អង្គការសហប្រតិបត្តិការអ៊ីស្លាម រិះគន់ជំនួបកំពូលអ៊ីស្លាមនៅ ប្រទេសម៉ាឡេស៊ី
ពីថ្ងៃព្រហស្បតិ៍នេះ រហូតដល់ថ្ងៃសៅរ៍ទី ២១ធ្នូ ប្រទេសម៉ាឡេស៊ីបើកទទួលជំនួបកំពូលក្រុមប្រទេសអ៊ីស្លាម ដែលផ្តោតទៅលើបញ្ហាអភិវឌ្ឍន៍ និងសន្តិសុខ នៅក្នុងពិភពអ៊ីស្លាម។ នៅមួយថ្ងៃមុនបើកជំនួបកំពូល អង្គការសហប្រតិបត្តិការអ៊ីស្លាម ដែលមានសមាជិក ៥៧ប្រទេស និងមានទីស្នាក់ការនៅទីក្រុងរីយ៉ាដ ប្រទេសអារ៉ាប៊ី សាអូឌីត បានចេញសេចក្តីថ្លែងការណ៍រិះគន់ ថា ជំនួបកំពូលអ៊ីស្លាម នៅម៉ាឡេស៊ី កំពុងធ្វើឲ្យសាសនា និងប្រជាជនអ៊ីស្លាម ចុះទន់ខ្សោយ។
ចុះផ្សាយនៅថ្ងៃ៖
ស្តាប់ - ០២:៤៧
អគ្គលេខាធិការអង្គការសហប្រតិបត្តិការអ៊ីស្លាម បានរិះគន់ខ្លាំងៗ ជំនួបកំពូលអ៊ីស្លាមនៅម៉ាឡេស៊ី ដោយថា វាគ្មានប្រយោជន៍សម្រាប់ប្រទេសមួយ ដែលត្រូវរៀបចំជំនួបកំពូលអ៊ីស្លាម នៅក្រៅ ក្របខ័ណ្ឌ អង្គការសហប្រតិបត្តិការអ៊ីស្លាម នោះទេ ជាពិសេស នៅក្នុងកាលៈទេសៈដែលពិភពលោកកំពុងជួបប្រឈមនឹងជម្លោះ ជាច្រើនកន្លែងយ៉ាងដូច្នេះនោះ។
ជំនួបកំពូលនៅម៉ាឡេស៊ី ត្រូវបានគេមើលឃើញថា ធ្វើឡើង ដើម្បីប្រជែង អង្គការសហប្រតិបត្តិការអ៊ីស្លាម ដែលដឹកនាំដោយអារ៉ាប៊ី សាអូឌីត។ សម្រាប់អ្នកវិភាគ ជំនួបកំពូលអាចជាវេទិការ ដើម្បី ទប់ទល់ឥទ្ធពលរបស់អារ៉ាប៊ី សាអូឌីត ដែលគ្មានវត្តមាន នៅក្នុងជំនួបកំពូល។ ប្រទេស អ៊ីស្លាមខ្លះធ្លាប់បានសំដែងការព្រួយបារម្ភពីការពង្រីកឥទ្ធិពល ដ៏ចេញមុខរបស់អារ៉ាប៊ី សាអូឌីត ចាប់តាំងពីរាជបុត្រស្នងរាជ្យ មូហាមេដ បិន សាល់ម៉ាន បានឡើងបុណ្យអំណាច នៅអារ៉ាប៊ី សាអូឌីត។
ជំនួបកំពូលក្រុមប្រទេសអ៊ីស្លាម ដែលប្រព្រឹត្តទៅក្នុងរយៈពេល ៣ថ្ងៃ នៅម៉ាឡេស៊ី មានការចូលរួម ពីមេដឹកនាំក្រុមប្រទេសកាន់សាសនាអ៊ីស្លាម សំខាន់ៗ ដូចជា ប្រធានាធិបតីតួកគី អេមៀរ របស់ប្រទេសកាតា និងប្រធានាធិបតី របស់ប្រទេសអ៊ីរ៉ង់ ដែលសុទ្ធសឹងជាប្រទេស សត្រូវ គូប្រជែង របស់អារ៉ាប៊ី សាអូឌីត។ បន្ទាប់ពីធ្វើទស្សនកិច្ច នៅអារ៉ាប៊ី សាអូឌីត នាយករដ្ឋមន្រ្តីប៉ាគីស្ថាន បានបដិសេធមិនចូលរួម ក្នុងជំនួបកំពូល ក្រុមប្រទេសអ៊ីស្លាម ដើម្បី កុំឲ្យអារ៉ាប៊ី សាអូឌីត អាក់អន់ស្រពន់ចិត្ត។
ក្នុងបរិបទដែលអារ៉ាប៊ី សាអូឌីត មិនពេញចិត្តនឹងការបើកជំនួបកំពូល នៅម៉ាឡេស៊ី ប្រធានាធិបតីឥណ្ឌូណេស៊ីឯណោះវិញ បានត្រឹមបញ្ជូនអនុប្រធានធិបតី ឲ្យទៅចូលរួមជំនួបកំពូលគូឡាឡាំពួរ។
រដ្ឋាភិបាលម៉ាឡេស៊ី ដែលជាអ្នកផ្តួចផ្តើមធ្វើជាម្ចាស់ផ្ទះ រៀបចំ ជំនួបកំពូលអ៊ីស្លាម បានទាត់ចោលការលើកឡើងខាងលើ និងថា ជំនួបកំពូល អ៊ីស្លាម គ្មានគំនិត ទិសដៅ បង្កើតក្រុមបក្សពួក ក្នុងចំណោមប្រទេសកាន់សាសនាអ៊ីស្លាមនោះទេ។ នាយករដ្ឋមន្រ្តី ម៉ាឡេស៊ី លោក មហាធៀរ មហាម៉ាត់ ដែលចង់ប្រើជំនួបកំពូល លើកនេះ ដើម្បី បញ្ជាក់ពីតួនាទីសំខាន់ របស់ម៉ាឡេស៊ី នៅក្នុងឆាកអន្តរជាតិ និង ក្នុងចំណោមប្រទេសអ៊ីស្លាម ធ្លាប់បានបង្ហាញពីបំណងចង់ឲ្យមានការពង្រឹងសាមគ្គីភាពរវាងប្រទេសក្រុមប្រទេសសាសនាអ៊ីស្លាម។ សម្រាប់អាជ្ញាធរម៉ាឡេស៊ី ជំនួបកំពូលក្រុមប្រទេសអ៊ីស្លាម នឹងពិភាក្សា ផ្តោតសំខាន់ទៅលើបញ្ហា របស់ជនជាតិភាគតិច រ៉ូហ៊ីងយ៉ាដែលកំពុងរត់ភៀសខ្លួនចេញពីអំពើហិង្សានៅភូមា ហើយនិង ជោគវាសនារបស់ប្រជាជនអ៊ុយហ្គួរ កាន់សាសនាអ៊ីស្លាម ដែលកំពុង ជាប់ឃុំក្នុងជំរំលត់ដំ នៅប្រទេសចិន។ គេវាយតម្លៃថា នៅពេលបញ្ហាជនជាតិភាគតិចរ៉ូហ៊ីងយ៉ា ហើយនិងប្រជាជនប៉ាឡេស្ទីន នឹងត្រូវគេលើកនិយាយច្រើន នៅក្នុងជំនួបកំពូល មតិរិះគន់ទៅលើប្រទេសចិន ក្នុងសំណុំរឿងអ៊ុយហ្គួរ នឹងអាចតិចតួច ក្នុងហេតុផលថា ចិនបានបោះទុនវិនិយោគច្រើន នៅក្នុងបណ្តាប្រទេសកាន់សាសនាអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ