មេបក្សប្រឆាំងរបស់ថៃ ដឹកនាំបាតុកម្មប្រឆាំងនឹងពួកយោធា
ទីក្រុងបាងកកនៃប្រទេសថៃ នៅថ្ងៃសៅរ៍ ទី១៤ ធ្នូនេះ បានរួមរឹតដោយបាតុកម្មធំមួយ និងជាលើកដំបូង រាប់ចាប់តាំងពីការបោះឆ្នោតជាតិនាខែមីនាមក។ គេជឿថា បាតុកម្មនេះ គឺជាការសាកល្បងថ្មីមួយរបស់ក្រុមយុវជនថៃ ដើម្បីបង្ហាញនូវការមិនពេញចិត្តរបស់ពួកគេ ទៅកាន់រដ្ឋាភិបាល ដែលមានលោកប្រាយុទ្ធ ចាន់អូចា ជាមេដឹកនាំ។ ចុះហេតុអ្វីបានជាក្រុមយុវជនវ័យក្មេងថៃ ទើបហ៊ានចេញធ្វើបាតុកម្មនាពេលនេះ?
ចុះផ្សាយនៅថ្ងៃ៖ កែប្រែថ្ងៃទី៖
តាមពិតទៅ ការចុះផ្លូវ ធ្វើបាតុកម្មរបស់យុវជនវ័យក្មេងថៃរាប់ពាន់នាក់ នាថ្ងៃនេះ ធ្វើឡើងទៅតាមការអំពាវនាវរបស់ ឥស្សរជននយោបាយថៃដែលមានប្រជាប្រិយខ្លាំងមួយរូប ឈ្មោះថា ថាណាថន ជាសេដ្ឋីវ័យក្មេង និងជាមេបក្សប្រឆាំងល្បីឈ្មោះថៃ “អណាខុតម៉ៃ”។
មេបក្សប្រឆាំង លោកថាណាថន បានអំពាវនាវឲ្យប្រជាពលរដ្ឋថៃ ជួបជុំគ្នាធ្វើបាតុកម្មនៅរសៀលថ្ងៃសៅរ៍នេះ ដោយសារតែលោកមើលឃើញថា ក្រុមយោធាថៃ នៅតែបង្កើនយុទ្ធនាការរបស់ខ្លួនធ្វើបាប ក្រុមអ្នកប្រឆាំងនៅក្នុងប្រទេស។
ទាក់ទងនឹងរឿងនេះ អាជ្ញាធរថៃ បានប្រាប់ទីភ្នាក់ងារសារព័ត៌មានបារាំង AFP កងកម្លាំងប៉ូលិសប្រមាណជា ១៥០ នាក់ត្រូវបានដាក់ពង្រាយនៅតាមទីប្រជុំជនសំខាន់ៗ ក្នុងទីក្រុងបាងកក ដើម្បីរក្សាសន្តិសុខ។
ចំណែក អធិការរងក្រុងបាងកកលោក Somprasong Yenthuam បានឲ្យដឹងថា ប្រសិនបើបាតុកម្មនេះ មានរបៀបរៀបរយ និងធ្វើដោយមិនរំលោភច្បាប់ណាមួយនោះទេ ក្រុមបាតុករ អាចបន្តធ្វើវាទៅមុខទៀតបាន។ តែជាមួយគ្នានេះ អធិការរងក្រុងបាងកក ក៏បាននិយាយដែរថា គណបក្សអណាខុតម៉ៃ មិនបានទទួលការអនុញ្ញាតឲ្យធ្វើបាតុកម្មនោះឡើយ។
គួររំឭកជូនថា គណបក្សប្រឆាំង អណាខុតម៉ៃ របស់លោកថាណាថន ទទួលសំឡេងគាំទ្រជាង ៦ លាន ពោលគឺជាប់លេខរៀងទី៣ នៅក្នុងការបោះឆ្នោត កាលពីខែមីនាកន្លង។ អ្នកគាំទ្រលោកថាណាថន ភាគច្រើន គឺជាក្រុមយុវជន ដែលធុញទ្រាន់ នឹងតួនាទីរបស់ពួកយោធា ក្នុងឆាកនយោបាយថៃ។ ដូចនេះហើយទើប ប្រជាប្រិយភាព របស់លោកថាណាថន មានកើនឡើងខ្លាំង ហើយគេជឿថា ដោយសារតែមូលហេតុនេះហើយ ទើបមេក្សប្រឆាំងរូបនេះ ក្លាយទៅជាបន្លាមួយ ក្នុងកែវភ្នែករបស់យោធាថៃ។
ជាក់ស្តែង កាលពីខែតុលា ឆ្នាំ២០១៩ កន្លងទៅថ្មីៗនេះ ក្រុមយោធាថៃ ធ្លាប់បានចោទប្រកាន់លោកថាណាថន ពីបទចង់បះបោរ។ ក៏ប៉ុន្តែ មេដឹកនាំបក្សប្រឆាំងវ័យ ៤១ ឆ្នាំរូបនេះ បាននិយាយម្តងហើយម្តងទៀតថា ករណីប្រឆាំងនឹងរូបលោក ហើយនិងគណបក្សអណាខុតម៉ៃ ធ្វើឡើងក្រោមហេតុផលនយោបាយតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ