ចិនប្រកាសបិទព្រំដែន ដើម្បី ទប់ស្កាត់ ការឆ្លងជំងឺកូវីដ១៩ ពីក្រៅប្រទេស
ដើម្បីកាត់បន្ថយ ការឆ្លងជំងឺ កូវីដ ១៩ ពីក្រៅប្រទេស ប្រទេសចិន នៅថ្ងៃនេះ បានចាត់វិធានការតឹងខ្លាំង ជាងមុន ដោយបានប្រកាសបិទព្រំដែនមួយរយៈ មិនឲ្យជនបរទេសចូលទៅប្រទេសចិន។ ការសម្រេចនេះធ្វើឡើង បន្ទាប់ពី ចិន សង្កេតឃើញមានករណីឆ្លងពីបរទេស មានចំនួន កាន់តែច្រើន នៅពេលករណីឆ្លងក្នុងស្រុក មានតិចតួចបំផុត។ ជាក់ស្តែង នៅក្នុងចំណោមករណីឆ្លងកូវីដ ១៩ ចំនួន ៥៥ ដែលគេរាប់ឃើញបន្ថែម នៅថ្ងៃសុក្រនេះ មាន ៥៤នាក់ ជាអ្នកឆ្លង មកពីបរទេស។
ចុះផ្សាយនៅថ្ងៃ៖
ស្តាប់ - ០២:០៣
ប្រទេសចិន ដែលបារម្ភខ្លាចមានរលកថ្មី នៃជំងឺរាតត្បាតកូវីដ ១៩ បានប្រកាសបិទព្រំដែន ហាមមិនឲ្យជនបរទេសចូលទឹកដីរបស់ខ្លួន។ តាមវិធានការថ្មី ដែលចូលជាធរមាន ចាប់តាំងពីយប់ថ្ងៃសុក្រនេះ អ្នកទេសចរ ជនបរទេស ដែលមានវីសា លិខិតស្នាក់នៅប្រទេសចិន ប៉ុន្តែ ដែលកំពុងស្ថិតនៅបរទេស នឹងត្រូវហាមមិនឲ្យធ្វើដំណើរចូលប្រទេសចិនទៀតនោះទេ។
យ៉ាងណាក៏ដោយ ប្រទេសចិន នៅតែបើកទ្វារទទួល អ្នកដែលកាន់លិខិតឆ្លងដែនរដ្ឋ និងមន្រ្តីទូត រួមទាំងអ្នកដែលធ្វើជំនួញ នៅប្រទេសចិន។
ប្រទេសចិនដែលទើបធូរស្បើយ គ្មាន អ្នកឆ្លងមេរោគកូរ៉ូណា ក្នុងស្រុកសោះ ក្នុងរយៈពេល ៣ថ្ងៃមកនេះ បានដាក់អាទិភាពថ្មីរបស់ខ្លួន គឺ ទប់ស្កាត់ ធ្វើយ៉ាងណាកុំឲ្យជំងឺកូវីដ ១៩ អាចវិលត្រលប់ចូលទឹកដីរបស់ខ្លួន តាំងពីទឹកដីបរទេស។ តួលេខចុងក្រោយរបស់អាជ្ញាធរចិនបានបង្ហាញថា ចិន រកឃើញមានករណីឆ្លងពីបរទេស សរុប ៥៩៥នាក់ ដែលនៅក្នុងនោះ មាន៥៤នាក់ ត្រូវបានគេធ្វើតេស្តរកឃើញ នៅថ្ងៃសុក្រនេះ។ តាមក្រសួងការបរទេសចិន ភាគច្រើននៃអ្នកឆ្លងពីបរទេស គឺប្រមាណ ៩០ភាគរយ ជាជនជាតិចិន ដែលធ្វើដំណើរពីបរទេស ត្រលប់ចូលប្រទេសចិន។
ជំងឺផ្លូវដង្ហើម កូវីដ ១៩ ដែលបានលេចមុខ តាំងពីខែធ្នូ ឆ្នាំ មុន នៅប្រទេសចិនបានឆ្លងទៅជនជាតិចិន ជាង ៨ម៉ឺននាក់ និងសម្លាប់មនុស្សជាង ៣ពាន់នាក់ នៅប្រទេសចិន មុននឹងឆ្លងរាតត្បាត ធ្វើឲ្យពិភពលោកសព្វថ្ងៃ មានករណីឆ្លង មេរោគកូរ៉ូណា ដល់ទៅជាង ៥សែនករណី។
នៅក្នុងវិធានការទប់ស្កាត់ការឆ្លងមេរោគកូរ៉ូណាពីក្រៅប្រទេស អាជ្ញាធរចិន បានសម្រេចផងដែរ កាត់បន្ថយ ជើងហោះហើរ ពីបរទេស។ ជាក់ស្តែង ចាប់ពីថ្ងៃអាទិត្យ យន្តហោះ របស់ក្រុមហ៊ុនចិន អាចធ្វើដំណើរទៅក្រៅប្រទេសបានតែមួយលើក ក្នុងមួយសប្តាហ៍ ចំណែកក្រុមហ៊ុនបរទេសវិញ ក៏អាចហោះចូលចតក្នុងប្រទេសចិន បានតែ១ដងដែរ ក្នុង១សប្តាហ៍។ ចំណែកអ្នកដំណើរនៅក្នុងយន្តហោះវិញក៏ ត្រូវកាត់បន្ថយ មកនៅត្រឹមចំនួន ៧៥ភាគរយ នៃកៅអីរបស់យន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ