ឧបនាយករដ្ឋមន្រ្តីអាល្លឺម៉ង់ប្រាប់អារ៉ាប៊ី សាអូឌីតឲ្យឈប់ផ្តល់លុយឧបត្ថម្ភវិហារអ៊ីស្លាមនៅ បរទេស
បន្ទាប់ពីទីភ្នាក់ងារស៊ើបការណ៍សម្ងាត់របស់អាល្លឺម៉ង់ អារ៉ាប៊ី សាអូឌីត ធ្លាក់ចូលក្នុងសំណាញ់ចោទប្រកាន់របស់ឧបនាយករដ្ឋមន្រ្តីអាល្លឺម៉ង់ លោកSigmar Gabriel។ នៅក្នុងកាសែតចុះផ្សាយអាល្លឺម៉ង់ ចុះផ្សាយនៅថ្ងៃអាទិត្យ លោកឧបនាយករដ្ឋមន្រ្តីអាល្លឺម៉ង់បានអំពាវនាវដល់អារ៉ាប៊ី សាអូឌីត ឲ្យឈប់ផ្តល់ថវិកាដល់វិហារនៅបរទេស ដែលកំពុងចិញ្ចឹមបង្កើតក្រុមអ៊ីស្លាមជ្រុលនិយមតទៅទៀត។
ចុះផ្សាយនៅថ្ងៃ៖
តាមលោកឧបនាយករដ្ឋមន្រ្តីអាល្លឺម៉ង់ Sigmar Gabriel អារ៉ាប៊ី សាអូឌីតត្រូវតែឈប់ផ្តល់លុយទៅឲ្យវិហារអ៊ីស្លាមជ្រុលនិយមនៅបរទេស។ លោករដ្ឋមន្រ្តីសេដ្ឋកិច្ចអាល្លឺម៉ង់ចង់និយាយសំដៅដល់វិហាររបស់ក្រុមអ៊ីស្លាមវ៉ាហាប៊ី នៅបរទេសដែលបានទទួលជំនួយហិរញ្ញវត្ថុសន្ធឹកសន្ធាប់ពីទីក្រុងរីយ៉ាដ។ អ៊ីស្លាមវ៉ាហាប៊ី ដែលមានប្រភពមកពីនិកាយស៊ុននីត ប៉ុន្តែ តឹងរ៉ឹងត្រូវបានបង្កើតឡើង និងដាកអនុវត្ត នៅសតវត្សរ៍ ទី១៨ ដោយមេគ្រូសាសនាSheikh Mohammed Bin Abdul Wahhab ដែលជាស្ថាបនិកម្នាក់ដែរ ក្នុងការបង្កើតប្រទេសអារ៉ាប៊ី សាអូឌីត។ អ៊ីស្លាមវ៉ាហាប៊ី ដែលចាក់គ្រឹះនៅអារ៉ាប៊ី សាអូឌីត ចង់ឲ្យមានការវិលត្រលប់ទៅរកអ៊ីស្លាមដើមដំបូងគេបង្អស់។ សម្រាប់ក្រុមនិកាយស៊ុននីត វ៉ាហាប៊ី អ្នកកាន់សាសនាអ៊ីស្លាម និកាយស្ហ៊ីអ៊ីត មិនមែន ជាអ្នកគោរពជឿសាសនារបស់ព្រះអាឡាពិតប្រាកដឡើយ។
ការផ្សព្វផ្សាយសាសនាអ៊ីស្លាមដោយមានលាយឡំចូលជាមួយ មនោគម វ៉ាហាប៊ី ត្រូវបានរិះគន់ ចោទប្រកាន់ថា បានជះឥទ្ធិពល និងជំរុញលើកទឹកចិត្តដោយមានក្រុមអ៊ីស្លាមជ្រុលនិយម ដែលមានតាំងពីមេបណ្តាញអាល់កៃដា អូសាម៉ា បិនឡាដិន រហូតដល់មេកើយរបស់ក្រុមជីហាត អង្គការរដ្ឋអ៊ីស្លាម ដែលបច្ចុប្បន្ន កំពុងធ្វើសង្រ្គាម សម្លាប់មនុស្សមិនរើសមុខ នៅប្រទេសស៊ីរី និងអ៊ីរ៉ាក់។
តាមឧបនាយករដ្ឋមន្រ្តីអាល្លឺម៉ង់ នៅប្រទេសអាល្លឺម៉ង់ ក្រុមអ៊ីស្លាមដែលអាជ្ញាធរចាត់ទុកថា គ្រោះថ្នាក់ភាគច្រើនគឺមានប្រភពចេញមកពីសហគមន៍អ៊ីស្លាមវ៉ាហាប៊ីនេះឯង។ “ក្រុមអ៊ីស្លាមជ្រុលនិយម នៅតាមវិហារអ៊ីស្លាម គឺមានគ្រោះថ្នាក់ មិនចាញ់ក្រុមស្តាំនិយមជ្រុលអាល្លឺម៉ង់នោះទេ។ នេះបើតាមលោកSigmar Gabriel មុននឹងអំពាវនាវដល់រដ្ឋាភិបាលឲ្យចាត់វិធានការបន្ទាន់ ដើម្បី ប្រឆាំង នឹងក្រុមវិហារដែលមានចំណងទាក់ទងនឹងក្រុមសាឡាហ្វីស អ៊ីស្លាមជ្រុលនិយម ក្នុងទឹកដីអាល្លឺម៉ង់។
លោកSigmar Gabriel មកពីគណបក្សកណ្តាលឆ្វេងសង្គមនិយម ដែលចូលរួមបង្កើតរដ្ឋាភិបាលចម្រុះជាមួយ លោកស្រីនាយករដ្ឋមន្រ្តីអង់ហ្គែឡា ម៉ែរគែល នៅបាននិយាយទៀតថា អាល្លឺម៉ង់ប្រឹងប្រែង ទប់ស្កាត់មិនឲ្យអារ៉ាប៊ី សាអូឌីតអាចបញ្ជូនលុយទៅឲ្យវិហារ ដែលកំពុងផ្សព្វផ្សាយមនោគមវ៉ាហាប៊ីនៅប្រទេសអាល្លឺម៉ង់។
សារព្រមានរបស់ឧបនាយករដ្ឋមន្រ្តីអាល្លឺម៉ង់ ទៅលើអារ៉ាប៊ី សាអូឌីត ធ្វើឡើង បន្ទាប់ពីទីភ្នាក់ងារស៊ើបការណ៍សម្ងាត់នៅបរទេសរបស់អាល្លឺម៉ង់ ទើបបានចេញរបាយការណ៍មួយ កាលពីថ្ងៃពុធ ដែលនៅក្នុងនោះ គេបានចោទប្រកាន់ទីក្រុងរីយ៉ាដថា បានជះលុយ ជំរុញ នយោបាយការបរទេស ដើម្បីបង្កអស្ថិរភាពក្នុងតំបន់។ តាមទីភ្នាក់ងារស៊ើបការណ៍សម្ងាត់អាល្លឺម៉ង់ ព្រះរាជបុត្រស្នងរាជ្យ និងជារដ្ឋមន្រ្តីក្រសួងការពារជាតិរបស់អារ៉ាប៊ី សាអូឌីត និងបិតារបស់ព្រះអង្គ គឺព្រះចៅ សាល់ម៉ាន បានដើរនយោបាយបង្កើនអំណាចយោធា និងចងសម្ព័ន្ធ ក្នុងតំបន់ ក្នុងគោលដៅ ចង់ក្លាយជាមេដឹកនាំពិភពអារ៉ាប់ទាំងមូល។ កន្លងមក អ្នកជំនាញខ្លះធ្លាប់បានលើកឡើងថា ក្រុមជីហាត អង្គការរដ្ឋអ៊ីស្លាមកើតឡើងដោយសារជំនួយ ឧបត្ថម្ភរបស់អារ៉ាប៊ី សាអូឌីតដែលប៉ុនប៉ងចង់ឲ្យសម្ព័ន្ធមិត្តរបស់អ៊ីរ៉ង់ លោកប្រធានាធិបតីស៊ីរី ខ្ទាតចេញពីតំណែង។ ដើម្បីប្រជែងជាមួយអ៊ីរ៉ង់ អារ៉ាប៊ី សាអូឌីតកំពុងគាំទ្រក្រុមប្រឆាំងរដ្ឋាភិបាលស៊ីរី និងទម្លាក់គ្រាប់បែកលើក្រុមឧទ្ទាម នៅក្នុងប្រទេសយេម៉ែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ