កំណើនសេដ្ឋកិច្ចចិនធ្លាក់ចុះបន្តិចប៉ុន្តែនៅតែរឹងមាំ
អត្រាកំណើនសេដ្ឋកិច្ចចិនបានធ្លាក់ចុះបន្តិច នៅក្នុងត្រីមាសទី៣ឆ្នាំ២០១៧នេះ។ នេះបើយោងតាមតួលេខផ្លូវការ ចេញផ្សាយដោយការិយាល័យស្ថិតិចិន នៅថ្ងៃព្រហស្បតិ៍នេះ ដោយបានបញ្ជាក់បន្ថែមថា បើទោះបីជាមានការធ្លាក់ចុះបន្តិចបន្តួចនៅត្រីមាសទី៣នេះក៏ដោយ តែបើគិតជាអត្រាកំណើនពេញមួយឆ្នាំ សេដ្ឋកិច្ចចិននឹងនៅតែមានអត្រាកំណើនស្របទៅតាមគោលដៅដែលរដ្ឋាភិបាលបានកំណត់។
ចុះផ្សាយនៅថ្ងៃ៖
តួលេខនៃការិយាល័យស្ថិតិចិនបង្ហាញថា នៅក្នុងចន្លោះពីខែកក្កដាដល់ខែកញ្ញាកន្លងទៅនេះ សេដ្ឋកិច្ចចិនមានកំណើន ៦,៨% ពោលគឺទាបជាងបន្តិចពីត្រីមាសទី១ និងត្រីមាសទី២កន្លងទៅ ដែលមានអត្រាកំណើន ៦,៩%។ ក៏ប៉ុន្តែ អ្នកនាំពាក្យការិយាល័យស្ថិតិបានធ្វើការគូសបញ្ជាក់ថា បើគិតជាលក្ខណៈទូទៅ សេដ្ឋកិច្ចចិននៅក្នុងរយៈពេល ៣ត្រីមាសកន្លងទៅនេះ នៅតែមានកម្លាំងរឹងមាំ ដែលអាចនឹងទទួលបានអត្រាកំណើនប្រចាំឆ្នាំស្របទៅតាមគោលដៅរបស់រដ្ឋាភិបាល។
ជាការពិត អត្រា ៦,៨% បើទោះបីជាធ្លាក់ចុះបន្តិចមែន តែនៅតែខ្ពស់ជាងអត្រាកំណើន ៦,៥% ដែលរដ្ឋាភិបាលរបស់លោកស៊ីជីនពីងបានកំណត់ធ្វើជាគោលដៅ សម្រាប់ឆ្នាំ២០១៧នេះ។ អ្នកជំនាញសេដ្ឋកិច្ចឯករាជ្យជាច្រើន ដែលឆ្លើយតបនឹងការសិក្សារបស់ទីភ្នាក់ងារព័ត៌មានអាអែហ្វប៉េក៏សុទ្ធតែបានធ្វើការព្យាករផងដែរថា កំណើនសេដ្ឋកិច្ចចិនសម្រាប់ឆ្នាំ២០១៧នេះ ប្រាកដជានឹងមានអត្រាខ្ពស់ជាងអ្វីដែលរដ្ឋាភិបាលចិនបានកំណត់ជាគោលដៅ។
នេះគឺជាដំណឹងដ៏ល្អមួយ សម្រាប់លោកស៊ីជីនពីង ពីព្រោះថា ស្ថានភាពសេដ្ឋកិច្ចរឹងមាំ គឺជាកត្តាដ៏ចម្បងមួយ ក្នុងការបង្កើនប្រជាប្រិយភាព និងពង្រឹងអំណាចរបស់លោក ជាពិសេស នៅក្នុងពេលដែលបក្សកុម្មុយនិស្តចិនកំពុងតែបើកធ្វើមហាសន្និបាតប្រចាំឆ្នាំ កំណត់ពីអំណាចរបស់លោកស៊ីជីនពីង សម្រាប់អាណត្តិទីពីរ។
អ្នកវិភាគសេដ្ឋកិច្ចមួយចំនួនក៏បានធ្វើការកត់សម្គាល់ផងដែរថា អត្រាកំណើនសេដ្ឋកិច្ចខ្ពស់ ក៏ជាកត្តាដ៏សំខាន់មួយដែរ សម្រាប់ឲ្យលោកស៊ីជីនពីងធ្វើកំណែទម្រង់សេដ្ឋកិច្ចចិន ឲ្យងាកចេញពីសេដ្ឋកិច្ចដែលពឹងផ្អែកលើការនាំចេញ និងការវិនិយោគរដ្ឋ ទៅរកម៉ូដែលសេដ្ឋកិច្ចដែលមានកំណើនប្រកបដោយចីរភាព ជាពិសេស គឺការបង្កើនការចំណាយនៅលើទីផ្សារក្នុងស្រុក។
ជាការពិត គេអាចសង្កេតឃើញថា នៅក្នុងតួលេខដែលផ្តល់ដោយការិយាល័យស្ថិតិចិន នៅថ្ងៃព្រហស្បតិ៍នេះ មានសូចនាករណ៍ជាច្រើនដែលបង្ហាញពីដំណើរវិវឌ្ឍជាវិជ្ជមាន នៃទីផ្សារក្នុងស្រុកចិន ជាពិសេស គឺការកើនឡើងនៃការចំណាយទូទៅរបស់ប្រជាជន និងការកើនឡើងនៃវិស័យសេវាកម្ម ដែលកំពុងតែក្លាយជាកម្លាំងចលករដ៏សំខាន់នៃកំណើនសេដ្ឋកិច្ចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ