ថៃអំពាវនាវកុំឲ្យប្រជាជនចេញពីបាងកក ក្រោយមានអ្នកឆ្លងថ្មីបន្ថែមច្រើនគួរឲ្យបារម្ភ
គិតមកត្រឹមថ្ងៃអាទិត្យទី២២មីនា នៅប្រទេសថៃ គេបានរកឃើញអ្នកផ្ទុកមេរោគកូវីដ១៩ ចំនួន៥៩៩នាក់ហើយ ដែលក្នុងនោះ គ្រាន់តែមួយថ្ងៃអាទិត្យ មានអ្នកឆ្លងថ្មីបន្ថែម ដល់ទៅ១៨៨នាក់។ នេះគឺជាចំនួនឆ្លងរាលដាល ដែលកើនឡើងខ្លាំង គួរឲ្យព្រួួយបារម្ភ ហើយដែលអាជ្ញាធរថៃ បានចេញវិធានការបន្ទាន់មួយចំនួន ដើម្បីព្យាយាមទប់ស្ថានភាព កុំឲ្យឈានទៅកាន់តែធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:៣៧
ចំនួនអ្នកឆ្លងកូវីដ១៩នៅថៃ បានកើនឡើងខ្លាំងគួរឲ្យព្រួួយបារម្ភបំផុត។ មនុស្ស១៨៨នាក់ត្រូវបានគេធ្វើតេស្តរកឃើញផ្ទុកកូវីដ១៩ នៅថ្ងៃអាទិត្យទី២២មីនា ដែលធ្វើឲ្យអ្នកឆ្លងសរុបនៅថ្ងៃ មានចំនួន៥៩៩នាក់។
យោងតាមមន្ត្រីក្រសួងសុខាភិបាលថៃ ដែលបានធ្វើសន្និសីទកាសែតនៅថ្ងៃទី២២មីនា បានលើកឡើងថា ករណីអ្នកឆ្លងថ្មីភាគច្រើន គឺជាអ្នកបានប្រាស្រ័យ ឬពាក់ព័ន្ធនឹងទីតាំងប្រកួតកីឡាប្រដាល់លំពីនី ក្នុងក្រុងបាងកក។ ៧នាក់កំពុងស្ថិតក្នុងស្ថានភាពធ្ងន់ធ្ងរ។ អ្នកនាំពាក្យក្រសួងសុខាភិបាលថៃ បានលើកឡើងថា ចំនួនអ្នកឆ្លងភាគច្រើនគឺនៅក្រុងបាងកក ដោយសារពួកគេ បន្តមានសកម្មភាពចេញដើរកម្សាន្តជួបជុំគ្នា នៅខាងក្រៅ ឬទីតាំងសាធារណៈផ្សេង ដោយគ្មានការប្រុងប្រយ័ត្ន។ មានករណីឆ្លង១៥នាក់ផ្សេងទៀត គឺនៅខេត្តស្រះកែវជាប់ព្រំដែនកម្ពុជា បន្ទាប់ពីពួកគេបានឆ្លងទៅចូលហាងភេសជ្ជៈនិងភោជនីយដ្ឋាន ក្នុងក្រុងប៉ោយប៉ែត។ នេះបើផ្អែកតាមការចុះផ្សាយ របស់កាសែត បាងកកប៉ុស្តិ។
ប្រឈមនឹងការឆ្លងរាលដាលកាន់តែលឿនរហ័សនេះ អាជ្ញាធរថៃបានចេញវិធានការមួយចំនួនបន្ថែម ដោយបានសម្រេចបិទហាងទំនិញ ហាងកែសម្ផស្ស ផ្សារទំនើប មជ្ឈមណ្ឌលពាណិជ្ជកម្មទាំងអស់ ទូទាំងក្រុងបាងកក ចាប់ពីថ្ងៃអាទិត្យទី២២មីនា រហូតដល់ថ្ងៃទី១២មេសា។ ប៉ុន្តែហាងលក់គ្រឿងឧបភោគបរិភោគ អាចបើកទ្វារដំណើរការជាធម្មតា។ នេះគឺជាវិធានការបន្ថែម ពីលើការសម្រេចបិទសាលារៀន ក្លឹបកម្សាន្ត បារ និងក្លឹបហាត់ប្រាណលេងកីឡា។ តែយ៉ាងណាក៏ដោយ មានមតិជាច្រើនបានលើកឡើងថា វិធានការនេះ មិនគ្រប់គ្រាន់ទេ។ អាជ្ញាធរគួរណាតែបិទខ្ទប់ រាជធានីបាងកកទាំងស្រុងតែម្តង ដើម្បីកុំឲ្យមេរោគកូវីដ១៩ ឆ្លងរាលដាលទៅតាមខេត្តក្រុងផ្សេងៗ។
តែយ៉ាងណា នៅថ្ងៃអាទិត្យនេះ លោករដ្ឋមន្ត្រីក្រសួងសុខាភិបាលថៃ គ្រាន់តែបានអំពាវនាវ ឲ្យបុគ្គលិក កម្មករ និងប្រជាជនរស់នៅក្រុងបាងកកទាំងអស់ ត្រូវសំងំនៅក្នុងផ្ទះ និងមិនត្រូវធ្វើដំណើរត្រលប់ទៅភូមិស្រុក នៅឯខេត្តជាដាច់ខាត។ ធ្វើយ៉ាងនេះ គឺដើម្បីចៀសវាង ការយកមេរោគកូវីដ១៩ ទៅចម្លងដល់បងប្អូនក្រុមគ្រួសារដែលនៅតាមខេត្ត។ អាជ្ញាធរតាមភូមិស្រុកខេត្ត ត្រូវមានតួនាទីតាមដាន ការទៅដល់របស់អ្នកទៅពីក្រុងបាងកក។ ក្រសួងសុខាភិបាលថ្ងៃ ក៏បានផ្ញើលិខិតណែនាំ ទៅកាន់ព្រលានយន្តហោះ ស្ថានីយ៍រថយន្តដឹកជញ្ជូន និងស្ថានីយ៍រថភ្លើងទូទាំងប្រទេស ឲ្យបង្កើនការត្រួតពិនិត្យ ស្ទង់សីតុណ្ហភាពរបស់អ្នកដំណើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ