ហេតុអ្វីបានជាអ៊ីរ៉ង់ក្តៅក្រហាយនឹងកិច្ចសហប្រតិបត្តិការរវាងអាមេរិក និងរុស្ស៊ីស្តីពីស៊ីរី?
ចុះផ្សាយនៅថ្ងៃ៖
ស្តាប់ - ០៥:០១
នៅថ្ងៃសៅរ៍ ទី៧ ឧសភាកន្លងទៅថ្មីៗនេះ មធ្យោបាយឃោសនាមហាជនក្នុងប្រទេសអ៊ីរ៉ង់បានទម្លាយព័ត៌មានឲ្យដឹងថា មានទីប្រឹក្សាយោធាអ៊ីរ៉ង់ចំនួន ១៣នាក់បានបាត់បង់ជីវិតនៅក្នុងទឹកដីស៊ីរី និងមានអ្នករងរបួសចំនួន ២១នាក់ផ្សេងទៀត។ ការបាត់បង់ទាហានអ៊ីរ៉ង់នៅក្នុងទឹកដីស៊ីរីបានកើតមានឡើងនៅក្នុងការប្រយុទ្ធគ្នាក្នុងស្រុកខាន់ទូមែនស្ថិតប៉ែកខាងត្បូងទីក្រុងអាឡិប។ ទីក្រុងអាឡិបដែលបទឈប់បាញ់ដ៏ផុយស្រួយទើបត្រូវបានពន្យារពេលរហូតដល់ថ្ងៃទី១០ ឧសភានេះ។ បទឈប់បាញ់នៅស៊ីរី គឺកើតចេញពីការផ្តួចផ្តើមរវាងអាមេរិក និងរុស្ស៊ី តែអ៊ីរ៉ង់កំពុងក្តៅក្រហាយខ្លាំងណាស់។ តើមកពីហេតុអ្វីទៅ?។
រវាងអ៊ីរ៉ង់ និងស៊ីរី រឿងសម្ងាត់មិនអាចបន្តលាក់ជាសម្ងាត់បានទៀតឡើយ។ តាំងពីដើមមកម្ល៉េះ ពោលតាំងពីស៊ីរីបានធ្លាក់ក្នុងសង្រ្គាមហែកហួរផ្ទៃក្នុងមក អ៊ីរ៉ង់ត្រូវបានគេសង្ស័យថា បានលូកដៃយ៉ាងជ្រៅនៅក្នុងបញ្ហាផ្ទៃក្នុងស៊ីរី ដោយជួយគាំទ្រទាំងថវិកា ស្មារតី និងកម្លាំងទ័ពដល់រដ្ឋាភិបាលស៊ីរីរបស់លោកប្រធានាធិបតីអាសាដក្នុងការប្រយុទ្ធទប់ទល់នឹងក្រុមបះបោរដែលរបបក្រុងដាម៉ាស់ចាត់ទុកជាពួកឧទ្ទាម។ តែជារឿយៗ អ៊ីរ៉ង់បានបដិសេធយ៉ាងដាច់អហង្ការ។ បន្ទាប់មក គឺអ៊ីរ៉ង់ខ្លួនឯងជាអ្នកសារភាពថា ពិតជាបានបញ្ជូនទ័ពទៅជួយច្បាំងខាងកម្លាំងរដ្ឋាភិបាលលោកអាសាដមែន។
ឥឡូវនេះទៀត អ៊ីរ៉ង់បានទម្លាយឲ្យដឹងជាសាធារណៈដោយមិនលាក់លៀម ពីការស្លាប់ទីប្រឹក្សាយោធាអ៊ីរ៉ង់ចំនួន ១៣នាក់ និងរបួសជាង ២០នាក់នៅក្នុងសមរភូមិខាន់ ទូមែនស្ថិតប៉ែកខាងត្បូងទីក្រុងអាឡិប។ សូមបញ្ជាក់ជូនថាជាផ្លូវការនៅអ៊ីរ៉ង់ ទីក្រុងតេហេរ៉ង់មិនបានហៅទ័ពអ៊ីរ៉ង់នៅស៊ីរីថាជាទ័ពប្រយុទ្ធទេ តែជាទីប្រឹក្សាយោធា។ នេះជាលើកទី១ តាំងពីស៊ីរីធ្លាក់ក្នុងជម្លោះផ្ទៃក្នុងដែលអ៊ីរ៉ង់ទទួលរងការបានបាត់បង់យ៉ាងច្រើនសម្បើម។ អ៊ីចឹងហើយបានជាលោកអនុរដ្ឋមន្រ្តីការបរទេសអ៊ីរ៉ង់បានចាត់ទុកការស្លាប់ទាហានអ៊ីរ៉ង់នៅអាឡិបថា កើតចេញពីការរំលោភបំពានលើបទឈប់បាញ់ដែលបានផ្តួចផ្តើមដោយអាមេរិក និងរុស្ស៊ី។
កំណត់សម្គាល់មួយទៀត ព័ត៌មានស្តីពីការស្លាប់ និងរបួសទាហានអ៊ីរ៉ង់យ៉ាងសម្បើមក្នុងទឹកស៊ីរីបានធ្លាក់មក បន្ទាប់ពីលោកអាលី អាក្បារ វីឡាយ៉ាទី ទីប្រឹក្សាការទូតរបស់ប្រមុខសាសនាអ៊ីស្លាមអ៊ីរ៉ង់លោកអាលី ខាមេណីបានជួបសន្ទនាជាមួយលោកប្រធានាធិបតីស៊ីរីអាសាដក្នុងទីក្រុងដាម៉ាស់កាលពីថ្ងៃសៅរ៍ ទី៧ ឧសភា។ នៅក្នុងជំនួបនោះ លោកអាលី អាក្បារ វីឡាយ៉ាទីបានពំានាំការគាំទ្រមិនរាថយរបស់សាធារណរដ្ឋអ៊ីស្លាមអ៊ីរ៉ង់ចំពោះស៊ីរីនៅក្នុងយុទ្ធនាការប្រឆាំងនឹងភេរវនិយម។ ក៏ប៉ុន្តែ និងអ្វីដែលថ្នាក់ដឹកនាំអ៊ីរ៉ង់ពិបាកទ្រាំមិននិយាយនោះ គឺការដែលអាមេរិក និងរុស្ស៊ីកំពុងព្យាយាមដើរតួនាទីផ្តាច់មុខនៅក្នុងសំណុំរឿងស៊ីរី។
ចូរកុំភ្លេចថា គឺអាមេរិក និងរុស្ស៊ីដែលជាអ្នកផ្តួចផ្តើមគំនិតឲ្យមានបទឈប់បាញ់នៅស៊ីរីក្នុងគោលដៅជួយផ្ទល់សន្ទុះកិច្ចចរចាសន្តិភាពរវាងភាគីជម្លោះផ្ទៃក្នុងស៊ីរីដែលរៀបចំក្នុងទីក្រុងហ្សឺណែវ ប្រទេសស្វ៊ីស។ នៅពេលដែលបទឈប់បាញ់ត្រូវបានរំលោភ លោករដ្ឋមន្រ្តីការបរទេសអាមេរិកចន ឃែរីផ្ទាល់ខ្លួនបានធ្វើដំណើរទៅទីក្រុងហ្ស៊ឺណែវដើម្បីជួបសន្ទនាជាមួយប្រេសិតពិសេសសហប្រជាជាតិទទួលបន្ទុកស៊ីរី ព្រមទាំងជួបជាមួយសមភាគីរុស្ស៊ី។ ទង្វើរបៀបនេះបានធ្វើឲ្យអ៊ីរ៉ង់អន់ចិត្តជាពន់ពេក ហើយប្រទេសដែលអ៊ីរ៉ង់ក្តៅក្រហាយខ្លាំងជាងគេ គឺរស្ស៊ី ព្រោះក្នុងនាមជាអ្នកគាំទ្ររបបស៊ីរីរបស់លោកអាសាដដូចអ៊ីរ៉ង់ដែរនោះ ក្រុងម៉ូស្គូហាក់ដូចជាបានបំភ្លេចអ៊ីរ៉ង់ រួចបែរក្បាលទៅជួបសន្ទនាផ្តាច់មុខជាមួយអាមេរិកទៅវិញ។
បន្ទាប់មកគឺអាមេរិកដែលអ៊ីរ៉ង់យល់ឃើញថា បាន និងកំពុងប្រើនយោបាយប្រឆាំងនឹងនិកាយឈីអ៊ីត និយាយជារួម និងប្រឆាំងអ៊ីរ៉ង់ និយាយដោយឡែក។ នៅក្នុងសុន្ទរកថាថ្លែងកាលពីថ្ងៃទី៥ ឧសភា លោកអាលី ខាមេណីបានចោទអាមេរិកពីបានធ្វើនយោបាយប្រឆាំងអ៊ីស្លាម ប្រឆាំងអ៊ីរ៉ង់ និងប្រឆាំងឈីអ៊ីត។ សុន្ទរកថាចោទអាមេរិកដូចគ្នានេះក៏មានពីបបូរមាត់លោកប្រធានាធិបតីអ៊ីរ៉ង់ហាសាន រ៉ូហានីដែរ។ លោករ៉ូហានីដែលគេបានចាត់ទុកជាអ្នកកណ្តាលនិយមមិនដែលប្រើសម្តីថ្លោសដាក់អាមេរិកទេតាំងពីលោកឡើងកាន់តំណែងក្នុងឆ្នាំ ២០១៣ និងតាំងពីមានកិច្ចព្រមព្រៀងនុយក្លេអ៊ែររវាងអ៊ីរ៉ង់ និងសហគមន៍អន្តរជាតិកាលពីថ្ងៃទី១៤ កក្កដា ឆ្នាំ ២០១៥។
តាមពិតទៅ ពោលតាំងពីមានកិច្ចព្រមព្រៀងនុយក្លេអ៊ែរអ៊ីរ៉ង់ និងតាំងពីមានការលើកទ័ណ្ឌកម្មសេដ្ឋកិច្ចមួយភាគចេញពីអ៊ីរ៉ង់មក ទំនាក់ទំនងរវាងអាមេរិក និងអ៊ីរ៉ង់មិនបានស្គាល់ភាពចម្រើនដូចដែលគ្រប់គ្នាបានរំពឹងទុកទេ។ ទីក្រុងវ៉ាស៊ីនតោនបន្តរក្សាទ័ណ្ឌកម្មប្រឆាំងនឹងធនាគារអ៊ីរ៉ង់ ហើយថ្មីៗកន្លងទៅនេះ តុលាការអាមេរិកាំងបានសម្រេចផ្អាប់ទុកលុយអ៊ីរ៉ង់ចំនួន ២ ០០០លានដុល្លារសម្រាប់ក្រុមគ្រួសារជនរងគ្រោះនៅក្នុងអំពើភេរវកម្មវាយប្រហារអគ្គបញ្ជាការដ្ឋានកងទ័ពអាមេរិកក្នុងទីក្រុងបេរូត ប្រទេសលីបង់ក្នុងទសវត្សឆ្នាំ ៨០។
ក្រៅពីនេះ អាមេរិកក៏បានចាត់វិធានការលើអ៊ីរ៉ង់នៅក្នុងសំណុំរឿងគ្រាប់មីស៊ីលដែរ។ ជាការឆ្លើយតបវិញ ទីក្រុងតេហេរ៉ង់បានគំរាមបិទច្រកសមុទ្រ Ormuz ដែលបរិមាណប្រេង ១ភាគ៣ក្នុងលោកបានដឹកចេញតាមច្រកសមុទ្រនោះ។ តើទំនាក់ទំនងរវាងអាមេរិក និងអ៊ីរ៉ង់សព្វថ្ងៃនេះមិនមែនកំពុងបោះជំហានទៅរកទំនាក់ទំនងអង្គុយបែរខ្នងដាក់គ្នាជាថ្មីទេ ឬយ៉ាងណា?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ