កិច្ចព្រមព្រៀង ពាណិជ្ជកម្មសេវាកម្ម អាស៊ាន-ឥណ្ឌា ត្រូវបានរដ្ឋសភាអនុម័ត
រដ្ឋសភា នៅព្រឹកថ្ងៃទី១៥ ខែមករា នេះ បានអនុម័តលើសេចក្តីព្រាងច្បាប់ស្តីពីកិច្ចព្រមព្រៀងពាណិជ្ជកម្ម សេវាកម្ម ក្រោមកិច្ចព្រមព្រៀងក្របខណ្ឌស្តីពីកិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយ រវាងសមាគមប្រជាជាតិអាស៊ីអាគ្នេយ៍ និងឥណ្ឌា។ ការសម្រេចអនុម័តនេះ ត្រូវបានធ្វើឡើងនៅក្នុងសម័យប្រជុំពេញអង្គរដ្ឋសភាលើកទី៩ នីតិកាលទី៥ ដោយមានគូរ៉ុម១១៣ សំឡេងគាំទ្រ។
ចុះផ្សាយនៅថ្ងៃ៖
រដ្ឋសភាកម្ពុជា នៅថ្ងៃទី១៥ ខែមករា នេះ បានបើកកិច្ចប្រជុំពេញអង្គ ដើម្បីអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្ម ក្រោមកិច្ចព្រមព្រៀងក្របខណ្ឌស្ដីពី កិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយ រវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា។
លោក ឈាង វុន អ្នកនាំពាក្យរដ្ឋសភា ធ្លាប់បានលើកឡើងថា ទោះជាទំហំពាណិជ្ជកម្មរវាងកម្ពុជា- ឥណ្ឌា មានការកើនឡើងក៏ពិតមែន ក៏ប៉ុន្តែនៅមានកម្រិតនៅឡើយ។ ដូច្នេះហើយ កម្ពុជា ត្រូវពង្រីកបន្ថែមទៀតជាមួយ ឥណ្ឌាទាំងក្នុងក្របខណ្ឌនៃកិច្ចសហប្រតិបត្តិការរវាងកម្ពុជា និងឥណ្ឌា ទាំងក្នុងក្របខ័ណ្ឌនៃកិច្ចសហប្រតិបត្តិការរវាងអាស៊ាន និងឥណ្ឌា។
យ៉ាងណាក៏ដោយ លោក ឈាង វុន កត់សម្គាល់ថា មិនមែនតែកម្ពុជានោះទេ ដែលមានទំហំពាណិជ្ជកម្មនៅមានកំរិត សូម្បីតែប្រទេសមួយចំនួននៅក្នុងតំបន់អាស៊ានក៏នៅមានកម្រិតដែរ ដូច្នេះ បានជាប្រទេសនីមួយៗខិតខំប្រឹងប្រែងអនុម័តច្បាប់នេះ ឲ្យបានលឿនដើម្បីបើកផ្លូវឲ្យធ្វើពាណិជ្ជកម្ម។
សមាជិករបស់សមាគមប្រជាជាតិអាស៊ីអាគ្នេយ៍ ហៅកាត់ថា (អាស៊ាន) ចំនួន៩ប្រទេសរួចមកហើយ ដែលបានអនុម័តច្បាប់ធ្វើពាណិជ្ជកម្មគ្រប់ជ្រុងជ្រោយជាមួយប្រទេសឥណ្ឌានេះ។ ឥណ្ឌា ដែលត្រូវបានមជ្ឈមណ្ឌលស្រាវជ្រាវមួយនៅចក្រភពអង់គ្លេស វាយតម្លៃថា នឹងក្លាយជាមហាអំណាចសេដ្ឋកិច្ច លំដាប់ទី៥ នៅលើពិភពលោក នៅឆ្នាំ២០១៨ខាងមុខ វ៉ាឈ្នះបារាំង និងអង់គ្លេស ទាំងពីរប្រទេសក្នុងពេលតែមួយតែម្តង។
សូមជម្រាបជូនដែរថា បើតាមគម្រោង កម្ពុជា និងឥណ្ឌា នឹងចុះអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យទេសចរណ៍ជាមួយគ្នានាពេលខាងមុខ ដោយគណៈប្រតិភូក្រសួងទេសចរណ៍កម្ពុជា នឹងទៅចូលរួមក្នុងកិច្ចប្រជុំកំពូលវិនិយោគិនសកល ដែលនឹងប្រារព្ធឡើងនាថ្ងៃទី៣-៤ ខែកុម្ភៈ ឆ្នាំ២០១៨ ខាងមុខ ក្នុងរដ្ឋអាសាន់ ប្រទេសឥណ្ឌា ដោយមានការចូលរួមពីប្រទេសជាច្រើននៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ