លោកស្រី អ៊ុងសាន ស៊ូជីធ្វើទស្សនកិច្ច នៅតំបន់ដែលគម្រោងសាងសង់ទំនប់ចិន រងការប្រឆាំង
មេដឹកនាំភូមា លោកស្រី អ៊ុងសាន ស៊ូជី កាលពីថ្ងៃសុក្រម្សិលមិញ បានធ្វើដំណើរទស្សនកិច្ច ដ៏កម្រមួយ នៅតំបន់ភាគខាងជើង ភូមា ដែលជាប់ជាមួយ ព្រំដែនប្រទេសចិន។ ទស្សនកិច្ចរបស់ប្រមុខដឹកនាំភូមា នៅរដ្ឋកាឈីន ជាទីដែលមានគម្រោងសាងសង់ទំនប់វារីអគ្គិសនី ចិន ដ៏ចម្រូងចម្រាស ធ្វើ ឡើងនៅតែ ១សប្តាហ៍មុន ដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោកស៊ី ជីនពីង នៅប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
នៅក្នុងដំណើរទស្សនកិច្ច ទៅកាន់ រដ្ឋកាឈីន ដែល ជាប់ជាមួយ ព្រំដែនចិន ប្រមុខដឹកនាំភូមា លោកស្រី អ៊ុងសាន ស៊ូជី មិនបាននិយាយដល់គម្រោងវិនិយោគដ៏ចម្រូងចម្រាស របស់ចិន គឺការសាងសង់ទំនប់វារីអគ្គិសនី នៅរដ្ឋកាឈីននោះទេ។ លោកស្រី គ្រាន់តែ បានជំរុញឲ្យប្រជាជនភាគតិច រាប់ពាន់នាក់ ដែលបានចេញទៅទទួលស្វាគមលោកស្រី កាលពីថ្ងៃសុក្រ ឲ្យគិតគូរពីបច្ចុប្បន្នកាល ហើយនិងអំពាវនាវឲ្យមានសុខសន្តិភាព នៅរដ្ឋកាឈីន ជាទីដែលកងទ័ពភូមា ឧស្សាហ៍ វាយប្រយុទ្ធគ្នា ជាមួយ ពួកឧទ្ទាមទ័ពព្រៃ ដើម្បី ដណ្តើមគ្រប់គ្រងប្រភពធនធានធម្មជាតិ។
គឺនៅរដ្ឋកាឈីននេះ ដែលគម្រោងសាងសង់ ទំនប់វារីអគ្គិសនីរបស់ក្រុមហ៊ុនចិន បានបង្កឲ្យមានបាតុកម្មប្រឆាំងចិន យ៉ាងខ្លាំងក្លា រហូត ដល់រដ្ឋាភិបាលត្រូវសម្រាកផ្អាកទៅវិញ គម្រោងវិនិយោគចិន ដែលមានតម្លៃ ជាង ៣ពាន់ ៦រយលានដុល្លារ។ នៅឆ្នាំមុន សំណើឲ្យមានការចាប់ផ្តើម គម្រោងឡើងវិញ បានជំរុញឲ្យប្រជាជនភាគតិច រាប់ពាន់ នាក់ ចុះថ្នល់ធ្វើបាតុកម្ម ប្រឆាំង នៅរដ្ឋកាឈីន។ គណៈកម្មការរដ្ឋាភិបាលមួយ ធ្លាប់បានចេញរបាយការណ៍ កាលពី៥ឆ្នាំមុន ដែលបង្ហាញពីផលប៉ះពាល់ធ្ងន់ធ្ងររបស់ទំនប់វារីអគ្គិសនី ចិន ទៅលើរបត់ ទឹកទន្លេអ៊ីរ៉ាវ៉ាឌី នៅភូមា។
លោកស្រី អ៊ុងសាន ស៊ូជី ធ្លាប់ចេញមុខប្រឆាំងខ្លាំង នឹងគម្រោងសាងសង់ទំនប់វារីអគ្គិសនី ចិន នៅរដ្ឋកាឈីន នៅពេលគណបក្សរបស់លោកស្រី នៅជាបក្សប្រឆាំង។ ចូលកាន់អំណាចនៅភូមា នៅឆ្នាំ ២០១៥ ជំហររបស់លោកស្រី បានផ្លាស់ប្តូរមកវិញ ដោយកាលពីខែ មីនា ឆ្នាំមុន លោកស្រីបានអំពាវនាវសុំឲ្យប្រជាជនភូមាពិចារណាឡើងវិញ ដើម្បី ប្រយោជន៍ធំសម្រាប់ប្រទេសជាតិ។
ដំណើរទស្សនកិច្ចដ៏កម្រ របស់លោកស្រី អ៊ុងសាន ស៊ូជី ទៅកាន់រដ្ឋកាឈីន ជាទីដែលមានគម្រោងសាងសង់ទំនប់វារី អគ្គិសនី ដ៏ចម្រូងចម្រាស របស់ចិន ធ្វើឡើងតែនៅ ១សប្តាហ៍មុន ទស្សនកិច្ចផ្លូវរដ្ឋរបស់ប្រធានាធិបតីចិន ស៊ី ជីនពីង នៅភូមា។ នៅថ្ងៃសុក្រម្សិលមិញ អនុរដ្ឋមន្រ្តី ក្រសួងការបរទេសចិន លោក Luo Zhaohui បាននិយាយប្រាប់កាសែតក្នុងស្រុកចិនថា នៅក្នុងទស្សនកិច្ចរយៈពេល ២ថ្ងៃ នៅសប្តាហ៍ក្រោយនេះ (១៧ និង១៨មករា) លោកប្រធានាធិបតីចិន នឹងពិភាក្សាជាមួយប្រមុខដឹកនាំភូមា ពីគម្រោងទំនប់វារីអគ្គិសនី ដែលជាផ្នែកដ៏សំខាន់មួយ នៃផ្លូវមួយ ខ្សែក្រវ៉ាត់មួយរបស់លោកប្រធានាធិបតី ស៊ី ជីនពីង។ អ្នកជំនាញវាយតម្លៃថា ភូមា បានខិតចូលទៅជិត ទីក្រុងប៉េកាំង ដែល ធ្លាប់បានចេញមុខការពាររដ្ឋាភិបាល ភូមា ពីការរិះគន់ របស់សហគមន៍អន្តរជាតិ ក្នុងរឿងធ្វើទុក្ខបុកម្នេញ លើជនជាតិភាគតិច រ៉ូហ៊ីងយ៉ា នៅរដ្ឋរ៉ាឃីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ