លោក កន សាវាង្ស៖ ខុមហ្វ្រែមកំពុងត្រៀមបង្ហាញរបាយការណ៍ពីភាពមិនប្រក្រតីការបោះឆ្នោតអាណត្តិទី៧
ចុះផ្សាយនៅថ្ងៃ៖
ស្តាប់ - ១២:៥៦
ភ្ញៀវប្រចាំថ្ងៃរបស់វិទ្យុបារាំងអន្តរជាតិនៅរាត្រីនេះគឺ លោក កន សាវាង្ស មន្ត្រីសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែម។ គណៈកម្មាធិការជាតិរៀបចំការបោះឆ្នោត (គជប) បានវាយតម្លៃថា ដំណើរការបោះឆ្នោតជាតិនៅឆ្នាំ២០២៣នេះ បានប្រព្រឹត្តទៅដោយជោគជ័យ និងក្នុងបរិយាកាសស្ងប់ស្ងាត់ សន្តិសុខ សុវត្ថិភាព និងសណ្តាប់ធ្នាប់ល្អ ។ល។ ចំណែកឯ ខុមហ្វ្រែម ដែលជាអង្គការសង្គមស៊ីវិលមួយចូលរួមសង្កេតការណ៍បោះឆ្នោតនេះ បានកត់សម្គាល់ឃើញថាមានពីភាពមិនប្រក្រតីជាច្រើន នៅពេលដំណើរការបោះឆ្នោត ក៏ដូចជាមុនពេលបោះឆ្នោតដែរ។ បើតាមលោក កន សាវាង្ស ភាពមិនប្រក្រតីទាំងនោះមានដូចជា៖ នៅតែមានវត្តមានអាជ្ញាធរមូលដ្ឋាននៅតាមការិយាល័យបោះឆ្នោត ការកត់ឈ្មោះអ្នកបោះឆ្នោតនៅពេលពលរដ្ឋទៅបោះឆ្នោត ការអនុញ្ញាតឱ្យពលរដ្ឋបោះឆ្នោតដោយគ្មានអត្តសញ្ញាណបណ្ណមានសុពលភាព ការគូសឈ្មោះបោះឆ្នោតជំនួសជាដើម។ មន្ត្រីសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែម បានបញ្ជាក់ថា ខុមហ្វ្រែមកំពុងតែត្រៀមបង្ហាញរបាយការណ៍ អំពីភាពមិនប្រក្រតីក្នុងដំណើរការបោះឆ្នោតអាណត្តិទី៧ ជាសាធារណៈ ក្នុងពេលឆាប់ៗនេះ។
