ប្រធានាធិបតី កូរ៉េខាងត្បូង បោះដៃអញ្ជើញ មេដឹកនាំកូរ៉េខាងជើងសាជាថ្មី
ប្រធានាធិបតី កូរ៉េខាងត្បូង លោកមូនចៃអ៊ីន បានអះអាង នៅថ្ងៃអង្គារនេះ ចង់ឲ្យមានការចាប់ផ្តើមការចរចាការទូតឡើងវិញ ជាមួយ ទីក្រុងព្យុងយ៉ាង ដើម្បី បើកផ្លូវឲ្យមានការបំពេញទស្សនកិច្ចរបស់មេដឹកនាំកូរ៉េខាងជើង គីម ជុងអ៊ុន នៅទីក្រុងសេអ៊ូល។ ប្រមុខរដ្ឋាភិបាលក្រុងសេអ៊ូល បោះដៃអញ្ជើញមេដឹកនាំកូរ៉េខាងជើង នៅបន្ទាប់ពីកូរ៉េខាងជើងទើបប្រកាសលែង គោរព កិច្ចសន្យាស្តីពីការបាញ់សាកល្បងគ្រាប់បែកនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
នៅក្នុងសារស្វាគមឆ្នាំថ្មី នៅតាមកញ្ចក់ទូរទស្សន៍ ប្រធានាធិបតី កូរ៉េខាងត្បូង លោកមូន ចៃអ៊ីន នៅថ្ងៃអង្គារនេះ បានអំពាវនាវឲ្យមានការចរចាឡើងវិញ រវាង ភាគី កូរ៉េខាងជើង និងកូរ៉េខាងត្បូងដើម្បី សម្រួល បើកផ្លូវឲ្យមានដំណើរទស្សនកិច្ច របស់មេដឹកនាំកូរ៉េខាងជើង នៅទីក្រុងសេអ៊ូល នៅក្នុងពេលឆាប់ៗខាងមុខ។
នៅក្នុងទស្សនកិច្ចដ៏កម្រ ទៅកាន់ទីក្រុងព្យុងយ៉ាង កាលពីខែកញ្ញាឆ្នាំ ២០១៨ លោកប្រធានាធិបតី មូន ចៃអ៊ីន ធ្លាប់បាននិយាយអញ្ជើញ មេដឹកនាំកូរ៉េខាងជើង លោកគីម ជុងអ៊ុន ឲ្យធ្វើទស្សនកិច្ចនៅ ទីក្រុងសេអ៊ូល។ នៅក្នុងសុន្ទរកថា តាមកញ្ចក់ទូរទស្សន៍កូរ៉េ នៅថ្ងៃ អង្គារនេះ ប្រធានាធិបតី កូរ៉េខាងត្បូង បានលើកឡើងផងដែរពីគំនិត បង្កើតគណៈប្រតិភូ តែមួយ ដើម្បី តំណាងកីឡាករ កូរ៉េខាងជើង និងកូរ៉េខាងត្បូង នៅក្នុងការប្រកួតកីឡាអូឡាំពិករដូវ ក្តៅ នៅប្រទេសជប៉ុន នៅពាក់កណ្តាលឆ្នាំនេះ។
សម្រាប់អ្នកជំនាញ នយោបាយ ឧបទ្វីបកូរ៉េ ការបោះដៃ សាជាថ្មី របស់ប្រធានាធិបតីកូរ៉េខាងត្បូង គឺជារឿងអត់ប្រយោជន៍ និងគ្មានខ្លឹមសារ សម្រាប់មេដឹកនាំកូរ៉េខាងជើង ជាពិសេស នៅក្នុងកាលៈទេសៈ ដែលកំពុងមានភាពតានតឹងកាន់តែខ្លាំងរវាងអាមេរិក និងកូរ៉េខាងជើង និងនៅក្រោយកូរ៉េខាងជើងបានបដិសេធ លែងចរចា ស្តីពីកិច្ចព្រមព្រៀងនុយក្លេអ៊ែរជាមួយរដ្ឋបាលលោកដូណាល់ ត្រាំ។
នៅសប្តាហ៍មុន មេដឹកនាំកូរ៉េខាងជើងដែលបានប្រកាសលែងគោរពការសន្យា ស្តីពីការបាញ់សាកល្បងគ្រាប់បែកនុយក្លេអ៊ែរ តទៅទៀត ធ្លាប់បានគំរាម ថា នឹងបង្ហាញដល់ពិភពលោក នូវ អាវុធយុទ្ធសាស្រ្តថ្មីរបស់កូរ៉េខាជើង។
មេដឹកនាំកូរ៉េខាងជើង ធ្លាប់ទទួលស្គាល់ថា ប្រទេសរបស់លោក កំពុងស្គាល់វិបត្តិសេដ្ឋកិច្ច ប៉ុន្តែ យ៉ាងណាក៏ដោយ លោកបានបញ្ជាក់ថា ប្រទេសរបស់លោកសុខចិត្ត រស់នៅ លំបាក នៅក្រោម សម្ពាធ ទណ្ឌកម្មសេដ្ឋកិច្ច ប៉ុន្តែមិនបោះបង់ចោលកម្មវិធីផលិតគ្រាប់បែកនុយក្លេអ៊ែរនោះទេ៕
(ព័ត៌មានដកស្រង់ពី AFP)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ