បរិបទនៃការគេចខ្លួនរបស់លោកការឡូស ហ្គោនពីជប៉ុនទៅលីបង់កំពុងបន្តស្រពិចស្រពិល
រឿងរ៉ាវជុំវិញការគេចខ្លួនរបស់លោកការឡូស ហ្គោនពីប្រទេសជប៉ុនទៅកាន់ប្រទេសលីបង់ដោយឆ្លងកាត់តាមទឹកដីតួកគីកំពុងបន្តក្លាយជាសំណុំរឿងភ្ញាក់ផ្អើលយ៉ាងខ្លាំងនៅជប៉ុន។ ភ្ញាក់ផ្អើលដោយគេមិនទាន់ដឹងថា តើលោកការឡូស ហ្គោនដែលកំពុងជាប់អង្កេតតុលាការ ជាប់ឃុំក្នុងផ្ទះ និងគ្មានលិខិតឆ្លងដែនក្នុងដៃបានចាកចេញពីទឹកដីជប៉ុនដោយរបៀបណា?។ នៅលីបង់ រដ្ឋអំណាចបានបញ្ជាក់ពីការចូលទឹកដីលីបង់ដោយស្របច្បាប់របស់លោកការឡូស ហ្គោន ហើយប្រភពតុលាការបានអះអាងថា លីបង់ និងជប៉ុនគ្មានកិច្ចព្រមព្រៀងធ្វើបត្យាប័នរវាងគ្នាឡើយ។ ចំណែកប្រភពពីក្រសួងការបរទេសលីបង់បានធានាថា ខ្លួននៅមិនទាន់ទទួលបានសំណើអ្វីពីរដ្ឋាភិបាលជប៉ុននៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០០
ក្រោយទទួលបានដំណឹងរត់គេចខ្លួនរបស់លោកការឡូស ហ្គោនទៅកាន់ប្រទេសលីបង់ រដ្ឋាភិបាលជប៉ុននៅមិនទាន់បានបញ្ចេញប្រតិកម្មអ្វីទាំងអស់។ ចំណែកនៅក្នុងប្រទេសលីបង់ រដ្ឋអំណាចបានបញ្ជាក់ពីការចូលទឹកដីលីបង់ដោយស្របច្បាប់របស់លោកការឡូស ហ្គោន ហើយប្រភពមួយពីតុលាការបានអះអាងថា លីបង់ និងជប៉ុនគ្មានកិច្ចព្រមព្រៀងធ្វើបត្យាប័នរវាងគ្នាទេ។ លោកអ៊ីប្រាហ៊ីម ណាហ្សារដែលជាអតីតរដ្ឋមន្រ្តីក្រសួងយុត្តិធម៌លីបង់ និងជាអ្នកជំនាញច្បាប់បានប្រាប់ AFP ថា ច្បាប់លីបង់មិនអនុញ្ញាតឲ្យមានការចាប់បញ្ជូនជនជាតិខ្លួនទៅឲ្យប្រទេសណាមួយឡើយ ហើយក្នុងករណីណាដែលមានការប្រើនីតិវិធីរបស់ប៉ូលិសអាំងទែប៉ូល ឈ្មោះលោកការឡូស ហ្គោនអាចនឹងបញ្ជូនទៅឲ្យក្រុមប្រទេសសមាជិកដើម្បីចាប់ខ្លួន តែប៉ូលិសអាំងទែប៉ូលមិនអាចប្រើកម្លាំងដើម្បីចាប់ ឬមួយក៏បង្ខំលីបង់ឲ្យចាប់ខ្លួនលោកការឡូស ហ្គោនទេ។
តាមលោកណាហ្សារ តុលាការលីបង់អាចស្នើជប៉ុនឲ្យបញ្ជូនសំណុំរឿងលោកហ្គោនទៅឲ្យខ្លួនដើម្បីពិនិត្យមើល តែលីបង់មិនអាចកាត់ទោសមនុស្សណាម្នាក់ដែលជាប់ចោទក្នុងរឿងលួចពន្ធនៅក្នុងប្រទេសផ្សេងឡើយ។ គួររម្លឹកថា លោកហ្គោនត្រូវបានចាប់ខ្លួននៅជប៉ុនតាំងពីថ្ងៃទី១៩ វិច្ឆិកា ឆ្នាំ ២០១៨ ដោយជាប់ក្នុងបទចោទប្រកាន់ចំនួន ៤ ក្នុងនោះ បទចោទប្រកាន់ចំនួនពីរទាក់ទងនឹងមិនបានរាយការណ៍រឿងប្រាក់ខែ និងបទចោទប្រកាន់ពីរទៀតទាក់ទងនឹងការរំលោភលើសេចក្តីទុកចិត្ត។ កាសែតប្រចាំថ្ងៃអារ៉ាប់ឈ្មោះ al-Akhbar ឲ្យដឹងថា ទីភ្នាក់ងារសន្តិសុខឯកជនមួយជាអ្នករៀបចំផែនការរំដោះលោកការឡូស ហ្គោនចេញពីប្រទេសជប៉ុន។
រីឯកាណាល់ទូរទស្សន៍ LBC បានលំអិតបន្ថែមថា លោកហ្គោនប្រហែលជាបានលាក់ខ្លួននៅក្នុងហិបមួយនៅពេលធ្វើដំណើរពីជប៉ុនទៅតួកគី។ តែការធ្វើដំណើររបៀបនេះចាំបាច់ត្រូវមានការរួមសហការណ៍ពី ៣ប្រទេសយ៉ាងតិច មុនគេគឺជប៉ុន តួកគី និងលីបង់។ នៅជប៉ុន រឿងរ៉ាវគេចខ្លួនរួចរបស់លោកការឡូស ហ្គោនបន្តឲ្យមានការភ្ញាក់ផ្អើល និងទទួលរងការរិះគន់។ អ្នកតំណាងរាស្រ្តមកពីគណបក្សសេរីប្រជាធិបតេយ្យលោកស្រីម៉ាសាហ៊ីសា សាតូបានចាត់ទុកជារឿងអាស្រូវដែលប្រទេសមួយបានបណ្តោយឲ្យមនុស្សម្នាក់ចាកចេញដោយខុសច្បាប់។ លោកហ្គោហារ៉ា អតីតព្រះរាជអាជ្ញាជប៉ុន និងបច្ចុប្បន្នជាមេធាវីបានយល់ឃើញថា រឿងរ៉ាវមួយនេះពិតជាធ្ងន់ធ្ងរណាស់សម្រាប់ក្រុមព្រះរាជអាជ្ញា។
រីឯក្រុមមេធាវីការពារលោកការឡូស ហ្គោនបានអាម៉ាស់មុខយ៉ាងខ្លាំង ព្រោះពួកគេបានសន្យានៅចំពោះមុខចៅក្រមពីការមិនគេចខ្លួនរបស់លោកហ្គោនដែលជាលក្ខខណ្ឌនៃការដោះលែងលោកហ្គោនឲ្យនៅក្រៅឃុំបណ្តោះអាសន្នដោយបង់ប្រាក់តម្កល់ចំនួន ១២លានអឺរ៉ូ។ លោកហ៊ីរ៉ូណាកាដែលជាមេធាវីជនជាតិជប៉ុនរបស់លោកហ្គោនបានបញ្ជាក់ថា ការដោះលែងឲ្យនៅក្រៅឃុំបណ្តោះអាសន្ននឹងត្រូវលុបចោលវិញ ហើយប្រាក់តម្កល់ទាំង ១២លានអឺរ៉ូនឹងត្រូវក្រសួងយុត្តិធម៌រក្សាទុក៕
(ព័ត៌មានដកស្រង់ពី AFP)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ