ទីតាំងបង្ហោះរ៉ុកកែតអវកាសទីមួយនៅក្នុងទឹកដីអឺរ៉ុបត្រូវបានសម្ពោធដាក់ឲ្យប្រើប្រាស់
ចុះផ្សាយនៅថ្ងៃ៖
ស្តាប់ - ០៣:៤៧
កាលពីថ្ងៃសុក្រ ១៣មករាកន្លងទៅនេះ សហភាពអឺរ៉ុបបានសម្ពោធទីតាំងបាញ់បង្ហោះរ៉ុកកែតអវកាសរបស់ខ្លួន នៅក្នុងប្រទេសស៊ុយអែត។ ជាទីតាំងបាញ់បង្ហោះរ៉ុកកែតអវកាសដំបូងបង្អស់ ដែលស្ថិតនៅក្នុងទ្វីបអឺរ៉ុប ហើយវាជាផ្នែកមួយ នៃកិច្ចខិតខំប្រឹងប្រែងរបស់អឺរ៉ុប នៅក្នុងការប្រជែងផ្នែកអវកាស។
ទីតាំងបង្ហោះរ៉ុកកែតអវកាស ដែលត្រូវបានសម្ពោធដាក់ឲ្យប្រើប្រាស់ កាលពីថ្ងៃសុក្រ ក្រោមអធិបតីភាពព្រះមហាក្សត្រស៊ុយអែត និងប្រធានគណៈកម្មការអឺរ៉ុប គឺជាមជ្ឈមណ្ឌលអវកាស ដែលគេឲ្យឈ្មោះថា « Esrange Space Center » បង្កើតឡើង ដោយទីភ្នាក់ងារអវកាសអឺរ៉ុប “អេសា” តាំងពីឆ្នាំ១៩៦៦មកម៉្លេះ គ្រាន់តែថា កាលពីពេលកន្លងមក មជ្ឈមណ្ឌលអវកាសនេះត្រូវបានប្រើប្រាស់ សម្រាប់តែការសិក្សាទៅលើស្រទាប់បរិយាកាសផែនដី និងសិក្សាទៅលើបាតុភូត “អូរ៉បូរេអាល់” តែប៉ុណ្ណោះ ហើយមិនមានសមត្ថភាពបាញ់បង្ហោះផ្កាយរណបទៅដាក់ក្នុងគន្លងតារាវិថីនោះទេ ដោយរ៉ុកកែតទាំងប្រមាណជាជាង ៦០០ ដែលត្រូវបានគេបាញ់បង្ហោះចេញពីមជ្ឈមណ្ឌលអវកាសនេះ សុទ្ធសឹងជាប្រភេទរ៉ុកកែត ដែលគេឲ្យឈ្មោះជាភាសាអង់គ្លេសថា « Suborbital » ពោលគឺ វាអាចហោះទៅដល់ក្នុងទីអវកាសដែរ (គឺទៅដល់ រយៈកម្ពស់ ២៦០គីឡូម៉ែត្រ) ក៏ប៉ុន្តែ មិនអាចស្ថិតនៅក្នុងគន្លងតារាវិថីបាន ដោយត្រូវធ្លាក់ចុះមកដីវិញ។
រហូតទាល់តែដល់ឆ្នាំ២០២០កន្លងទៅ ទើបស៊ុយអែត និងអឺរ៉ុប សម្រេចពង្រីកមជ្ឈមណ្ឌលអវកាសនេះ ឲ្យក្លាយជាទីតាំងបាញ់បង្ហោះផ្កាយរណបរហូតទៅដល់ក្នុងគន្លងតារាវិថីជុំវិញផែនដី។
គួរបញ្ជាក់ថា មុននឹងដាក់សម្ពោធមជ្ឈមណ្ឌលអវកាសនៅស៊ុយអែតនេះ អឺរ៉ុបមានទីតាំងបាញ់បង្ហោះរ៉ុកកែតអវកាសតែមួយគត់ គឺមជ្ឈមណ្ឌលអវកាសគូរូ ស្ថិតនៅក្នុងខេត្តហ្គីយ៉ាន ដែលជាដែនដីនាយសមុទ្ររបស់បារាំង ស្ថិតនៅតំបន់អាមេរិកខាងត្បូង ពោលគឺនៅត្រើយម្ខាងទៀតនៃមហាសមុទ្រអាត្លង់ទិក ឆ្ងាយពីទឹកដីអឺរ៉ុប។
នៅក្បែរអឺរ៉ុប គឺមានមជ្ឈមណ្ឌលអវកាសបៃកូនួររបស់រុស្ស៊ី ដែលអឺរ៉ុបធ្លាប់ពឹងផ្អែកច្រើនផងដែរ នៅក្នុងបេសកកម្មអវកាសមួយចំនួនកាលពីពេលកន្លងទៅ ក៏ប៉ុន្តែ ក្រោយពីមានសង្គ្រាមអ៊ុយក្រែន កិច្ចសហប្រតិបត្តិការវិស័យអវកាស រវាងអឺរ៉ុប និងរុស្ស៊ី ត្រូវកាត់ផ្តាច់ស្ទើរតែទាំងស្រុង ហើយដំណើរវិវឌ្ឍនៃភូមិសាស្រ្តនយោបាយនេះ ធ្វើឲ្យអឺរ៉ុបមើលឃើញកាន់តែច្បាស់ ពីតម្រូវការចាំបាច់ដែលត្រូវមានមជ្ឈមណ្ឌលអវកាសផ្ទាល់ខ្លួនឯងនៅក្នុងទឹកដីអឺរ៉ុប ដើម្បីកាត់បន្ថយការពឹងផ្អែកលើប្រទេសដទៃ។
ស្ថិតនៅខាងជើងប្រទេសស៊ុយអែត រហូតទៅដល់ក្បែរតំបន់ប៉ូលខាងជើង មជ្ឈមណ្ឌលអវកាស Esrange គឺជាទីតាំងបាញ់បង្ហោះរ៉ុកកែតអវកាស ដែលស្ថិតនៅខាងជើងគេបង្អស់ នៅក្នុងចំណោមមជ្ឈមណ្ឌលអវកាសផ្សេងទៀត នៅទូទាំងពិភពលោក។ ទីតាំងដែលមានអំណោយផល សម្រាប់ការបាញ់បង្ហោះផ្កាយរណប ដែលមានគន្លងតារាវិថីពីលើតំបន់ប៉ូល ដោយឆ្លងកាត់ពីប៉ូលខាងជើង ទៅប៉ូលខាងត្បូង។
ខុសពីមជ្ឈមណ្ឌលអវកាសគូរូ ដែលជាទីតាំងបាញ់បង្ហោះរ៉ុកកែតធុនធំ ផ្ទុកទម្ងន់រហូតដល់ទៅរាប់តោន ហើយអាចបាញ់បង្ហោះយានទៅកាន់ទីអវកាសក្នុងចម្ងាយឆ្ងាយ មជ្ឈមណ្ឌលអវកាស Esrange នៅស៊ុយអែតនេះវិញ នឹងត្រូវប្រើសម្រាប់តែការបាញ់បង្ហោះរ៉ុកកែតធុនតូច ផ្ទុកទម្ងន់បានត្រឹមរាប់រយគីឡូក្រាម ហើយប្រើសម្រាប់តែការបាញ់បង្ហោះផ្កាយរណបទៅក្នុងគន្លងជុំវិញភពផែនដីយើងនេះតែប៉ុណ្ណោះ។
ដោយមើលទៅលើកំណើននៃតម្រូវការផ្កាយរណប ដែលគេព្យាករថា នឹងអាចកើនឡើង ពី ៥ពាន់គ្រឿង ដែលមានបច្ចុប្បន្ន រហូតដល់ទៅប្រមាណជា ១០ម៉ឺនគ្រឿង នៅឆ្នាំ២០៤០ខាងមុខ ហើយបណ្តាប្រទេសនៅអឺរ៉ុបក៏សម្បូរទៅដោយក្រុមហ៊ុនផលិត និងប្រតិបត្តិការផ្កាយរណបផងនោះ មជ្ឈមណ្ឌលអវកាស Esrange អាចនឹងត្រូវក្លាយជាទីតាំងចម្បងមួយ សម្រាប់ឲ្យអឺរ៉ុបបង្កើនភាពប្រកួតប្រជែងក្នុងវិស័យផ្កាយរណប។
គួរបញ្ជាក់ថា បច្ចុប្បន្ននេះ មជ្ឈមណ្ឌលអវកាស Esrange ត្រូវបានទីភ្នាក់ងារអវកាសអឺរ៉ុប យកធ្វើជាទីតាំង សម្រាប់គម្រោងផលិតរ៉ុកកែតអវកាសធុនថ្មី គឺរ៉ុកកែតឈ្មោះ « Themis » ដែលជាប្រភេទរ៉ុកកែតអាចប្រើបានច្រើនដង ស្រដៀងទៅនឹងរ៉ុកកែតធុន Falcon 9 របស់ក្រុមហ៊ុន SpaceX ហើយដែលការបាញ់បង្ហោះសាកល្បងជាលើកដំបូង ត្រូវគេគ្រោងធ្វើ នៅក្នុងអំឡុងឆ្នាំ២០២៣នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ