បារាំងស្នើឲ្យកំណត់សិទ្ធិធ្វើវេតូនៅក្រុមប្រឹក្សាសន្តិសុខ
ប្រទេសបារាំងកំពុងរកវិធីសាស្រ្តដើម្បីកាត់បន្ថយសិទ្ធិធ្វើវេតូរបស់សមាជិកអចិន្ត្រៃយ៍ នៅក្រុមប្រឹក្សាសន្តិសុខរបស់អង្គការសហប្រជាជាតិ។ កាលពីថ្ងៃព្រហស្បតិ៍ នៅ ក្រៅក្របខ័ណ្ឌកិច្ចប្រជុំអចិន្រ្តៃយ៍របស់អង្គការសហប្រជាជាតិ នៅទីក្រុងញូវយ៉ក បារាំង និងប្រទេសម៉ិចស៊ិកជាអ្នកផ្តួចផ្តើមគំនិតរៀបចំកិច្ចប្រជុំពិសេសស្តីពីបញ្ហានេះ ដោយមានចូលរួមពីប្រទេសជាង ២០ ដែលនៅក្នុងនោះ មានសមាជិកអន្រ្តៃយ៍ចំនួន ៤ លើកលែងតែរុស្ស៊ីដែលមិនបង្ហាញខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
បារាំងជាអ្នកផ្តួចផ្តើមគំនិត ចង់ស្នើឲ្យក្រុមប្រឹក្សាសន្តិសុខរបស់អង្គការសហប្រជាជាតិពិចារណាឡើងវិញ ពីសិទ្ធិធ្វើវេតូរបស់សមាជិកអចិន្ត្រៃយ៍ទាំង៥ របស់ក្រុមប្រឹក្សា ដែលមាន ដូចជា សហរដ្ឋអាមេរិក បារាំង រុស្ស៊ី អង់គ្លេស និងចិន។ ប៉ុន្តែ នៅក្នុងកិច្ចប្រជុំដែលមានប្រទេសជាង ២០ចូលរួម គ្មានទេវត្តមានរបស់ភាគីរុស្ស៊ី។ រុស្ស៊ី និងចិនឧស្សាហ៍ត្រូវប្រទេសលោកខាងលិចរិះគន់ ដោយសារតែប្រទេសទាំងពីរ ជាញឹកញយប្រើសិទ្ធិវេតូរបស់ខ្លួន ដើម្បីប្រឆាំងមិនឲ្យក្រុមប្រឹក្សាចេញសម្រេចដាក់គំនាបទៅលើប្រទេសសម្ព័ន្ធមិត្តរបស់ខ្លួន។
លោកប្រមុខការបរទេសបារាំង ដែលលើកយកឧទាហរណ៍ករណីសង្រ្គាមស៊ីវិល នៅស៊ីរី បានថ្លែងថា សំណើកាត់បន្ថយសិទ្ធិធ្វើវេតូរបស់សមាជិកអចិន្ត្រៃយ៍ នឹងជួយកាត់បន្ថយភាពស្ពឹកស្រពន់របស់ក្រុមប្រឹក្សាសន្តិសុខ នៅពេលវិបត្តិធំមួយកំពុងកើតឡើង។ ជារួម តាមរយៈសំណើនេះ បារាំងចង់ទាមទារឲ្យប្រទេសសមាជិកអចិន្ត្រៃយ៍ទាំង៥របស់ក្រុមប្រឹក្សាឈប់ប្រើសិទ្ធិវេតូ នៅពេលដែលការសម្លាប់រង្គាល (ដូចជាអំពើប្រល័យពូជសាសន៍ ឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ) កំពុងកើតឡើង។
សូមបញ្ជាក់ថា ចាប់តាំងពីសង្រ្គាមស៊ីវិលផ្ទុះនៅស៊ីរី និងសម្លាប់មនុស្សជាង២សែននាក់ រុស្ស៊ី និងចិនបានរួមគ្នាបោះឆ្នោតវេតូ ៤ដង ប្រឆាំងមិនឲ្យក្រុមប្រឹក្សាសន្តិសុខចេញសេចក្តីសម្រេច ដែលសំដៅដាក់ទណ្ឌកម្មទៅលើរបបលោកបាស្ហា អាល់ អាសាដ។
សម្រាប់រដ្ឋមន្រ្តីការបរទេសម៉ិចស៊ិកដែលជាសហប្រធានកិច្ចប្រជុំ សិទ្ធិធ្វើវេតូ មិនមែនជាបុព្វសិទ្ធិផ្តាច់មុខ ប៉ុន្តែ ជាការទទួលខុសត្រូវរបស់ប្រទេសសមាជិកអចិន្ត្រៃយ៍នៃក្រុមប្រឹក្សាសន្តិសុខ។ មន្រ្តីទូតបារាំងម្នាក់បានបង្ហើបប្រាប់ទីភ្នាក់ងារបារាំងAFP ថា សមាជិកមួយចំនួនតូច ដែលខ្លាចបាត់បង់ប្រយោជន៍ សិទ្ធិអត្ថិភាពរបស់ខ្លួន នៅក្រុមប្រឹក្សាសន្តិសុខមិនសូវពេញចិត្ត គាំទ្រ សំណើរបស់បារាំង ប៉ុន្តែ មានប្រទេសជាច្រើនផ្សេងទៀត និងអង្គការសង្គមស៊ីវិលគាំទ្រគំនិតផ្តួចផ្តើមរបស់បារាំង។ ដូច្នេះ គេនៅត្រូវការពេលវេលាយូរ និងការងារប្រឹងប្រែងជាច្រើនទៀត ដើម្បីធ្វើការបញ្ចុះបញ្ចូល និងដាក់គំនាបឲ្យសមាជិកអចិន្ត្រៃយ៍ទាំង៥របស់ក្រុមប្រឹក្សាសន្តិសុខលះបង់បុព្វសិទ្ធិពិសេសរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ