វិបត្តិសេដ្ឋកិច្ច អតិផរណា ធ្វើឲ្យតម្រូវការមាស កើនឡើងកាន់តែខ្លាំង ខណៈតម្លៃមិនទាន់កើនឡើង
ចុះផ្សាយនៅថ្ងៃ៖
ស្តាប់ - ០៥:០៤
តម្រូវការមាស នៅទូទាំងពិភពលោក បានកើនឡើងយ៉ាងខ្លាំង ជាពិសេសនៅក្នុងត្រីមាសទី៣ឆ្នាំ២០២២នេះ។ បើទោះបីជាអ្នកវិនិយោគហិរញ្ញវត្ថុ មិនសូវចាប់អារម្មណ៍ទិញមាស តែលោហៈពណ៌លឿងភ្លឺផ្លេកនេះ គឺជាតម្លៃគោល ដែលធានាគារកណ្តាលភាគច្រើន និយមទិញស្តុកទុក ជាពិសេសនៅក្នុងគ្រាពិភពលោកមានវិបត្តិសេដ្ឋកិច្ច។ ទន្ទឹមគ្នានេះ អតិថិជនឯកជន ដែលភាគច្រើននៅឥណ្ឌា និងនៅចិន ក៏បានសម្រុកទិញមាសទុកដែរ នៅរវាងប៉ុន្មានខែចុងក្រោយនេះ ដែលធ្វើឲ្យតម្រូវការមាស កើនឡើងកាន់តែខ្លាំង។
យោងតាម របាយការណ៍ប្រចាំត្រីមាស របស់ក្រុមប្រឹក្សាមាសពិភពលោក នៅរវាងពីខែកក្កដាដល់ខែកញ្ញា ឆ្នាំ២០២២ តម្រូវការមាសទូទាំងពិភពលោក មានចំនួន ១១៨១តោន។ ពោលគឺបានកើនចំនួន ១៨% បើប្រៀបធៀបទៅក្នុងរយៈពេលដូចគ្នា កាលពីឆ្នាំ២០២១។
របាយការណ៍អះអាងថា តម្រូវការមាសបានកើន គឺដោយសារការសំរុកទិញទុកមាសសន្លឹក និងមាសដុំ ពីសំណាក់ធនាគារកណ្តាល។ ក្នុងរវាងត្រីមាសទី៣ឆ្នាំនេះ ធនាគារកណ្តាលតាមបណ្តាប្រទេសជាច្រើន បានទិញមាសទុកចំនួនសរុប ៤០០តោន។ លោកស្រី Louise Street អ្នកវិភាគនៅក្រុមប្រឹក្សាមាសពិភពលោក បានពន្យល់ថា ហេតុផលដែលធ្វើឲ្យធនាគារកណ្តាលចូលចិត្តទិញមាសទុក គឺដោយសារគេយល់ថា ការស្តុកមាសទុក វាគឺជារឿងគួរឲ្យទុកចិត្ត នៅក្នុងបរិបទដែលពិភពលោកមានវិបត្តិសេដ្ឋកិច្ច អតិផរណា និងវិបត្តិភូមិសាស្ត្រនយោបាយ។
ដោយឡែក អ្នកវិនិយោគនៅទីផ្សារហិរញ្ញវត្ថុវិញ មិនសូវចាប់អារម្មណ៍លើការទិញមាសទេ ពោលគឺគេផ្តោតអាទិភាពខ្លាំង តែទៅលើតម្លៃប្រាក់ដុល្លារ ព្រមទាំងអត្រាការប្រាក់។ ដោយហេតុនេះហើយ បានជាទីផ្សារហិរញ្ញវត្ថុ Wall Street មិននិយមទិញលក់មាសនោះទេ។ មូលប័ត្រហិញ្ញវត្ថុដែលពាក់ព័ន្ធនឹងតម្លៃមាស ត្រូវបានលក់ចេញពីទីផ្សារមូលធន ដែលគិតជាទំហំចំនួនមាស គឺមានចំនួន២២៧តោន។ តែផ្ទុយទៅវិញ អ្នកវិនិយោគធម្មតា ផ្តល់សារៈសំខាន់ តែទៅលើការទិញមូលប័ត្រកាតព្វកិច្ច នៅលើទីផ្សារអាមេរិក ព្រោះគេសង្ឃឹមថាគោលនយោបាយរតនាគារជាតិអាមេរិក នឹងកាន់តែតឹងតែងឡើង ដោយសារតែបញ្ហាអតិផរណា។ ដូច្នេះមូលប័ត្រប្រភេទនេះ ប្រាកដជាឡើងថ្លៃ។ ដោយកត្តានេះហើយ បានជាតម្លៃមាស បានធ្លាក់ចុះ ក្នុងមួយដំឡឹង មានតម្លៃ ១៦៦០ដុល្លារ គិតត្រឹមថ្ងៃអង្គារទី១វិច្ឆិកា។ ពោលគឺបានថយចុះ ៨%។
តែជាមួយគ្នានេះ នៅតាមបណ្តាប្រទេសជាច្រើន ប្រជាជនសាមញ្ញ បានសំរុកទិញមាសទុក មានទាំងមាសសន្លឹក មាសដុំ និងគ្រឿងអលង្ការធ្វើពីមាស។ នៅឥណ្ឌា ដែលជាប្រទេសធំជាងគេទី២ ដែលនិយមទិញមាស តម្រូវការអលង្ការធ្វើពីមាស បានកើនឡើង ចំនួន១៧% ស្មើនឹង១៤៦,២តោន ចំណែកការទិញមាសសន្លឹក និងមាសដុំវិញ បានកើនឡើងចំនួន៦% ស្មើនឹង៤៥,៤តោន។
របាយការណ៍ក្រុមប្រឹក្សាមាសពិភពលោកពន្យល់ថា មនុស្សសាមញ្ញសំរុកទិញមាសច្រើន នារវាង៣ខែចុងក្រោយនេះ គឺដោយសារតែសកម្មភាពសេដ្ឋកិច្ច បានត្រលប់មករកភាពប្រក្រតីវិញ បន្ទាប់ពីបានឆ្លងកាត់វិបត្តិកូវីដ១៩ ជិត៣ឆ្នាំមកនេះ។ ដោយសារតែអតិផរណា តម្លៃរូបិយបណ្ណធ្លាក់ចុះ មនុស្សមួយចំនួនធំ ងាកទៅចំណាយប្រាក់ ដើម្បីទិញមាសទុក ព្រោះមាសគឺជាទ្រព្យជម្រកដែលមានតម្លៃគួរឲ្យទុកចិត្ត។ តែយ៉ាងណាក៏ដោយ កាលៈទេសៈនេះ មិនអាចបន្តយូរអង្វែងបានទេ ព្រោះប្រជាជនខ្លះ ដែលមានជីវភាពកាន់តែចុះខ្សោយ ជាពិសេសនៅតាមទីជនបទ អាចនឹងលក់មាសចេញវិញ ដើម្បីយកប្រាក់ទៅចំណាយចាយវាយ ខណៈតម្លៃទំនិញស្បៀងអាហារកាន់តែឡើងថ្លៃ។
ចិន គឺជាប្រទេសធំជាងគេបង្អស់ ដែលទិញមាសច្រើនជាងគេ។ តម្រូវការទិញមាសនៅចិន ក្នុងឆ្នាំ២០២២នេះ មានទំហំកើនឡើង តិចល្មម ប្រមាណ៨% ដែលស្មើនឹង៧០,១តោន សម្រាប់មាសសន្លឹក និងមាសដុំ។ ចំណែកគ្រឿងអលង្ការធ្វើពីមាស បានកើនចំនួន៥%។ ក៏ប៉ុន្តែទំហំទិញមាសនៅចិន បានកើនឡើងខ្លាំង ក្នុងរយៈពេល៣ខែចុងក្រោយនេះ ដល់ទៅ៥៨%។ ដោយសារតែវិធានការបិទខ្ទប់ បង្ការកូវីដ១៩ ធ្វើឲ្យប្រជាជនចិនខានទិញមាសយូរ ហើយក៏សម្រុកទិញព្រមៗគ្នា។ តែមូលហេតុមួយទៀត គឺការទិញមាសទុក ព្រោះវាមានតម្លៃដំកល់ជាទីទុកចិត្ត។ លោកស្រី Louise Street ពន្យល់ថា អតិថិជនសាមញ្ញនៅចិន ចង់ទិញមាសទុកកាន់តែច្រើន ដើម្បីបានចំណេញទៅថ្ងៃក្រោយ។
ផ្អែកតាមក្រុមប្រឹក្សាមាសពិភពលោក ការសំរុកទិញមាសទុក មិនមែនមាននៅតែតាមប្រទេសតំបន់អាស៊ីទេ។ នៅដើមត្រីមាសទី៣ឆ្នាំនេះ តាមប្រទេសអឺរ៉ុបខ្លះ ដូចជានៅអង់គ្លេសជាដើម មានអតិថិជនកាន់តែច្រើន បាននាំគ្នាទិញមាសសន្លឹក និងមាសដុំទុក។ វិបត្តិសេដ្ឋកិច្ច អតិផរណាដែលកំពុងគំរាមសង្កត់ពិភពលោក គឺជាហេតុផលដែលជំរុញឲ្យមនុស្សងាកទៅទិញមាសទុក។
ដោយឡែក ទីផ្សារមាសដែលគេប្រើ នៅក្នុងវិស័យឧស្សាហកម្មផលិតផលបច្ចេកវិទ្យាទំនើប បានធ្លាក់ចុះយ៉ាងរហ័ស នាប៉ុន្មានខែចុងក្រោយនេះ ដោយសារតែវិបត្តិសេដ្ឋកិច្ច អ្នកប្រើប្រាស់ទូទៅកាត់បន្ថយការចំណាយលើផលិតផលទាំងនេះ។ ប្រការនេះ បានធ្វើឲ្យការផ្គង់ផ្គង់មាសនៅលើទីផ្សារជារួម គឺមានកម្រិតនឹងធម្មតា ដោយបានកើនប្រមាណតែ១%ប៉ុណ្ណោះ ពោលគឺមានទំហំសរុប ចំនួន ១២១៥,២តោន។ ឧស្សាហកម្មជីករ៉ែមាសនៅចិន បានចាប់ផ្តើមដំណើរការឡើងវិញ ស្របពេលប្រទេសផលិតមាសនៅអាហ្វ្រិក មានដូចជា ហ្កាណា ម៉ាលី និងបួរគីណាហ្វាសូ ជាដើម បន្តស្រូបយកប្រាក់ចំណេញពីរ៉ែលោហៈកម្រនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ