អាមេរិកនិងចិនឯកភាពគ្នាដាក់បន្ថែមទណ្ឌកម្មលើកូរ៉េខាងជើង
អាមេរិកបានប្រកាសឲ្យដឹងថា ខ្លួននឹងបញ្ជូនសេចក្តីព្រាងមួយទៅឲ្យក្រុមប្រឹក្សាសន្តិសុខបោះឆ្នោតអនុម័ត ដើម្បីដាក់ទណ្ឌកម្មបន្ថែមទៅលើកូរ៉េខាងជើង ក្រោយពីរបបកុម្មុយនិស្តក្រុងព្យុងយ៉ាងបានធ្វើការសាកល្បងអាវុធនុយក្លេអ៊ែរ និងមីស៊ីលបាលីស្ទិក ដែលជាការរំលោភទៅនឹងបម្រាមរបស់ក្រុមប្រឹក្សាសន្តិសុខ។ ការសម្រេចដាក់ទណ្ឌកម្មថ្មីនេះទៅឲ្យក្រុមប្រឹក្សាសន្តិសុខអនុម័ត ត្រូវបានធ្វើឡើង ក្រោយពីមានការឯកភាពពីសំណាក់ប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
តាំងពីដើមរៀងមក នៅក្នុងវិបត្តិនុយក្លេអ៊ែរកូរ៉េខាងជើង គេសង្កេតឃើញថា រាល់ការសម្រេចរបស់ក្រុមប្រឹក្សាសន្តិសុខក្នុងការដាក់ទណ្ឌកម្មទៅលើកូរ៉េខាងជើង ត្រូវតែឆ្លងកាត់ឧបសគ្គចម្បងមួយដោយចៀសមិនរួច គឺចិន ដែលជាសម្ព័ន្ធមិត្តរបស់កូរ៉េខាងជើង និងជាសមាជិកអចិន្រ្តៃយ៍ដែលមានសិទ្ធិវ៉េតូ។ លើកនេះក៏មិនខុសពីលើមុនៗដែរ អាមេរិកបានព្យាយាមចរចាជាមួយចិន អស់រយៈពេល ៧សប្តាហ៍មកហើយ ពោលគឺ ចាប់តាំងពីក្រោយពីកូរ៉េខាងជើងធ្វើការសាកល្បងអាវុធនុយក្លេអ៊ែរ កាលពីថ្ងៃទី៦មករា។
កាលពីថ្ងៃពុធ មន្រ្តីទូតអ.ស.បបានបង្ហើបឲ្យដឹងថា មហាអំណាចទាំងពីរបានឯកភាពគ្នាលើទណ្ឌកម្មដែលត្រូវដាក់លើកូរ៉េខាងជើង ទើបឯកអគ្គរដ្ឋទូតអាមេរិកប្រចាំអ.ស.ប សម្រេចបញ្ជូនសេចក្តីព្រាងសេចក្តីសម្រេចទៅឲ្យក្រុមប្រឹក្សាសន្តិសុខអនុម័ត។
យោងតាមការិយាល័យទំនាក់ទំនងសាធារណៈអ.ស.ប សំណើដាក់ទណ្ឌកម្មលើកូរ៉េខាងជើងនេះនឹងត្រូវដាក់ជារបៀបវារៈ នៅក្នុងកិច្ចប្រជុំរបស់ក្រុមប្រឹក្សាសន្តិសុខនៅថ្ងៃព្រហស្បតិ៍វេលាម៉ោង ៣រសៀល ម៉ោងនៅទីក្រុងញូវយ៉ក (ត្រូវនឹងម៉ោង៣រំលងអធ្រាតថ្ងៃសុក្រ ម៉ោងនៅក្នុងប្រទេសកម្ពុជា) ក៏ប៉ុន្តែ គេនៅមិនទាន់អាចដឹងច្បាស់នៅឡើយទេថា តើសេចក្តីសម្រេចនេះអាចនឹងត្រូវអនុម័តចេញរួចនៅពេលណា?
ម្យ៉ាងទៀត រហូតមកទល់នឹងពេលនេះ គេក៏នៅមិនទាន់អាចដឹងលម្អិតច្បាស់នៅឡើយដែរ អំពីខ្លឹមសារនៃសេចក្តីសម្រេចនេះ។ ក៏ប៉ុន្តែ មន្រ្តីទូតអ.ស.ប ដែលមិនបញ្ចេញឈ្មោះបានបង្ហើបឲ្យដឹងត្រួសៗថា ទណ្ឌកម្មដែលអាមេរិកស្នើឡើងគឺរួមមានការដាក់បញ្ចូលឈ្មោះបុគ្គល និងស្ថាប័នថ្មីៗមួយចំនួនទៀតរបស់កូរ៉េខាងជើងចូលទៅក្នុងបញ្ជីខ្មៅត្រូវជាប់ទណ្ឌកម្ម ការកម្រិតសិទ្ធិសេរីភាពនាវាដឹកជញ្ជូនរបស់កូរ៉េខាងជើងក្នុងការប្រើប្រាស់កំពង់ផែនៅទូទាំងពិភពលោក ក៏ដូចជាការកម្រិតសិទ្ធិសេរីភាពរបស់ធនាគារកូរ៉េខាងជើងក្នុងការប្រើប្រាស់ប្រព័ន្ធហិរញ្ញវត្ថុអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ