បោះឆ្នោតប្រធានាធិបតីតៃវ៉ាន់៖ពលរដ្ឋត្រូវជ្រើសរើសរវាងបេក្ខនារីប្រឆាំងចិនដីគោក និងបេក្ខជនងាករកចិនដីគោក
នៅថ្ងៃសៅរ៍ ទី១១ មករា មានពលរដ្ឋតៃវ៉ាន់ប្រមាណជា ១៩លាននាក់ចូលរួមបោះឆ្នោតប្រធានាធិបតីថ្មីដែលត្រូវជ្រើសរើសរវាងបេក្ខជនឈរឈ្មោះពីររូប គឺប្រធានាធិបតីផុតអាណត្តិលោកស្រីត្សៃ អ៊ីងវេន និងលោកហាន គួរយូ។ លោកស្រីអ៊ីងវេនជាបេក្ខនារីមកពីគណបក្សប្រជាធិបតេយ្យចម្រើននិយមដែលចង់បានឯករាជ្យ ហើយលោកហាន គួរយូជាបេក្ខជនមកពីគណបក្សគូមីនតង់ដែលមាននិន្នាការរកចិនដីគោក។ ថ្ងៃសុក្រ ទី១០ មករាជាថ្ងៃឃោសនាបោះឆ្នោតចុងក្រោយរបស់បេក្ខជនទាំងពីរ។ តាមលទ្ធផលស្ទង់មតិចុងក្រោយ លោកស្រីត្សៃ អ៊ីងវេនមានប្រៀបខ្លាំងជាងលោកហាន គួរយូ។
ចុះផ្សាយនៅថ្ងៃ៖
ស្តាប់ - ០២:១៣
បេក្ខជនទាំងពីររូប គឺលោកស្រីត្សៃ អ៊ីងវេន និងលោកហាន គួរយូមានទស្សនវិស័យខុសគ្នាស្តីពីអនាគតរបស់កោះតៃវ៉ាន់ និងទំនាក់ទំនងរបស់ពួកគេជាមួយមហាអំណាចចិនដីគោក។ កាន់អំណាចតាំងពីឆ្នាំ ២០១៦ និងមានអាយុ ៦៣ឆ្នាំ ប្រធានាធិបតីផុតអាណត្តិលោកស្រីអ៊ីងវេនបានតាំងខ្លួនជាអ្នកធានាតម្លៃប្រជាធិបតេយ្យប្រឈមនឹងអំណាចផ្តាច់ការរបស់ចិន។ « បោះឆ្នោតឲ្យត្សៃ អ៊ីងវេនមានន័យថា យើងជ្រើសរើសអនាគតរបស់យើង និងការពារប្រជាធិបតេយ្យ និងសេរីភាព » នេះជាការថ្លែងរបស់លោកស្រីអ៊ីងវេនក្នុងថ្ងៃសុក្រ ទី១០ មករា។
ខុសពីលោកស្រីអ៊ីងវេន លោកហាន គួរយូបានជ្រើសផ្លូវងាករកចិនដោយឲ្យតម្លៃលើផលប្រយោជន៍សេដ្ឋកិច្ចដែលតៃវ៉ាន់ទាញបានពីចិន។ « យើងចង់ឲ្យមានការផ្លាស់ប្តូរ យើងចង់រកឃើញសុភមង្គល វិបុលភាព និងមោទនភាពឡើងវិញឲ្យប្រជាជនតៃវ៉ាន់ » នេះជាការថ្លែងរបស់លោកគួរយូនៅក្នុងអង្គមិទ្ទិញមួយក្នុងថ្ងៃសុក្រ ទី១០ មករា។ តាំងពី ១០ថ្ងៃដែលការផ្សព្វផ្សាយលទ្ធផលស្ទង់មតិត្រូវបានហាមឃាត់ តែបើផ្អែកតាមលទ្ធផលស្ទង់មតិចុងក្រោយ លោកស្រីអ៊ីងវេនទទួលបានសម្លេងគាំទ្រលើសលោកគួរយូច្រើនណាស់។
កាលពីមួយឆ្នាំមុន ប្រធានាធិបតីផុតអាណត្តិរូបនេះទទួលបានប្រជាប្រិយភាពតិចតួចណាស់ ហើយគ្មាននរណាម្នាក់ជឿឡើយថាពេលនេះ លោកស្រីអ៊ីងវេនបែរជាមានប្រៀបខ្លាំងលើលោកគួរយូសោះ។ តាមក្រុមអ្នកវិភាគ កំណើនប្រជាប្រិយភាពរបស់លោកស្រីអ៊ីងវេនក៏ដោយសារតែលោកស្រីចេះទាញប្រយោជន៍ពីជម្លោះពាណិជ្ជកម្មរវាងចិន និងអាមេរិក និងពីវិបត្តិនយោបាយនៅហុងកុង។ យ៉ាងណាក៏ដោយ ចិនដីគោកមិនបានលាក់បាំងពីការចង់ឃើញបរាជ័យរបស់លោកស្រីអ៊ីងវេននៅក្នុងការបោះឆ្នោតពេលនេះទេ។ តាំងពីក្រោយការជាប់ឆ្នោតរបស់លោកស្រីអ៊ីងវេនក្នុងឆ្នាំ ២០១៦ ក្រុងប៉េកាំងតែងបានបន្តឹងជំហរជាមួយតៃវ៉ាន់ដោយបានកាត់ផ្តាច់ទំនាក់ទំនងផ្លូវការទាំងអស់ និងថែមទាំងបានដាក់គំនាបសេដ្ឋកិច្ច និងយោធាទៀតផង។
ចិនដីគោកជាដៃគូពាណិជ្ជកម្មធំបំផុតរបស់កោះតៃវ៉ាន់ តែចិនដីគោកតែងចាត់ទុកកោះមួយនេះជាខេត្តមួយរបស់ខ្លួន និងបានប្តេជ្ញាយកទៅគ្រប់គ្រងវិញនៅថ្ងៃណាមួយដោយប្រើកម្លាំង បើចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ