្វើឲ្យផែនដីឡើងកម្តៅ។ ប្រភពថាមពលថ្មីនេះ ដែលមិនបញ្ចេញឧស្ម័នកាបូនិក ហើយដែលគេតែងតែហៅថា ថាមពលបៃតង អាចធ្វើឲ្យពិភពលោកងាកចេញពីការពឹងផ្អែកលើប្រេង ក៏ប៉ុន្តែ ក្នុងពេលជាមួយគ្នា វាបង្កើននូវតម្រូវការវត្ថុធាតុដើមចាំបាច់ផ្សេង ដែលជាទូទៅត្រូវបានគេហៅថា “រ៉ែលោហៈយុទ្ធសាស្រ្ត”។
លោហៈដែលជាវត្ថុធាតុដើមចាំបាច់ ក្នុងការផលិតថាមពលបៃតងនេះ គឺរួមមាន កូបាល់ នីកែល ម៉ង់កាណែស និងលីចូម ដែលចាំបាច់ក្នុងការផលិតអាគុយសម្រាប់ប្រើក្នុងរថយន្តអគ្គិសនី។ ប្រភេទលោហៈកម្រ ដែលចាំបាច់ក្នុងការផលិតម៉ូទ័រអគ្គិសនី ក៏ដូចជា កង្ហារផលិតអគ្គិសនីដើរដោយថាមពលខ្យល់។ ប្លាទីន ចាំបាច់ក្នុងថាមពលអ៊ីដ្រូសែន។ ចំណែក ទង់ដែង និងអាលុយមីញ៉ូម ជាប្រភេទលោហៈចម្លងចរន្តអគ្គិសនី ហើយចាំបាច់ក្នុងការផលិត និងចែកចាយថាមពលអគ្គិសនីជាលក្ខណៈទូទៅ។
យោងតាមទីភ្នាក់ងារថាមពលអន្តរជាតិ ប្រសិនបើគេចង់កាត់បន្ថយការបញ្ចេញឧស្ម័នកាបូនិក សម្រេចឲ្យបានគោលដៅហ្សេរ៉ូកាបូន នៅត្រឹមឆ្នាំ២០៥០ តម្រូវការលោហៈយុទ្ធសាស្រ្ត នៅទូទាំងពិភពលោក នៅត្រឹមឆ្នាំ២០៤០ខាងមុខនេះ នឹងត្រូវកើនឡើង ១គុណនឹង ៤ ធៀបនឹងកម្រិតបច្ចុប្បន្ន។
ប្រឈមនឹងតម្រូវការយ៉ាងច្រើន និងកំណើនក្នុងអត្រាយ៉ាងលឿនបែបនេះ ការប្រជែងដណ្តើមធនធានរ៉ែលោហៈយុទ្ធសាស្រ្តទាំងនេះ អាចនឹងក្លាយជាប្រធានបទក្តៅ នៃភូមិសាស្រ្តនយោបាយពិភពលោក ក្នុងសតវត្សរ៍ទី២១ ក្នុងទម្រង់ប្រហាក់ប្រហែលគ្នា នឹងការប្រជែងដណ្តើមធនធានប្រេង នៅក្នុងរយៈពេលប្រមាណជា១សតវត្សរ៍កន្លងទៅនេះ។
កន្លងមក យើងសង្កេតឃើញថា ភូមិសាស្រ្តនយោបាយក្នុងវិស័យប្រេងនិងឧស្ម័ន ស្ថិតនៅជុំវិញប៉ូលចម្បងៗចំនួន ៣ គឺអារ៉ាប៊ីសាអ៊ូឌីត រុស្ស៊ី និងសហរដ្ឋអាមេរិក។ ភូមិសាស្រ្តនយោបាយក្នុងវិស័យលោហៈយុទ្ធសាស្រ្តវិញ អាចនឹងស្ថិតនៅជុំវិញប៉ូលចំនួនពីរ គឺសហរដ្ឋអាមេរិក និងចិន ដែលជាប្រទេសមហាអំណាចសេដ្ឋកិច្ចពិភពលោក ហើយមានតម្រូវការខ្ពស់នូវលោហៈយុទ្ធសាស្រ្តអស់ទាំងនេះ។
អ្វីដែលគួរឲ្យកត់សម្គាល់ គឺ ចិន មិនមែនត្រឹមតែជាប្រទេសដែលត្រូវការលោហៈយុទ្ធសាស្រ្តច្រើននោះទេ ក៏ប៉ុន្តែ ក៏ជាប្រទេសដ៏ចម្បងមួយផងដែរ ដែលគ្រប់គ្រងខ្សែបណ្តាញផ្គត់ផ្គង់លោហៈយុទ្ធសាស្រ្ត។
ជាការពិតថា លោហៈយុទ្ធសាស្រ្តមួយចំនួនមានប្រភពចេញពីប្រទេសផ្សេង រួមមានដូចជា លីចូម ជាដើម មានប្រភពចម្បងពីអូស្រ្តាលី។ នីកែលមកពីឥណ្ឌូណេស៊ី។ ចំណែកទង់ដែងមានប្រភពចម្បងពីប្រទេសស៊ីលី។ ក៏ប៉ុន្តែ ចិន ក្រៅពីជាប្រទេសនាំមុខគេក្នុងការផលិតលោហៈកម្រ ក៏ជាប្រទេសដែលកំពុងមានឥទ្ធិពលយ៉ាងខ្លាំងផងដែរ នៅក្នុងតំបន់អាហ្វ្រិក ហើយយើងដឹងថា អាហ្វ្រិកនេះ គឺជាតំបន់ដែលសម្បូររ៉ែលោហៈយុទ្ធសាស្រ្ត។ ជាអាទិ៍ កូបាល់ ប្រមាណជា ៧០% នៃបរិមាណសរុបនៅទូទាំងពិភពលោក ត្រូវផលិតចេញពីសាធារណរដ្ឋប្រជាធិបតេយ្យកុងហ្គោ ដែលជាប្រទេសដែលប្រមូលផ្តុំជង្រុករ៉ែកូបាល់រហូតដល់ទៅ ៥០% នៃធនធានសរុបនៅទូទាំងពិភពលោកទាំងមូល។ ប្រទេសអាហ្វ្រិកខាងត្បូង គឺជាប្រភពចម្បងនៃធនធានរ៉ែម៉ង់កាណែស។ ចំណែកប្រទេសហ្គីណេ គឺជាជង្រុករ៉ែបុកស៊ីត ដែលជាប្រភេទរ៉ែចាំបាច់ ក្នុងការផលិតអាលុយមីញ៉ូម។
យោងតាមអ្នកជំនាញខាងវត្ថុធាតុដើមបារាំង គិតមកទល់នឹងពេលបច្ចុប្បន្ននេះ នៅក្នុងបណ្តាញផ្គត់ផ្គង់លោហៈយុទ្ធសាស្រ្តចាំបាច់ក្នុងការផលិតអាគុយប្រើក្នុងរថយន្តអគ្គិសនីគិតជាសរុបនៅទូទាំងពិភពលោក មានរហូតដល់ទៅ ៤០% ស្ថិតក្រោមការគ្រប់គ្រងរបស់ចិន និងក្រុមហ៊ុនឯកជនរបស់ចិន។
ដូច្នេះ ការប្រជែងដណ្តើមបណ្តាញផ្គត់ផ្គង់លោហៈយុទ្ធសាស្រ្តនេះ អាចនឹងក្លាយជាចំណុចដ៏ក្តៅមួយទៀត ដែលបង្កើតឲ្យមានការប្រឈមមុខដាក់គ្នា រវាងសហរដ្ឋអាមេរិក និងចិន នៅក្នុងរយៈពេលប៉ុន្មានឆ្នាំខាងមុខ នៅក្នុងពេលសំណុំរឿងជាច្រើនផ្សេងទៀត រាប់ចាប់តាំងពីជម្លោះពាណិជ្ជកម្ម រហូតដល់បញ្ហាសន្តិសុខជុំវិញជម្លោះនៅសមុទ្រចិនខាងត្បូង និងបញ្ហាតៃវ៉ាន់ កំពុងតែជាបញ្ហាក្តៅគគុកស្រាប់ នៅក្នុងពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ