បាតុករហុងកុង៥នាក់ត្រូវចាប់ឃុំខ្លួនក្រោយពីព្យាយាមស្ទាក់ក្បួនរថយន្តមេដឹកនាំចិន
បាតុករហុងកុងចំនួន៥នាក់ ក្នុងនោះរួមមានទាំងមេដឹកនាំចលនានិស្សិតដើម្បីប្រជាធិបតេយ្យម្នាក់ផង ត្រូវបានអាជ្ញាធរចាប់ឃុំខ្លួន នៅថ្ងៃព្រហស្បតិ៍នេះ ក្រោយពីពួកគេបានព្យាយាមរត់ចូលទៅស្ទាក់ក្បួនរថយន្តដឹកប្រធានសភាចិន ដែលកំពុងបំពេញទស្សនកិច្ចនៅហុងកុង។
ចុះផ្សាយនៅថ្ងៃ៖
ហេតុការណ៍បានកើតឡើង នៅថ្ងៃព្រហស្បតិ៍ ដែលជាថ្ងៃទី៣ និងជាថ្ងៃចុងក្រោយ នៃដំណើរទស្សនកិច្ចប្រកបដោយភាពតានតឹង របស់លោក ចាង តឺជាំង (Zhang Dejiang) ប្រធានសភាប្រជាជនចិន ដែលជាមេដឹកនាំជាន់ខ្ពស់លំដាប់ទី៣របស់ចិន។
Joshua Wong មេដឹកនាំចលនានិស្សិតដើម្បីប្រជាធិបតេយ្យ ព្រមទាំងគូកនចំនួន ៤នាក់ផ្សេងទៀតបានរត់តាមបណ្តោយដងផ្លូវដែលក្បួនរថយន្តលោកចាង តឺជាំង ឆ្លងកាត់ ដោយនៅក្នុងដៃពួកគេមានកាន់បដា ដែលសរសេរទាមទារ “សិទ្ធិក្នុងការកំណត់ជោគវាសនាដោយខ្លួនឯង”។ ក៏ប៉ុន្តែ បាតុករទាំង៥រូបត្រូវបានប៉ូលិសចាប់ខ្លួន ហើយយកចេញពីផ្លូវ នៅមុនពេលដែលក្បួនរថយន្តមេដឹកនាំចិនធ្វើដំណើរមកដល់។
គួរបញ្ជាក់ថា ចលនានិស្សិតដើម្បីប្រជាធិបតេយ្យ គឺជាចលនាប្រឆាំងដ៏ធំមួយ ដែលចាប់ផ្ទុះឡើង កាលពីឆ្នាំ២០១៤ ដើម្បីតវ៉ាប្រឆាំងនឹងការបង្កើនអំណាចរបស់រដ្ឋាភិបាលក្រុងប៉េកាំង ទៅលើដែនដីហុងកុង ដែលជាផ្នែកមួយនៃប្រទេសចិន ប៉ុន្តែ ត្រូវបានដាក់ឲ្យស្ថិតក្រោមរបបដឹកនាំដាច់ដោយឡែក ទៅតាមគោលការណ៍ “ដែនដីមួយរបបដឹកនាំពីរ”។ បច្ចុប្បន្ននេះ ចលនានិស្សិតដើម្បីប្រជាធិបតេយ្យនេះបានប្រែក្លាយខ្លួនទៅជាគណបក្សនយោបាយមួយ ដែលដឹកនាំដោយ Joshua Wong។
នៅក្នុងអំឡុងដំណើរទស្សនកិច្ច៣ថ្ងៃនៅហុងកុង លោកចាង ទឺជាំង បានព្យាយាមរំងាប់ក្តីបារម្ភអ្នកហុងកុងថា ដែនដីហុងកុងនឹងនៅតែជាដែនដីស្វ័យ័ត ដោយនឹងមិនត្រូវដាក់ឲ្យស្ថិតក្រោមការចាត់ចែងដោយផ្ទាល់របស់រដ្ឋាភិបាលចិនដីគោកដូចជាខេត្តក្រុងផ្សេងទៀតនោះទេ។ ក៏ប៉ុន្តែ ក្នុងពេលជាមួយគ្នា លោកប្រធានសភាប្រជាជនចិនក៏បានរិះគន់ផងដែរដល់សកម្មជនដែលទាមទារស្វ័យភាពបន្ថែមពីអ្វីដែលមានបច្ចុប្បន្ន ដោយចាត់ទុកពួកគេថា គឺជាក្រុមអ្នកបះបោរផ្តាច់ទឹកដី។
លោកចាង តឺជាំង បានបញ្ចប់ទស្សនកិច្ចនៅហុងកុង ហើយបានឡើងយន្តហោះត្រឡប់ទៅចិនដីគោកវិញ នៅរសៀលថ្ងៃព្រហស្បតិ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ