លោក លី សារី៖ ពលករខ្មែរពី៥០០ ទៅ៧០០នាក់ សម្រុកមកពីថៃក្នុង១ថ្ងៃៗ តាមច្រកបន្ទាយមានជ័យ
ចុះផ្សាយនៅថ្ងៃ៖
ស្តាប់ - ១០:០៥
គ្រាន់តែតាមច្រកទ្វារ ខេត្តបន្ទាយមានជ័យមួយប៉ុណ្ណោះ មានពលករខ្មែរទេសន្តរប្រវេសន៍ចាប់ពី ៥០០ ទៅ៧០០នាក់ ក្នុងមួយថ្ងៃៗ សម្រុកមកពីប្រទេសថៃ ទីដែលពួកគេធ្វើការ ដើម្បីសេដ្ឋកិច្ចគ្រួសារ។ លោក លី សារី អ្នកនាំពាក្យសាលាខេត្តបន្ទាយមានជ័យ ដែលមានទីតាំងជាប់ខេត្តស្រះកែវរបស់ថៃ បានកត់សម្គាល់ថា មួយរយៈចុងក្រោយនេះ ចំនួនពលករខ្មែរត្រលប់មកពីប្រទេសថៃ មានការកើនឡើងច្រើន ខុសពីប្រក្រតី។ តាមលោក លី សារី ការត្រលប់មកស្រុកវិញយ៉ាងគំហុកដូច្នេះ គឺដោយសារតែនៅថៃត្រូវសម្រាកត្រៀមបុណ្យចូលឆ្នាំថ្មី ហើយជួនគ្នានឹងជិតដល់បុណ្យចូលឆ្នាំខ្មែរផងដែរ។ ការសម្រាករបស់រោងចក្រ សហគ្រាស ធ្វើឲ្យពលករខ្មែរគ្មានការងារធ្វើ ណាមួយថៃកំពុងប្រឈមនឹងបញ្ហានយោបាយផ្ទៃក្នុង ជាហេតុធ្វើឲ្យពលករខ្មែរជាច្រើនមិនអាចបន្តស្ថិតនៅក្នុងប្រទេសថៃទៀតបាន។
