ដូងប្រេង៖ ម៉ាឡេស៊ីប្រាប់អឺរ៉ុបថា កុំសំអាងតែពាក្យការពារបរិស្ថាន ហើយភ្លេចកសិករក្រីក្រ
រដ្ឋមន្ត្រីឧស្សាហកម្មម៉ាឡេស៊ី បានថ្លែងថា សហភាពអឺរ៉ុបដែលរឹងរូស ចង់អនុវត្តគោលនយោបាយការពារបរិស្ថាន តែមិនគួរភ្លេចទេ ថាបញ្ហាខ្លះគឺវាប៉ះពាល់ដល់ជីវភាព របស់ប្រជាកសិករក្រីក្រ។ ការថ្លែងបែបនេះ គឺលោកស្រីរដ្ឋមន្ត្រីឧស្សាហកម្មម៉ាឡេស៊ី បានធ្វើឡើងពីទីក្រុងព្រុចសែល នៅថ្ងៃទី១៣កុម្ភៈ ជាទីដែលលោកស្រី មកប្រជុំចរចាជាមួយតំណាងភាគីអឺរ៉ុប ទាក់ទិននឹងអនាគត នៃឧស្សាហកម្មដូងប្រេង ដែលអឺរ៉ុបមានបំណង ចង់បិទខ្ទប់ទាំងស្រុងនៅរវាងឆ្នាំ២០៣០។
ចុះផ្សាយនៅថ្ងៃ៖
ស្តាប់ - ០២:២៨
លោកស្រី តេរ៉េសា កុក រដ្ឋមន្ត្រីក្រសួងឧស្សាហកម្មម៉ាឡេស៊ី បានលើកឡើងថា “កតិកាសញ្ញាបៃតង” ដែលអឺរ៉ុបចង់អនុវត្ត ក្នុងបុព្វហេតុការពារបរិស្ថាន គឺវាប៉ះពាល់ដោយផ្ទាល់ដល់ជីវភាពរបស់ប្រជាជន។ លោកស្រីបន្តថា គេមិនត្រូវភ្លេចទេ ថាមានប្រជាជនក្រីក្រច្រើនណាស់ ដែលរស់រំពឹងនឹងមុខរបរខ្លះ ហើយដែលមុខរបរនោះ អាចប្រឈមនឹងការហាមឃាត់របស់សហភាពអឺរ៉ុប។
លោកស្រីរដ្ឋមន្ត្រីក្រសួងឧស្សាហកម្មម៉ាឡេស៊ី កំពុងមានវត្តមាននៅទីក្រុងព្រុចសែល ដើម្បីចរចាជាមួយសហភាពអឺរ៉ុប ទាក់ទិននឹងឧស្សាហកម្មដូចប្រេង។ លោកស្រីលើកឡើងទៀតថា លោកស្រីមកនេះ គឺមកនិយាយគ្នាដោយសន្តិវិធី ព្រោះម៉ាឡេស៊ី មិនចង់ឲ្យមានជម្លោះវែងឆ្ងាយទេ។ តែបើសហភាពអឺរ៉ុប នៅតែមិនយល់ នោះម៉ាឡេស៊ី ប្រាកដជាត្រូវបង្ខំចិត្តដាក់ពាក្យប្តឹងរួមគ្នាជាមួយឥណ្ឌូណេស៊ី នៅអង្គការពាណិជ្ជកម្មពិភពលោក។
គួរកត់សំគាល់ថា ម៉ាឡេស៊ី គឺជាប្រទេសធំទី២ បន្ទាប់ពីឥណ្ឌូណេស៊ី ដែលមានឧស្សាហកម្មដូចប្រេងធំជាងគេលើពិភពលោក។ ប្រទេសទាំង២នេះ សុទ្ធតែបានបង្ហាញជំហរប្រឆាំងនឹងសហភាពអឺរ៉ុប ដែលមានគម្រោងហាមឃាត់ផលិតផលដូងប្រេង។ យោងតាមលោកស្រីរដ្ឋមន្ត្រីម៉ាឡេស៊ី ៤០%នៃផ្ទៃដីចំការដូងប្រេងរបស់ម៉េឡេស៊ី គឺជាអាជីវកម្មខ្នាតតូចរបស់ប្រជាជនក្រីក្រ។
ក្រៅពីបានថ្លែងការពារឧស្សាហកម្មដូងប្រេង ថាវាជាប្រភពចំណូលរបស់ប្រជាកសិករក្រីក្រ លោកស្រីរដ្ឋមន្ត្រីឧស្សាហកម្មម៉ាឡេស៊ី បានលើកឡើងថា សហភាពអឺរ៉ុប មិនគួរមើលរំលងការខំប្រឹងប្រែងរបស់រដ្ឋាភិបាលម៉ាឡេស៊ី ក្នុងការរៀបចំវិស័យនេះ ឲ្យមានស្តង់ដាចីរភាពយូរអង្វែងឡើយ។ ជាង២ភាគ៣នៃផ្ទៃដីចំការដូងប្រេងសុរប នៅម៉ាឡេស៊ី គឺត្រូវបានទទួលស្គាល់ ដោយស្លាកសញ្ញា “ចីរភាព”។
សូមរំលឹកថា កាលពីខែធ្នូកន្លងទៅ សហភាពអឺរ៉ុបបានសម្រេច ប្តេជ្ញាកសាងប្រព័ន្ធសេដ្ឋកិច្ច ដែលមាន ទំហំបញ្ចេញចោលឧស្ម័នកាបូនិកនឹងថ្កល់ នៅរវាងឆ្នាំ២០៥០។ ក្នុងន័យនេះ ពីនេះដល់ឆ្នាំ២០៣០ ផលិតផលចេញពីដូងប្រេង នឹងត្រូវហាមឃាត់ទាំងស្រុង។ យោងតាមអង្គការបរិស្ថានជាច្រើន ឧស្សាហកម្មដូងប្រេង បានបំផ្លាញដីព្រៃធម្មជាតិរាប់សែនហិកតា។ ក្រៅពីការបាត់បង់ព្រៃឈើ ដែលជាអ្នកស្រូបឧស្ម័នកាបូនិក ការកាប់ឆ្កាព្រៃបានប៉ះពាល់យ៉ាងខ្លាំង ដល់ប្រព័ន្ធជីវចម្រុះ ព្រមទាំងជីវភាពរបស់សហគមជនជាតិភាគតិច ដែលរស់រំពឹងនឹងភោគផលព្រៃឈើ។
នៅអឺរ៉ុប ការប្រើប្រាស់ផលិតផងដូងប្រេង នៅក្នុងវិស័យផលិតចំណីអាហារ ឬវិស័យគ្រឿងសំអាង បានចាប់ផ្តើមថយចុះខ្លាំង ដោយសារតែមានការអំពាវនាវពីអង្គការបរិស្ថាន ព្រមទាំងការយល់ដឹងពីសំណាក់អ្នកប្រើប្រាស់។ យោងតាមការស្រាវជ្រាវខ្លះ ផលិតផលដូងប្រេង អាចបង្កឲ្យមានបញ្ហាសុខភាពផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ