កូរ៉ូណាវីរុសសម្លាប់មនុស្ស ៤១នាក់ និងចម្លងដល់មនុស្ស១៨២០នាក់ នៅប្រទេសចិន
ជម្ងឺឆ្លងរាតត្បាត កូរ៉ូណាវីរុស ដែលរហូតមកដល់ថ្ងៃសៅរ៍នេះ បានសម្លាប់មនុស្ស ៤១នាក់ នៅប្រទេសចិន និងចម្លងទៅដល់មនុស្ស១៨២០នាក់ ដែលនៅក្នុងនោះ មានជាង ២០០ករណីស្ថិតក្នុងស្ថានភាពធ្ងន់ធ្ងរ។ ប្រឈមនឹងការរីករាលដាល យ៉ាងឆាប់រហ័សនៃមេរោគផ្លូវដង្ហើម កូរ៉ូណាវីរុស អាជ្ញាធរចិន បានចាត់វិធាន បង្កើនបិទទីក្រុង បន្ថែមទៀត ក្នុងខេត្តហ៊ូពេ ដែលធ្វើឲ្យប៉ះពាល់ដល់ប្រជាជន ប្រមាណ ៥៦លាននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ក្នុងរយៈពេលតែ ២៤ម៉ោង ចំនួនមនុស្សស្លាប់ ដោយសារមេរោគផ្លូវដង្ហើម កូរ៉ូណាវីរុស បានកើនឡើង បន្ថែម ១៥នាក់ទៀត នៅទីក្រុងវូហាន (មានគ្រូពេទ្យម្នាក់) ដែលធ្វើឲ្យចំនួនមនុស្សស្លាប់ សរុប កើនដល់៤១នាក់ នៅក្នុងប្រទេសចិន គិតមកដល់ថ្ងៃសៅរ៍នេះ។
ប្រឈមនឹងការរីករាលដាលយ៉ាងឆាប់រហ័ស នៃមេរោគផ្លូវដង្ហើម កូរ៉ូណាវីរុស រដ្ឋាភិបាលចិន កាលពីថ្ងៃសុក្រ បានបញ្ជូនពេទ្យទាហាន៤៥០នាក់ និងបុគ្គលិកពេទ្យមួយចំនួនទៀត ទៅកាន់តំបន់ហាមឃាត់ចំនួន បីក្នុងទីក្រុងវូហាន។ តាមរដ្ឋអំណាចចិន ពេទ្យទាហាន ទាំងនោះ ដែលសុទ្ធតែធ្លាប់មានបទពិសោធន៍ ព្យាបាល ក្នុងករណីជម្ងឺSARS និងអេបូឡាជាដើម នឹងត្រូវដាក់ពង្រាយ នៅតាមមន្ទីរពេទ្យ ដែលមានការខ្វះខាត គ្រូពេទ្យ និងចំនួនគ្រែ ដោយសារតែការកើនឡើងនៃករណីអ្នកជម្ងឺ ថ្មី ដែលឆ្លងកូរ៉ូណាវីរុស ហើយនិងអ្នកជម្ងឺដែលបារម្ភពីបញ្ហាសុខភាពជាទូទៅ។
សូមស្តាប់សក្ខីកម្មរបស់និស្សិតខ្មែរ គីម ហុង ពីទីក្រុងវូហាន
គីម ហុង និស្សិតផ្នែកវិស្វកម្មសំណង់នៅទីក្រុងវូហាន
តាមសេចក្តីរាយការណ៍របស់អ្នកកាសែត ទីភ្នាក់ងារព័ត៌មានបារាំង AFP ឱសថស្ថានជាច្រើនកន្លែងនៅទីក្រុងវូហាន កំពុងចាប់ផ្តើមខ្វះខាត ម៉ាសបិទមុខ ស្រោមដៃ និងសាប៊ូលាងដៃ ដោយសារតែមនុស្សបានសម្រុកទៅទិញ កាន់តែច្រើន។ រូបភាពវីដេអូ ដែលបង្ហោះផ្សាយ នៅតាមបណ្តាញសង្គម បានបង្ហាញពីគ្រែរបស់អ្នកជម្ងឺ និងគ្រែសែង អ្នកស្លាប់ នៅតាមផ្លូវដើរ ក្នុងមន្ទីរពេទ្យ ក្នុងក្រុងវូហាន ជាទី ដែលមនុស្សឈរតម្រង់ជួរគ្នា សម្រាប់ស្វែងរក ការព្យាបាល។
កាសែតរដ្ឋចិន ថ្មី បានសរសេរនៅថ្ងៃសៅរ៍នេះថា អាជ្ញាធរនឹងសាងសង់មន្ទីរពេទ្យបន្ទាន់មួយទៀត ដែលមានសមត្ថភាពដាក់អ្នកជម្ងឺ កូរ៉ូណាវីរុស ១៣០០នាក់។ កាលពីថ្ងៃព្រហស្បតិ៍ អាជ្ញាធរកុ្រងវូហានបានចាប់ផ្តើមសាងសង់មន្ទីរពេទ្យពិសេស សម្រាប់ដាក់អ្នកជម្ងឺកូរ៉ូណាវីរុស ដែលអាចចាប់ដំណើរការ ជាផ្លូវការ នៅក្នុងរយៈពេល១០ថ្ងៃ។
ដើម្បីទប់ទល់កុំឲ្យមានការឆ្លងរីករាលដាល មេរោគរាតត្បាត កូរ៉ូណាវីរុស ទៅតំបន់ផ្សេងទៀត នៅក្នុងប្រទេសចិន អាជ្ញាធរចិន នៅថ្ងៃសៅរ៍នេះ បានសម្រេច បិទទីក្រុងបន្ថែមទៀត ក្នុងខេត្តហ៊ូពេ ដែលជាហេតុ ធ្វើឲ្យប្រជាជនចិនប្រមាណ ៥៦លាននាក់ ត្រូវគេតម្រូវឲ្យស្ថិតក្នុងផ្ទះ មិនឲ្យធ្វើដំណើរចាកចេញពីទីក្រុង។ នៅថ្ងៃសៅរ៍ អាជ្ញាធរក្រុងវូហានបានចេញបញ្ជា ហាមមិនឲ្យមានចរាចរណ៍រថយន្តឯកជន ចាប់ពីម៉ោង ១២អាធ្រាត្រថ្ងៃសៅរ៍។
អាជ្ញាធរចិនបានចេញបញ្ជាផងដែរ ឲ្យចាប់សំអាត អនាម័យ នៅក្នុងមធ្យោបាយធ្វើដំណើរ ដូចជារថភ្លើង និងយន្តហោះ ក្នុងទូទាំងប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ