ហេតុអ្វីបានជាពលរដ្ឋហុងកុងក្តៅក្រហាយនឹងដំណើរទស្សនកិច្ចរបស់ប្រធានសភាចិន?
នៅថ្ងៃអង្គារ ទី១៧ ឧសភានេះ លោកប្រធានរដ្ឋសភាចិន ចាង តឺជាងបានផ្តើមទស្សនកិច្ចនៅហុងកុង។ ក្រៅពីមានតំណែងជាប្រធានរដ្ឋសភា លោកចាង តឺជាងក៏មានតួនាទីជាអ្នកទទួលបន្ទុកសំណុំរឿងហុងកុងដែរ ហើយនេះជាលើកទី១ គិតតាំងពី ៤ឆ្នាំកន្លងទៅដែលមានថ្នាក់ដឹកនាំជាន់ខ្ពស់ចិនលំដាប់ទី៣ ម្នាក់បានដាក់ជើងជាន់ទឹកដីហុងកុង។ តែជាទូទៅ វត្តមានថ្នាក់ដឹកនាំចិននៅហុងកុងមិនបានទទួលស្វាគមន៍រាក់ទាក់ដោយប្រជាជនហុងកុងប៉ុន្មានទេ។ ជាក់ស្តែងថ្ងៃនេះ រដ្ឋអំណាចហុងកុងបានពង្រឹងសន្តិសុខកម្រិតខ្ពស់ដូចត្រៀមប្រឈមទប់នឹងអំពើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥២
ជាផ្លូវការ លោកប្រធានរដ្ឋសភាចិនចាង តឺជាងទៅហុងកុងដើម្បីចូលរួមនៅក្នុងវេទិកាសេដ្ឋកិច្ចមួយ តែបើនិយាយមិនផ្លូវការវិញ គឺដើម្បីស្វែងយល់ឲ្យបានស៊ីជ្រៅពីស្ថានការណ៍បច្ចុប្បន្ននៅហុងកុងក្នុងនាមលោកជាអ្នកទទួលខុសត្រូវសំណុំរឿងហុងកុង។ ក៏ប៉ុន្តែ ដំណើរទៅកាន់ហុងកុងរបស់ថ្នាក់ដឹកនាំជាន់ខ្ពស់ចិនលំដាប់ទី៣ រូបនេះបានធ្វើឡើង ចំពេលដែលមានពលរដ្ឋហុងកុងកាន់តែច្រើនឡើងៗបានចេញមុខប្រឆាំងនឹងការលូកដៃកាន់តែជ្រៅរបស់ចិនដីគោកនៅក្នុងកិច្ចការផ្ទៃក្នុងហុងកុង។ ជាក់ស្តែងនៅថ្ងៃនេះ ក្រុមអ្នកស្នេហាលទ្ធិប្រជាធិបតេយ្យនៅហុងកុងបានអំពាវនាវឲ្យមានបាតុកម្មប្រឆាំងលោកចាង តឺជាងនៅថ្ងៃពុធស្អែក នោះបើទោះបីជារដ្ឋអំណាចបានហាមឃាត់ដោយចាត់វិធានការសន្តិសុខយ៉ាងតឹងរឹងក៏ដោយ។
ក្រុមបាតុករហុងកុងសង្ឃឹមនឹងរៀបចំក្បួនបាតុកម្មនៅតាមដងផ្លូវក្រោមក្រសែភ្នែកលោកចាង តឺជាង ពិសេសតាមផ្លូវដែលលោកត្រូវធ្វើដំណើរទៅកាន់សភាហុងកុងនៅថ្ងៃពុធ ទី១៨ ឧសភាស្អែក។ នៅក្នុងសភាហុងកុង លោកចាង តឺជាងត្រូវឡើងថ្លែងសុន្ទកថា និងមានគម្រោងជួបជាមួយក្រុមអ្នកតំណាងរាស្រ្តគាំទ្រលទ្ធិប្រជាធិបតេយ្យ។ ពិតណាស់ថា លោកចាង តឺជាងទៅហុងកុងដើម្បីស្វែងយល់ពីស្ថានការណ៍ពិតនៅហុងកុង និងក៏ដើម្បីព្យាយាមរំងាប់ភាពតានតឹង តែលោកមិនត្រូវបានទទួលស្វាគមន៍រាក់ទាក់ពីពលរដ្ឋហុងកុងទូទៅទេ។ អ្វីដែលពលរដ្ឋហុងកុងពិបាកបើកភ្នែកមើលថ្ងៃនេះទៀត គឺវិធានការសន្តិសុខដ៏សម្បើមហួសហេតុមិនធ្លាប់មានសម្រាប់ទទួលលោកចាង តឺជាង។
ដើមចមនៃវិបត្តិតានតឹងរវាងហុងកុង និងចិនប៉េកាំង
វិបត្តិតានតឹងរវាងហុងកុង និងចិនប៉េកាំង គឺការលូកដៃកាន់តែជ្រៅរបស់ចិនដីគោកទៅក្នុងកិច្ចការផ្ទៃក្នុងរបស់ចិនហុងកុង។អ្វីៗបានផ្ទុះឡើងនៅក្រោយការប្រកាសរបស់ទីក្រុងប៉េកំាងកាលពីខែសីហា ឆ្នាំ ២០១៤ ដែលថា ចិននឹងអនុញ្ញាតឲ្យមានការបោះឆ្នោតជាសកលនៅហុងកុងចាប់ពីឆ្នំា ២០១៧ ទៅ។ ក៏ប៉ុន្តែ រូបបេក្ខជននឹងត្រូវចិនជាអ្នកជ្រើសរើស ហើយចំនួនបេក្ខជនក៏ត្រូវចិនជាអ្នកកំណត់ឲ្យមាន ២ ឬ៣នាក់ប៉ុណ្ណោះ។ នេះហើយជាចន្លុះដែលបានដុតគំនរអុសនៅហុងកុងឲ្យឆេះសន្ធោសន្ធៅ និងកំពុងបន្តក្តៅងំមកដល់សព្វថ្ងៃ។ គេពិតជាចាំបានមិនភ្លេចមហាបាតុកម្មរបស់ពលរដ្ឋហុងកុង ពិសេសសិស្ស និស្សិតក្នុងឆ្នាំ ២០១៤ ហៅថា « ចលនាឆ័ត្រ »។
អស់រយៈពេលជាច្រើនសប្តាហ៍ដែលក្រុមបាតុករសិស្ស និស្សិតបានបោះជំរំនៅលើទីធ្លាសាធារណៈ និងទីកន្លែងយុទ្ធសាស្រ្តសំខាន់ៗជាច្រើនក្នុងទីក្រុង។ គោលដៅកាលណោះ គឺទាមទារឲ្យចិនដីគោកឈប់លូកលាន់កិច្ចការផ្ទៃក្នុងរបស់ហុងកុង និងទុកឲ្យពលរដ្ឋហុងកុងជាសម្រេចជោគវាសនាដោយខ្លួនឯង ពិសេសទាក់ទងនឹងការជ្រើសរើសថ្នាក់ដឹកនាំ។ គួរជម្រាបជូនថា ពិតមែនតែហុងកុងត្រូវបានអង់គ្លេសប្រគល់ឲ្យចិនតាំងពីឆ្នាំ ១៩៩៧ មកមែន តែនៅក្នុងកិច្ចព្រមព្រៀងដែលរដ្ឋាភិបាលចិនដីគោកបានចុះហត្ថលេខាជាមួយរដ្ឋាភិបាលអង់គ្លសេនោះ ចិនប៉េកាំងបានយល់ព្រមទុកហុងកុងជាដែនដីស្វយយ័តទូលំទូលាយដោយផ្អែកលើគោលការណ៍ប្រទេសមួយ ប្រព័ន្ធពីរ។
ម្យ៉ាងទៀត និងបើផ្អែកតាមកិច្ចព្រមព្រៀងដដែល ដែនដីហុងកុង និងពលរដ្ឋហុងកុងមានសេរីភាពពេញទីរហូតដល់ឆ្នាំ ២០៤៧ ដូចដែលហុងកុងធ្លាប់មាននៅក្នុងជំនាន់អាណានិគមនិយមអង់គ្លេស។ តែសព្វថ្ងៃនេះ ចិនដីគោក និងរដ្ឋអំណាចហុងកុងបែរជាកំពុងបន្តរឹត ក ពលរដ្ឋហុងកុងទៅវិញ។
ចិនដីគោកបារម្ភបាត់បង់ហុងកុង ហើយពលរដ្ឋហុងកុងបារម្ភបាត់បង់សេរីភាព
អ្វីជាការព្រួយបារម្ភរបស់រដ្ឋាភិបាលចិនប៉េកាំង គឺមិនចង់បាត់បង់ដែនដីហុងកុងជាថ្មី និងក៏មិនចង់ឃើញហុងកុងក្លាយជាដែនដីឯករាជ្យផ្តាច់ចេញពីការគ្រប់គ្រងរបស់ចិនដែរ។ នៅថ្ងៃចន្ទ ទី១៦ ឧសភា ចិនដីគោកបានបញ្ជាក់ជាថ្មីម្តងទៀតថា គ្មានថ្ងៃដែលហុងកុងត្រូវចាកចេញពីមាតុភូមិចិនជាលើកទី២ ទេ។ សម្រាប់ពលរដ្ឋហុងកុងក្តីបារម្ភរបស់គេ គឺអនាគតនយោបាយមិនទៀតទាត់។
ចូរកុំភ្លេចថា គឺទើបតែក្នុងរយៈពេល ១៩ឆ្នំាចុងក្រោយនេះប៉ុណ្ណោះដែលពលរដ្ឋហុងកុងបានភ្លួករសជាតិចិនកុម្មុយនិស្តដោយផ្ទាល់។ គឺជារសជាតិមួយដែលពួកគេពិបាកលេប ព្រោះប្រជាជនហុងកុងភាគច្រើនមានទម្លាប់តែជាមួយនឹងរសជាតិប្រជាធិបតេយ្យ និងសេរីភាពពេញទី។ រហូតមកដល់សព្វថ្ងៃនេះទៀត មានពលរដ្ឋហុងកុងភាគច្រើននៅតែចង់ចាកចេញទៅរស់នៅប្រទេសផ្សេងដោយសារតែបារម្ភពីអនាគតនយោបាយមិនច្បាស់លាស់។
យ៉ាងណាក៏ដោយ ភាពតានតឹងរវាងចិនដីគោក និងក្រុមសកម្មជនប្រជាធិបតេយ្យនៅហុងកុងកំពុងបន្តមានដែលគ្មានអ្នកណាយល់ព្រមធ្វើសម្បទានឲ្យអ្នកណាទេ។ ថ្នាក់ដឹកនាំប៉េកាំងមិនចង់ឲ្យហុងកុងរបូតពីដៃខ្លួនជាថ្មី ហើយហុងកុងដែលដឹងខ្លួនមិនអាចគេចរួចពីកណ្តាប់ដៃចិនដីគោកបានសុំតែម្យ៉ាង គឺសេរីភាពក្នុងការកំណត់ជោសវាសនាអនាគតរបស់ខ្លួនដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ