តើបញ្ញាសិប្បនិម្មិតអាចបង្កផលប៉ះពាល់អ្វីខ្លះដល់ទីផ្សារការងារ?
ចុះផ្សាយនៅថ្ងៃ៖
ស្តាប់ - ០៤:៤៩
នៅក្នុងមួយរយៈកាលចុងក្រោយនេះ គេសង្កេតឃើញថា បច្ចេកវិទ្យាបញ្ញាសិប្បនិម្មិតកំពុងរីកចម្រើនយ៉ាងលឿនទៅមុខគួរឲ្យកត់សម្គាល់។ ជឿនលឿនខ្លាំង រហូតធ្វើឲ្យអ្នកជំនាញជាច្រើនបង្ហាញនូវក្តីបារម្ភ ហើយនាំគ្នាធ្វើញត្តិទាមទារឲ្យផ្អាកការអភិវឌ្ឍបញ្ញាសិប្បនិម្មិតជាបណ្តោះអាសន្ន ដោយនៅក្នុងចំណោមក្តីបារម្ភរបស់អ្នកជំនាញនេះ ក៏មានដែរ ផលប៉ះពាល់ចំពោះទីផ្សារការងារ។ តើភាពជឿនលឿននៃបច្ចេកវិទ្យាសិប្បនិម្មិតនេះអាចនឹងបង្កនូវផលប៉ះពាល់អ្វីខ្លះដល់ការងាររបស់មនុស្សយើង?
បញ្ញាសិប្បនិម្មិត ដែលគេច្រើនហៅកាត់ពីភាសាអង់គ្លេសថា “អេអាយ” (AI) មិនមែនជារឿងថ្មីនោះទេ។ អ្វីដែលថ្មី គឺវាមានភាពជឿនលឿនខ្លាំងជាងមុន និងមានមុខងារទូលំទូលាយជាងមុន ដែលអាចឲ្យគេកែច្នៃយកទៅប្រើប្រាស់នៅក្នុងវិស័យកាន់តែទូលាយ ហើយដែលមានសក្តានុពលបង្កើតជាមុខងារស្វ័យប្រវត្តិជំនួសការងាររបស់មនុស្សបានកាន់តែច្រើនជាងមុន។
បច្ចេកវិទ្យាបញ្ញាសិប្បនិម្មិតខ្លះ រួមមានដូចជា Midjourney ឬក៏ DALL-E ជាដើម អាចបង្កើតជារូបភាពបានយ៉ាងលឿន និងយ៉ាងស្អាត ដែលមនុស្សភាគច្រើនមិនអាចធ្វើបាន។ បញ្ញាសិប្បនិម្មិតខ្លះទៀត អាចបង្កើតជាបទភ្លេង ឬបង្កើតជាសំឡេងមនុស្សនិយាយ ទៅតាមអត្ថបទ។ រឹតតែជឿនលឿនជាងនេះទៅទៀត គឺបញ្ញាសិប្បនិម្មិតថ្មីចុងក្រោយ ដែលគេតែងតែនាំគ្នានិយាយទៅដល់ នៅក្នុងរយៈពេលប៉ុន្មានខែចុងក្រោយនេះ គឺ ChatGPT របស់ក្រុមហ៊ុន OpenAI ហើយដែលត្រូវបានដាក់ឲ្យដំណើរការលើប្រព័ន្ធ Microsoft។
ChatGPT អាចសន្ទនាឆ្លងឆ្លើយជាមួយមនុស្ស អាចសរសេរអត្ថបទ (ជាអត្ថបទតែងសេចក្តី ជាអត្ថបទព័ត៌មាន ឬជារឿងប្រលោមលោក) អាចសរសេរកូដកុំព្យូទ័រ ឬរចនាវេបសាយពីដើមដល់ចប់ដោយចេញត្រឹមពីគំនូសព្រាង ហើយអ្វីដែលធ្វើឲ្យអ្នកជំនាញរឹតតែភ្ញាក់ផ្អើលជាងនេះទៅទៀត គឺសមត្ថភាពរបស់ ChatGPT ក្នុងការឆ្លើយសំណួរវិញ្ញាសារប្រឡងថ្នាក់សកលវិទ្យាល័យ ក្នុងមុខជំនាញដ៏លំបាកពីរ គឺជំនាញវេជ្ជសាស្ត្រ និងមេធាវី។
នៅក្នុងការធ្វើតេស្តដោយអ្នកជំនាញនៅសកលវិទ្យាល័យអាមេរិក ChatGPT អាចប្រឡងជាប់ក្នុងវិញ្ញាសារមេធាវី ចំណែកក្នុងវិញ្ញាសារថ្នាក់វេជ្ជសាស្រ្តវិញ អាចឆ្លើយត្រូវរហូតដល់ទៅក្នុងរង្វង់ ៦០% ដែលជាកម្រិតខ្ពស់មិនធ្លាប់អាចធ្វើបានដោយបញ្ញាសិប្បនិម្មិតកាលពីមុន។
កាលពីចុងខែមីនាកន្លងទៅនេះ ក្រុមអ្នកជំនាញសេដ្ឋកិច្ចនៃធនាគារ Golmand Sachs របស់អាមេរិក បានចេញផ្សាយរបាយការណ៍មួយ ដោយបានកត់សម្គាល់ថា បញ្ញាសិប្បនិម្មិត ដែលមានសមត្ថភាពបង្កើតមាតិកា (អត្ថបទ រូបភាព ឬសំឡេង) ក្នុងគុណភាពមួយ ដែលគេមិនអាចបែងចែកបានថា មួយណាបង្កើតដោយបញ្ញាសិប្បនិម្មិត មួយណាបង្កើតដោយមនុស្ស វាគឺជាចំណុចរបត់ដ៏ចម្បងមួយ ហើយគេព្យាករថា នៅក្នុងដំណើរវិវឌ្ឍនេះ បញ្ញាសិប្បនិម្មិតអាចនឹងជំនួសការងារមនុស្សរហូតដល់ទៅប្រមាណជា ៣០០លាននាក់ នៅទូទាំងពិភពលោកទាំងមូល ដោយគិតជាមធ្យមការងារប្រមាណជា ១៨% អាចនឹងត្រូវធ្វើដោយបញ្ញាសិប្បនិម្មិត។ ក៏ប៉ុន្តែ ការជំនួសការងារមនុស្ស ដោយបញ្ញាសិប្បនិម្មិតនេះក៏អាស្រ័យផងដែរ ទៅលើប្រភេទការងារ និងទៅតាមប្រទេសនីមួយៗ។
ជារួម ការងារដោយដៃ ត្រូវរងនូវផលប៉ះពាល់តិចជាងការងារដោយប្រើបញ្ញា។ ជាអាទិ៍ នៅក្នុងរបាយការណ៍ គេបានព្យាករថា នៅក្នុងវិស័យសំណង់ មុខងារត្រឹមតែប្រមាណជា ៦% ប៉ុណ្ណោះ ដែលអាចនឹងត្រូវជំនួសដោយបញ្ញាសិប្បនិម្មិតបាន រីឯមុខងារក្នុងផ្នែករដ្ឋបាល និងក្នុងវិជ្ជាជីវៈផ្នែកច្បាប់វិញ អាចនឹងត្រូវប៉ះពាល់ខ្លាំងជាងគេ ដោយមានមុខងាររហូតដល់ទៅប្រមាណពី ៤៤% ទៅ ៤៦% អាចនឹងត្រូវជំនួសដោយបញ្ញាសិប្បនិម្មិត។
នេះមានន័យថា បណ្តាប្រទេសមានសេដ្ឋកិច្ចជឿនលឿន ដែលការងារដោយដៃមានអត្រាទាបជាងការងារដោយប្រើបញ្ញា អាចនឹងត្រូវប៉ះពាល់ច្រើនជាងប្រទេសកំពុងអភិវឌ្ឍ។ តាមការព្យាករ នៅក្នុងប្រទេសជឿនលឿន ដូចជា អាមេរិក និងប្រទេសនៅអឺរ៉ុបជាដើម ការងាររហូតដល់ទៅប្រមាណជា ២ភាគ៣ អាចនឹងត្រូវប៉ះពាល់ក្នុងកម្រិតណាមួយ ហើយប្រមាណជា ១ភាគ៤ អាចនឹងត្រូវជំនួសដោយបញ្ញាសិប្បនិម្មិតទាំងស្រុង។
ទោះជាយ៉ាងណា យោងតាមរបាយការណ៍របស់ Goldman Sachs ការដាក់ពង្រាយបច្ចេកវិទ្យាបញ្ញាសិប្បនិម្មិតជាលក្ខណៈទូលំទូលាយ អាចនឹងជួយបង្កើនផលិតភាពការងារ និងជួយជំរុញកំណើនសេដ្ឋកិច្ចពិភពលោកបានដល់ទៅ ៧% ក្នុងមួយឆ្នាំៗ សម្រាប់រយៈពេល ១០ឆ្នាំ។ កំណើនសេដ្ឋកិច្ច និងបច្ចេកវិទ្យានេះ អាចនឹងនាំទៅដល់ការបង្កើតជាប្រភេទផលិតផល ឬសេវាកម្មថ្មី ហើយបង្កើតជាប្រភេទមុខងារថ្មីសម្រាប់មនុស្ស ជំនួសមុខងារដែលត្រូវដាក់ឲ្យធ្វើជាស្វ័យប្រវត្តិដោយបញ្ញាសិប្បនិម្មិត។
អ្វីដែលគេពិបាកនឹងព្យាករ គឺនៅត្រង់ថា តើប្រភេទមុខងារថ្មី ដែលបង្កើតឡើងនេះ វាអាចមានគ្រប់គ្រាន់ សម្រាប់ស្រូបយកអ្នកដែលបាត់បង់ការងារដោយបញ្ញាសិប្បនិម្មិតបានដែរឬទេ? នៅក្នុងពេលដែលបច្ចេកវិទ្យាបញ្ញាសិប្បនិម្មិតនេះចេះបន្តរីកចម្រើនជឿនលឿនទៅមុខក្នុងល្បឿនយ៉ាងលឿនដូចជាសព្វថ្ងៃនេះ តើល្បឿននៃការបង្កើតប្រភេទការងារថ្មីវាអាចទាន់ល្បឿននៃការបាត់បង់ការងារ ដែលត្រូវជំនួសដោយសិប្បនិម្មិតបានដែរឬក៏យ៉ាងណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ