ហេតុអ្វីបានជារដ្ឋាភិបាលចិនត្រឡប់ជួយស្រោចស្រង់វិស័យអចលនទ្រព្យដែលកំពុងជួបវិបត្តិ?
ចុះផ្សាយនៅថ្ងៃ៖
ស្តាប់ - ០៥:៥៥
នៅក្នុងប្រទេសចិន រដ្ឋាភិបាលបានលាតត្រដាងនូវវិធានការមួយចំនួនដើម្បីជួយស្រោចស្រង់ និងផ្តល់សន្ទុះលើវិស័យអចលនទ្រព្យដែលកំពុងជួបវិបត្តិធ្ងន់ធ្ងរ។ គួរបញ្ជាក់ថា ការរឹតបន្តឹងលើលក្ខខណ្ឌនៃការផ្តល់ប្រាក់កម្ចី និងការអូសបន្លាយនៃវិបត្តិកូវីដ១៩ បានរុញក្រុមហ៊ុនអចលនទ្រព្យចិនមួយចំនួនទៅក្បែរមាត់ជ្រោះនៃភាពក្ស័យធន។ តើវិធានការរបស់រដ្ឋាភិបាលមានអ្វីខ្លះ និងថាហេតុអ្វីបានជារដ្ឋាភិបាលត្រឡប់ទៅជួយស្រោចស្រង់វិបត្តិអចលនទ្រព្យនៅពេលនេះ?។
នៅក្នុងប្រទេសណាមិនដឹងទេ តែបើនៅចិន អចលនទ្រព្យជាវិស័យគន្លឹះនៃសេដ្ឋកិច្ចជាតិ។ វិស័យមួយនេះ ពិសេសវិស័យសំណង់មានទម្ងន់ ១ភាគ៤ នៃផលិតផលសរុបក្នុងស្រុករបស់ចិន និងបានផ្តល់ការងារឲ្យកម្មករចិនជាច្រើនលាននាក់ដែលមិនសូវមានអាជីព។ តាមពិតទៅ មហាយក្សអាស៊ីមួយបានស្គាល់សន្ទុះកំណើនវិស័យអចលនទ្រព្យខ្ពស់ត្រដែតតាំងពីចិនផ្តើមប្រកាន់យកនយោបាយទីផ្សារសេរីក្នុងឆ្នាំ ១៩៩៨។ ជាមួយនឹងលក្ខខណ្ឌខ្ចីប្រាក់មិនតឹងតែង និងការជួយសម្រួលនៅក្នុងការផ្តល់ប្រាក់កម្ចី ក្រុមហ៊ុនអចលនទ្រព្យបានធ្វើការអភិវឌ្ឍន៍នៅក្នុងល្បឿនមួយលឿនខ្លាំងដែលគ្មាននរណានឹកស្មានដល់។ ក្រុមហ៊ុនអចលនទ្រព្យបានធ្វើការសាងសង់អគារ ខុនដូ និងផ្ទះសម្បែងដោយមិនទុកឲ្យដីនៅទំនេរឡើយ។
ក្នុងរយៈពេលតែប៉ុន្មានឆ្នាំ ទីក្រុងធំ តូចត្រូវបានគ្របដណ្តប់ដោយអគារ និងខុនដូខ្ពស់ត្រដែត រួមទាំងផ្ទះសម្បែងស្អេកស្កះ។ រូបភាពនេះមិនអាចកំបាំងភ្នែកអ្នកណាបានឡើយ សូម្បីតែអ្នកទេសចរបរទេស។ ក៏ប៉ុន្តែក្នុងពេលជាមួយគ្នា ក្រុមហ៊ុនអចលនទ្រព្យក៏កំពុងមានបំណុលកាន់តែច្រើនទៅៗសឹងហៅមិនឮ។ ប្រឈមនឹងប្រាក់បំណុលរបស់ក្រុមហ៊ុនអចលនទ្រព្យដែលប៉ោងកាន់តែធំនេះបានបង្ខំឲ្យរដ្ឋាភិបាលចាត់វិធានការទប់ស្កាត់ចាប់ពីឆ្នាំ ២០២០។ ផ្ទាំងស៊ីបនៃវិធានការរបស់រដ្ឋាភិបាលកាលណោះ គឺរឹតបន្តឹងលើលក្ខខណ្ឌនៃការផ្តល់ប្រាក់កម្ចីឲ្យក្រុមហ៊ុនអចលនទ្រព្យ ឬនិយាយឲ្យស្រួលយល់ មិនអនុញ្ញាតឲ្យក្រុមហ៊ុនអចលនទ្រព្យខ្ចីលុយងាយៗដូចមុនទៀតឡើយ។
ជាមួយនឹងវិធានការរឹតបន្តឹងក្នុងការផ្តល់ប្រាក់កម្ចី គួបផ្សំនឹងតម្រូវការអចលនទ្រព្យដាំក្បាលចុះយ៉ាងគំហុកដោយសារតែសេដ្ឋកិច្ចធ្លាក់ចុះ និងភាពមិនទៀងទាត់ទាក់ទងនឹងកូវីដ១៩ មានក្រុមហ៊ុនអចលនទ្រព្យខ្លះបានផ្តើមត្រដរខ្យល់ និងខ្លះទៀតកំពុងព្យាយាមត្រដររស់។ កុំថាឡើយតែក្រុមហ៊ុនអចលនទ្រព្យតូចតាច សូម្បីតែក្រុមហ៊ុនអចលនទ្រព្យគ្រាក់ៗដូចយ៉ាង Evergrande ក៏កំពុងរស់យ៉ាងលំបាកលំបិនដែរ។ ក្នុងឆ្នាំ ២០២១ Evergrande ជាប់បំណុលគេប្រមាណជា ៣០០ ០០០លានដុល្លារ។ កង្វះសាច់ប្រាក់ និងការជាប់បំណុលគេវ័នកបានធ្វើឲ្យក្រុមហ៊ុនអចលនទ្រព្យខ្លះដួលបះជើង និងខ្លះទៀតបង្ខំចិត្តផ្អាកសកម្មភាពសាងសង់នៅពាក់កណ្តាលទី។
គឺរូបភាពថ្មីនេះហើយដែលបានធ្វើឲ្យរដ្ឋាភិបាលក្រុងប៉េកាំងពិបាកបន្តយកភ្នែកមើល និងបានបោះមួយជំហានថយក្រោយវិញ មានន័យថា បញ្ឈប់ការអនុវត្តន៍លើសេចក្តីសម្រេចរបស់ខ្លួនកាលពីឆ្នាំ ២០២០។ នៅក្នុងការណែនាំថ្មីដែលលាតត្រដាងកាលពីថ្ងៃទី១១ វិច្ឆិកា រដ្ឋាភិបាលបានដាក់ចេញនូវវិធានការចំនួន ១៦ចំណុចដើម្បីផ្តល់សន្ទុះឲ្យវិស័យអចលនទ្រព្យឡើងវិញ។ វិធានការទាំង ១៦ចំណុចរួមមាន ការពន្យារពេលសងបំណុលរបស់ក្រុមហ៊ុនអចលនទ្រព្យណាដែលមិនអាចសងបំណុលគេទាន់ពេល ការលើកទឹកចិត្តឲ្យធនាគារផ្តល់ប្រាក់កម្ចីបន្ថែម ឬធានាពីការផ្តល់សាច់ប្រាក់ឲ្យក្រុមហ៊ុនអចលនទ្រព្យដើម្បីឲ្យពួកគេបញ្ចប់ការសាងសង់ដែលបានផ្អាកនៅពាក់កណ្តាលទី។
គេនៅមិនទាន់ដឹងថា តើវិធានការផ្តល់ខ្យល់អុកស៊ីសែនថ្មីឲ្យវិស័យអចលនាទ្រព្យរបស់រដ្ឋាភិបាលពេលនេះនឹងអាចជួយឲ្យក្រុមហ៊ុនអចលនទ្រព្យខ្លះរួចផុតពីការក្ស័យធន ឬអត់ទេ។ អ្វីដែលគេបានសំឡឹងឃើញ តម្លៃភាគហ៊ុនរបស់ក្រុមហ៊ុនអចលនទ្រព្យមួយចំនួនបានហក់ឡើងនៅទីផ្សារភាគហ៊ុននៅហុងកុងក្នុងថ្ងៃចន្ទ ទី១៤ វិច្ឆិកា។ ជាក់ស្តែង ភាគហ៊ុនរបស់ក្រុមហ៊ុនអចលនទ្រព្យធំជាងគេនៅចិនឈ្មោះ Country Garden បានស្ទុះឡើងដល់ទៅ ៤៥% ហើយក្រុមហ៊ុនអចលនទ្រព្យឈ្មោះ Greenland បានហក់ឡើងជាង ៣៥%។ នេះ ស បញ្ជាក់ឲ្យឃើញថា ទីផ្សារភាគហ៊ុនមានទំនុកចិត្តលើវិធានការរបស់រដ្ឋាភិបាលក្នុងការស្រោចស្រង់វិបត្តិអចលនទ្រព្យដែលចិនកំពុងជួបប្រទះ។
មួយវិញទៀតក្នុងថ្ងៃសុក្រ ទី១១ វិច្ឆិកាដដែល រដ្ឋាភិបាលក្រុងប៉េកាំងក៏បានប្រកាសកាត់បន្ថយរយៈពេលនៃការធ្វើចត្តាឡីស័កសម្រាប់ជនបរទេសដែលចូលក្នុងប្រទេសចិន នោះបើទោះបីជាចិនបន្តអនុវត្តនយោបាយសូន្យកូវីដក៏ដោយ។ គួរបញ្ជាក់ថា យុទ្ធសាស្រ្តសូន្យកូវីដបានតម្រូវឲ្យមានការបិទខ្ទប់តំបន់ ឬទីក្រុងទាំងមូល ប្រសិនបើរកឃើញករណីវិជ្ជមានកូវីដ សូម្បីតែមួយករណី។ យុទ្ធសាស្រ្តសូន្យកូវីដ នេះបានធ្វើឲ្យសេដ្ឋកិច្ចចិនជាប់គាំង ពិសេសជះផលវិបាកខ្លាំងដល់សង្វាក់ផ្គត់ផ្គង់ និងសង្វាក់ឡូជីស្ទិកសកល។ ដូច្នេះ វិធានការទាំងពីរចុងក្រោយនេះអាចគ្រប់គ្រាន់ដើម្បីឲ្យចិនមានសន្ទុះកំណើនសេដ្ឋកិច្ចឡើងវិញ។
តែអ្នកជំនាញសេដ្ឋកិច្ចចិនលោក Andrew Batson ហាក់មិនបានមើលឃើញយ៉ាងដូច្នេះទេ។ លោក Andrew Batson យល់ថា វិធានការរបស់រដ្ឋាភិបាលជារឿងវិជ្ជមាន តែមិនមែនជាវិធានការក្រឡប់ចាក់ដ៏អស្ចារ្យក្នុងសំណុំរឿងអចលនទ្រព្យ និងក្នុងរឿងកូវីដទេ។ អ្វីដែលលោក Andrew Batson ចង់និយាយនៅត្រង់ចំណុចនេះគឺថា រដ្ឋអំណាចចិនកំពុងបន្តព្យាយាមធ្វើឱ្យគោលនយោបាយបច្ចុប្បន្នរបស់ខ្លួនមានដំណើរការជាជាងប្តូរគោលនយោបាយថ្មីទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ