តុលាការស៊ីងជាំងបើកសវនាការកាត់ទោសជនជាតិអ៊ុយហ្គួពាក់ព័ន្ធក្នុងរឿងភេរវកម្ម
កាលពីថ្ងៃសុក្រម្សិលមិញនេះ មានការបើកសវនាការកាត់ទោសជនជាតិអ៊ុយហ្គួ ដែលត្រូវបានអាជ្ញាធរចិនចោទថា បានផ្សំគំនិតក្នុងការធ្វើភេរវកម្មអត្តឃាត នៅទីក្រុងប៉េកាំង កាលពីចុងខែតុលា ឆ្នាំទៅ។ សវនាការនេះបានបើកធ្វើ នៅតុលាការកំពូលខេត្តស៊ីងជាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
សវនាការជាសាធារណៈមួយត្រូវបានបើកធ្វើឡើង នៅតុលាកា ក្រុងអ៊ូរុមឈី ខេត្តស៊ីងជាំង ភាគខាងលិចប្រទេសចិន ដើម្បីកាត់ទោសលើជនជាតិអ៊ុយហ្គួរដែលគេបានចោទថា បានឃុបឃិតធ្វើភេរវកម្មអត្តឃាត កាលពីថ្ងៃ២៨ តុលា ឆ្នាំ២០១៣។ យោងតាមសេចក្តីប្រកាសរបស់តុលាការ មានមនុស្ស៥នាក់ដែលត្រូវបានចាប់ខ្លួននៅក្នុងសំណុំរឿងនេះ។
ភ្នាក់ងារសារព៌តមានAFP បានព្យាយាមទូរស័ព្ទសាកសួរព៌តមានទៅតុលាការ និង រដ្ឋអជ្ញាអមតុលាកាខេត្តស៊ីងជាំងជាច្រើនលើក ប៉ុន្តែមិនបានទទួលនូវការឆ្លើយតបនោះទេ។ តាមការផ្តល់ព៌តមាន តុលាកានៅមិនទាន់ចេញសាលក្រមនៅឡើយទេ។
ដោយឡែក កាលពីថ្ងៃ២៥ ឧសភា កន្លងទៅ នគរបាលចិនបានចាប់ជនជាតិ អ៊ុយហ្គួរ បីនាក់ផ្សេងទៀតក្នុងហេតុការណ៍ ដែលជនទាំងបីនាក់នោះត្រូវគេសង្ស័យថាបានដើរបង្កចលាចល ដោយបានយកកាំបិតមុខស្រួចដើរចាក់មនុស្សម្នា នៅតាមទីសាធារណៈនៅខេត្តស៊ីងជាំង។ ក្នុងខែឧសភាដដែលនេះដែរ មានអំពើភេរវកម្មមួយទៀត ដែលបានផ្ទុះឡើងនៅទីផ្សារមួយ ដែលបានសម្លាប់មនុស្ស៤៣នាក់។ បន្ទាប់ពីហេតុការណ៍នេះ អាជ្ញាធរចិន បានធ្វើការចាប់ខ្លួនមនុស្សជាច្រើនរយនាក់។ ជាងនេះទៅទៀត អាជ្ញាធរចិនបានដាក់បន្ទុកទៅលើសហគមន៍ជនជាតិ អ៊ុយហ្គួរ នៅខេត្តស៊ិនជាំង ថាជាអ្នកនៅពីក្រោយ ហេតុការណ៏ចាក់មនុស្ស នឹងកាំបិតឲ្យស្លាប់ ២៩នាក់ និងរបួស១៤០នាក់ នៅស្ថាននីយ៍រថភ្លើងក្រុងគុនមីង។
គួរបញ្ជាក់ផងដែរថា ខេត្តស៊ីងជាំង ជាខេត្តដ៏ធំភាគខាងលិចប្រទេសចិន ដែលមានជនជាតិភាគតិច អ៊ុយហ្គួរកាន់សាសនាឥស្លាម រស់នៅច្រើនជាងគេ។ប៉ុន្មានឆ្នាំកន្លងមកនេះ សហគមន៍ជនជាតិនេះ បានធ្វើការបះបោរ ប្រឆាំងតវ៉ានឹងការសង្កត់សង្កិន ពីសំណាក់អាជ្ញាធរចិន។ ការធ្វើសកម្មភាពប្រឆាំង ដែលកន្លងមកធ្វើនៅតែក្នុងទឹកដីខេត្តស៊ីងជាំង ឥឡូវនេះបានឈានទៅដល់ទីកន្លែងដ៏ទៃទៀតនៅប្រទេសចិន។ កាលពីសប្តាហ៍មុន មាន មនុស្ស៩នាក់ ត្រូវបានតុលាកាចិនកាត់ទោសឲ្យជាប់ទោសប្រហារជីវិត ពីបទបង្កភេរវកម្ម។ គេកំពុងព្រួយបារម្ភថា ក្រុមជនសង្ស័យអាចត្រួវតុលាកាចិន ធ្វើការកាត់ទោស ដោយមិនមានសមភាពនិង អព្យាក្រិត្យ ពោលគឺពួកគេមិនបានទទួលកិច្ចការពារខ្លួនដោយស្របច្បាប់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ