ការបាញ់បង្ហោះរ៉ុកកែតផ្ទុកផ្កាយរណបដំបូងបង្អស់នៅអង់គ្លេសត្រូវទទួលបរាជ័យ
ចុះផ្សាយនៅថ្ងៃ៖
ស្តាប់ - ០៤:០៨
កាលពីថ្ងៃចន្ទ អង់គ្លេសបានប៉ុនប៉ងបាញ់បង្ហោះរ៉ុកកែតផ្ទុកផ្កាយរណបទៅក្នុងទីអវកាស ដែលជាបេសកកម្មមិនធ្លាប់ធ្វើពីមុននៅក្នុងទឹកដីអង់គ្លេស។ ក៏ប៉ុន្តែ នៅទីបំផុតទៅ បេសកកម្មជាប្រវត្តិសាស្រ្តនេះ ដែលគេរំពឹងថានឹងអាចឲ្យអង់គ្លេសឈានជើងចូលក្នុងក្លឹបប្រទេសមហាអំណាចអវកាស ត្រូវទទួលបរាជ័យ ដោយរ៉ុកកែតអវកាសមិនអាចនាំផ្កាយរណបទៅដាក់ក្នុងគន្លងតារាវិថីបានទៅតាមការគ្រោងទុក។
នៅក្នុងប្រវត្តិនៃកម្មវិធីអវកាសរបស់ខ្លួន អង់គ្លេសធ្លាប់បានទទួលជោគជ័យក្នុងការបាញ់បង្ហោះផ្កាយរណបដោយខ្លួនឯងតែម្តងគត់ ហើយជោគជ័យនេះ គឺតាំងពីឆ្នាំ១៩៧១កន្លងទៅម៉្លេះ ពោលគឺតាំងពីកន្លះសតវត្សរ៍មកហើយ។ ចាប់តាំងពីពេលនោះមក អង់គ្លេសមិនមានរ៉ុកកែតអវកាសផ្ទាល់ខ្លួនឯងនោះទេ ដោយរាល់ការបាញ់បង្ហោះផ្កាយរណបទាំងអស់ត្រូវធ្វើនៅប្រទេសផ្សេង។
ហេតុដូច្នេះហើយបានជាបេសកកម្មបាញ់បង្ហោះផ្កាយរណបកាលពីថ្ងៃចន្ទកន្លងទៅនេះ ថ្វីដ្បិតតែជាបេសកកម្មធ្វើឡើងដោយរ៉ុកកែតអវកាសរបស់ក្រុមហ៊ុនឯកជន ក៏ប៉ុន្តែ វាជាក្តីសង្ឃឹមមួយ សម្រាប់អង់គ្លេស ក្នុងការអភិវឌ្ឍវិស័យរ៉ុកកែតអវកាសក្នុងស្រុកផ្ទាល់ខ្លួនឯង លែងពឹងលើប្រទេសផ្សេង និងជាពិសេស អាចឈានជើងចូលប្រកួតប្រជែងនៅក្នុងវិស័យអវកាសជាមួយប្រទេសមហាអំណាចអវកាសផ្សេងទៀត។ ក៏ប៉ុន្តែ ក្តីសង្ឃឹមនេះត្រូវអាក់ខានទៅវិញ ក្រោយពីបេសកកម្មកាលពីថ្ងៃចន្ទត្រូវទទួលបរាជ័យ។
រ៉ុកកែតអវកាស ដែលគេប្រើក្នុងការបាញ់បង្ហោះផ្កាយរណប កាលពីថ្ងៃចន្ទនេះ មានឈ្មោះថា LauncherOne ជារ៉ុកកែតរបស់ក្រុមហ៊ុនឯកជនឈ្មោះ Virgin Orbit ដែលជាផ្នែកមួយនៃក្រុមហ៊ុន Virgin របស់មហាសេដ្ឋីអង់គ្លេស Richard Branson។
គួរបញ្ជាក់ថា កាលពីដំបូង គម្រោងផលិតរ៉ុកកែតអវកាស LauncherOne ត្រូវបានអភិវឌ្ឍដោយក្រុមហ៊ុន Virgin Galactic មុននឹងត្រូវបំបែកចេញជាក្រុមហ៊ុនពីរដាច់ពីគ្នានៅឆ្នាំ២០១៧ ដោយ Virgin Galactic បន្តផ្តោតលើកម្មវិធីទេសចរណ៍អវកាស ចំណែកក្រុមហ៊ុន Virgin Orbit ផ្តោតតែលើការផលិតរ៉ុកកែត Launcher One ដើម្បីផ្តល់សេវាកម្មបាញ់បង្ហោះផ្កាយរណប។
LauncherOne ដែលត្រូវបាញ់បង្ហោះសាកល្បងដោយជោគជ័យជាលើកទីមួយ កាលពីឆ្នាំ២០២១កន្លងទៅ គឺជាប្រភេទរ៉ុកកែតអវកាសធុនតូច ប្រវែងសរុបត្រឹម ២១ម៉ែត្រ ហើយអាចផ្ទុកផ្កាយរណបក្នុងទម្ងន់សរុបត្រឹមក្នុងចន្លោះពី ៣០០គីឡូក្រាម ទៅ ៥០០គីឡូក្រាម ពោលគឺត្រឹមកន្លះតោនតែប៉ុណ្ណោះ។ ដើម្បីជាការប្រៀបធៀប រ៉ុកកែតធុន Falcon9 របស់ក្រុមហ៊ុន SpaceX អាចផ្ទុកទម្ងន់បានក្នុងចន្លោះ ពី ៦តោន ទៅ ៩តោន ចំណែករ៉ុកកែត Ariane 5 របស់បារាំង និងទីភ្នាក់ងារអវកាសអឺរ៉ុបវិញ អាចផ្ទុកទម្ងន់រហូតទៅដល់ ១០តោន ទៅ ២០តោនឯណោះ។
រ៉ុកកែត LauncherOneក៏ដូចជារ៉ុកកែតអវកាសទូទៅដែរ ត្រូវធ្វើឡើងជាពីរកំណាត់ (Stages) ក៏ប៉ុន្តែ ខុសពីរ៉ុកកែតអវកាសភាគច្រើនផ្សេងទៀត LauncherOne មិនត្រូវគេបាញ់បង្ហោះចេញពីដីដោយផ្ទាល់នោះទេ ផ្ទុយទៅវិញ គេដាក់វាភ្ជាប់ទៅនឹងយន្តហោះធុន Boeing 747 ហោះចេញពីដីរហូតទៅដល់រយៈកម្ពស់ជាង ១០គីឡូម៉ែត្រ ទើបផ្តាច់ខ្លួនចេញពីយន្តហោះ រួចហើយបញ្ឆេះម៉ូទ័របន្តដំណើរទៅកាន់ទីអវកាសដោយខ្លួនឯង។
នៅក្នុងបេសកកម្មកាលពីថ្ងៃចន្ទ LauncherOne ដែលផ្ទុកទៅដោយផ្កាយរណបចំនួន ៩គ្រឿង បានផ្តាច់ខ្លួនចេញពីយន្តហោះ Boeing 747 នៅពីលើមហាសមុទ្រអាត្លង់ទិក រួចហើយបញ្ឆេះម៉ូទ័រកំណាត់ទីមួយ ហោះឡើងទៅលើក្នុងដំណើរការជាធម្មតា ទៅតាមការគ្រោងទុក។ ក៏ប៉ុន្តែ បញ្ហាបច្ចេកទេសកើតឡើងទៅលើកំណាត់ទីពីរ ដែលនាំទៅដល់បរាជ័យ មិនអាចបញ្ជូនផ្កាយរណបទៅដាក់ក្នុងគន្លងតារាវិថីបាន។
គិតរហូតមកទល់នឹងពេលនេះ គេនៅមិនទាន់ដឹងប្រាកដនៅឡើយទេ អំពីដំណើរដើមហេតុដែលនាំទៅដល់បរាជ័យក្នុងបេសកកម្មបាញ់បង្ហោះផ្កាយរណបនេះ ដោយអាជ្ញាធរអង់គ្លេស រួមជាមួយក្រុមហ៊ុន Virgin Orbit កំពុងស៊ើបអង្កេត។ ក៏ប៉ុន្តែ ទាំងអគ្គនាយកក្រុមហ៊ុន Virgin Orbit និងទាំងរដ្ឋាភិបាលអង់គ្លេស សុទ្ធតែបានអះអាងថា បរាជ័យកាលពីថ្ងៃចន្ទនេះ នឹងមិនជាឧបសគ្គរារាំងគម្រោងអភិវឌ្ឍរ៉ុកកែតអវកាសអង់គ្លេសនោះទេ ដោយគេគ្រោងនឹងចាប់ផ្តើមបេសកកម្មបាញ់បង្ហោះផ្កាយរណបនេះសាជាថ្មីឡើងវិញ នៅក្រោយពេលការស៊ើបអង្កេតត្រូវបញ្ចប់ ហើយបញ្ហាបច្ចេកទេសត្រូវបានគេរកឃើញ និងកែតម្រូវឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ