ហេតុអ្វី ពិភពលោកមិនអាចត្រៀមលក្ខណៈប្រឈមនឹងវិបត្តិរាតត្បាតសកលថ្មី ?
ចុះផ្សាយនៅថ្ងៃ៖
ស្តាប់ - ០៥:១៤
នៅថ្ងៃទី ៣០ មករា២០២០ អង្គការសុខភាពពិភពលោកបានប្រកាសចាត់ទុកជំងឺកូវីដ១៩ជាភាពបន្ទាន់សាធារណៈកំរិតអន្តរជាតិ។ បីឆ្នាំក្រោយ នៅថ្ងៃទី ៣០មករា២០២៣ អង្គការសុខភាពពិភពលោកសម្រេចរក្សាកំរិតអាសន្នខ្ពស់បំផុតដដែល ប្រឈមនឹងជំងឺរាតត្បាតសកលកូវីដ១៩។ ប៉ុន្តែទោះបីជាមានកូវីដ១៩ជាមេរៀនជាក់ស្តែងក៏ដោយ ក៏ពិភពលោកបន្តស្ថិតក្នុងស្ថានភាពប្រហែសខ្លាំងបំផុតប្រឈមនឹងជំងឺរាតត្បាតសកល នាពេលអនាគតដែលអាចលេចឡើងទន្ទឹមនឹងគ្រោះមហន្តរាយធម្មជាតិដដែល។ នេះបើតាមការសម្គាល់ឃើញរបស់អង្គការកាកបាទក្រហម។ ហេតុអ្វី ?
តាំងពីក្លាយជាជំងឺរាតត្បាតសកលជាផ្លូវការមក កូវីដ១៩បានសម្លាប់ជីវិតមនុស្សអស់ជាង៦លាននាក់ នៅទូទាំងពិភពលោក។ បីឆ្នាំក្រោយ កូវីដនៅតែបន្តឆក់យកជីវិតដោយគ្មានរអារដដែល។ ចំនួនអ្នកស្លាប់បានកើនឡើងជាថ្មី ជារៀងរាល់ថ្ងៃ ចាប់តាំងពីខែធ្នូ២០២២មក។ ១៧ម៉ឺននាក់ថែមទៀតបានស្លាប់ដោយកូវីដ១៩ ក្នុងរយៈពេលតែពីរខែចុងក្រោយមកនេះ។ សម្រាប់អង្គការសុខភាពពិភពលោក ចំនួនជនរងគ្រោះស្លាប់ពិតប្រាកដអាចច្រើនជាងតួលេខខាងលើ។ ដោយសារការរកឃើញថ្នាំបង្ការ ស្ថានភាពជាទូទៅបានប្រសើរឡើងមួយភាគធំ ប៉ុន្តែអង្គការសុខភាពពិភពលោកបានសម្រេចនៅថ្ងៃទី ៣០មករា២០២៣ រក្សាកំរិតភាពអាសន្នកំរិតខ្ពស់បំផុតដដែលប្រឈមនឹងជំងឺកូវីដ១៩។
ដូច្នេះរដ្ឋាភិបាលត្រូវតែបន្តអំពាវនាវឱ្យប្រជាពលរដ្ឋទៅចាក់ថ្នាំបង្ការទៀត ហើយត្រូវបន្តភាពប្រុងប្រយ័ត្នខ្ពស់ដដែល ព្រោះមធ្យោបាយដែលមានកន្លងមកមិនគ្រប់គ្រាន់នឹងប្រឈមជាមួយគ្រោះរាតត្បាតសកល។ ប្រជាពលរដ្ឋទូទាំងពិភពលោក ក៏ដូចជារដ្ឋាភិបាលប្រទេសមួយចំនួន ភ្ញាក់ផ្អើលខ្លាំងណាស់ នៅពេលជួបវិបត្តិកូវីដ១៩ ហើយចាប់យល់អំពីភាពចាំបាច់នៃការត្រៀមលក្ខណៈប្រឈមនឹងគ្រោះរាតត្បាតសកល។
វិបត្តិកូវីដ១៩ បានឆ្លុះបញ្ចាំងឱ្យឃើញអំពីកង្វះខាតដ៏ធំធេងនៃប្រព័ន្ធការពារ និងកង្វះការត្រៀម ដែលមានលក្ខណៈរឹងមាំល្អ។ មិនបានត្រៀមខ្លួនត្រឹមត្រូវ វិបត្តិកូវីដបានបន្សល់ទុកនូវផលវិបាកជាច្រើន។ ដូច្នេះបើមិនចាប់ផ្តើមត្រៀមលក្ខណៈទប់ទល់ទេ ពិភពលោកច្បាស់ជាគ្មានលេសអ្វីការពារកំហុសខ្លួនឯងឡើយនៅថ្ងៃក្រោយ។ ប៉ុន្តែបើតាមលោក Jagan Chapagain អគ្គលេខាសហព័ន្ធសង្គមអន្តរជាតិនៃអង្គការកាកបាទនិងអឌ្ឍចន្ទក្រហម ឆ្លងកាត់មេរៀនកូវីដបីឆ្នាំហើយក៏ពិភពលោកនៅតែពុំរាងចាល ពុំមានការត្រៀមលក្ខណៈទេ។ បណ្តាញមនុស្សធម៌ដ៏ធំជាងគេនៅលើពិភពលោកនេះបានព្រមានថាបើទោះបីជាដឹងថាមានពហុហានិភ័យ កាន់តែខ្ពស់ខ្លាំងនាពេលអនាគតក៏ដោយ ក៏មានរដ្ឋាភិបាលច្រើនណាស់ដែលគ្មានត្រៀមប្រព័ន្ធការពារ ឱ្យបានប្រសើរជាងសម័យមុនឆ្នាំ២០១៩។
នាពេលអនាគត ប្រទេសនីមួយៗត្រូវត្រៀមប្រឈមនឹងពហុហានិភ័យ មិនមែនជាហានិភ័យទោល ក្នុងពេលតែមួយទេ។ សម្រាប់អង្គការកាកបាទនិងអឌ្ឍចន្ទក្រហម មានវិបត្តិពីរអាចកើតឡើងក្នុងពេលតែមួយនោះគឺ កំណើននៃគ្រោះមហន្តរាយធម្មជាតិដោយហេតុអាកាសធាតុប្រែប្រួល និងរលកជំងឺរាតត្បាតសកល ប្រហាក់ប្រហែលនឹងកូវីដ១៩។ នៅ សតវត្សរ៍នេះ វិបត្តិសុខភាពអាចផ្ទុះឡើងដំណាលនឹងវិបត្តិធម្មជាតិ។ គ្រោះធម្មជាតិដ៏អាក្រក់ហួសហេតុ នឹងលេចមានកាន់តែញយ និងកាន់តែកំណាចខ្លាំងឡើង ហើយសមត្ថភាពទប់ទល់របស់មនុស្សជាតិមានកំរិត។ ជំងឺរាតត្បាតសកលថ្មីអាចនឹងលេចឡើង ដ៏ឆាប់ៗទៀត។ ដូច្នេះបើមានបទសោធន៍កូវីដហើយ ពិភពលោកនៅតែមិនពន្លឿនវិធានការត្រៀមទេ តើបាននរណាធ្វើទៅវិញ ?
នៅក្នុងរបាយការណ៍ អង្គការកាកបាទនិងអឌ្ឍចន្ទក្រហម បានទទូចបញ្ជាក់ថា វិបត្តិវាយប្រហារខ្លាំងលើជនងាយរងគ្រោះស្រាប់ ហើយការបណ្តោយឱ្យជនក្រីក្រខ្លាំងប្រឈមនឹងគ្រោះទាំងនោះ គឺជាការស្វ័យបំផ្លាញខ្លួនឯងទេ ព្រោះជំងឺរាតត្បាតអាចនឹងបំប្លែង បកត្រលប់មកវិញក្នុងទម្រង់គ្រោះថ្នាក់ខ្លាំងជាងមុន។ ជាច្រេះស៊ីរូងសង្គមទៅវិញទេ !
ចុះតើត្រូវត្រៀមលក្ខណៈប្រឈមយ៉ាងណា ?! បណ្តាញមនុស្សធម៌ដ៏ធំជាងគេនៅលើពិភពលោក យល់ថាគេត្រូវពង្រឹង ការផ្តល់ទំនុកចិត្ត ផ្តល់សមធម៌ និងសកម្មភាពមូលដ្ឋាន សម្រាប់យកមកធ្វើជាទម្រគ្រឹះស្ថាបនាវិធានការត្រៀមប្រឈមនឹងវិបត្តិក្រោយៗ។ ប្រសិនបើមនុស្សជាតិមានទំនុកចិត្តលើសារសុវត្ថិភាព ពួកគេនឹងព្រមសម្របខ្លួនធ្វើតាមវិធានការរបស់អាជ្ញាធរសុខាភិបាលសាធារណៈនិងព្រមទៅចាក់ថ្នាំបង្ការ។ ប៉ុន្តែទំនុកចិត្តត្រូវស្ថាបនាដោយប្រើពេល និងជាដំណើរបែបបទដែលមិនអាចរង់ចាំទាល់តែមានវិបត្តិផ្ទុះឡើងឡើយ។ នៅពេលគ្មាន ឬមិនសូវមានទំនុកចិត្ត គឺនយោបាយនិងបុគ្គលនិយមជាអ្នកឈ្នះនាំមុខ។ នេះជាអ្វីដែលវិបត្តិកូវីដបានរំលេចឱ្យឃើញ។ វិបត្តិរាតត្បាតជំងឺ បានបង្ខូងវិសមភាពសង្គមដែលមានស្រាប់ឱ្យកាន់តែខូងជ្រៅ ហើយបន្ថែមដោយប្រព័ន្ធអនាម័យអាក្រក់ រស់គរផ្តុំចម្រុះគ្នា ខ្វះសេវាថែទាំសុខភាព និងសង្គម ព្រមទាំងកង្វះស្បៀងអាហារ ... ទាំងអស់សុទ្ធតែជាលក្ខខណ្ឌដ៏ប្រពៃសម្រួលការចម្លងជំងឺ។
ផ្តល់សមធម៌ ដោយត្រូវគិតគូរលុបបំបាត់ភាពងាយរងគ្រោះផ្នែកសុខភាពនិងសង្គមសេដ្ឋកិច្ច ឱ្យបានមុនផ្ទុះវិបត្តិថ្មី។ នេះជាអនុសាសន៍របស់ក្រុមការងារអង្គការកាកបាទក្រហម ដោយណែនាំឱ្យរដ្ឋាភិបាលផ្តោតការគិតគូរដល់សហគមន៍មូលដ្ឋាន។ របាយការណ៍ក៏បានអំពាវនាវផងដែរ ឱ្យមានការអភិវឌ្ឍផលិតផលថ្នាំក្នុងតម្លៃថោក ងាយរក្សាទុក និងអាចប្រើបានសម្រាប់ប្រឈមនឹងជំងឺរាតត្បាត។ ពីពេលនេះដល់ឆ្នាំ២០២៥ អង្គការប៉ាន់ប្រមាណថាប្រទេសនីមួយៗត្រូវបង្កើនហិរញ្ញវត្ថុជាតិសម្រាប់វិស័យសុខាភិបាល ឱ្យបានដល់កំរិត ១%នៃផលិតផលសរុបក្នុងស្រុក។ ចំណែកកញ្ចប់ហិរញ្ញវត្ថុពិភពលោក សម្រាប់ផ្នែកសុខភាព ត្រូវមានទំហំយ៉ាងតិច ១៥ពាន់លានដុល្លារក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ