កុប្បករ៤០នាក់ស្លាប់នៅខេត្តស៊ីនជាំង
ខេត្ត ស៊ីជាំង (Xingjiang)ភាគខាងលិចប្រទេសចិន បានធ្លាក់ក្នុងអំពើហិង្សាបង្ហូរឈាមកាលពីថ្ងៃអាទិត្យ២១កញ្ញាមុនដោយការបំផ្ទុះគ្រាប់បែកដ៏សែនសាហាវផ្ទួនៗគ្នា។ ស៊ីងជាំង ដែលជាតំបន់មួយមានប្រជាជនរស់នៅភាគច្រើនជាអ្នកកាន់សាសនាអ៊ីស្លាម តែងតែប្រឈមមុខនឹងភាពតានតឹងខ្លាំងដោយហេតុជម្លោះរវាងសហគមន៍សាសនា។យោងតាមសេចក្តីជូនដំណឹងរបស់កាសែតរដ្ឋ ការបំផ្ទុះគ្រាប់បែកយ៉ាងហិង្សានេះ បានសម្លាប់ជីវិតកុប្បករ៤០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
អំពើហិង្សាទាំងអស់នេះ បានផ្ទុះឡើងនៅស្រុកលុនតៃ(Luntai) ក្នុងខេត្តស៊ីនជាំង ភាគខាងលិចប្រទេសចិន។ យោងតាមព័ត៌មានក្នុងវិបសៃត៍ប្រចាំតំបន់ Tianshan ជនស៊ីវិល៦នាក់ ប៉ូលិស ២នាក់និងជំនួយការប៉ូលិស២រូបដែរ បានស្លាប់នៅក្នុងការវាយប្រហារបំផ្ទុះ គ្រាប់បែក នេះ។ យោងតាមវិបសៃត៍តំបន់ដដែល ជនស៊ីវិល ៥៤នាក់ក្នុងចំណោមនេះ ៣២នាក់ជាសមាជិកសហគមន៍ជនជាតិភាគតិច អ៊ុយហ្គួកាន់សាសនាអ៊ីស្លាម និយាយភាសាទួគី និង២២ នាក់ទៀតជាជនជាតិចិនហានត្រូវរងរបួស។
ទន្ទឹមនេះ កុប្បករ២នាក់ ត្រូវបានប៉ូលិសចាប់ខ្លួន-នេះបើយោងតាមប្រភពដដែល។ រីឯ ជនជាប់សង្ស័យដ៏សំខាន់ម្នាក់ឈ្មោះ Mamat Tursun ត្រូវបានសម្លាប់។ វិបសៃត៍Tianshan បានបន្តទៀតថា កុប្បករ៤០នាក់ទៀត បានស្លាប់ដោយធ្វើអត្តឃាតឬការបំផ្ទុះគ្រាប់បែកឬមួយត្រូវប៉ូលិសសម្លាប់។ គួររំលឹកថា អាជ្ញាធរកុម្មុយនិស្តចិន ចាត់វិធានការតឹងរឹងខ្លាំងនៅតំបន់បះបោរ ស៊ីងជាំង ដោយមិនឲ្យអ្នកកាសែតបរទេសណាមួយចូលទៅកាន់តំបន់នេះឡើយ។
ដូច្នេះ ហើយព័តមាននានាចេញពីតំបន់នេះ ក៏គេពិបាកនិយាយដែរថា ជាព័តមានប្រកបដោយលក្ខណៈឯករាជ្យនោះដែរ។ យោងតាមវិបសៃត៍ដដែល ការបំផ្ទុះគ្រាប់បែក៤លើកនៅថ្ងៃអាទិត្យមុននេះ បានកើតឡើងនៅក្នុងស្នងការប៉ូលិសចំនួន២ នៅលើទីផ្សារមួយកន្លែងនិងក្នុងហាងលក់ទំនិញមួយ ក្រោមទ្រង់ទ្រាយដ៏សាហាវនឹងផ្ទួនៗគ្នា។
សូមរំលឹកថា ការវាយប្រហារបំផ្ទុះគ្រាប់ទាំងនេះ បានប្រព្រឹត្តទៅនៅមុនមួយថ្ងៃនៃការផ្តន្ទាទោសដាក់ពន្ធនាគារអស់មួយជីវិតលើរូបលោក IlhamTohti ដែលជាសាស្តាចារ្យសាកលវិទ្យាល័យជាតិអ៊ុយហ្គួកាលពីថ្ងៃអង្គារមុន ក្នុងបទចោទប្រកាន់ធ្វើឧទ្ទាមផ្តាច់ទឹកដី។ ការចោទប្រកាន់របស់តុលាការនៅអុយរុំជី (Urumqi)នេះ ត្រូវបានបញ្ញវន្តជាតិអ៊ុយហ្គួរ ប្រកែកយ៉ាងដាច់អហង្កា។ ក្រោយពីការជំនំជម្រះទោសរួចមក ទីក្រុងប៉េកាំង ត្រូវរងនូវការទិះតៀនរិះគន់់យ៉ាងខ្លាំងក្លាពីសំណាក់បរទេស។
ម្យ៉ាងទៀតក្រុងប៉េកាំង ក៏កំពុងប្រឈមមុខនឹងភាពជ្រុលនិយមរបស់សហគមន៍ជនជាតិភាគតិចអ៊ុយហ្គួដែរនាពេលថ្មីៗ ដោយពួកអ៊ុយហ្គូ បានបង្កើនភេរវកម្មយ៉ាងសាហាវៗ ក្នុងនោះក៏មានភេរវកម្មអត្តឃាតផងដែរ នៅស៊ីនជាំងដែលជាតំបន់ស្វ័យតរបស់ចិននៅជាប់ព្រំដែនតំបន់អាស៊ីកណ្តាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ