២០២៣ ឆ្នាំថ្មីនៃការគំរាមប្រើអាវុធនុយក្លេអ៊ែរដាក់គ្នា រវាងប្រទេសបងប្អូនកូរ៉េទាំង២?
ចុះផ្សាយនៅថ្ងៃ៖
ស្តាប់ - ០៦:២៧
ឆ្នាំ២០២២ បានបិទបញ្ចប់ទៅ ជាមួយនឹងកម្រឹតតានតឹងយ៉ាងខ្លាំង នៃជម្លោះរវាងប្រទេសបងប្អូនកូរ៉េទាំង២។ តែឆ្នាំ២០២៣ បានឈានចូលមកដល់ ជាមួយនឹងការប្រឈមមុខដាក់គ្នាកាន់តែខ្លាំងថែមទៀត តាមរយៈការគំរាមប្រើអាវុធនុយក្លេអ៊ែរ ដាក់គ្នាទៅវិញទៅមក។ លទ្ធភាពនៃការផ្ទុះសង្គ្រាមនុយក្លេអ៊ែរ រវាងកូរ៉េទាំង២ កំពុងតែធ្វើឲ្យមានការព្រួយបារម្ភជាខ្លាំង បន្ទាប់ពីមេដឹកនាំកូរ៉េខាងជើង បានអះអាងថា អាចនឹងប្រើប្រាស់អាវុធនុយក្លេអ៊ែរ ដើម្បីវាយប្រហារជាលក្ខណៈបង្ការ។ ចំណែកពីខាងកូរ៉េខាងត្បូងវិញ លោកប្រធានាធិបតីអះអាងថា នឹងនិយាយជាមួយភាគីអាមេរិក ដើម្បីរៀបចំការហ្វឹកហាត់ សាកល្បងប្រើអាវុធនុយក្លេអ៊ែរ។ កំហឹងកំញើញដាក់គ្នានេះ អាចជាការបោះជំហានឈានចូលគ្រោះថ្នាក់វិនាសកម្មនុយក្លេអ៊ែរ ប្រសិនបើគ្មានដំណោះស្រាយដោយសន្តិវិធីទេនោះ។
លទ្ធភាពនៃការប្រើប្រាស់អាវុធនុយក្លេអ៊ែរ បានក្លាយជាចំណុចអាទិភាព របស់មេដឹកនាំកូរ៉េទាំង២ ក្នុងឆ្នាំ២០២៣នេះ។ កូរ៉េខាងជើង និងខាងត្បូង ចាប់ផ្តើមស្វាគមន៍ឆ្នាំថ្មី ជាមួយនឹងការបោះពាក្យសំដី គំរាមកំញើញដាក់គ្នាកាន់តែខ្លាំង តាមរយៈអាវុធនុយក្លេអ៊ែរ។
នៅក្នុងឱកាសមហាសន្និបាទបក្សពលករកូរ៉េ ថ្ងៃទី៣១ធ្នូ២០២២ មេដឹកនាំកូរ៉េខាងជើង គីម ជុងអ៊ុន បានប្រកាសថា កូរ៉េខាងជើងត្រូវតែបង្កើនសមត្ថភាពសព្វាវុធនុយក្លេអ៊ែរ ឲ្យបានខ្ពស់បំផុត។ ជាការប្តេជ្ញាចិត្ត ដែលមេដឹកនាំផ្តាច់ការព្យុងយ៉ាង អះអាងថាក៏ព្រោះថា អំណេះតទៅ កូរ៉េខាងត្បូង គឺជា “សត្រូវដោយមិនអាចប្រកែកបាន” របស់កូរ៉េខាងជើង បន្ទាប់ពីលោក យូន ស៊ុនយោល បានឡើងមកអំណាចជាប្រធានាធិបតីកូរ៉េខាងត្បូង។
ការពង្រឹងសមត្ថភាពសព្វាវុធនុយក្លេអ៊ែរ គឺជាអាទិភាពធំបំផុតនៃគោលនយោបាយដឹកនាំរបស់ គីម ជុងអ៊ុន ក្នុងឆ្នាំ២០២៣នេះ។ ឆ្នាំ២០២២កន្លងទៅ កូរ៉េខាងជើងបានបាញ់មីស៊ីលចំនួនដល់ទៅ៧០គ្រាប់ ដែលជាចំនួនខ្ពស់បំផុតមិនធ្លាប់មានទេ ក្នុងប្រវត្តិសាស្ត្រនៃរបបកុម្មុយនីស្តផ្តាច់ការនេះ។ យោងតាមការវិភាគ ឆ្នាំ២០២៣នេះ កូរ៉េខាងជើងនឹងប្រឹងប្រែងអភិវឌ្ឍន៍ មីស៊ីលចំងាយខ្លីដែលអាចហោះទៅវាយប្រហារនៅកូរ៉េខាងត្បូង ព្រមទាំងមីស៊ីលបាលីស្ទីកអន្តរទ្វីប ICBM ដែលអាចហោះទៅដល់សហរដ្ឋអាមេរិក។ ដើម្បីបញ្ជាក់ពីការតាំងចិត្តនេះ នៅថ្ងៃទី៣១ធ្នូ និងថ្ងៃទី១មករា កូរ៉េខាងជើងបានបាញ់មីស៊ីលជាច្រើនគ្រាប់ ដែលគីម ជុងអ៊ុនបានអះអាងថា សុទ្ធតែអាចបំពាក់ក្បាលគ្រាប់នុយក្លេអ៊ែរបានទាំងអស់។
ប្រឈមនឹងគោលជំហរកាន់តែដាច់ខាតរបស់កូរ៉េខាងជើងនេះ កូរ៉េខាងត្បូង ក្រោមការដឹកនាំរបស់លោក យូន ស៊ុនយោល ក៏បានពង្រឹងគោលជំហរកាន់តែខ្លាំងដែរ ដោយសន្យាថានឹងឆ្លើបតបវិញដោយអាវុធនុយក្លេអ៊ែរ។ រដ្ឋមន្ត្រីក្រសួងការពារជាតិកូរ៉េខាងត្បូង បានគំរាមថា “ឲ្យតែកូរ៉េខាងជើងហ៊ានប៉ុនប៉ងប្រើអាវុធនុយក្លេអ៊ែរ នោះរបបផ្តាច់ការនេះ នឹងរលាយក្លាយជាផេះ”។
ឆ្លើយនៅក្នុងបទសម្ភាសន៍ឲ្យកាសែត Chosun ចុះផ្សាយថ្ងៃទី២មករា លោកប្រធានាធិបតីកូរ៉េខាងត្បូង យូន ស៊ុកយោល បានលើកឡើងថា ភាគីកូរ៉េខាងត្បូងកំពុងតែពិចារណាមួយភាគីអាមេរិក ដើម្បីបើកការហាត់សមរួមគ្នា ត្រៀមប្រើប្រាស់អាវុធនុយក្លេអ៊ែរ ដើម្បីឆ្លើយតបទៅនឹងការគំរាមកាន់តែខ្លាំងឡើង ពីសំណាក់របបផ្តាច់ការព្យុងយ៉ាង។ តែយ៉ាងណាក៏ដោយ នៅថ្ងៃអង្គារទី៣មករា អ្នកនាំពាក្យក្រុមប្រឹក្សាសន្តិសុខជាតិអាមេរិក បានបញ្ជាក់ថា ភាគីអាមេរិក កំពុងពិភាក្សាគ្នាជាមួយកូរ៉េខាងត្បូង ស្តីអំពីសេណារីយ៉ូឆ្លើយតបរួមគ្នា និងជាក់ស្តែងទាំងអស់ ចំពោះការគំរាមពីសំណាល់កូរ៉េខាងជើង ដោយរាប់ទាំងការប្រើប្រាស់សព្វាវុធនុយក្លេអ៊ែរពិតមែន ក៏ប៉ុន្តែគេមិនបាននិយាយគ្នា អំពីការធ្វើសមយុទ្ធរួមគ្នាក្នុងការប្រើអាវុធនុយក្លេអ៊ែរទេ។
គួរបញ្ជាក់ថា រហូតមកទល់ពេលនេះ កូរ៉េខាងត្បូងពុំមានគ្រឿងសព្វាវុធនុយក្លេអ៊ែរទេ។ សម្ព័ន្ធភាពការពារពីសំណាក់អាមេរិក ដែលអាចប្រើប្រាស់អាវុធនុយក្លេអ៊ែរបាន គឺវាស្ថិតនៅក្នុងការសម្រេច និងការអនុវត្តដោយផ្តាច់មុខ របស់ភាគីអាមេរិក។ មានន័យថា បើទោះបីជាមានការសម្រេចប្រើអាវុធនុយក្លេអ៊ែរ ក៏ពុំមានកូរ៉េខាងត្បូងចូលរួមជាមួយដែរ។ ការលើកឡើងរបស់ប្រធានាធិបតីកូរ៉េខាងត្បូង ដែលចង់ឲ្យកងទ័ពខ្លួនចូលរួមហាត់សមប្រើប្រាស់អាវុធនុយក្លេអ៊ែរជាមួយកងទ័ពអាមេរិក អាចជាជំហានថ្មីបញ្ជាក់ពីចេតនារបស់កូរ៉េខាងត្បូង ដែលចង់បានសព្វាវុធនុយក្លេអ៊ែរប្រើប្រាស់ដែរ ទៅថ្ងៃអនាគត។
គួររំលឹកដែរថា លោកយូន ស៊ុលយោល បានឡើងមកកាន់អំណាច ជាមួយនឹងកម្មវិធីនយោបាយស្តាំអភិរក្សនិយម ដែលលែងបន្ធូរដៃដាក់កូរ៉េខាងជើង ដូចរដ្ឋាភិបាលមុនៗ។ រាល់ការកំញើញពីខាងជើង លោកយូន ស៊ុនយោលបានប្រតិកម្មគំរាមភ្លាមដោយមិនតមមាត់។ ជាក់ស្តែងក្រោយកូរ៉េខាងជើងបានបញ្ជាយានដ្រូន៥គ្រឿង ហោះចូលដែនអាកាសកូរ៉េខាងត្បូង កាលពីចុងខែធ្នូ លោកយូន ស៊ុកយោល បានហៅប្រជាជាតិកូរ៉េខាងត្បូង “ត្រៀមខ្លួនរៀបចំធ្វើសង្គ្រាម”។
យោងតាមលោក Soo Kim អ្នកវិភាគនៅវិទ្យាស្ថាន RAND នៅអាមេរិក គឺឆ្នាំ២០២៣នេះ អ្វីៗនឹងមិនអាចល្អប្រសើរឡើងបានទេ ព្រោះប្រទេសកូរ៉េទាំង២ កាន់តែមានទម្លាប់គំរាមកំញើញគ្នាទៅវិញទៅមក ដោយគ្មាននរណាព្រមចាញ់នរណាឡើយ។ ភាពក្លាហានពើងទ្រូងរបស់កូរ៉េខាងជើង អាចត្រូវបានទុកថា មានលក្ខណៈជោរជ្រុលបន្តិចមែន ក៏ប៉ុន្តែវាក៏មានន័យថា កូរ៉េខាងជើង កាន់តែមានទំនុកចិត្តលើសមត្ថភាពសព្វាវុធរបស់ខ្លួនដែរ ទើបហ៊ានពើងទ្រូងដូច្នេះ។ ជាងនេះទៀត សមត្ថភាពសព្វាវុធខ្លាំងក្លា អាចជាសន្លឹកបៀរសម្រាប់កូរ៉េខាងជើង នៅក្នុងករណីចរចាណាមួយ។ ខណៈដែលវិស័យសេដ្ឋកិច្ចស្ថិតនៅចំណុចសូន្យ វិស័យសព្វាវុធការពារជាតិ គឺចំណុចតែមួយគត់ ដែលគីម ជុងអ៊ុននៅសែសសល់ ដើម្បីយកទៅអួតប្រាប់ប្រជាជនខ្លួន។ នេះបើផ្អែកតាមការវិភាគ របស់លោកសាស្ត្រាចារ្យ Yang Moo-Jin នៅសកលវិទ្យាល័យ សិក្សាកូរ៉េខាងជើងនៅក្រុងសេអ៊ូល។
ចំណែកខាងត្បូងវិញ លោកយូន ស៊ុកយោល អះអាងថាបើកទ្វារចំហរដល់ការចរចាជានិច្ច។ ក៏ប៉ុន្តែ លោកបានបដិសេធ មិនចង់រៀបចំកម្មវិធីជំនួបកំពូលដែលមានតែនាម ឲ្យតែល្អមើល តែគ្មានលទ្ធផលជាក់ស្តែងនោះឡើយ។ លោកយូន ស៊ុកយោល ប្រកាន់គោលជំហររឹងរូសជាមួយកូរ៉េខាងជើង ក៏ដោយសារតែហេតុផលនយោបាយដែរ ដើម្បីប្រមូលកម្លាំងសំឡេងគាំទ្រ ពីសំណាក់ក្រុមអ្នកអភិរក្សនិយម សម្រាប់ការបើឆ្នោតសភាឆ្នាំ២០២៤។
ជាការពិត ភាពក្អេងក្អាង អួតសំញ៉ែញអាវុធនុយក្លេអ៊ែររបស់កូរ៉េខាងជើង បានធ្វើឲ្យមតិសាធារណៈកូរ៉េខាងត្បូង មានការបារម្ភកាន់តែខ្លាំងឡើង។ យោងតាមការស្ទាបស្ទង់មតិ កាលពីថ្ងៃ២មករា ដោយវិទ្យាស្ថាន Hankook Research គឺ៦៧%នៃប្រជាជនកូរ៉េខាងត្បូង បានបង្ហាញការគាំទ្រ ចង់ឲ្យប្រទេសខ្លួនមានអាវុធនុយក្លេអ៊ែរទុកការពារខ្លួន។ លោក Cheong Seong-Chang នៅវិទ្យាស្ថាន Sejong បានអះអាងថា នេះគឺជាវិធីតែមួយគត់ ដើម្បីទប់កូរ៉េខាងជើង ឲ្យប្រុងប្រយ័ត្ន។ តែយ៉ាងណា ការប្រកែកមកវិញពីសំណាក់រដ្ឋបាលលោកចូ បៃដិន បានបញ្ជាក់ថា លទ្ធភាពនៃការមានសព្វាវុធនុយក្លេអ៊ែរដោយផ្ទាល់ខ្លួនរបស់កូរ៉េខាងត្បូង គឺប្រហែលជាមិនអាចទៅរួចទេ ព្រោះវានឹងបើកផ្លូវ ឲ្យមានការប្រកួតប្រជែងសព្វាវុធនុយក្លេអ៊ែរ ទូទាំងតំបន់អាស៊ីខាងកើតតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ