នៅឥណ្ឌា ប្រជាជនកាន់សាសនាហិណ្ឌូនិងអ៊ីស្លាម ចោទប្រកាន់គ្នាពីបញ្ហាបង្កើតកូនច្រើន
ចុះផ្សាយនៅថ្ងៃ៖
ស្តាប់ - ០៥:៣៤
តាំងពីពេលដែល អង្គការសហប្រជាជាតិ ចេញផ្សាយរបាយការណ៍ពីចំនួនកំណើនប្រជាជនឥណ្ឌានឹងកើនឡើងច្រើនលើសប្រជាជនចិនមក គឺ ធ្វើឲ្យ ប្រជាជនឥណ្ឌាកាន់សាសនាហិណ្ឌូ និង អ្នកកាន់សាសនាអ៊ីស្លាមនៅក្នុងស្រុក កាន់តែបញ្ឆេះកំហឹងដាក់គ្នាខ្លាំងឡើងៗដែរ។ នៅផ្ទៃក្នុងប្រទេសឥណ្ឌា បណ្តាអ្នកកាន់សាសនាហិណ្ឌូ ជាតិនិយមជ្រុល បានអង្អុលមុខពួកអ្នកកាន់សានាអ៊ីស្លាម ថាបង្កើតកូនច្រើនដើម្បីចង់គ្រប់គ្រងប្រទេសឥណ្ឌា។ ចំណែកឯ អ្នកកាន់សាសនាអ៊ីស្លាម ចោទវិញថា អ្នកកាន់សាសនាហិណ្ឌូកំពុងតែបំប៉ោងបំភ្លៃ ហើយនិង រើសអើងជនជាតិភាគតិច។
ពាក់កណ្តាលឆ្នាំនេះ ឥណ្ឌា វ៉ាដាច់ ចិន ខាងបង្កើតកូន។ ប្រជាជនឥណ្ឌា នឹងកើនដល់ ១,៤២៨៦ ពាន់លាននាក់ ហើយ ចិន មានប្រជាជន ១,៤២៥៧ ពាន់លាននាក់។ នេះជាទិន្នន័យរបស់អង្គការសហប្រជាជាតិ ដែលផ្សាយព្រោងព្រាត ក្នុងខែមេសាកន្លងទៅ។
«អ៊ីស្លាមត្រួតត្រាឥណ្ឌា»
ផ្ទៃក្នុងប្រទេសឥណ្ឌា គឺបញ្ហាកំណើតកូនច្រើននេះ បង្កឲ្យមានការរើសអើងប្រកាន់គ្នា ចំណោមរង្វង់ប្រជាពលរដ្ឋឥណ្ឌាខ្លួនឯង ដែលនិយមនិកាយសាសនាផ្សេងគ្នា។ ពួកឥណ្ឌាកាន់សាសនាហិណ្ឌូ បញ្ឆេះកំហឹង និងសាបព្រោះភាពស្អប់ខ្ពើមទៅលើពួកមូស្លិមកាន់សាសនាអ៊ីស្លាម ព្រមទាំងចោទថា ពួកអ៊ីស្លាមខំប្រឹងបង្កើតកូនឲ្យបានច្រើន ដើម្បីឲ្យច្រើនជាងពួកហិណ្ឌូ អាចត្រួតត្រាប្រទេសឥណ្ឌាទាំងមូល ហើយនិងចង់បង្កើតច្បាប់សាសនាអ៊ីស្លាម «សារីយ៉ា Charia» ជំនួសច្បាប់រដ្ឋធម្មនុញ្ញ ហិណ្ឌូនិយម តែម្តង។
ទិន្នភាពនេះ មានក្នុងជីវភាពរស់នៅប្រចាំថ្ងៃ និងនៅលើបណ្តាញផ្សព្វផ្សាយសង្គម។ នៅរដ្ឋឧត្តរប្រទេស (ឬ Uttar Pradesha) ឱសថការីម្នាក់ ឈ្មោះ អមីត អ៊ុតបាយ្យាយ (Amit Upadhyay )មានអ្នកគាំទ្រ ៤ ម៉ឺននាក់នៅក្នុងបណ្តាញសង្គម ហ្វេសបុក បានស្រោចគំនិតអើសអើងប្រឆាំងនឹង ជនជាតិឥណ្ឌា ភាគតិច កាន់តែសាសនាអ៊ីស្លាម។ អ្នកលក់ឱសថ ជាតិនិយមសាសនាហិណ្ឌូ រូបនេះ បានផ្សាយក្នុងបណ្តាញសង្គម និងឃោសនាប្រាប់អតិថិជនទៅទិញថ្នាំ ជាពួកហិណ្ឌូ ថា «ត្រូវតែនាំគ្នាបង្កើតកូនឲ្យបានច្រើន ឲ្យច្រើនជាងពួកអ៊ីស្លាម។ បើមិនដូច្នេះទេ ពួកអ៊ីស្លាម នឹងក្លាយជាអ្នកបង្កគ្រោះថ្នាក់ គំរាមកំហែង ហើយនិងលុបបំបាត់សាសនាហិណ្ឌូ នៅស្រុកឥណ្ឌាហើយ»។ បុរសម្នាក់នេះ ផ្សព្វផ្សាយគំនិតអើសអើងបែបៗដូច្នេះនេះ ជាប្រចាំ និងតែងតែមានអ្នកតាមដានចូលចិត្តច្រើនដែរ ។
ការឃោសនាបែបៗនេះ នៅប្រទេសឥណ្ឌា ពុំមែនមានតែនៅក្នុងចំណោមប្រជាពលរដ្ឋសាមញ្ញទេ សូម្បីតែ ពួកអ្នកនយោបាយនិងអ្នកច្បាប់ នៅរដ្ឋសភាជាតិ ក៏មានដែរ។ គំនិតជំរុញឲ្យពួកហិណ្ឌូបង្កើនចំនួនកូនឲ្យច្រើន ឲ្យលើសពួកអ៊ីស្លាមនេះ គឺអ្នកនយោបាយជាតិនិយមជ្រុល បំផុសការគិតនេះច្រើនឆ្នាំដែរមកហើយ។ ឧទាហរណ៍ជាក់ស្តែង គឺពួកអ្នកនយោបាយរបស់គណបក្ស Bharatiya Janata Party (BJP) បក្សកាន់អំណាចរបស់លោកនាយករដ្ឋមន្ត្រី ណារិន្ទ្រា ម៉ូឌី និងដែលប្រកាន់នយោបាយហិណ្ឌូនិយម។ ក្នុង២០១៩ អ្នកតំណាងរាស្ត្រ រាកិស្ហ សិង្ហា (Rakesh Sinha) មកពីបក្សអំណាចនេះ បានផ្តួចផ្តើមរៀបចំ សំណើច្បាប់ កំណត់ចំនួនកូន ឲ្យមានត្រឹម ២ នាក់។ នេះក៏ព្រោះតែគេយល់ឃើញថា ក្នុងគ្រួសារកាន់សាសនាអ៊ីស្លាម ប្តីអាចមានប្រពន្ធច្រើននិងកូនច្រើនពេក។ សំណើច្បាប់ក្នុងស្មារតីបែបនេះ ត្រូវអ្នកតំណាងរាស្ត្រ ដល់ទៅ ១២៤ នាក់ឯណោះ បានគាំទ្រ។
បុគ្គលល្បីល្បាញម្នាក់ទៀត លោក ឥស្សារ ឡល (Ishwar Lal) ដែលស្និទ្ធនឹងបក្សហិណ្ឌូនិយមនេះ ក៏បានថ្លែងបែបចំអកឌឺដងផង នៅទីសាធារណៈថា«ពួកហិណ្ឌូ រៀបអាពាហ៍ពិពាហ៍តែម្តង និងមានកូនតែ ២ ប៉ុន្តែ ចំណែកឯ ពួកអ៊ីស្លាម រៀបការ ៤ - ៥ ដង ហើយមានកូន ក៏ច្រើនសន្ធឹក ស្ទើរតែអាចបង្កើតក្រុមកីឡា ១ ក្រុម បានទៅហើយ»។
តើនៅឥណ្ឌា ពួកមូស្លិមកាន់សាសនាអ៊ីស្លាម ពិតជាមានចំនួនច្រើនជាងពួកហិណ្ឌូ មែនឬទេ?
ចម្លើយ គឺថា នៅឥណ្ឌា ពួកមូស្លិមកាន់សាសនាអ៊ីស្លាម ជាក្រុមជនជាតិភាគតិច ហើយមានចំនួនតិចជាងពួកហិណ្ឌូឆ្ងាយណាស់។ តាមការសិក្សារបស់មជ្ឈមណ្ឌលអាមេរិកខាងជញ្ជឹងគិត Pew Reaserche Center គឺបានបញ្ជាក់ឲ្យឃើញថា សូម្បីតែនៅពេលពាក់កណ្តាលសតវត្សរ៍ទី២១នេះ ក៏ពលរដ្ឋឥណ្ឌាជនជាតិភាគតិចកាន់សាសនាអ៊ីស្លាម នៅតែមានចំនួនតិចជាងពួកឥណ្ឌាកាន់សាសនាហិណ្ឌូ ឆ្ងាយដែរ។ ពោលគឺ នៅឆ្នាំ២០៥០ ពួកឥណ្ឌាអ៊ីស្លាម អាចកើនឡើងដល់ ៣១១ លាននាក់ ចំណែក ឯ ពួកហិណ្ឌូ ១,៣ ពាន់លាននាក់ ឯណោះ។ ចំពោះអត្រាបង្កើតកូនវិញ ២ទសវត្សរ៍ចុងក្រោយ ពួកឥណ្ឌាអ៊ីស្លាម បានថយចុះស្ទើរតែពាក់កណ្តាល។ ការសិក្សា១នៅឆ្នាំ២០២១ បញ្ជាក់ថា នារីឥណ្ឌាកាន់សាសនាអ៊ីស្លាមម្នាក់ អាចផ្តល់កំណើតកូន ជាមធ្យម ២,៣ នាក់។ ផ្ទុយពីរយៈពេល២០ឆ្នាំមុន ដែល នារីមូស្លិមឥណ្ឌាម្នាក់ បង្កើតកូន ជាមធ្យម ៤ ទៅ៥ នាក់ឯណោះ។
«ដើម្បីកេងចំណេញនយោបាយ»
លោកបណ្ឌិត ឃុរៃស្ហី (S.Y. Quraishi) ជាអតីតស្នងការរៀបចំការបោះឆ្នោតជាតិឥណ្ឌា ហើយរូបលោកក៏ជាអ្នកកាន់សាសនាអ៊ីស្លាមម្នាក់ដែរ បានវិភាគពិចារណានិងសរសេរច្រើនពី ពួកក្រុមជាតិនិយមជ្រុលហិណ្ឌូ។ លោកបណ្ឌិតថា ពួកនេះឃោសនាបំភ្លៃព័ត៌មានស្តីពីអត្រាកំណើត ព្រោះដើម្បីកេងចំណេញនយោបាយ។
នេះអាចឲ្យគេឆ្លុះបញ្ចាំងឃើញពីទង្វើរបស់បក្សកាន់អំណាចនៅឥណ្ឌា។ រដ្ឋាភិបាលរបស់នាយករដ្ឋមន្ត្រី ណារិនដ្រា ម៉ូឌី មិនបានប្រកាសចំនួនសិក្សាប្រជាសាស្រជាផ្លូវការទេ ពីព្រោះអាចទំនងជាចង់ទុកឲ្យមានការបកស្រាយផ្សេងគ្នាៗចំពោះចំនួនបង្កើតកូនផង ហើយម្យ៉ាងទៀត ក៏ព្រោះតែបារម្ភខ្លាចពីការរិះគន់ចំពោះអត្រាអត់ការងារធ្វើ ដ៏ច្រើនក្នុងចំណោមយុវជន។ ប្រជាជនឥណ្ឌា ជិតពាក់កណ្តាល មានអាយុតិចជាង៣០ឆ្នាំ ហើយដែលកំពុងតែស្រេកឃ្លានក្នុងការប្រលូកចូលក្នុងវិស័យការងារ។ ប្រសិនបើរដ្ឋាភិបាលឥណ្ឌាប្រកាសចំណុចនេះ ជាផ្លូវការ គឺមិននាំផលល្អ ហើយថែមទាំងអាចជះផលអាក្រក់ដល់ការបោះឆ្នោតជាតិ នៅឆ្នាំខាងមុខនេះ។
ចំពោះប្រទេសឥណ្ឌាផ្ទាល់ ក្រៅពីបញ្ហាកង្វះការងារ កំណើនខ្លាំងខាងប្រជាសាស្ត្រ គឺនឹងនាំឲ្យបង្កជាបញ្ហាចំណោទប្រឈមខ្លាំង វិបត្តិសង្គម មានទាំងពីការសិក្សា រចនាសម្ព័ន្ធ ទឹក ភ្លើង... ពិសេសទៅទៀត គឺ វិសមភាពអ្នកមានអ្នកក្រ, កង្វះលំនៅដ្ឋានសមរម្យនៅក្នុងទីក្រុង...៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ