FAO៖ ប្រជាជនងាយរងគ្រោះបំផុតនៅលើពិភពលោកត្រូវចំណាយកាន់តែច្រើន សម្រាប់ស្បៀងអាហារកាន់តែតិច
ចុះផ្សាយនៅថ្ងៃ៖
ស្តាប់ - ០៣:៤២
យោងតាមរបាយការណ៍របស់អង្គការ FAO ពិភពលោកត្រូវគេរំពឹងថានឹងចំណាយប្រាក់ដ៏ច្រើនសន្ធឹកសន្ធាប់ក្នុងការនាំចូលស្បៀងអាហារ ក្នុងទំហំទឹកប្រាក់ ១,៨ទ្រីលានដុល្លារអាមេរិក នៅក្នុងឆ្នាំនេះ។ នេះគឺជាកំណត់ត្រាពិភពលោកថ្មីមួយ ហើយវាគឺជារឿងមួយដែលគួរឲ្យព្រួយបារម្ភណាស់។ ប្រជាជនងាយរងគ្រោះបំផុតនៅលើពិភពលោកឥឡូវនេះចំណាយកាន់តែច្រើន សម្រាប់ស្បៀងអាហារកាន់តែតិច។
ផ្អែកតាមទិន្នន័យផ្លូវការចុងក្រោយរបស់ អង្គការស្បៀងអាហារ និងកសិកម្ម (FAO) បណ្ដាប្រទេសយ៉ាងច្រើននៅលើពិភពលោក ត្រូវគេរំពឹងថានឹងត្រូវចំណាយប្រាក់ ១,៨ទ្រីលានដុល្លារអាមេរិក សម្រាប់ការនាំចូលស្បៀងអាហារដែលពួកគេត្រូវការ នៅក្នុងឆ្នាំនេះ។
ការចំណាយលើស្បៀងអាហារកើនឡើង និងមូលហេតុ
មូលហេតុចម្បងគឺដោយសារការឡើងថ្លៃតម្លៃស្បៀងអាហារសកល ហើយវាកាន់តែលំបាកសម្រាប់ប្រជាជនងាយរងគ្រោះបំផុត និងបណ្ដាប្រទេសក្រីក្រ។
ដោយសារថ្លៃវត្ថុធាតុដើមសម្រាប់ការធ្វើកសិកម្ម តួយ៉ាង ជី និងប្រេងឥន្ធនៈ កំពុងកើនឡើង នោះថ្លៃដើមផលិតកម្មក៏ហក់កាន់តែខ្ពស់ផងដែរ។ ជាលទ្ធផល តម្លៃស្បៀងអាហារ និងការនាំចូលស្បៀងអាហារសកលក៏កាន់តែមានកម្រិតធំជាងឆ្នាំមុននោះដែរ។
លោក Upali Galketi Aratchilage សេដ្ឋវិទូពីអង្គការ FAO បានលើកឡើងថា ការព្យាករណ៍ចុងក្រោយរបស់ FAO បង្ហាញអំពីការរឹតបន្តឹងទីផ្សារម្ហូបអាហារ និងការបង្កើនការចំណាយលើការនាំចូលអាហារឈានដល់កម្រិតខ្ពស់បំផុត។ នេះគឺព្រោះដោយគេមើលឃើញអំពីការកើនឡើងនៃតម្លៃវត្ថុធាតុដើម ក្តីបារម្ភអំពីការប្រែប្រួលអាកាសធាតុ ការបន្ដអូសបន្លាយនៃបញ្ហាជំងឺកូវីដ១៩ និងការកើនឡើងនូវភាពមិនច្បាស់លាស់នៃទីផ្សារសកលដែលកើតចេញពីសង្រ្គាមឈ្លានពានរបស់ប្រទេសរុស្ស៊ីលើប្រទេសអ៊ុយក្រែន។
របាយការណ៍របស់អង្គការ FAO ក៏បានចង្អុលបង្ហាញអំពីការធ្លាក់ចុះនៃផលិតកម្មធញ្ញជាតិពិភពលោក នៅក្នុងឆ្នាំ២០២២ ជាលើកដំបូងក្នុងរយៈពេល៤ឆ្នាំចុងក្រោយនេះ។
ប្រទេស និងប្រជាជនដែលងាយរងគ្រោះបំផុត
យោងតាម កម្មវិធីស្បៀងអាហារពិភពលោក (WFP) ពិភពលោកប្រឈមនឹងវិបត្តិភាពអត់ឃ្លានជាសកល ក្នុងកម្រិតមិនធ្លាប់មានពីមុនមក។ ក្នុងរយៈពេលត្រឹមតែពីរឆ្នាំប៉ុណ្ណោះ ចំនួនមនុស្សដែលប្រឈមមុខ ឬប្រឈមនឹងហានិភ័យនៃអសន្តិសុខស្បៀងធ្ងន់ធ្ងរ បានកើនឡើងពី១៣៥លាននាក់ នៅក្នុង៥៣ប្រទេស មុនការរាតត្បាតជំងឺកូវីដ១៩ ដល់៣៤៥លាននាក់ក្នុង ៨២ប្រទេសនាពេលបច្ចុប្បន្ននេះ។
អង្គការ FAO បានប៉ាន់ប្រមាណថា ក្នុងចំណោមបណ្ដាប្រទេសដែលងាយរងគ្រោះបំផុតគឺប្រទេសអភិវឌ្ឍន៍តិចតួច ឬប្រទេសដែលមានចំណូលទាប។ ប្រទេសទាំងនេះមានជម្រើសតិចតួច ប៉ុន្តែត្រូវចំណាយក្នុងការនាំចូលស្បៀងអាហារ ក្នុងបរិមាណតិចជាងមុន ៥ភាគរយ នៅក្នុងឆ្នាំនេះ។
រដ្ឋអនុតំបន់សាហារ៉ានៃទ្វីបអាហ្រ្វិក និងប្រទេសផ្សេងទៀតដែលទិញអាហារច្រើនជាងពួកគេនាំចេញ ក៏ទំនងជាប្រឈមនឹងការកើនឡើងថ្លៃដើមនៃផលិតកម្ម ហើយពួកគេនឹងទទួលបាននូវស្បៀងអាហារសំខាន់ៗតិចជាងមុន។
នៅក្នុងតំបន់មួយចំនួនដូចជា នៅអាហ្រ្វិកខាងកើត និងម៉ាដាហ្គាស្កា ពួកគេបានជួបប្រទះនឹងគ្រោះរាំងស្ងួត និងទុរ្ភិក្សរួចហើយ ហើយការកើនឡើងតម្លៃស្បៀងអាហារត្រូវគេរំពឹងថានឹងធ្វើឱ្យស្ថានភាពកាន់តែអាក្រក់ទៅៗ។
ទីភ្នាក់ងារអង្គការសហប្រជាជាតិបានផ្តល់អនុសាសន៍ឱ្យប្រទេសទាំងនោះត្រូវបង្កើតយន្តការថ្លឹងថ្លែងចំណូល និងចំណាយ ដើម្បីជួយទប់ស្កាត់អសន្តិសុខស្បៀងកាន់តែច្រើននៅថ្ងៃខាងមុខ។
ប្រភេទទំនិញឡើងថ្លៃបំផុត
ឆ្នាំ២០២២ បង្ហាញអំពីការកើនឡើងយ៉ាងឆាប់រហ័សនៃតម្លៃស្បៀងអាហារ និងកង្វះការផ្គត់ផ្គង់ស្បៀងអាហារនៅជុំវិញពិភពលោក។ វិបត្តិរួមគ្នាផ្សេងៗគឺបណ្តាលមកពីវិបត្តិភូមិសាស្ត្រនយោបាយ វិបត្តិសេដ្ឋកិច្ច វិបត្តិសន្តិសុខស្បៀង និងវិបត្តិជំងឺកូវីដ១៩។
បន្ទាប់ពីការឈ្លានពានរបស់រុស្ស៊ីក្នុងឆ្នាំ២០២២មកលើអ៊ុយក្រែន តួលេខផ្លូវការបង្ហាញអំពីការកើនឡើងនូវតម្លៃស្បៀងអាហារសកល និងក្ដីបារម្ភអំពីអសន្ដិសុខស្បៀងអាហារ។ ក្តីបារម្ភភាគច្រើនគឺទាក់ទងទៅនឹងកង្វះការផ្គត់ផ្គង់ដំណាំទំនិញសំខាន់ៗ ដូចជាស្រូវសាលី ពោត និងគ្រាប់ប្រេងដែលកំពុងកើនឡើងតម្លៃ។ សង្គ្រាមនេះក៏ធ្វើឱ្យតម្លៃប្រេងឥន្ធនៈ និងជីកើនឡើង ហើយវារុញច្រានឱ្យមានការខ្វះខាតស្បៀងអាហារ និងការកើនឡើងតម្លៃជាទូទៅបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ