តើការស្លាប់មេដឹកនាំនឹងធ្វើឲ្យឥទ្ធិពលក្រុមជីហាតរដ្ឋអ៊ីស្លាមនៅអាស៊ីអាគ្នេយ៍ថយចុះឬទេ?
ចុះផ្សាយនៅថ្ងៃ៖
ស្តាប់ - ០៤:៥៥
កាលពីថ្ងៃអង្គារ លោកប្រធានាធិបតីហ្វីលីពីន ឌុយទែរតេ បានប្រកាសពីការរំដោះបានទាំងស្រុងទីក្រុងម៉ារ៉ាវីពីដៃក្រុមឧទ្ទាមអ៊ីស្លាមជ្រុលនិយម ហើយមួយថ្ងៃមុននោះ ហ្វីលីពីនក៏បានប្រកាសឲ្យដឹងផងដែរពីការស្លាប់មេដឹកនាំក្រុមឧទ្ទាមពីររូប ដែលត្រូវបានគេចាត់ទុកថាជាមេដឹកនាំដ៏សំខាន់របស់ក្រុមជីហាតរដ្ឋអ៊ីស្លាមប្រចាំតំបន់អាស៊ីអាគ្នេយ៍។ ក៏ប៉ុន្តែ បរាជ័យនៅម៉ារ៉ាវី និងការស្លាប់មេដឹកនាំក៏សំខាន់ទាំងពីររូបនេះ មិនប្រាកដថានឹងធ្វើឲ្យតំបន់អាស៊ីអាគ្នេយ៍បានរួចផុតពីការគំរាមកំហែងពីក្រុមជីហាតរដ្ឋអ៊ីស្លាមនោះទេ។
ក្នុងចំណោមមេដឹកនាំអ៊ីស្លាមជ្រុលនិយមទាំងពីររូប ដែលត្រូវស្លាប់ ក្នុងប្រតិបត្តិការកងទ័ពហ្វីលីពីនកាលពីថ្ងៃចន្ទ មានម្នាក់ គឺជាមេដឹកនាំក្រុមអាប៊ូសៃយ៉ាហ្វ ដែលកាលពីឆ្នាំ២០១៤កន្លងទៅបានប្រកាសតាំងខ្លួនជាមេដឹកនាំសាខាក្រុមជីហាតរដ្ឋអ៊ីស្លាមប្រចាំតំបន់អាស៊ីអាគ្នេយ៍ ហើយដែលអាមេរិកបានចាត់បញ្ចូលជាមេដឹកនាំជីហាតដែលត្រូវតាមប្រមាញ់ រហូតប្រកាសផ្តល់រង្វាន់ដល់ទៅ ៥លានដុល្លារ ដល់អ្នកណាដែលអាចចាប់ខ្លួនបាន។
មេដឹកនាំអ៊ីស្លាមជ្រុលនិយមម្នាក់ទៀតដែលត្រូវស្លាប់កាលពីថ្ងៃចន្ទ គឺជាមេដឹកនាំក្រុមដែលទើបនឹងបង្កើតថ្មី តែជាក្រុមដែលមានកម្លាំងខ្លាំង មានការហ្វឹកហ្វឺន និងគ្រឿងសព្វាវុធល្អ ព្រមទាំងមានខ្សែបណ្តាញច្រើននៅបរទេស ជាពិសេស នៅឥណ្ឌូណេស៊ី និងម៉ាឡេស៊ី។ ក្រុមនេះ ក៏ដូចជា ក្រុមអាប៊ូសៃយ៉ាហ្វដែរ សុទ្ធតែបានប្រកាសភ្ជាប់ខ្លួនជាមួយនឹងក្រុមជីហាតរដ្ឋអ៊ីស្លាមនៅស៊ីរី និងអ៊ីរ៉ាក់។ ក្រុមទាំងពីរនេះហើយ ដែលបានរួមដៃគ្នា បើកការវាយប្រហារដណ្តើមកាន់កាប់ក្រុងម៉ារ៉ាវី ពីរដ្ឋាភិបាលហ្វីលីពីន។
ដូច្នេះ គេអាចនិយាយបានថា រហូតមកទល់នឹងពេលនេះ អ្នកទាំងពីរគឺជាមេដឹកនាំដ៏សំខាន់ របស់ក្រុមជីហាតប្រចាំនៅក្នុងតំបន់អាស៊ីអាគ្នេយ៍ ហើយការស្លាប់មេដឹកនាំទាំងពីរនេះ គឺជាបរាជ័យដ៏ធំមួយ នៅក្នុងយុទ្ធសាស្រ្តរបស់ក្រុមជីហាតរដ្ឋអ៊ីស្លាម ដែលចង់ជ្រៀតខ្លួនចូលមកក្នុងតំបន់អាស៊ីអាគ្នេយ៍។
ទោះជាយ៉ាងណា បរាជ័យនេះមានលក្ខណៈជានិមិត្តរូបច្រើនជាង ហើយក៏ជាបរាជ័យដែលមានផលវិបាកសម្រាប់តែនៅក្នុងរយៈពេលខ្លីប៉ុណ្ណោះ ដោយមិនមានន័យថា តំបន់អាស៊ីអាគ្នេយ៍នឹងអាចរួចផុតពីការគំរាមកំហែងរបស់ក្រុមជីហាតរដ្ឋអ៊ីស្លាមនោះទេ។
បើតាមការសិក្សានិងសង្កេតមើលទូទៅ ពីអ្វីដែលធ្លាប់កើតមានឡើងកន្លងមក គេអាចមើលឃើញថា ក្រុមភេរវជន ដែលមានការគាំទ្រ និងមានខ្សែបណ្តាញជាអន្តរជាតិ ហើយដែលធ្វើសកម្មភាពដោយផ្អែកលើមនោគមន៍វិជ្ជាអ៊ីស្លាមជ្រុលនិយម មិនងាយនឹងរលំរលាយ ដោយគ្រាន់តែសម្លាប់បានមេដឹកនាំនោះទេ។
អ្វីដែលគេតែងតែសង្កេតឃើញជាញឹកញាប់ នៅក្រោយពីត្រូវទទួលបរាជ័យ ឬពេលស្លាប់មេដឹកនាំ ក្រុមភេរវជនអ៊ីស្លាមជ្រុលនិយមច្រើនតែបែកខ្ញែកគ្នា ទៅសម្ងំលាក់ខ្លួន ហើយបាត់មុខ បាត់សំឡេង ផ្អាកសកម្មភាពមួយរយៈ មុននឹងអាចជ្រើសរើសមេដឹកនាំថ្មីមកជំនួសមេដឹកនាំចាស់ រួចហើយប្រមែរប្រមូលកម្លាំង ចេញមកធ្វើសកម្មភាពឡើងវិញ។
នេះគឺជាអ្វីដែលទំនងជានឹងត្រូវកើតឡើង ចំពោះក្រុមអ៊ីស្លាមជ្រុលនិយមនៅអាស៊ីអាគ្នេយ៍។ មកទល់នឹងពេលនេះ គេសំឡេងឃើញសកម្មជនជីហាតម្នាក់មកពីម៉ាឡេស៊ី គឺ ម៉ះមូដ អះម៉ាត់ ដែលអាចនឹងត្រូវឡើងមកបន្តវេន ពីមេដឹកនាំដែលស្លាប់កាលពីថ្ងៃចន្ទ។ ហេតុដូច្នេះហើយបានជាកងទ័ពហ្វីលីពីនបានអះអាងថា នៅពេលនេះ ម៉ះមូដ អះម៉ាត់ គឺជាគោលដៅដ៏សំខាន់បំផុត ដែលគេកំពុងតាមប្រមាញ់។
បើយោងតាមអ្នកជំនាញខាងភេរវកម្មនៅក្នុងតំបន់អាស៊ីអាគ្នេយ៍ ម៉ះមូដ អះម៉ាត់ គឺជាអ្នកមានតួនាទីសំខាន់នៅក្នុងការស្វែងរកប្រភពហិរញ្ញវត្ថុ និងការជួយជ្រោមជ្រែងពីបរទេស ហើយកាន់តែសំខាន់ជាងនេះទៅទៀត គឺជាអ្នកដែលមានទំនាក់ទំនងជាមួយនឹងក្រុមជីហាត ដែលចេញពីអាស៊ីអាគ្នេយ៍ ជាពិសេស ពីម៉ាឡេស៊ី និងឥណ្ឌូណេស៊ី ទៅចូលរួមជាមួយនឹងក្រុមជីហាតរដ្ឋអ៊ីស្លាម នៅស៊ីរី និងអ៊ីរ៉ាក់។
ក្រុមជីហាតដែលចេញទៅស៊ីរី និងអ៊ីរ៉ាក់នេះហើយ ដែលអាចនឹងក្លាយទៅជាកម្លាំងប្រយុទ្ធដ៏សំខាន់ សម្រាប់ក្រុមអ៊ីស្លាមជ្រុលនិយមនៅអាស៊ីអាគ្នេយ៍ ពីព្រោះថា ក្រុមជីហាតទាំងនេះ មិនត្រឹមតែមានជំនឿយ៉ាងងុបងល់ទៅលើមនោគមន៍វិជ្ជាអ៊ីស្លាមជ្រុលនិយមរបស់មេដឹកនាំរដ្ឋអ៊ីស្លាមតែប៉ុណ្ណោះទេ តែកាន់តែសំខាន់ជាងនេះទៅទៀត គឺជាអ្នកដែលទទួលបាននូវការហ្វឹកហ្វឺន និងមានបទពិសោធន៍នៅក្នុងសមរភូមិ។
នៅក្នុងពេលបច្ចុប្បន្ននេះ នៅក្នុងពេលកំពុងទទួលបរាជ័យជាបន្តបន្ទាប់ នៅអ៊ីរ៉ាក់ និងស៊ីរី ក្រុមជីហាតរដ្ឋអ៊ីស្លាមកំពុងតែស្វះស្វែងរកទីជម្រកថ្មី ហើយនេះអាចជាពេលល្អមួយ ដែលក្រុមជីហាតចេញពីអាស៊ីអាគ្នេយ៍នាំគ្នាចាកចេញពីស៊ីរី និងអ៊ីរ៉ាក់ ហើយវិលត្រឡប់ចូលទៅប្រទេសកំណើតរបស់ខ្លួនវិញ ដើម្បីរួមកម្លាំងជាមួយអ្នកក្នុងស្រុក ធ្វើសកម្មភាព និងពង្រឹងសាខាក្រុមជីហាតរដ្ឋអ៊ីស្លាមនៅក្នុងតំបន់អាស៊ីអាគ្នេយ៍។
ដូច្នេះ និយាយសរុបមកវិញ ការគំរាមកំហែងរបស់ក្រុមជីហាតរដ្ឋអ៊ីស្លាមនៅក្នុងតំបន់អាស៊ីអាគ្នេយ៍នៅតែមានកម្រិតខ្ពស់ ពីព្រោះថា មេដឹកនាំកំពូលរបស់ក្រុមជីហាតរដ្ឋអ៊ីស្លាមនៅស៊ីរី និងអ៊ីរ៉ាក់ ដែលជាមេក្លោងខាងមនោគមន៍វិជ្ជាអ៊ីស្លាមជ្រុលនិយមនៅតែមាន ចំណែកឯសកម្មជនប្រយុទ្ធដែលមានការហ្វឹកហ្វឺន មានបទពិសោធន៍ និងមានភាពប្តូរផ្តាច់ខ្ពស់ក៏នៅតែមាន ហើយនឹងមានកាន់តែច្រើន នៅពេលដែលមានការវិលត្រឡប់នៃក្រុមជីហាតពីស៊ីរី និងអ៊ីរ៉ាក់។ តាមការពិត តាំងពីដើមរៀងមក ការវិលត្រឡប់នៃក្រុមជីហាតពីស៊ីរី និងអ៊ីរ៉ាក់ចូលមកក្នុងប្រទេសកំណើតវិញនេះហើយ ដែលជាចំណុចដែលគេនាំគ្នាព្រួយបារម្ភខ្លាំង មិនថាតែនៅក្នុងតំបន់អាស៊ីអាគ្នេយ៍នេះមួយទេ តែនៅស្ទើរតែគ្រប់ប្រទេសទាំងអស់ ដែលមានប្រជាជនចេញទៅធ្វើជីហាតជាមួយអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ