ការស្រាវជ្រាវ៖ការបន្ថយប្រើជីអាសូតមិនប៉ះពាល់ដល់គុណភាពដីដាំដុះ និងផ្តល់ផលចំណេញដល់បរិស្ថាន និងសុខភាព
ចុះផ្សាយនៅថ្ងៃ៖
ស្តាប់ - ០៤:០៧
លទ្ធផលនៃការសិក្សាមួយចុះផ្សាយដោយទស្សនាវដ្តីវិទ្យាសាស្រ្តឈ្មោះ « Nature » កាលពីថ្ងៃទី៤ មករាបានឲ្យដឹងថា ពិភពលោកអាចកាត់បន្ថយការប្រើជីអាសូតដែលជាជីគីមីសម្រាប់ការដាំដុះ និងថា ការកាត់បន្ថយជីកសិកម្មមួយនេះមិនធ្វើឲ្យដីខ្វះជីជាតិ រួមទាំងផ្តល់ផលចំណេញដល់បរិស្ថាន និងសុខភាពទៀតផង។ តាមលទ្ធផលនៃការសិក្សាដដែល ទោះបីជាគេមិនប្រើជីអាសូតនៅក្នុងការដាំដុះក៏ដោយក៏ទិន្នផលដែលទទួលបានអាចគ្រប់គ្រាន់សម្រាប់ចិញ្ចឹមមនុស្សលោកដែលនឹងកើនដល់ ៩ ៧០០លាននាក់នៅឆ្នាំ ២០៥០ ខាងមុខ។
លទ្ធផលនៃការសិក្សានេះទទួលបានពីការវិភាគរបស់ក្រុមអ្នកស្រាវជ្រាវអន្តរជាតិមួយក្រុមលើដីដំាំដុះជាង ១ ៥០០កន្លែងនៅទូទាំងពិភពលោក។ ក្រុមអ្នកស្រាវជ្រាវបានយល់ឃើញថា ការស្វែងរកវិធីសាស្រ្តក្នុងការកាត់បន្ថយការប្រើជីអាសូតមិនទាន់យឺតពេល និងអាចធ្វើបាន។ នៅក្នុងន័យនេះ ក្រុមអ្នកស្រាវជ្រាវបានដាក់ចេញនូវកំណែទម្រង់ចំនួន ១១ចំណុចដែលត្រូវអនុវត្តជាបន្ទាន់ដើម្បីកាត់បន្ថយការបំពុលដោយជីអាសូតនៅក្នុងបរិយាកាស។ តាមក្រុមអ្នកស្រាវជ្រាវ ការចំណាយក្នុងការកាត់បន្ថយការបំពុលដោយជីអាសូតមានតម្លៃ ៣៤ ០០០លានដុល្លារក្នុងមួយឆ្នាំ។
ប្រទេសចិន និងប្រទេសឥណ្ឌាដែលបានប្រើជីអាសូតច្រើនសម្បើមនៅក្នុងការដាំដុះ និងដែលជាអ្នកបំពុលដោយអាសូតខ្លាំងជាងគេនៅក្នុងលោក ការចំណាយក្នុងការកាត់បន្ថយការបំពុលដោយជីអាសូតមានតម្លៃចន្លោះពី ៣ ០០០លានទៅ ៥ ០០០លានដុល្លារ។ តែទោះជាការចំណាយក្នុងការកាត់បន្ថយការបំពុលដោយជីអាសូតមានតម្លៃថ្លៃប៉ុណ្ណាក៏ដោយក៏ក្រុមអ្នកស្រាវជ្រាវបានមើលឃើញថា ផលចំណេញដែលទទួលបានត្រឡប់វិញមានតម្លៃច្រើនជាងនេះឆ្ងាយណាស់។
ផលចំណេញដែលក្រុមអ្នកស្រាវជ្រាវចង់និយាយផ្តោតសំខាន់លើអាកាសធាតុ បរិស្ថាន និងសុខភាពរបស់មនុស្ស។ ការកាត់បន្ថយការបំពុលដោយជីអាសូតនៅក្នុងបរិយាកាសនាំឲ្យការស្លាប់មុនអាយុធ្លាក់ចុះ ការខូចខាតដល់ធម្មជាតិមានការថមថយ និងមានការកើនឡើងនូវទិន្នផលកសិកម្ម។ តែក្រុមអ្នកស្រាវជ្រាវបានទទួលស្គាល់ថា ក្រុមប្រជាកសិករតូចតាចគ្មានលទ្ធភាពដើម្បីងាកចេញពីការប្រើជីអាសូតនៅក្នុងការធ្វើស្រែ ចម្ការរបស់ខ្លួន និងចូលរួមកាត់បន្ថយការបំពុលដោយជីអាសូតបានទេ។ នៅក្នុងករណីនេះ ក្រុមអ្នកស្រាវជ្រាវបានអំពាវនាវឲ្យមានការជួយជ្រោមជ្រែងពីរដ្ឋអំណាចដើម្បីឲ្យពួកគេបែរទៅរកបច្ចេកទេសថ្មីនៅក្នុងអាជីពរបស់ខ្លួន។
សព្វថ្ងៃនេះ បរិមាណសារធាតុអាសូតជាងពាក់កណ្តាលដែលមាននៅក្នុងជីអាសូតបានជ្រាបចូលទៅក្នុងខ្យល់ និងទៅក្នុងទឹក។ សារធាតុអាសូតដែលចេញពីជីអាសូតនេះបានបង្កឲ្យមានខ្យល់តុកស៊ិក ដីមានជាតិអាស៊ីត ធ្វើឲ្យស្រទាប់អូហ្សូនស្តើង និងការរិចរិលជីវៈចម្រុះ។ ពិតណាស់ អាហ្សូតជាសារធាតុចាំបាច់សម្រាប់គ្រប់ជីវិតនៅលើផែនដីរបស់យើង ពិសេសរុក្ខជាតិ។ មួយវិញទៀត ពិភពលោករបស់យើងក៏កំពុងជោរជន់ដោយអាសូតពីធម្មជាតិស្រាប់ទៅហើយ។ ជិត ៨០% នៃបរិយាកាសរបស់ផែនដីយើងជាអ្នកបង្កើតអាសូតដោយធម្មជាតិ និងដោយស្វ័យប្រវត្តិក្នុងទម្រង់ជាឧស្ម័ន។
ជារៀងរាល់ឆ្នាំ មានអាសូតធម្មជាតិប្រមាណជា ២០០លានតោនបានជ្រាបចូលក្នុងដី និងក្នុងមហាសមុទ្រ។ តែក្រុមអ្នកស្រាវជ្រាវបានរម្លឹកថា សង្វាក់នៃវត្តមានអាសូតធម្មជាតិនេះត្រូវបានរំខាន និងមានភាពមិនប្រក្រតីដោយសារការប្រើជីអាសូត ឬជីគីមីប្រមាណជា ១២០លានតោនក្នុងមួយឆ្នាំ។ មួយវិញទៀត នៅក្នុងបរិមាណជីអាសូត ឬជីគីមីដែលមនុស្សបានប្រើទាំងប្រមាណ ១២០លានតោនក្នុងមួយឆ្នាំនេះ មានជិតជិតពាក់កណ្តាលបានជ្រាបចូលក្នុងរុក្ខជាតិ ហើយចំនួនដែលនៅសេសសល់បានសាយភាយនៅក្នុងបរិយាកាស។
សរុបមក បញ្ហាប្រឈមសម្រាប់មនុស្សលោកនៅចំពោះមុខពេលនេះ គឺការព្យាយាមស្វែងរកដំណោះស្រាយដើម្បីបញ្ឈប់ការបន្ថែមសារធាតុអាសូតទៅក្នុងដីតាមរយៈការប្រើជីគីមី។ គេអាចនិយាយបានថា ការស្វែងរកដំណោះស្រាយលើបញ្ហាមួយនេះមិនខុសគ្នានឹងការព្យាយាមរបស់មនុស្សលោកក្នុងការកាត់បន្ថយឧស្ម័នកាបូននៅក្នុងបរិយាកាសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ