ប្រេងមួយធុងបារីល ៣០ដុល្លារ បង្កើនហានិភ័យភូមិសាស្ត្រនយោបាយនៅតំបន់ឈូងសមុទ្ទពែក្ស
ចុះផ្សាយនៅថ្ងៃ៖
ស្តាប់ - ០៤:៣៦
ការបន្តរាតត្បាតរបស់កូវីដ១៩នៅអឺរ៉ុប និងសេដ្ឋកិច្ចចិនធ្លាក់ចុះខ្លាំង បាននិងកំពុងធ្វើឱ្យតម្លៃប្រេងឆៅរងផលប៉ះពាល់មួយកំរិតទៀត និងបន្តធ្លាក់ថ្លៃ ចុះមកនៅ ត្រឹមប្រមាណ ៣០ ដុល្លារអាមេរិក ក្នុងមួយធុងបារីល។ ប្រេងកាន់តែធ្លាក់ថ្លៃ សម្ពាធភូមិសាស្ត្រនយោបាយនៅតំបន់ឈូងសមុទ្ទពែក្ស កាន់តែតានតឹង។ ហេតុអ្វី ?
កូវីដ១៩ កាន់តែរាតត្បាត ផលវិបាកកាន់តែមានច្រើន ចំណែកវិបត្តិប្រេងឆៅក៏កាន់តែរីកធំធាត់ដែរ។ តើរុស្ស៊ីនិងអារ៉ាប៊ីសាអូឌីតបន្តធ្វើសង្គ្រាមជុំវិញតម្លៃប្រេង ដល់ថ្ងៃណា ? ដោយមិនអាចរកដំណោះស្រាយបញ្ចុះផលិតកម្មប្រេងដើម្បីទ្រទ្រង់តម្លៃក្នុងបរិបទនៃវិបត្តិកូរ៉ូណាវីរុសថ្មី ក្នុងរង្វង់ក្រុមប្រទេសអ្នកផលិតប្រេង OPEP+ មក អារ៉ាប៊ីសាអូឌីត បានសម្រេចជាឯកតោភាគីបញ្ចុះតម្លៃប្រេង។ តម្លៃប្រេងបានចុះថ្លៃអស់៣០% នៅលើទីផ្សារអាស៊ី កាលពីថ្ងៃចន្ទទី៩មីនា។ តម្លៃទីផ្សារភាគហ៊ុនពិភពលោក បានដាំក្បាលចុះតាមយ៉ាងខ្លាំង ស្ទើរមិនធ្លាប់មានក្នុងប្រវត្តិសាស្ត្រ តាំងពីដើមខែមីនានោះមកដែរ។
មួយសប្តាហ៍ក្រោយមកទៀត ប្រេងឆៅ បានផុងខ្លួនក្នុងវិបត្តិលង់កាន់តែជ្រៅជាងមុនមួយជាន់ទៀត។ តម្រូវការផ្នែកប្រេងនៅអឺរ៉ុបក៏ចាប់ថយដែរ ព្រោះអឺរ៉ុបបានសម្រេចចាត់វិធានការបិទខ្ទប់ប្រទេស និងខ្ទប់ពលរដ្ឋឱ្យនៅតែក្នុងផ្ទះ។ អឺរ៉ុបចាប់ថយសកម្មភាព ចិនជាក្បាលម៉ាស៊ីនក៏ងើបមិនទាន់រួច។ ចិនដែលកូវីដ១៩ ហាក់ចាប់ចុះអំណាច បានចេញរបាយការណ៍ នៅថ្ងៃចន្ទទី ១៦មីនា បញ្ជាក់ថា សកម្មភាពឧស្សាហកម្ម ប្រចាំខែមករានិងកុម្ភៈ បានធ្លាក់ចុះធ្ងន់ធ្ងរបំផុតមិនធ្លាប់មានទេ គិតក្នុងរយៈពេល៣០ឆ្នាំចុងក្រោយនេះ។
ដំណឹងមិនល្អទាំងនេះ បានជ្រមុជតម្លៃប្រេងឆៅនៅលើទីផ្សារអន្តរជាតិឱ្យធ្លាក់ដាំក្បាលចុះដល់ក្រោយ៣០ដុល្លារក្នុងមួយធុងបារីល នៅសហរដ្ឋអាមេរិក។ វិធានការរបស់ធនាគារកណ្តាលហាក់គ្មានឥទ្ធិពលអាចស្តារតម្លៃប្រេងឆៅបានទេនៅពេលនេះ។ នេះមិនមែនជាសញ្ញាល្អទេ ព្រោះវាអាចនឹងបំបោងឱ្យមានហានិភ័យមួយចំនួនបន្ថែមទៀត ៖ ហានិភ័យភូមិសាស្ត្រនយោបាយនៅក្នុងតំបន់ឈូងសមុទ្ទពែក្ស។
អារ៉ាប៊ីសាអូឌីត ដែលជាប្រទេសផលិតប្រេងធំជាងគេមួយ គ្រោងនឹងចាប់បង្ហូរប្រេងចេញជាគំហុក នៅខែក្រោយ ទៅលក់នៅលើទីផ្សារ។ ចំណែកអ៊ីរ៉ង់ ដែលជាសត្រូវរបស់អារ៉ាប៊ីសាអូឌីត និងដែលរងទណ្ឌកម្មសេដ្ឋកិច្ចយ៉ាងធ្ងន់ធ្ងរពីសហរដ្ឋអាមេរិកច្បាស់ជាក្តៅក្រហាយខ្លាំង និង ទំនងមិនអាចនៅស្ងៀមទេ។ មានប្រាក់ចំណូលបានមកពីការលក់ប្រេងធ្លាក់ចូលហិបបានតិចតួចបំផុតស្រាប់ហើយ តេអេរ៉ង់កំពុងប្រឈមនឹងគ្រោះកូរ៉ូណាវីរុសថ្មីយ៉ាងធ្ងន់ធ្ងរខ្លាំងជាងបំផុតក្នុងតំបន់ (ស្លាប់១១៣៥នាក់ អ្នកឆ្លង ១៧១៦១នាក់ នេះ បើតាមតូលេខផ្លូវការអ៊ីរ៉ង់ គិតត្រឹមថ្ងៃពុធទី១៨មីនា)។ ហេតុដូច្នេះ ហើយបានជា ក្នុងអំឡុងពេលចុងក្រោយនេះក្រុមប្រដាប់អាវុធគាំទ្រអ៊ីរ៉ង់ សម្រុកធ្វើការវាយប្រហារទៅលើទីតាំងយោធាអាមេរិកនៅអ៊ីរ៉ាក់ កាន់តែច្រើនៗឡើង។ សម្រាប់អ្នកវិភាគឯករាជ្យស្វ៊ីស Petromatrix នេះមិនមែនជាទង្វើចៃដន្យទេ។
ប៉ុន្តែសួរថា បើអ៊ីរ៉ង់បង្កើនការវាយប្រហារលើយោធាអាមេរិកនៅលើទឹកដីអ៊ីរ៉ាក់ តើអាមេរិកសុខចិត្តនៅស្ងៀមឈរមើលអ៊ីរ៉ង់ធ្វើស្រេចនឹងចិត្តទេ ? ពិតជាមិនបានទេ ! ក្រៅអំពីស្រែកព្រមាន គេឃើញអាមេរិកបានពង្រឹងវិធានការយោធានៅក្នុងតំបន់ឈូងសមុទ្ទពែក្សរួចជាស្រេចទៅហើយ។ អាមេរិកក៏បានវាយបកតាមផ្លូវអាកាសប្រឆាំងនឹងកងជីវពលអ៊ីរ៉ង់វិញ ហើយអាចនឹងបើកការវាយប្រហារថ្មីទៀត ខ្លាំងជាងមុនទៀតផង។ សម្រាប់ពេលនេះអាមេរិកគ្មានហេតុផលអ្វីត្រូវក្រែងរអា ខ្លាចរងការបន្ទោសថាជាដើមហេតុធ្វើឱ្យប្រេងឡើងថ្លៃហើយ នៅពេលវាយប្រហារលើអ៊ីរ៉ង់ទេ ព្រោះតម្រូវការផ្នែកប្រេងឥន្ធនៈពិភពលោកចុះថយយ៉ាងខ្លាំងក្នុងបរិបទនៃកូរ៉ូណាវីរុសថ្មីផង និងផលិតផលប្រេងឆៅនៅលើទីផ្សារក៏សម្បូរហូរហៀទៀត។ ជាសម្ព័ន្ធមិត្តអាមេរិក អារ៉ាប៊ីសាអូឌីត បានបង្ហាញអំពីសមត្ថភាពរៀបចំហេដ្ឋារចនាសម្ព័ន្ធប្រេង បានឆាប់រហ័ស ប្រសិនបើត្រូវរងការប៉ះពាល់ណាមួយជាយថាហេតុ។ ក្រុងរីយ៉ាដ ក៏បានត្រៀមលក្ខណៈការពារទីតាំងឃ្លាំងស្តុកប្រេង ដោយផ្ទេរទៅទុកក្នុងឃ្លាំងដ៏មានសុវត្ថិភាព ឆ្ងាយពីតំបន់ជម្លោះស្ទើរអស់ទៅហើយ។
ដូច្នេះប្រសិនបើអាមេរិកចង់វាយប្រហារលើទីតាំងប្រេងរបស់អ៊ីរ៉ង់ណាមួយ នេះជាពេលវេលាល្អបំផុត ! នេះបើតាមការសន្និដ្ឋានរបស់ភ្នាក់ងារវិភាគស្វ៊ីស Petromatrix ដដែល។ ម្យ៉ាងទៀត វ៉ាស៊ីនតោនបានរៀបយុទ្ធសាស្ត្រប្រេងរួចហើយ ដោយប្រមូលទិញផលិតផលប្រេងអាមេរិកមកស្តុកទុក។ ធ្វើដូច្នេះ ប្រទេសមិនភ័យព្រួយខ្លាចខ្វះថាមពលប្រើផង និងបានជួយជំរុញដល់ឧស្សាហកម្មប្រេងអាមេរិកខ្លួនទៀត។ ឧស្សាហកម្មប្រេងអាមេរិកដែលក៏កំពុងជួបបញ្ហា នៅពេលនេះ ដោយសារតម្លៃប្រេងលើទីផ្សារប្រេងពិភពលោកកំពុងធ្លាក់ថ្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ