លោក យ៉ង សាំងកុមារ៖ គម្រោង«ឃុំកសិកម្មគំរូ» ត្រូវការយ៉ាងតិច៣ឆ្នាំដើម្បីកំណត់ពីភាពជោគជ័យ និងបន្តអនុវត្តទូទាំងប្រទេស
ចុះផ្សាយនៅថ្ងៃ៖
ស្តាប់ - ០៩:២៨
គម្រោង«ឃុំកសិកម្មគំរូ»ដែលក្រសួងកសិកម្មជ្រើសរើសយកឃុំចំនួន១០ នៅក្នុងស្រុកជើងព្រៃនៃខេត្តកំពង់ចាមដើម្បីអនុវត្ត មុននឹងឈានទៅរកការអនុវត្តជាទូទៅនៅក្នុងប្រទេស បានចាប់ផ្តើមប្រកាសឱ្យអនុវត្តជាផ្លូវការហើយនៅរសៀលថ្ងៃទី០៧ ខែកុម្ភៈនេះ។ លោក យ៉ង់ សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានថ្លែងថា គម្រោងឃុំកសិកម្មគំរូនឹងជួយប្រជាកសិករដែលកំពុងជួបបញ្ហាទីផ្សារក្រោយការប្រមូលផល និងជួយជាបច្ចេកទេសលើការដាំដុះដល់កសិករផងដែរ។ ការបង្កើតគម្រោងឃុំកសិកម្មគំរូដោយមានមន្ត្រីឬអ្នកជំនាញកសិកម្មប្រចាំនៅតាមឃុំនីមួយៗ គឺធ្វើឡើងស្របទៅនឹងគោលនយោបាយរបស់រដ្ឋាភិបាលដែលដាក់ចេញសម្រាប់អាណត្តិទី៧ ដែលផ្តោតលើវិស័យកសិកម្ម។ តែយ៉ាងណា លោក យ៉ង សាំងកុមារ ចាត់ទុកថា គម្រោងនេះត្រូវការពេលយ៉ាងតិចពី៣ទៅ៥ឆ្នាំដែរ ដើម្បីអាចកំណត់ពីភាពជោគជ័យ មុននឹងឈានដល់ការអនុវត្តទៅទូទាំងប្រទេសបាន។