ចិនបានសារភាពពីចាប់ឃុំបុគ្គលិកក្រុមហ៊ុន Mighty Current នៅហុងកុង
នៅក្នុងប្រទេសចិន ប៉ូលិសបានប្រកាសសារភាពជាសាធារណៈពីការចាប់ឃុំខ្លួនបុគ្គលិកចំនួន ៣នាក់ដែលបម្រើការងារឲ្យក្រុមហ៊ុនបោះពុម្ពសៀវភៅមួយនៅហុងកុងឈ្មោះ Mighty Current។ ការសារភាពជាផ្លូវការរបស់ប៉ូលិសចិនត្រូវបានធ្វើឡើងនៅក្នុងលិខិតមួយផ្ញើទៅឲ្យប៉ូលិសហុងកុង និងដែលត្រូវបានផ្សព្វផ្សាយជាសាធារណៈនៅយប់ថ្ងៃព្រហស្បតិ៍ ទី៤ កុម្ភៈ។ នៅក្នុងលិខិតនោះ ប៉ូលិសចិនបានចោទបុគ្គលិកក្រុមហ៊ុន Mighty Current ទាំង ៣នាក់ពីបទធ្វើសកម្មភាពខុសច្បាប់។ រឿងអាស្រូវមួយនេះបានធ្វើឲ្យពលរដ្ឋតក់ស្លុត និងព្រួយបារម្ភជាពន់ពេក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៧
រឿងរ៉ាវបាត់ខ្លួនដ៏ចម្លែក និងដ៏អាដ៍កំបាំងរបស់បុគ្គលិកបម្រើការងារឲ្យក្រុមហ៊ុនបោះពុម្ពសៀវភៅនៅហុងកុងឈ្មោះ Mighty Current មានបុរសចំនួន ៥នាក់។ រឿងរ៉ាវមួយនេះបានចាប់ផ្ទុះដំបូងក្នុងចន្លោះថ្ងៃទី ១៥ និងទី២៤ តុលា ឆ្នាំ ២០១៥កន្លងទៅជាមួយនឹងការបាត់ខ្លួនបុគ្គលិកចំនួន ៤នាក់។ នៅក្នុងចំណោមអ្នកបាត់ខ្លួនទាំង ៤នាក់ដំបូងនេះ មាន ៣នាក់ គឺឈ្មោះល្វី ប៉ ឈុង ជីពីង និងឡាម វីឃីបានធ្វើដំណើរទៅកាន់ចិនដីគោក ពោលទៅក្នុងទីក្រុង Shenzhen និងទីក្រុង Dongguan ហើយអ្នកទាំង ៣ ក៏បានបាត់ដំណឹងសូន្យឈឹងមិនឃើញវិលត្រឡប់ចូលហុងកុងវិញ។
មនុស្សបាត់ខ្លួនទី៤ មានឈ្មោះហ្គី មីនហាយ (Gui Minhai) ជាជនជាតិស៊ុយអែតដែលមានតួនាទីជាអគ្គនាយកក្រុមហ៊ុន និងអ្នកមានភាគហ៊ុន។ លោកហ្គីបានបាត់ខ្លួននៅក្នុងប្រទេសថៃក្នុងខែតុលា ឆ្នាំ ២០១៥ នាពេលដែលលោកកំពុងសម្រាកលំហែកាយនៅផ្ទះទី២ របស់លោកនៅកោះPattaya។ ព័ត៌មានលេចឮកាលណោះឲ្យដឹងថា មានមនុស្សមួយក្រុមបានទៅចាប់លោកហ្គីដល់ផ្ទះនៅកោះ Pattaya។ តាំងពីពេលនោះមក លោកហ្គីបានឲ្យដំណឹងដល់ប្រពន្ធ និងកូនជាហូរហែ តែមិនបានប្រាប់ពីទីកន្លែងដែលលោកកំពុងស្នាក់នៅទេ។
មនុស្សបាត់ខ្លួនទី៥ មានឈ្មោះ លី បូ។ លោកលី បូប្រហែលជាបាត់ខ្លួននៅដើមខែមករា ឆ្នាំ ២០១៦ ព្រោះគេបានឃើញវត្តមានលោកចុងក្រោយនៅក្នុងឃ្លាំស្តុកសៀវភៅទឹកដីហុងកុងនាថ្ងៃទី៣០ ធ្នូ ឆ្នាំ ២០១៥។ គឺប្រពន្ធរបស់លោកលី បូដែលបានរាយការណ៍ប្រាប់ប៉ូលិសហុងកុងពីការបាត់ខ្លួនស្វាមីលោកស្រី។ ប៉ុន្មានថ្ងៃក្រោយមក លោកលី បូបានទូរស័ព្ទឲ្យប្រពន្ធ តែជាលេខចេញមកពីទីក្រុង Shenzhen។
ដំណឹងបាត់ខ្លួនបុគ្គលិកទាំង ៥នាក់របស់ក្រុមហ៊ុន Mighty Current បានធ្វើឲ្យពលរដ្ឋហុងកុងបារម្ភ និងទម្លាក់ការចោទប្រកាន់ដាក់ចិនដីគោក។ តែរដ្ឋអំណាចប៉េកាំងបន្តបដិសេធជានិច្ច និងដែលទើបនៅពេលនេះទេដែលប៉ូលិសចិនបានសារភាពថា ខ្លួនពិតជាបានចាប់ឃុំខ្លួនបុគ្គលិកចំនួន ៣នាក់របស់ក្រុមហ៊ុន Mighty Current។
ការប្រកាសសារភាពរបស់ប៉ូលិសចិនមិនបានធ្វើឲ្យគេភ្ញាក់ផ្អើល
ការសារភាពរបស់ចិនពេលនេះជាដំណឹងមួយដែលគ្រប់គ្នាកំពុងរង់ចាំ។ សូមជម្រាបជូនថា តាំងពីរឿងអាស្រូវមួយនេះបានផ្ទុះឡើងក្នុងខែតុលា ឆ្នាំ ២០១៥ មក ពលរដ្ឋហុងកុងបានចង្អុលមុខចិនដីគោកដោយមិនញញើតពីបទនៅពីក្រោយការបាត់ខ្លួនបុគ្គលិកក្រុមហ៊ុន Mighty Current ទាំង ៥នាក់នោះ។ ក្រៅពីពលរដ្ឋហុងកុង សហគមន៍អន្តរជាតិ ពិសេសអាមេរិកក៏បានទម្លាក់ការសង្ស័យលើរដ្ឋអំណាចក្រុងប៉េកាំងដែរ។
នៅថ្ងៃចន្ទ ទី១ កុម្ភៈ អាមេរិក តាមរយៈក្រសួងការបរទេសបានជំរុញឲ្យចិនចេញមុខបំភ្លឺជុំវិញស្ថានភាពបុគ្គលិកក្រុមហ៊ុន Mighty Current ទាំង ៥នាក់ ពិសេសបំភ្លឺពីហេតុផលនៃការបាត់ខ្លួនរបស់អ្នកទាំង ៥។ តែនៅថ្ងៃអង្គារ ទី២ កុម្ភៈ ក្រសួងការបរទេសចិនបានឆ្លើយបកវិញថា រឿងរ៉ាវបាត់ខ្លួនបុគ្គលិកក្រុមហ៊ុន Mighty Current មិនមែនជារឿងដែលអាមេរិកត្រូវចេញមុខធ្វើអត្ថាធិប្បាយអ្វីទាំងអស់ ហើយអាមេរិកក៏គ្មានសិទ្ធិអ្វីចេញមុខលូកលាន់កិច្ចការផ្ទៃក្នុងរបស់ចិនដែរ។
គួរបញ្ជាក់ថា នៅក្នុងលិខិតមួយដែលប៉ូលិសចិនបានផ្ញើទៅឲ្យប៉ូលិសហុងកុង និងដែលត្រូវបានគេផ្សព្វផ្សាយជាសាធារណៈនាយប់ថ្ងៃព្រហស្បតិ៍ ទី៤ កុម្ភៈ ប៉ូលិសចិនបានបញ្ជាក់ពីការចាប់ខ្លួនបុគ្គលិកក្រុមហ៊ុន Mighty Current តែ ៣នាក់ គឺលោកល្វី ប៉ លោកឈុង ជីពីង និងលោកឡាម វីឃី។ ទាក់ទងនឹងលោកលី បូ និងលោកហ្គី មីនហាយ ប៉ូលិសចិនមិនបានបញ្ជាក់អ្វីទាំងអស់ តែមានដាក់ភ្ជាប់សំបុត្ររបស់លោកលី បូសរសេរដោយដៃទៅជាមួយ។ សំបុត្ររបស់លោកលី បូជាភស្តុតាងមួយដែលបញ្ជាក់ថា លោកក៏កំពុងស្ថិតក្នុងកណ្តាប់ដៃចិនដែរ តែលោកមិនបានបញ្ជាក់ពីការចាប់ឃុំខ្លួនលោកដោយប៉ូលិសចិនទេ។
ពលរដ្ឋហុងកុងបារម្ភកាន់តែខ្លាំងពីជោគវាសនាខ្លួន
រឿងអាស្រូវថ្មីមួយនេះជាសក្ខីកម្មមួយដែលបញ្ជាក់ពីការដែលចិនកំពុងលូកដៃកាន់តែជ្រៅនៅហុងកុង និងដែលពលរដ្ឋហុងកុងកំពុងព្រួយបារម្ភជាពន់ពេក។ គឺព្រួយបារម្ភពីការបាត់បង់លទ្ធិប្រជាធិបតេយ្យ និងសិទ្ធិសេរីភាពក្នុងការបញ្ចេញមតិដែលពលរដ្ឋហុងកុងធ្លាប់ទទួលបាននៅក្នុងសម័យអាណានិគមនិយមអង់គ្លេស។ គួររម្លឹកជូនឡើងវិញថា គឺទើបតែនៅក្នុងឆ្នំា ១៩៩៧ ទេដែលអង់គ្លេសបានប្រគល់ទឹកដីហុងកុងទៅឲ្យចិនវិញ និងដែលចិនខ្លួនឯងបានសន្យារក្សាទុកលក្ខន្តិកហុងកុងដូចក្នុងសម័យអង់គ្លេសរយៈពេល ៥០ឆ្នាំ។
ជាការពិត ហុងកុងសព្វថ្ងៃជាទឹកដីស្វយ័តដែលមានរចនាសម្ព័ន្ធដាច់ដោយឡែកពីចិនដីគោក ពោលមានរូបិយប័ណ្ណផ្សេង មានច្បាប់ផ្ទាល់ខ្លួន និងមានរដ្ឋាភិបាលផ្ទាល់ខ្លួន។ តែនាប៉ុន្មានឆ្នាំចុងក្រោយនេះ ពិសេសជិតដល់ថ្ងៃបោះឆ្នោតសភាហុងកុងនៅឆ្នាំ ២០១៧ ចិនបានផ្តើមដាក់គំនាបកាន់តែខ្លាំងនៅហុងកុង។សម្រាប់ប្រជាជនហុងកុងដែលធ្លាប់ភ្លួករសជាតិលទ្ធិប្រជាធិបតេយ្យ និងសិទ្ធិសេរីភាពពេញលេញក្នុងសម័យអាណានិគមនិយមអង់គ្លេស ទង្វើរបស់ចិនកុម្មុយនិស្តរបៀបនេះ ជារឿងដែលគេពិបាកទទួលយក។
គួររម្លឹកជូនថា ប៉ុន្មានឆ្នំា ក្រោយពីប្រទេសអង់គ្លេសបានប្រគល់ដែនដីហុងកុងទៅឲ្យចិនក្នុងឆ្នំា ១៩៩៧ មានប្រជាជនហុងកុងប្រមាណជា ៦០ ០០០នាក់បានចាកចេញពីហុងកុងទៅតំាងលំនៅដ្ឋានក្នុងប្រទេសផ្សេងជារៀងរាល់ឆ្នំា។ លទ្ធផលស្ទង់មតិថ្មីៗនេះឲ្យដឹងថា មានប្រជាជនហុងកុងចំនួន ២១% បានត្រៀមខ្លួនចាកចេញទៅកាន់ប្រទេសផ្សេង ដោយសារតែពួកគេបារម្ភពីអនាគតនយោបាយមិនទៀតទាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ