NGO៖ចិនបានប្រើកម្លាំងពលកម្មជនជាតិអ៊ុយហ្គួដើម្បីផលិតទំនិញម៉ាកល្បីៗក្នុងលោក
វិទ្យាស្ថានយុទ្ធសាស្ត្រនយោបាយអូស្រ្តាលីបានបញ្ជាក់នៅក្នុងរបាយការណ៍មួយចេញផ្សាយក្នុងថ្ងៃចន្ទ ទី២ មីនា ថា រដ្ឋាភិបាលចិនបានបញ្ជូនជនជាតិភាគតិចអ៊ុយហ្គួជាច្រើនពាន់នាក់ឲ្យទៅធ្វើការនៅតាមរោងចក្រមួយចំនួនដើម្បីផលិតចេញនូវផលិតផលម៉ាកធំៗក្នុងលោក។ ក្រៅពីម៉ាកល្បីៗក្នុងលោក ពួកអ៊ុយហ្គួក៏ត្រូវបានគេប្រើដើម្បីផលិតចេញនូវផលិតផលរបស់ម៉ាកធំៗរបស់ចិនដែរ។ របាយការណ៍ដដែលបានហៅការងារពលកម្មរបស់ពួកអ៊ុយហ្គូរជាការងារចាប់បង្ខំ និងថា រោងចក្រ សហគ្រាសដែលទទួលបានអត្ថប្រយោជន៍ពីកម្លាំងពលកម្មអ៊ុយហ្គួនៅក្នុងចង្វាក់ផលិតកម្មរបស់ខ្លួនជាការរំលោភច្បាប់ដែលហាមការនាំចូលផលិតផលបានមកពីការប្រើកម្លាំងពលកម្មចាប់បង្ខំ។
ចុះផ្សាយនៅថ្ងៃ៖
ស្តាប់ - ០២:២៥
នៅក្នុងរបាយការណ៍ដែលមានកម្រាស់ ៥៦ទំព័រ វិទ្យាស្ថានយុទ្ធសាស្ត្រនយោបាយអូស្រ្តាលីបានបញ្ជាក់ថានៅចន្លោះឆ្នាំ ២០១៧ និងឆ្នាំ ២០១៩ មានជនជាតិភាគតិចអ៊ុយហ្គួជាង ៨០ ០០០នាក់ជាប់ឃុំក្នុងតំបន់ស៊ីនជាំងត្រូវបានចិនបញ្ជូនឲ្យទៅធ្វើការនៅតាមរោងចក្រដែលផលិតចេញនូវផលិតផលបច្ចេកវិទ្យា វាយនភ័ណ្ឌ ឬរថយន្តសម្រាប់ម៉ាកល្បីៗក្នុងលោកចំនួន ៨៣ម៉ាក។ ម៉ាកល្បីៗផ្នែកបច្ចេកវិទ្យាមានដូចជា Apple Sony Samsung Microsoft ឬ Nokia។ ចំណែកផ្នែកវាយនភ័ណ្ឌមានដូចជាម៉ាក Adidas Lacoste Gap Nike Puma Uniqlo ឬ H&M ហើយនៅក្នុងផ្នែករថយន្តវិញមានដូចជាម៉ាក BMW Volkswagen Mercedes-Benz Land Rover ឬ Jaguar។
ក្រៅពីម៉ាកល្បីៗក្នុងលោក ម៉ាកល្បីៗរបស់ចិនមួយចំនួនក្នុងវិស័យរថយន្ត និងវិស័យបច្ចេកវិទ្យាមាន Huawei ឬ Oppo ក៏បានប្រើកម្លាំងពលកម្មរបស់ជនជាតិភាគតិចអ៊ុយហ្គួដែរ។ តាមរបាយការណ៍ដដែល ជនជាតិអ៊ុយហ្គួដែលចិនបានបញ្ជូនទៅឲ្យធ្វើការនៅតាមរោងចក្រនានាក្នុងទឹកដីចិនបន្តគ្មានសេរីភាព និងត្រូវបានគេបង្ខំឱ្យធ្វើការក្រោមការឃ្លាំមើលយ៉ាងតឹងតែងជាទីបំផុត។ វិទ្យាស្ថានយុទ្ធសាស្ត្រនយោបាយអូស្រ្តាលីបានកត់សម្គាល់ថា រោងចក្រដែលទទួលអត្ថប្រយោជន៍ពីកម្លាំងពលកម្មចាប់បង្ខំលើពួកអ៊ុយហ្គួនៅក្នុងចង្វាក់ផលិតកម្មរបស់ខ្លួនបានរំលោភច្បាប់ហាមឃាត់ការនាំចូលទំនិញដែលផលិតដោយប្រើកម្លាំងពលកម្មចាប់បង្ខំ។
នៅក្នុងន័យនេះ របាយការណ៍របស់វិទ្យាស្ថានយុទ្ធសាស្ត្រនយោបាយអូស្រ្តាលីបានអំពាវនាវដល់ម៉ាកល្បីៗក្នុងលោកដែលជាប់ពាក់ព័ន្ធឲ្យបើកការស៊ើបអង្កេតជាបន្ទាន់ និងស៊ីជម្រៅនៅគ្រប់រោងចក្រចិនដែលបានផលិតផលិតផលឲ្យពួកគេ។ រដ្ឋអំណាចតំបន់ស៊ីនជាំង ក៏ដូចរដ្ឋាភិបាលចិននៅក្រុងប៉េកាំងមិនទាន់បានបញ្ចេញប្រតិកម្មតបនឹងរបាយការណ៍របស់វិទ្យាស្ថានយុទ្ធសាស្ត្រនយោបាយអូស្រ្តាលីនេះនៅឡើយទេ។ គួររម្លឹកថា រដ្ឋអំណាចចិនបានប្រើនយោបាយសន្តិសុខចាស់ដៃលើពួកអ៊ុយហ្គួអ្នកកាន់សាសនាអ៊ីស្លាមក្នុងតំបន់ស៊ីជាំង។ ចិនបានជាប់ចោទពីបទឃុំជនជាតិភាគតិចអ៊ុយហ្គួជាង ១លាននាក់នៅក្នុងជំរំលត់ដំមួយដ៏ធំ។ តែចិនតែងចេញមុខបដិសេធ និងបញ្ជាក់ច្រើនដងថា ជំរំនោះជាមជ្ឈមណ្ឌលអប់រំវិជ្ជាជីវៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ